བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་མཆོག་གིས་འདི་ལོ་ཕྱི་ལོ་ ༢༠༡༧ ཕྱི་ཟླ་ ༡༢ ནང་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་ནང་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་སེ་འབྲས་དགེ་གསུམ་ནང་དུ་དགེ་འདུན་པར་བསྙེན་རྫོགས་ཀྱི་སྡོམ་པ་འབོག་ཆོག་གནང་རྒྱུ་མཚོན་པའི་མཛད་འཆར་སྔོན་བསྒྲིགས་ཟིན་ཁག་ཅིག་ལ་འགྱུར་བ་ཕྲན་བུ་ཕྱིན་འདུག
དེའང་རྒྱ་གར་ལྷོ་ཕྱོགས་མུམ་བའེ་གྲོང་ཁྱེར་དུ་རྟེན་གཞི་བྱས་པའི་ཝ་ན་ཐེབས་རྩ་ཁང་གི་ Vidyaloke ཞེས་པའི་ཚོགས་པ་དང་སོ་མཱེ་ཡ་མཐོ་སློབ་ཟུང་འབྲེལ་ཐོག་ཇི་ལྟར་གསོལ་བ་བཏབ་པ་ལྟར་ཟླ་ ༡༢ ཚེས་ ༡༠ ཉིན་སྔ་དྲོ་སོ་མཱ་ཡ་མཐོ་སློབ་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རིག་གཞུང་རྙིང་པ་བསྐྱར་གསོའི་ཆེད་དུ་ Reviving Indian Wisdom in Contemporary ཞེས་པའི་བརྗོད་གཞིའི་ཐོག་མི་མང་ལ་གསུང་བཤད་གནང་རྒྱུ་དང་ཕྱི་ཚེས་ ༡༡ ཉིན་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་ནང་ཡོད་པའིི་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་༸ཞབས་སོར་བདེ་བར་འཁོད་གནང་སྟེ་ཕྱི་ཚེས་ ༡༧ བར་ཆོས་འབྲེལ་མཛད་འཆར་ཆེད་བཞུགས་ཞག་མཛད་རྒྱུ་རེད་འདུག་པ་ལྟར། ཕྱི་ཚེས་ ༡༡ ཉིན་མུམ་བའེ་གྲོང་ཁྱེར་ནས་མོན་གྷོ་འདོད་རྒུ་གླིང་དུ་༸ཞབས་སོར་འཁོད་གནང་རྒྱུ་མ་ཟད་ཚེས་ ༡༢ དང་ ༡༣ བཅས་ཉིན་གཉིས་རིང་འབྲས་སྤུངས་བླ་སྤྱིར་དགེ་འདུན་པར་བསྙེན་རྫོགས་ཀྱི་སྡོམ་པ་འབོག་ཆོག་གནང་རྒྱུ་དང་ཕྱི་ཚེས་ ༡༤ ཉིན་འབྲས་སྤུངས་བློ་གསལ་གླིང་གི་སྒོམ་སྒྲུབ་དང་ཚན་རིག་ལྟེ་གནས་ཁང་གསར་པ་དབུ་འབྱེད་རབ་གནས་མཛད་རྒྱུ། དེ་རྗེས་ཚེས་ ༡༥ ཉིན་མོན་གྷོ་བཙུན་དགོན་བྱང་ཆུབ་ཆོས་གླིང་དུ་ཆོས་ར་གསར་པ་དབུ་འབྱེད་རབ་གནས་མཛད་རྒྱུ་ཡིན་པ་རེད། ཕྱི་ཚེས་ ༡༦ དང་ ༡༧ བཅས་ཉིན་གཉིས་རིང་གདན་ས་དགའ་ལྡན་རྣམ་པར་རྒྱལ་བའི་གླིང་བླ་སྤྱིར་བསྙེན་རྫོགས་ཀྱི་སྡོམ་པ་འབོག་ཆོག་གནང་གི་འདུག
ཕྱི་ཚེས་ ༡༨ ཉིན་མོན་གྷོ་འདོད་རྒུ་གླིང་ནས་ཧུབ་ལི་གྲོང་ཁྱེར་བརྒྱུད་སྦེལ་ཀོབ་བོད་མིའི་གཞིས་ཆགས་ཁུལ་དུ་རྟེན་གཞི་བྱས་པའི་གདན་ས་སེ་ར་ཐེག་ཆེན་གླིིང་དུ་ཆིབས་བསྒྱུར་མཛད་ཀྱི་ཡོད་པ་རེད། ༸གོང་ས་མཆོག་གིས་སེ་ར་ཐེག་ཆེན་གླིང་དུ་དགེ་འདུན་པ་ ༦༠ ཙམ་ལ་ཉིན་གཅིག་རིང་བསྙེན་རྫོགས་སྡོམ་པ་འབོག་ཆོག་གནང་གཏན་ཁེལ་ཡོད་ཀྱང་ད་ལྟའི་ཆར་དུས་ཚེས་གཏན་འཁེལ་མེད་པ་རེད། འོན་ཀྱང་སེ་ར་བླ་སྤྱིའི་ཕྱག་མཛོད་ཁང་ནས་ཕྱི་ཚེས་ ༡༩ ཉིན་སྒྲུབ་གནང་སྲིད་པར་ཚོད་དཔག་གནང་གི་འདུག
ཚེས་ ༢༠ ཉིན་མགོན་པོ་༸གང་ཉིད་མཆོག་གིས་སེར་བྱེས་གྲྭ་ཚང་དུ་རྟ་མགྲིན་ཡང་གསང་གི་བཀའ་དབང་བཀའ་དྲིན་སྩལ་རྒྱུ་དང་ཚེས་ ༢༡ ཉིན་སེར་སྨད་ཐོས་བསམ་ནོར་གླིང་གྲྭ་ཚང་གིས་གསར་བཞེངས་གནང་བའི་ཆོས་གྲྭ་དབུ་འབྱེད་དང་། ༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་བཀྲིན་སྩལ་རྒྱུ་རེད་འདུག
ཤེས་རྟོགས་བྱུང་བ་ལྟར་ན་ཚེས་ ༢༣ ནས་ ༢༦ བར་༸གོང་ས་༸སྐྱབས་མགོན་ཆེན་པོ་མཆོག་གིས་སྦེང་ལོར་གྲོང་ཁྱེར་ནང་དུ་མཐོ་སློབ་ཁག་ཏུ་སློབ་གཉེར་གནང་བཞིན་པའི་བོད་རིགས་སློབ་མ་ཚོར་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཁག་ཅིག་ཀྱང་བང་སྒྲིག་ཡོད་པ་རེད་འདུག
