༸གོང་ས་མཆོག་གིས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་མཛད་པ།

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་གྱི་ཉིན་མོར་༸གོང་ས་མཆོག་གིས་བཞུགས་སྒར་དྷ་སའི་ལྷ་རྒྱལ་རིའི་ཉེ་འཁྲིས་སུ་ཆགས་པའི་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་མཛད་སོང་། དེ་རིང་སྔ་དྲོ་ཕྱག་ཚོད་ ༨ ཡོལ་ཙམ་ལ་༸གོང་ས་མཆོག་གིས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་མཛད་པ་དང་འབྲེལ་ཏེ་དཔེ་མཛོད་དང་ཡིག་ཚགས་ཁང་། གཟེངས་རྟགས་སྒྲིག་གཤོམ་ཁང་བཅས་སུ་གཟིགས་ཞིབ་ཀྱིས་བྱིན་འབེབས་རབ་གནས་སྩལ་གྲུབ་མཚམས་དབུ་འབྱེད་མཛད་སྒོར་དབུ་བཞུགས་མཛད་སོང་། སྐབས་དེར་མགོན་པོ་༸གང་ཉིད་མཆོག་གིས་ཁྱེད་རང་ཚོ་༸རྒྱལ་བ་རིན་པོ་ཆེའི་སྐྱེས་སྐར་ལ་འཛུམ་མུལ་མུལ་དང་དགའ་སེམས་འཁོལ་བོའི་ངང་འདུ་འཛོམས་གནང་བར་ཐུགས་རྗེ་ཆེ་ཞེས་བཀའ་སྩལ་བ་དང་། གཉན་འཕྲང་གི་དུས་ཚིགས་འདིར་ངོས་ནས་ཏཱ་ལའི་བླ་མ་མིང་འཁུར་ཏེ་བོད་གངས་ཅན་གྱི་ཆོས་དང་རིག་གཞུང་། མི་རིགས་ཀྱི་ཐོབ་ཐང་རྩོད་ལེན་བྱས་ཡོད་ཅེས་བཀའ་སྩལ་བ་དང་ཆབས་ཅིག ད་བར་ངོས་ནས་བསམ་པ་རྣམ་དག་གིས་ལས་དོན་གཉེར་ཁག་གི་ལག་རྗེས་སུ་འཛམ་གླིང་གང་སར་ནས་མང་ཚོགས་དུ་མས་བོད་ཀྱི་གནད་དོན་དེ་ཆབ་སྲིད་ཀྱི་གནད་དོན་ཁོ་ན་མ་ཡིན་པར་དྲང་བདེན་གྱི་གནད་དོན་ཞིག་ཡིན་པར་དོ་སྣང་གནང་གི་ཡོད་སྐོར་བཀའ་སྩལ་སོང་།དེ་བཞིན་མགོན་པོ་༸གང་ཉིད་མཆོག་གིས་བོད་ཀྱི་ཆོས་དང་རིག་གཞུང་ནི་སེམས་ཁམས་རིག་པ་གཙོ་བོར་གྱུར་པའི་སེམས་ཀྱི་ཞི་བདེ་བསྐྲུན་རྒྱུ་ཞིག་ཡིན་པ་དང་། དེ་ནི་ཆོས་དད་ཡོད་མེད་ལ་མ་ལྟོས་པར་ཀུན་ལ་མཁོ་བ་ཞིག་ཡིན་སྟབས། བོད་ཀྱི་སེམས་ཁམས་རིག་པ་གཙོ་བོར་གྱུར་པའི་རིག་གཞུང་དེ་འཛམ་བུ་གླིང་འདིའི་སྒང་ལ་ཕན་ཐོགས་ཡོད་པ་ཞིག་ཆགས་ཡོད་སྐོར་བཀའ་སྩལ་སོང་།མགོན་པོ་༸གང་ཉིད་མཆོག་གིས་བོད་མི་རྣམས་ནི་བཙན་བྱོལ་བ་འདྲ་འདྲི་ནང་ནས་མི་འདྲ་ཞིག་ཆགས་ཡོད་པ་དང་ལྷག་པར་མགོན་པོ་༸གང་ཉིད་མཆོག་གི་གྲོགས་པོ་ཞིག་གིས་དེ་སྔ་མ་སུ་རི་ནས་བཞུགས་སྒར་དུ་ཆིབས་བསྒྱུར་མཛད་སྐབས་༸རྒྱལ་བ་རིན་པོ་ཆེའི་བཞུགས་སྒར་དྷརྨ་སཱ་ལཱ་བཞུགས་ནས་ཐུགས་རྗེའི་འོད་ཟེར་འཛམ་བུ་གླིང་ཡོངས་ལ་ཁྱབ་ཐུབ་པ་ཡོང་གི་རེད་ཅེས་གསུངས་པ་དང་སྦྲགས། གཞིས་བྱེས་གཉིས་སུ་བཞུགས་པའི་བོད་མི་ཡོངས་ནས་བོད་སྤྱིའི་དོན་དུ་སེམས་ཤུགས་སྤུངས་ཏེ་ཕྱག་ལས་གནང་བར་ཐུགས་རྗེ་ཆེ་ཞེས་བཀའ་སྩལ་སོང་བར་མ་ཟད་ངོས་ད་དུང་ལོ་ངོ་བཅུ་ཕྲག་གཅིག་གཉིས་འཚོ་ཐུབ་ཀྱི་རེད་ཅེས་བཀའ་སྩལ་སོང་།མཛད་སྒོར་༸དཔལ་ལྡན་དགའ་ལྡན་ཕོ་བྲང་ཡིད་ཆེས་དགེ་རྩའི་ཚོགས་གཙོ་ལས་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ངོ་སྤྲོད་གསུང་བཤད་གནང་སྐབས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ནས་ཕྱི་ལོ་ ༡༩༥༩ ལོ་ནས་བཟུང་ད་བར་༸སྐུ་སྒེར་ཡིག་ཚང་གི་ཡིག་ཚགས་མ་ཉམས་པ་ཡོད་པ་ཡོངས་དང་ཕྲན་བུ་ཉམ་ཆག་ཕྱིན་པ་རྣམས་ཉམས་གསོའི་ཐོག་ནས་བདག་ཉར་བྱ་རྒྱུ་དང་། དེ་བཞིན་ཤེས་ཡོན་གྱི་ཉམས་ཞིབ་པ་ཚོར་༸རྒྱལ་དབང་རིམ་བྱོན་གྱི་གསུང་འབུམ་སོགས་དཔེ་མཛོད་གཅིག་གི་ནང་བདེ་བླག་ཏུ་འཚོལ་རྙེད་ཀྱིས་གསན་བསམ་ཉམས་ཞིབ་གནང་ཐུབ་པའི་དཔེ་མཛོད་ཕུན་སུམ་ཚོགས་པ་ཞིག་བསྐྲུན་རྒྱུ་ནི་༸གོང་ས་ཏཱ་ལའི་བླ་མའི་དཔེ་མཛོད་ཀྱི་དགོས་དམིགས་ཡིན་སྐོར་གསུངས་སོང་།གཞི་རྩའི་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ནང་དཔེ་མཛོད་དང་ཡིག་ཚགས་ཁང་། གཟེངས་རྟགས་སྒྲིག་གཤོམ་ཁང་། དེ་བཞིན་སྒྲ་བརྙན་སྡེ་ཚན། གསུང་འབུམ་ཕྱོགས་སྒྲིག་སྡེ་ཚན་གྱི་ལས་ཁུངས་སོགས་ཡོད། དེ་རིང་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་ཀྱི་མཛད་སྒོ་ཐོག་དགའ་ལྡན་ཁྲི་ཐོག་ ༡༠༤ པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་དབུས་པའི་བླ་སྤྲུལ་རྣམ་པ་དང་། སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། བོད་དོན་རྒྱབ་སྐྱོར་བ་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ Richard Gere ལགས་སོགས་ནས་ལྷན་ཞུགས་གནང་སོང་།