བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ ICAN ནམ་རྒྱལ་སྤྱིའི་རྡུལ་ཕྲན་མཚོན་ཆ་བཀག་སྡོམ་ལས་འགུལ་ཁང་ལ་དགའ་བསུའི་འཚམས་འཕྲིན་བསྩལ་བ་དང་ཆབས་ཅིག་༸གང་ཉིད་མཆོག་ནས་ཚོགས་པ་དེ་ལ་རྒྱབ་སྐྱོར་ཡོད་ཅེས་བཀའ་གནང་འདུག
མགོན་པོ་མཆོག་གིས་ཚོགས་པ་དེའི་སྤྱི་ཁྱབ་འགན་འཛིན་ལྕམ་ Beatrice Fihn མཆོག་གི་མཚན་ཐོག་ཏུ་བསྩལ་བའི་འཚམས་འཕྲིན་དེའི་ནང་། ཁོང་རྣམ་པའི་ལས་དོན་ལ་བསྔགས་བརྗོད་དང་འབྲེལ། དེང་སང་འཛམ་གླིང་གི་ས་ཕྱོགས་མང་པོ་ཞིག་གི་ནང་དུ་དྲག་ཤུགས་ཁོ་ན་སྤྱོད་ནས་བརྟན་ལྷིང་ངེས་གཏན་མེད་པའི་དུས་མཚམས་འདིར་ ICAN ཚོགས་པའི་ལས་དོན་བྱེད་སྒོ་ཁག་ཛ་དྲག་དང་ཁ་ཚ་དགོས་གཏུགས་ཤིག་ཆགས་ཡོད་པ་བཀའ་གནང་འདུག་པ་མ་ཟད། ༸གང་ཉིད་མཆོག་གིས་ནོ་སྦེལ་ཞི་བདེའི་ལྷན་ཚོགས་ནས་ཚོགས་པའི་ལས་དོན་ལ་ངོས་འཛིན་དེ་ལྟར་གནང་པ་དེ་ནི་ཧ་ཅང་གི་འོས་འཚམ་ཞིག་ཆགས་ཡོད་པ་བཀའ་གནང་འདུག ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་དེའི་ཐོག་ནས་མ་འོངས་པ་ན་ཚང་མས་མཉམ་འབྲེལ་གྱི་ནུས་པ་སྤུངས་པའི་ཐོག་ནས་རྡུལ་ཕྲན་མཚོན་ཆ་མེད་པའི་འཛམ་གླིང་བུའི་གླིང་ཞིག་ཡོང་ཆེད་ཐུགས་སྨོན་མཛད་པ་དང་སྦྲགས། ༸གང་ཉིད་མཆོག་ནས་རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་ཡོང་ཐུབ་རྒྱུ་ཡོད་པ་དགོངས་གནང་གི་ཡོད་སྟབས་ ༢༠༠༨ ནས་ ICAN ཚོགས་པར་གསར་འཛུགས་སྐབས་ནས་རྒྱབ་སྐྱོར་གནང་གི་ཡོད་བཅས་གསུངས་འདུག
གཞི་རྩའི་ ICAN ཞེས་པའི་རྡུལ་ཕྲན་མཚོན་ཆ་བཀའ་སྡོམ་ལས་འགུལ་ཁང་ཞེས་པའི་ཚོགས་པ་དེ་ནི་འཛམ་གླིང་རྒྱལ་ཁབ་༡༠༠ ནང་དུ་ཡན་ལག་ལས་ཁུངས་ ༤༦༨ ཡོད་པའི་གཞུང་འབྲེལ་མིན་པའི་ཚོགས་པ་ཞིག་ཡིན་པ་དང་། དེ་ཡང་ཕྱི་ལོ་ ༢༠༠༧ ལོར་གསར་འཛུགས་གནང་འདུག ཚོགས་པ་དེའི་ངོས་ནས་འཛམ་གླིང་ཁྱོན་ཡོངས་སུ་རྡུལ་ཕྲན་མཚོན་ཆ་ལ་འགོག་རྒོལ་ལས་འགུལ་གཙོ་གྱུར་ཞི་བདེ་དང་ཁོར་ཡུག་སྲུང་སྐྱོབ། འགྲོ་བ་མིའི་བདེ་དོན་སྤྱིའི་ཐད་ལ་ལས་འགུལ་སྤེལ་གནང་གི་འདུག
ཚོགས་སྤྱི་ཁྱབ་འགན་འཛིན་ལྕམ་ Beatrice Fihn མཆོག་གི་The Guardian གསར་ཁང་གི་བཅར་འདྲི་དང་ལེན་གནང་པའི་ནང་། ཐེངས་འདིའི་ནོ་སྦེལ་ཞི་བདེའི་གཟེངས་རྟགས་འདི་ནི་རྡུལ་ཕྲན་མཚོན་ཆར་འགོག་རྒོལ་གྱི་ལས་འགུལ་ལ་ཆེ་མཐོང་དང་རྒྱབ་སྐྱོར་ཤུགས་ཆེ་ཞིག་གནང་པ་ཙམ་མ་ཟད། ཆེ་བསྟོད་ངོས་འཛིན་འདིའི་ཐོག་ནས་ང་ཚོ་དང་ང་ཚོ་འདྲ་བ་གཞན་ལ་ནུས་པ་འཕར་མ་ཞིག་དང་སྒོས་སུ་མི་རབས་གསར་པ་ཚོ་ལ་ང་ཚོ་ལ་མིག་དཔེ་བཟང་པོ་ཞིག་དང་ལས་དོན་གལ་ཆེ་ཡིན་པ་ར་སྤྲོད་ཐུབ་རྒྱུར་ཕན་ཐོགས་ཆེན་པོ་མཐོང་གི་ཡོད་པ་གསུངས་འདུག