རྩོམ་པ་པོ་དང་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་ཟླ་ ༤ ཚེས་ ༢ ཉིན་ཡོ་རོབ་སུད་སི་རྒྱལ་ཁབ་ནས་འགོ་འཛུགས་ཀྱིས་ཡོ་རོབ་ནང་གི་རྒྱལ་ཁབ་མི་ཉུང་བ་ཞིག་ཏུ་བོད་དོན་གཏམ་བཤད་ཀྱི་སྐོར་སྐྱོད་ལས་འགུལ་སྤེལ་བཞིན་ཡོད་པ་དང་། ཁ་ཉིན་ཕྱི་ཚེས་ ༡༨ ཉིན་ཁོང་སུད་སི་དང་། ཌེན་མག སུད་ཌེན་བཅས་ཀྱི་ནང་གཏམ་བཤད་ཀྱི་ལས་རིམ་ཁག་གྲུབ་ནས་ནོར་ཝེ་རྒྱལ་ས་ཨོས་ལོ་ (Oslo) ནང་དུ་འབྱོར་མཚམས་ས་གནས་བོད་མི་རྣམས་དང་ཐུག་འཕྲད་དང་ལྷག་པར་དུ་ཁ་ཉིན་དང་དེ་རིང་བཅས་སུ་ནོར་ཝེ་རྒྱལ་ཁབ་ཀྱི་ཁོར་ཡུག་བློན་ཆེན་ཟུར་པ་སྐུ་ཞབས་ Ola Elvestuen ལགས་དང་འཛུགས་སྐྲུན་བློན་ཆེན་ཟུར་པ་སྐུ་ཞབས་ Dag Inge Ulstein ལགས། བདེ་སྲུང་དང་ཕྱི་འབྲེལ་བློན་ཆེན་ཟུར་པ་ལྕམ་ Ine Eriksen Soereide ལགས་བཅས་དང་མཇལ་འཕྲད་ཞུས་ཏེ་བོད་དོན་སྐོར་གླེང་སློང་དང་། རྒྱལ་ས་ཨོས་ལོ་ནང་ཡོད་པའི་ The House of Literature ཞེས་པའི་སྟེ་གནས་ཁང་དུ་བོད་དོན་སྐོར་གཏམ་བཤད་སོགས་ཀྱང་གནང་ཡོད་པ་རེད།
རླུང་འཕྲིན་ཁང་གིས་ཞལ་པར་བརྒྱུད་བསྟན་འཛིན་བརྩོན་འགྲུས་ལགས་སུ་ད་བར་འདས་པའི་ཉིན་གྲངས་ཉི་ཤུ་ཙམ་གྱི་ཡོ་རོབ་སྐོར་སྐྱོད་ཀྱི་ལས་འགུལ་དང་འབྲེལ་བཅར་འདྲི་ཁག་ཅིག་ཞུས་ཡོད།
