Tibetan Royal Year of 2151 | Year of the Wood Dragon

རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་དབུ་འཛུགས།

Tibetan News Headlines

  • འགྲོ་བ་མིའི་ཐོབ་ཐང་རྩོད་ལེན་པའི་བུ་ཕྲུག་ཐོག་མཉམ་བསྡུས་ཀྱི་ཉེས་ཆད་འགེལ་བཞིན་པ་མངོན་གསལ།
  • སྨར་ཁམས་རྫོང་ནང་རྒྱ་མི་དང་བོད་མི་དབར་འཁྲུག་རྩོད་ཤོར་ནས་བོད་མི་བཞི་འཛིན་བཟུང་བྱས་འདུག
  • འཇར་མ་ནིའི་སྲིད་བློན་མཆོག་གིས་རྒྱ་གཞུང་ལ་དྲང་བདེན་གྱི་ཚོང་ལས་གཉེར་དགོས་ཞེས་ཉེན་བརྡ་བཏང་འདུག
  • བལ་ཡུལ་ལྷ་མོ་ཚོགས་པ་དང་ཧི་མ་ལ་ཡའི་རི་རྒྱུད་ཀྱི་འཁྲབ་སྟོན་པ།

Tuesday 16/04/2024

  • China using ‘collective punishment’ against activists’ families: Rights group
  • 4 arrested over protest against seizure of pastureland in Tibet
  • Germany’s Scholz calls for fair competition, warns against dumping during China visit
  • Nepal Tibetan Lhamo Association and its Himalayan artists: Feature

དེ་རིང་ཕྱི་ཟླ་ ༦ ཚེས་ ༢༢ ཉིན་ཨ་རིའི་རྒྱལ་ས་ Washington DC དུ་རྟེན་གཞི་བྱས་པའི་ཨ་རིའི་གྲོས་ཚོགས་ཀྱི་ཚོགས་ཁང་ཨང་ DSG ༡༡ ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་གྱི་ཚོགས་ཆེན་ཐེངས་  ༨ པ་དངོས་སུ་དབུ་འཛུགས་གནང་སོང་།ཚོགས་ཆེན་གྱི་དབུ་འབྱེད་མཛད་སྒོའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་འཕྲིན་བརྒྱུད་འདི་ལྟ་བུའི་ཚོགས་ཆེན་ཐོག་ལ་ཆབ་སྲིད་ཁོ་ན་ཙམ་མིན་པར་འཛམས་གླིང་སྤྱིར་ཞབས་འདེགས་སྒྲུབ་ཐུབ་པའི་བོད་ཀྱི་ཐུན་མོང་མ་ཡིན་པའི་རིག་གཞུང་དང་གོམས་གཤིས་བཟང་པོ་རྣམས་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུར་ཐུགས་འཁུར་ཆེ་ཙམ་བཞེས་གནད་ཡིན་པ་བཀའ་སྩལ་སོང་།ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་བུ་ཆུང་ཚེ་རིང་ལགས་ཀྱིས་ཐེངས་འདིའི་ཚོགས་ཆེན་ཐོག་ཕེབས་པའི་རྒྱལ་སྤྱིའི་གྲོས་ཚོགས་འཐུས་མི་རྣམ་པའི་རྒྱབ་སྐྱོར་འདི་ནི་བོད་མིའི་རང་དབང་འཐབ་རྩོད་དང་བོད་མི་རྣམས་རང་དབང་ལྡན་པའི་ཐོག་ནས་ཕྱིར་སོ་སོའི་ལུང་པར་ཕེབས་ཐུབ་རྒྱུའི་མངོན་འདོད་ལ་རྒྱབ་སྐྱོར་ཡོད་པའི་དཔང་རྟགས་ཤིག་མཚོན་གྱི་ཡོད་པ་སོགས་གསུངས་ཏེ་མཛད་སྒོ་དངོས་སུ་དབུ་འཛུགས་གནང་ཡོད།མཛད་སྒོའི་ཐོག་མར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཐེངས་འདིའི་ཚོགས་ཆེན་འདི་ནི་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་དང་གྲོས་ཚོགས་འཐུན་མི་སྐུ་ཞབས་ Jim McGovern མཆོག་རྣམ་གཉིས་ཀྱིས་དབུས་པའི་ཨ་རིའི་གྲོས་ཚོགས་འཐུས་མི་མང་དག་ཅིག་གི་མཐུན་འགྱུར་རོགས་རམ་གནང་བའི་ཐོག་ནས་གོ་སྒྲིག་ཞུ་རྒྱུ་བྱུང་ཡོད་པ་སོགས་འགྲེལ་བརྗོད་དང་སྦྲགས། ད་ལྟའི་ཆར་བོད་ནང་གི་གནས་སྟངས་ནི་ཛ་དྲག་རང་བཞིན་ཅན་ཞིག་དང་། ལྷག་པར་དུ་རྒྱ་ནག་གཞུང་གིས་མུ་མཐུད་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་ཁག་རྩིས་མེད་རྡོག་རོལ་གཏོང་བཞིན་ཡོད་པ་ཐེར་འདོན་གནང་སྟེ། རྒྱ་གཞུང་གི་བྱེད་བབ་དེ་དག་ལ་བོད་མིའི་ངོས་ནས་ངོས་བཞེས་རྩ་བ་ནས་གནང་གི་མེད་པ་ལྟར་རྒྱལ་སྤྱིའི་ངོས་ནས་ཀྱང་རྒྱ་གཞུང་གི་བྱེད་བབ་དེ་དག་ལ་ངོས་བཞེས་གནང་རྒྱུ་མེད་པ་གསུངས་ཡོད།ལྷག་དོན་བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་འདི་ལོ་ངོ་སྟོང་ཕྲག་མང་པོའི་རིང་ལ་རང་བཙན་གཙང་མའི་རྒྱལ་ཁབ་ཅིག་ཡིན་པའི་ལོ་རྒྱུས་ལྡན་ཡོད་ཀྱང་། བོད་མིའི་ངོས་ནས་དབུ་མའི་ལམ་གྱི་སྲིད་བྱུས་དགོངས་དོན་འོག་བོད་རྒྱ་གཉིས་ཀྱི་དཀའ་རྙོག་ཞི་སྒྲིག་ཡོང་རྒྱུར་བཅོས་མིན་གྱི་འབད་བརྩོ་ཞུས་དང་ཞུ་བཞིན་ཡོད་པ་འགྲེལ་བརྗོད་དང་སྦྲགས་ཏེ། རྒྱ་གཞུང་གི་འགོ་ཁྲིད་ཚོས་ལོ་རྒྱུས་ཀྱི་འགན་ཁུར་དང་ཆབ་སྲིད་ཀྱི་རྣམ་སྤྱོད་ལྡན་པའི་ཐོག་ནས་༸གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་གནང་དགོས་ཞེས་གསུངས་ཡོད།ཚོགས་ཆེན་གྱི་དབུ་འབྱེད་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་འཕྲིན་བརྒྱུད་གསུང་འཕྲིན་ཞིག་སྩལ་འདུག་པའི་ནང་ཐེངས་འདིའི་ཚོགས་བཅར་བ་ཡོངས་ལ་ཐུགས་རྗེ་ཆེ་ཞེས་བཀའ་སྩལ་བ་དང་འབྲེལ། བོད་ཀྱི་གནད་དོན་ནི་ཕྱོགས་གཅིག་ནས་བདེན་པའི་གནད་དོན་དང་། ཕྱོགས་གཞན་ཞིག་ནས་བོད་ཀྱི་སེམས་ཁམས་རིག་པའི་རྣམ་གཞག་དང་འབྲེལ་བའི་ཐུན་མོང་མ་ཡིན་པའི་རིག་གཞུང་དང་བཟང་པོའི་གོམས་གཤིས་ཡོད་པ་འདི་བོད་མི་ཙམ་མིན་པར་འཛམ་གླིང་སྤྱིར་ཕན་ཐོགས་ཡོད་པ་ཞིག་ཡིན་སྟབས་ད་ཆ་བོད་ཀྱི་རིག་གཞུང་དང་འབྲེལ་བའི་བྱམས་བརྩེ་དང་བཟང་པོའི་ཆ་དེ་དག་ལ་ཐུགས་སྣང་གསར་པ་ཞིག་སླེབས་ཡོད་ཅེས་བཀའ་སྩལ་ཡོད།ལྷག་པར་དུ་མགོན་པོ་༸གང་ཉིད་མཆོག་གིས་དེ་རིང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཚོགས་སྐབས་རྣམ་པ་ཚོས་བོད་ཀྱི་ཆབ་སྲིད་དཀའ་ངལ་ཐོག་བཀའ་མོལ་གནང་རྒྱུ་དང་གཙོ་བོར་བོད་ཀྱི་ཐུན་མོང་མ་ཡིན་པའི་རིག་གཞུང་དང་གོམས་གཤིས་བཟང་པོ་རྣམས་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུར་ཐུགས་འཁུར་ཆེ་བཞེས་གནང་དགོས་པའི་ལམ་སྟོན་བཀའ་དྲིན་ཆེ་བ་སྩལ་ཡོད།གསུང་འཕྲིན་ནང་ད་དུང་མགོན་པོ་༸གང་ཉིད་མཆོག་གིས་བོད་ཀྱི་རིག་གཞུང་གི་གལ་གནད་དང་འབྲེལ་བའི་བཀའ་སྩལ་ཏེ་སེམས་པ་བཟང་པོ་བྱ་རྒྱུའི་རིག་གཞུང་འདི་དེང་དུས་ཀྱི་ཤེས་ཡོན་སྡེ་ཁག་ཏུ་ཆོས་དང་མ་འབྲེལ་བའི་ཡ་རབས་བཟང་སྤྱོད་བསླབ་རྒྱུར་ཤུགས་སྣོན་རྒྱག་ཐུབ་ཚེ་དགེ་མཚན་ལྡན་ངེས་ཡིན་པ་ལམ་སྟོན་མཛད་སོང་།དབུ་འབྱེད་མཛད་སྒོའི་སྐུ་མགྲོན་གཙོ་བོ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་རྒྱ་ནག་གཞུང་གིས་བོད་ནང་ལ་གཞི་རྩའི་འགྲོ་བ་མིའི་ཐོབ་ཐང་རྩིས་མེད་རྡོལ་རོལ་དང་བོད་ཀྱི་ངོ་བོ་རྩ་མེད་གཏོང་རྒྱུའི་སྲིད་བྱུས་ཁག་ལག་བསྟར་བྱེད་བཞིན་པ་དེ་དག་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གཞི་རྩའི་ལྟ་གྲུབ་དང་ཡོངས་སུ་འགལ་ཡོད་པ་སོགས་འགྲེལ་བརྗོད་གནང་བ་དང་སྦྲགས་ཏེ། རྒྱལ་སྤྱིའི་མང་ཚོགས་ཀྱི་ངོས་ནས་བོད་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་གནང་རྒྱུར་འཛེམ་ཟོན་གནང་ནས་བཞུགས་ཚེ་རྣམ་ཀུན་ནས་འགྲོ་བ་མིའི་ཐོབ་ཐང་དང་འབྲེལ་བའི་གླེང་སློང་གནང་རྒྱུའི་འོས་བབ་མེད་ཅེས་གསུངས་ཡོད། དེ་བཞིན་ལྕམ་སྐུ་མཆོག་གིས་སྐུ་ཉིད་མཆོག་ཐོག་མར་བོད་ཀྱི་གནད་དོན་དང་འབྲེལ་བ་ཇི་ལྟར་བྱུང་ཚུལ་བརྒྱུད་རིམ་ཁག་ཅིག་དྲན་གསོ་དང་སྦྲགས་ད་བར་ཨ་རིའི་གྲོས་ཚོགས་ནས་བོད་དོན་དང་འབྲེལ་བའི་སྲིད་བྱུས་གཏན་འབེབ་གནང་བ་ཁག་གི་གལ་གནད་སོགས་ཀྱི་སྐོར་གསུངས་ཡོད།དབུ་འབྱེད་མཛད་སྒོ་ཐོག་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ Richard Gere ལགས་དང་ཨ་རིའི་རྒྱལ་ཡོངས་མང་གཙོ་གོང་འཕེལ་བསྟི་གནས་ཁང་གི་འགན་འཛིན་སྐུ་ཞབས་ Damon Wilson ལགས་ཀྱིས་ཀྱང་རྒྱ་གཞུང་གི་བྱེད་བབ་ཁག་ལ་གདོང་ལེན་གནང་བར་རྒྱལ་སྤྱིའི་རྒྱལ་ཁབ་ཚང་མས་མཉམ་རུབ་ཀྱི་ནུས་པ་སྤུངས་གནད་ཆགས་ཡོད་པ་དང་། བཙན་བྱོལ་བོད་མིའི་མང་གཙོའི་ནུས་པ་གོང་འཕེལ་གཏོང་རྒྱུ་སོགས་ཀྱི་གལ་གནད་ཐོག་གསུང་བཤད་གནང་ཡོད།གཞི་རྩའི་དེ་རིང་ཨ་རིའི་རྒྱལ་ས་ Washington DC ཁུལ་དུ་དབུ་འཛུགས་གནང་བའི་རྒྱལ་སྤྱིའི་གྲོས་ཚོགས་འཐུས་མིའི་བོད་རྒྱབ་སྐྱོར་གྱི་ཚོགས་ཆེན་ཐེངས་བརྒྱད་པ་འདི་དེ་རིང་དང་སང་ཉིན་བཅས་ཉིན་གྲངས་གཉིས་རིང་ཚོགས་ཀྱི་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱལ་སྤྱིའི་རྒྱལ་ཁབ་ ༢༦ ནས་གྲོས་ཚོགས་འཐུས་མི་དང་མཁས་དབང་། དེ་བཞིན་ལས་འགུལ་བ་སོགས་ཁྱོན་ཚོགས་བཅར་བ་ ༡༠༠ ལྷག་མཉམ་ཞུགས་གནང་ཡོད་པ་དང་། སང་ཉིན་ཚོགས་དུས་ཉིན་གཉིས་པའི་སྔ་ཐོག་ཨ་རིའི་གྲོས་ཚོགས་ནང་བོད་ཀྱི་དཀའ་རྙོག་སེལ་ཐབས་དང་འབྲེལ་བའི་དམིགས་བསལ་ཉན་ཞིབ་ཀྱི་ལས་རིམ་ཞིག་འཚོགས་ཀྱི་ཡོད་པ་རེད།

འབྲེལ་ཡོད་གསར་གནས།

གསར་གནས།