བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ Colombia རྒྱལ་ས་ Bogota ཁུལ་གྱི་གཞུང་འབྲེལ་འཚམས་གཟིགས་ཀྱི་ལས་རིམ་ཁག་ལེགས་གྲུབ་ཀྱིས་ཚེས་ ༧ ཉིན་ Mexico གནམ་ཐང་དུ་ཕེབས་འབྱོར་གནང་སྐབས་མེ་སི་ཀོའི་གྲོས་ཚོགས་འཐུས་མི་སྐུ་ཞབས་ Salvador Caro Cabrera ལགས་གཙོས་བོད་དོན་རྒྱབ་སྐྱོར་བའི་ཚོགས་པ་ཁག་གི་སྐུ་ཚབ་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
![](https://vot.org/wp-content/uploads/2023/10/386760734_648175397446916_7917059543853981087_n.jpg)
སྲིད་སྐྱོང་མཆོག་ཕྱི་ཚེས་ ༧ ཉིན་ Mexico ལ་རྟེན་གཞི་བྱས་པའི་བློ་གསལ་གླིང་ཆོས་ཚོགས་སུ་འཚམས་གཟིགས་དང་ཆོས་ཚོགས་ཀྱི་སློབ་མ་དང་བོད་དོན་རྒྱབ་སྐྱོར་བ་ཁག་གཅིག་དང་མཇལ་མོལ་གནང་འདུག་པ་དང་། ཕྱི་ཚེས་ ༨ ཉིན་ Casa Tibet Mexico ཚོགས་ཁང་ནས་ལྷོ་ཨ་རི་ནང་གི་བོད་དོན་རྒྱབ་སྐྱོར་ཚོགས་པ་ ༡༦ ཡོད་པའི་ནང་ནས་མེ་སི་ཀོ་ནང་གི་བོད་དོན་རྒྱབ་སྐྱོར་ཚོགས་པ་ Casa Tibet Mexico དང་ Voces de Tibet དེ་བཞིན་ Tibet MX བཅས་ཀྱི་ཚོགས་མི་དང་ལྷན་མཇལ་མོལ་གནང་འདུག
![](https://vot.org/wp-content/uploads/2023/10/386737915_647504334180689_1999065570572159313_n.jpg)
སྐབས་དེར་བོད་དོན་རྒྱབ་སྐྱོར་བ་ཚོས་ལས་བསྡོམས་གཙོ་བོ་བོད་དོན་ཐོག་ལ་ཕྱག་ལས་གནང་སྒོ་སོགས་ཀྱི་སྐོར་ལ་ངོ་སྤྲོད་གནང་བ་དང་སྲིད་སྐྱོང་མཆོག་གིས་ལམ་སྟོན་གསུང་བཤད་གནང་བ་དང་སྦྲགས། ལྷོ་ཨ་རིའི་ཁྱབ་ཁོངས་སུ་ཡོད་པའི་བོད་དོན་རྒྱབ་སྐྱོར་བ་དང་ལྷན་དུ་དོན་ཕན་ལྡན་པའི་ཕྱག་ལས་གནང་ཐབས་དང་འབྲེལ་ནས་མ་འོངས་པར་དམིགས་བསལ་ཚོགས་ཆེན་ཞིག་གནང་རྒྱུའི་ཐག་གཅོད་གནང་ཡོད་པ་རེད།
![](https://vot.org/wp-content/uploads/2023/10/386354080_647504430847346_4899192806584598763_n.jpg)
དེ་བཞིན་ཁ་སང་ཕྱི་ཚེ ༨ ཉིན་ཁུལ་དེའི་ News Week ཞེས་པའི་བརྙན་དེབ་གསར་ཁང་གིས་སྲིད་སྐྱོང་མཆོག་ལ་བོད་དོན་བཅར་འདྲི་ཞུས་པར་མ་ཟད། མེ་སི་ཀོ་དཔེ་མཛོད་དུ་གདན་ཞུ་གནང་སྟེ་ཡུལ་དེའི་རིག་གཞུང་གཟིགས་འབུལ་ཞུས་འདུག
![](https://vot.org/wp-content/uploads/2023/10/387138360_648176970780092_8455146949776620472_n.jpg)
སང་ཉིན་ཕྱི་ཚེས་ ༩ ཉིན་སྲིད་སྐྱོང་མཆོག་ UAM གཙུག་ལག་སློབ་གཉེར་ཁང་དུ་རྒྱ་ནག་དང་རྒྱལ་སྤྱིའི་འབྲེལ་ལམ་ཁྲོད་མེ་སི་ཀོ་དང་ལྷོ་ཨ་རིའི་གནད་འགག་དང་བོད་མིའི་རང་དབང་ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་དང་། Mexico Casa Tibet ཞེས་པའི་བོད་དོན་རྒྱབ་སྐྱོར་ཚོགས་པའི་སློབ་ཕྲུག་རྣམས་ལ་༸རྒྱལ་བའི་ཡང་སྲིད་དང་ཆོས་དད་རང་མོས་ཀྱི་བརྗོད་གཞིའི་ཐོག་གསུང་བཤད་གནང་གཏན་ཁེལ་ཡོད་པ་རེད།
![](https://vot.org/wp-content/uploads/2023/10/387068752_351667030555445_1180115451522905122_n.jpg)
གཞི་རྩའི་སྲིད་སྐྱོང་སྤེན་པ་ཚེ་རིང་མཆོག་མེ་སི་ཀོར་མ་ཕེབས་གོང་ལ་ཀོ་ལམ་བི་ཡར་རྟེན་གཞི་བྱས་པའི་ཀོ་ལམ་བི་ཡ་རྒྱལ་ཡོངས་གཙུག་ལག་སློབ་ཁང་དུ་བོད་དོན་ངོ་སྤྲོད་དང་འབྲེལ་སྐྱབས་བཅོལ་བའི་བརྒྱུད་རིམ་དང་གནས་སྟངས་ཞེས་པའི་བརྗོད་གཞིའི་ཐོག་དགེ་ལས་དང་སློབ་ཕྲུག་ཁྱོན་སྟོང་ཕྲག་སུམ་ཅུ་ལྷག་ལ་གསུང་བཤད་གནང་འདུག་པར་མ་ཟད། Yamantaka Center ཚོགས་པའི་འགན་འཛིན་ལྷན་ཚོགས་ཀྱི་ཚོགས་མིར་མཇལ་མོལ་དང་། དེ་བཞིན་ཆོས་ལུགས་ཁག་གི་དབུ་ཁྲིད་དང་སྐུ་ཚབ་ཉི་ཤུ་ལྷག་དང་ Religion and Spirituality འམ་ཆོས་ལུགས་དང་ཆོས་ཀྱི་རང་བཞིན་ཅན་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།
![](https://vot.org/wp-content/uploads/2023/10/386728408_647504347514021_6359058808521001586_n.jpg)