དེ་རིང་ཟླ་ ༣ ཚེས་ ༩ ཉིན་རྒྱ་གར་བྱང་ཕྱོགས་སྤུ་རུ་ཝ་ལར་རྟེན་གཞི་བྱས་པའི་༸དཔལ་ས་སྐྱའི་མ་དགོན་བཤད་གྲྭ་ཐུབ་བསྟན་རྣམ་རྒྱལ་གླིང་དུ་༸དཔལ་ས་སྐྱ་སྒྲོལ་མ་ཕོ
་བྲང་གི་འཁོན་གདུང་སྲས་རཏྣ་བཛྲ་མཆོག་ས་སྐྱ་ཁྲི་འཛིན་ ༤༢ པར་ཁྲི་འདོན་རྟེན་འབྲེལ་མཛད་སྒོ་ཚོགས་སོང།
སྐབས་དེར་སྐུ་མགྲོན་ཁོངས་སུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང། ཆེས་མཐོའི་ཁྲིམས་ཞིབ་ཁང་
གི་ཁྲིམས་ཞིབ་པ་ངག་དབང་རབ་རྒྱས་མཆོག བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག དཔལ་འབྱོར་བཀའ་བློན་ཀརྨ་ཡེ་ཤེས་མཆོག འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག དེ་བཞིན་བོད་མི་མང་སྤྱི་འཐུས་རྒྱུན་ལས་སོགས་རང་གཞུང་བཀའ་ཤག་གི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་ས་གནས་བོད་མི་དང་ཕྱོགས་མཐའ་ཁག་ནས་ཕེབས་པའི་དད་ལྡན་མང་ཚོགས་བཅས་ལྷན་འཛོམས་ཀྱིས་ཁྲི་འདོན་མཛད་སྒོ་གཟབ་རྒྱས་ངང་ཚོགས་ཡོད་པ་རེད།
༸དཔལ་ས་སྐྱ་ཁྲི་ཐོག་ ༤༡ པ་ཁྲི་ཆེན་རྡོ་རྗེ་འཆང་རིན་པོ་ཆེ་མཆོག་གིས་འདི་ག་རླུང་འཕྲིན་ཁང་གི་བཅར་འདྲི་ཞལ་བཞེས་དང་འབྲེལ་གསུངས་པར་ངོས་ནས་མ་འོ
ངས་པར་ཉིན་ཞིག་གློ་བུར་དུ་བདག་ཁྲི་བསྐོ་གཞག་གནང་དགོས་བྱུང་ཚེ་ཚང་མར་དཀའ་ངལ་འཕྲད་གཞིར་འགྱུར་སྟབས། ད་ལྟ་ང་ཚོ་ཚང་མ་ཡོད་པའི་སྐབས་འདིར་གདུང་སྲས་ཚང་མ་སྐུ་ཚད་རྫོགས་པ་དང་སྐུ་ཡོན་གསན་སྦྱོང་ཕལ་མོ་ཆེ་གྲུབ་དང་འགྲུབ་བཞིན་ཡོད་པ་རེད། དེས་ན་གདུང་སྲས་རྣམ་པས་རིམ་བཞིན་༸དཔལ་ས་སྐྱ་བདག་ཁྲིའི་ཐུགས་འགན་བཞེས་པ་ཡིན་ན་ང་ཚོའི་ངོས་ནས་རྒྱུས་ཡོད་ལམ་སྟོན་དང་ཕྱག་རོགས་སོགས་ཞུ་རྒྱུར་ཐུགས་ཕན་གསོས་པ་བསམ་ནས་ཕུན་ཚོགས་ཕོ་བྲང་དང་གོ་བསྡུར་ཞུས་དོན་ལྟར་ཞལ་བཞེས་ཀྱང་གནང་སོང་ཞེས་གསུངས་སོང་། དེ་བཞིན་༸དཔལ་ས་སྐྱ་བདག་ཁྲི་རིན་པོ་ཆེ་མཆོག་གིས་དེ་རིང་དངོས་སུ་ཁྲི་འདོན་གནང་རྒྱུ་བྱུང་བར་ཐུགས་དགྱེས་ཚོར་ཆེན་པོ་བྱུང་སྐོར་སོགས་བཀའ་ལན་བསྩལ་སོང་།
