རྒྱ་གར་ནང་གི་མཐོ་སློབ་ཁག་འདྲ་མིན་དུ་སློབ་གཉེར་གནང་བཞིན་པའི་བོད་རིགས་སློབ་མ་དང་གདན་ས་བཤད་གྲྭ་ཁག་ཏུ་གཞུང་ཆེན་དག་ལ་སློབ་གཉེར་གནང་མུན་ཡིན་པའི་དགེ་བཙུན་སོགས་ནས་ཤེས་ཡོན་དང་རིག་གནས། ཆབ་སྲིད་དང་བོད་ཕྲུག་སློབ་མར་འཁྲི་བའི་འོས་འགན་སོགས་ཀྱི་ཐོག་སློབ་མ་ཕན་ཚུན་དབར་བགྲོ་གླེང་གནང་རྒྱུར་ཆེད་དམིགས་གནང་དོན་ལྟར། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་ཁ་སང་ཟླ་ ༣ ཚེས་ ༤ ཉིན་དབུ་འཛུགས་ཀྱིས་སྐབས་བཅུ་གཉིས་པའི་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཚོགས་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱ་གར་ནང་གི་མཐོ་སློབ་མི་འདྲ་བ་ ༡༨ ཀྱི་བོད་རིགས་སློབ་གཉེར་བ་ཁྱོན་ ༧༠ ལྷག་ནས་ལྷན་ཞུགས་གནང་འདུག
བོད་ཀྱི་མཐོ་རིམ་སློབ་མ་ཚོགས་ཆེན་གོ་སྒྲིག་ཚོགས་ཆུང་གི་ཚོགས་གཙོ་བྱམས་པ་ལྷུན་གྲུབ་ལགས་ཀྱིས་གསུངས་པར་ཉིན་གྲངས་ལྔ་རིང་གི་ཚོགས་ཆེན་ཐོག་གཙོ་བོ་སློབ་མའི་ཤེས་ཡོན་དང་འགན་འཁྲི་ཞེས་པའི་བརྗོད་གཞི་དང་འབྲེལ། མཐོ་རིམ་སློབ་མའི་ཁྲོད་ནས་ཤེས་འཇོན་གཉིས་ལྡན་གྱི་སློབ་མ་ཐོན་མཁན་ཉུང་བའི་རྒྱུ་རྐྱེན་གང་ཡིན་དང་། ལྷག་དོན་བོད་དོན་འཐབ་རྩོད་ཐོག་གཅིག་སྒྲིལ་གྱི་ནུས་པ་མཉམ་སྤུངས་ཇི་ལྟར་གནང་དགོས་པ་སོགས་ཀྱི་དོན་གནད་ ༡༤ ཐོག་གོ་བསྡུར་གནང་རྒྱུ་ཡིན་པ་གསུངས་ཡོད།
