སུད་སི་གྲོང་ཁྱེར་ Geneva ཇི་ནི་ཝའི་ནང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ དབུ་འཛུགས་དང་བསྟུན། Tibetan community in Switzerland and Liechtenstein སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་གོ་སྒྲོག་འོག་རྒྱལ་ཚོགས་ཀྱི་མདུན་དུ་བོད་མི་རྣམས་ནས་ཞི་བའི་སྐད་འབོད་དང་བོད་དོན་ཞུ་གཏུག་ཀྱི་ལས་འགུལ་སྤེལ་འདུག
ཁ་སང་སུད་སི་གྲོང་ཁྱེར་ཇི་ནི་ཝའི་ནང་དུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ པ་དབུ་འཛུགས་གནང་ཡོད་པ་དང་། སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་ཀརྨ་ཆོས་སྐྱིད་ལགས་ཀྱིས་གཙོས་འབྲེལ་ཡོད་ལས་བྱེད་དང་། ས་གནས་བེུད་ལྷན་ཚོགས། སུད་བོད་མཛའ་འབྲེལ་ཚོགས་པ་བཅས་ཀྱི་རྒྱུན་ལས་དང་སྐུ་ཚབ་མི་སྣ། དེ་བཞིན་ས་གནས་བོད་མི་སོགས་རྒྱལ་ཚོགས་ཀྱི་མདུན་ཐང་དུ་ལྷན་འཛོམས་གནང་སྟེ། རྒྱལ་ཚོགས་ནས་བོད་ཀྱི་གནད་དོན་ཐོག་འགན་འཁུར་ཆེ་ཙམ་བཞེས་དགོས་པ་དང་། རྒྱ་ནག་གཞུང་གིས་བོད་ནང་བོད་མིའི་སྐད་ཡིག་དང་རིག་གཞུང་གཙོས་མི་རིགས་ཀྱི་ངོ་བོ་རྩ་མེད་གཏོང་བཞིན་པའི་བྱ་སྤྱོད་ཁག་མཚམས་འཇོག་དགོས་པ། བོད་ཀྱི་བདག་པོ་བོད་མི་ཡིན་པ་སོགས་ཀྱི་འབོད་ཚིག་བསྒྲགས་ཏེ་ཞི་བའི་སྐད་འབོད་ཀྱི་ལས་འགུལ་སྤེལ་འདུག
སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་ཀརྨ་ཆོས་སྐྱིད་ལགས་ཀྱིས། རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཁག་ཅིག་ཐེར་འདོན་དང་སྦྲགས། ང་ཚོ་བཙན་བྱོལ་ནང་ལས་འགུལ་མུ་མཐུད་སྤེལ་ཏེ། རྒྱ་གཞུང་ལ་གདོང་ལེན་བྱ་རྒྱུ་གལ་ཆེན་པོ་ཡིན་པ་སོགས་གསུངས་པ་མ་ཟད། ད་རེས་ཀྱི་ལས་འགུལ་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ དབུ་འཛུགས་དང་བསྟུན། རྒྱལ་ཚོགས་ལ་ད་ལྟའི་བོད་ནང་གི་ཛ་དྲག་གནས་སྟངས་དང་འབྲེལ། ངེས་པར་དུ་དགོངས་པ་བཞེས་དགོས་པའི་དོན་ཚན་ཁག་ཅིག་འཁོད་པའི་ཞུ་གཏུག་ཡི་གེ་ཞིག་ཀྱང་ཕུལ་ཡོད་པ་སོགས་གསུངས་ཡོད།
གཞན་ཡང་སྐབས་དེར་ལས་འགུལ་ཐོག་སུད་སི་ས་གནས་བོད་ཀྱི་བེུད་ལྷན་ཚོགས་ཀྱི་ཚོགས་གཙོ་དང་། སུད་བོད་མཛའ་འབྲེལ་ཚོགས་པའི་སྐུ་ཚབ་སོགས་ནས་རྒྱ་ནག་གཞུང་གི་དམ་བསྒྲགས་སྲིད་བྱུས་འོག་བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པ་དང་། བོད་པའི་བྱིས་པ་རྣམས་བཙན་དབང་གིས་རང་ཉིད་ཕ་མ་ནང་མི་དང་ཁ་བྲལ་བཏང་སྟེ། རྒྱ་གཞུང་གིས་ཆེད་འཛུགས་བྱས་པའི་གཏན་འཇགས་བཅའ་སྡོད་སློབ་གྲྭར་གཏོང་བཞིན་པ་སོགས་གསལ་འདོན་གནང་བ་མ་ཟད། རྒྱལ་ཚོགས་དང་རྒྱལ་སྤྱིའི་འགོ་ཁྲིད་རྣམས་ནས་བོད་ནང་གི་གནད་དོན་ཐོག་དགོངས་པ་བཞེས་ཏེ་རྒྱ་གཞུང་དེ་བཞིན་འགན་ཁུར་ལྡན་པ་ཞིག་བཟོ་དགོས་པ་གསུངས་འདུག
གཞི་རྩའི་ཁ་སང་སུད་སི་ཀྱི་གྲོང་ཁྱེར་ཇི་ནི་ཝའི་ནང་དུ་དབུ་འཛུགས་གནང་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ འདི་བཞིན་ཟླ་བ་རྗེས་མའི་ཕྱི་ཚེས་ ༡༤ བར་འཚོག་གནང་གི་ཡོད་ཅིང་། ད་རེས་ཀྱི་ལྷན་ཚོགས་དེ་དང་བསྟུན་ནས་བོད་དོན་ཞུ་གཏུག་གནང་པའི་ནང་། ལྷན་ཚོགས་ཁྲོད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ལ་བོད་དོན་གསུང་བཤད་ཀྱི་གོ་སྐབས་འབུལ་དགོས་པ་དང་། རྒྱ་གཞུང་གི་བྱ་སྤྱོད་ལ་གདོང་ལེན་ནན་པོ་བྱེད་དགོས་པ། དེ་བཞིན་རྒྱལ་ཚོགས་ཀྱི་སྐུ་ཚབ་རྣམས་བོད་ནང་གི་དངོས་ཡོད་གནས་སྟངས་རྟོག་ཞིབ་སླད་ངེས་ཕེབས་དགོས་པ་སོགས་ཁྱོན་དོན་ཚན་དགུ་ཙམ་འཁོད་ཡོད་འདུག
