ཨ་རིའི་ཀུ་ཤུ་རྟགས་ཅན་ཚོང་ལས་ཁང་གིས་རྒྱ་ནག་གཞུང་དང་ལག་སྦྲེལ་གྱིས་ཡུལ་དེའི་ནང་ནུབ་ཕྱོགས་པའི་གསར་འགྱུར་གཙོ་གྱུར་ཆོས་དད་རང་དབང་དང་འགྲོ་བ་མིའི་ཐོབ་ཐང་གི་གནད་དོན་ཙམ་ཟད། རྒྱ་གཞུང་གི་དམ་དྲག་ལ་གདོང་ལེན་གྱིས་སྒེར་གྱི་གནད་དོན་སྦས་བསྐུངས་བྱེད་ཐུབ་པའི་མཉེན་ཆས་མང་དག་ཅིག་ཕབ་ལེན་གནང་རྒྱུ་བཀག་སྡོམ་བྱེད་བཞིན་པར་སྐྱོན་བརྗོད་གནང་འདུག
ཁ་སང་ཨ་རིར་རྟེན་གཞི་བྱས་པའི་ The Intercept གསར་ཁང་གིས་གནས་ཚུལ་སྤེལ་བར་རྒྱ་ནག་གཞུང་གི་དྲྭ་གནས་བཀག་སྡོམ་གྱི་ལྟ་རྟོག་བྱེད་མཁན་ GreatFire. ཚོགས་པའི་ཉམས་ཞིབ་པ་རྣམས་ནས་ AppleCensorship.com ཞེས་པའི་དྲྭ་གནས་ཤིག་བཟོ་སྐྲུན་བྱས་ནས་ཀུ་ཤུ་རྟགས་ཅན་གྱི་ཚོང་ལས་ཁང་ནས་རྒྱ་ནག་ནང་མཉེན་ཆས་གང་དང་གང་བཀག་སྡོམ་བྱས་དང་བྱེད་བཞིན་ཡོད་པའི་མིང་གཞུང་བཀོད་ཡོད་པ་དང་། དེའི་ཁྲོད་ཨ་རིའི་ New York གསར་ཁང་དང་། ཨེ་ཤེ་ཡ་རང་དབང་རླུང་འཕྲིན་ཁང་། ནོར་ཝེ་བོད་ཀྱི་རླུང་འཕྲིན་ཁང་། གྷུ་གྷལ་གྱི་འཚོལ་བཤེར་མ་ལག བོད་མིའི་སྒྲིག་འཛུགས་ཀྱི་མཉེན་ཆས་སོགས་མིང་མངོན་གསལ་གནང་བ་མ་ཟད། TOR དང་ Psiphon ལ་སོགས་པའི་ཉེན་གཡོལ་མཉེན་ཆས་ཕབ་ལེན་མང་དག་ཅིག་བཀག་སྡོམ་བྱེད་བཞིན་ཡོད་པར་འགྲེལ་བརྗོད་བྱས་འདུག
གནད་དོན་དེའི་ཐད་ཨེ་ཤེ་ཡའི་རང་དབང་རླུང་འཕྲིན་ཁང་གི་མགྲིན་ཚབ་པ་ Rohit Mahajan ལགས་ཀྱིས་ཀུ་ཤུ་རྟགས་ཅན་ནས་ཕྱི་ཟླ་ ༡༢ ནང་དེ་གའི་གསར་ཁང་ལ་གསར་ཁང་དེའི་མཉེན་ཆས་ཁག་ཅིག་རྒྱ་ནག་གི་ཁྲིམས་སྒྲིག་དང་མཚུངས་ཀྱི་མེད་པས་ཕྱིར་འཐེན་གནང་དགོས་སྐོར་བཤད་པ་ལུང་འདྲེན་གནང་འདུག རླུང་འཕྲིན་ཁང་གི་ཚོགས་གཙོ་ libby Liu ལགས་ཀྱིས་ཀུ་ཤུ་རྟགས་ཅན་ནས་ང་ཚོའི་མཉེན་ཆས་ཁག་ཅིག་ཕྱིར་འཐེན་བྱས་པ་དེས་ང་ཚོ་ཙམ་མ་ཟད་ང་ཚོའི་གསར་འགྱུར་ལ་གསན་གཟིགས་གནང་མཁན་མང་དག་ཅིག་ལ་གྱོང་གུད་ཕོག་ངེས་ཡིན་པ་སོགས་གསུངས་འདུག ལྷག་དོན་ནུབ་ཕྱོགས་པའི་ཚོང་ལས་ཁང་ནས་སོ་སོའི་ལངས་ཕྱོགས་བརྟན་པོ་བཟུང་ཐོག་ཐུགས་ཐག་བཅད་དགོས་གནད་ཡིན་པ་གསུངས་ཡོད་པ་རེད།
དེ་བཞིན་ GreatFire.org ཚོགས་པ་གསར་འཛུགས་གནང་མཁན་ཁོངས་སུ་ཡོད་པ་ Charlie Smith ལགས་ཀྱིས་ང་ཚོས་ད་རེས་རྒྱ་ནག་ནང་མཉེན་ཆས་གང་བཀག་སྡོམ་བྱེད་ཡོད་མེད་སོགས་ཤེས་རྟོགས་སླད་དྲྭ་གནས་བཟོ་སྐྲུན་ཞུས་པ་དེའི་བརྒྱུད་མང་ཚོགས་ལ་ཕྱི་གསལ་ནང་གསལ་གནང་གི་ཡིན་ཞེས་གསུངས་པ་མ་ཟད། ཨ་རིའི་ནང་མང་ཚོགས་ཀྱི་བཀོལ་སྤྱོད་ཐུབ་པའི་ VPN མཉེན་ཆས་གྲགས་གྲས་ ༡༠༠ ལྷག་ཙམ་ཞིག་རྒྱ་ནག་ནང་བཀོལ་སྤྱོད་བྱ་རྒྱུ་མེད་པ་གསལ་པོ་མཐོང་རྒྱུ་ཡོད་སྐོར་གསུངས་འདུག
ཀུ་ཤུ་རྟགས་ཅན་ཚོང་ལས་ཁང་གི་མགྲིན་ཚབ་པས་ད་ལྟའི་ཆར་རྒྱ་ནག་ཏུ་མཉེན་ཆས་མང་དག་ཅིག་བཀག་སྡོམས་བྱས་པའི་གནད་དོན་སྐོར་ལ་གསལ་བཤད་གང་ཡང་བྱས་མེད་པ་རེད།
