གནས་བརྟན་སྡེ་པའི་ལུགས་ཀྱི་ས་ག་ཟླ་བའི་ཚེས་ ༡༥ ཉིན་བདག་ཅག་གི་སྟོན་པ་མཉམ་མེད་ཤཱཀྱ་སེང་གེ་མཆོག་ལུམ་བི་ནིར་སྐུ་བལྟམས་པ་དང༌། གནས་མཆོག་རྡོ་རྗེ་གདན་དུ་སངས་རྒྱས་པ། རྩྭ་མཆོག་གྲོང་དུ་མྱ་ངན་ལས་འདས་ནས་མི་ལོ་ ༢༦༠༠ འཁོར་བའི་དུས་ཆེན་གསུམ་འཛོམས་ Buddha Purnima ཞེས་སྲུང་བརྩི་ཞུ་སྲོལ་ཡོད་པ་ལྟར། དེ་རིང་ཕྱི་ཚེས་ ༧ ཉིན་གྱི་ཞོགས་པ་ཕྱག་ཚོད་ ༦།༣༠ ཐོག་ International Buddhist Confederation ཞེས་རྒྱལ་སྤྱིའི་ནང་པའི་མཐུན་ཚོགས་ཀྱི་ངོས་ནས་དྲྭ་ཐོག་བརྒྱུད་དེ་དུས་ཆེན་གསུམ་འཛོམས་ཀྱི་དུས་སྟོན་སྲུང་བརྩི་གནང་བ་དང་འབྲེལ། ཆོས་ཕྱོགས་ཀྱི་དུས་སྟོན་དེའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུས་པའི་བོད་ཀྱི་བླ་སྤྲུལ་ཁག་ཅིག་དང་། གཞན་ཡང་རྒྱ་གར་གྱི་སྲིད་བློན་མོ་དི་མཆོག་གི་དབུས་འཛམ་གླིང་ས་ཕྱོགས་གང་སར་བཞུགས་པའི་ནང་པའི་བླ་ཆེན་བཅས་གནད་ཡོད་མི་སྣ་ཁྱོན་ ༢༩ ལྷག་མཉམ་བཞུགས་ཀྱིས་བཀའ་སློབ་ལམ་སྟོན་གནང་སོང་།
དེ་ཡང་དེ་རིང་དྲ་ཐོག་བརྒྱུད་དེ་སྲུང་བརྩི་ཞུས་པའི་ཆོས་ཕྱོགས་ཀྱི་དུས་སྟོན་དེའི་ཐོག་རྒྱ་གར་གྱི་སྲིད་བློན་མོ་དི་མཆོག་གིས་ཆེས་ཛ་དྲག་གི་ད་ལྟའི་དུས་ཚིགས་འདིར་ང་ཚོ་ལྷན་འཛོམས་ཤིག་བྱུང་མེད་ནའང་། འཕྲུལ་ཆས་བརྒྱུད་དེ་ཐག་རིང་ནས་ལྷན་འཛོམས་བྱུང་བར་འཚམས་འདྲི་དང་རྒྱལ་སྤྱིའི་ནང་པའི་མཐུན་ཚོགས་ཀྱི་ངོས་ནས་དྲྭ་ཐོག་བརྒྱུད་དེ་ཆོས་ཕྱོགས་ཀྱི་དུས་སྟོན་སྲུང་བརྩི་གནང་བར་ཡི་རངས་བསྔགས་བརྗོད་གནང་བ་དང་སྦྲགས། འཛམ་གླིང་ཁྱོན་ཡོངས་ལ་གོད་ཆག་ཆེན་པོ་བྱུང་བའི་དུས་སྐབས་འདིར་སྟོན་པའི་གསུང་དེ་དག་ཕན་རླབས་ཆེན་པོ་ཡོད་སྐོར་དང་། ལྷག་པར་དུ་སངས་རྒྱས་ཀྱི་གསུང་ལས་བཏང་སྙོམ་གྱི་བློ་དང་། བྱམས་དང་སྙིང་རྗེ་སོགས་ཉམས་ལེན་གནང་བ་བརྒྱུད་སྤྱི་ཚོགས་བདེ་ཐབས་ལ་དམིགས་ནས་ཞབས་ཞུ་སྒྲུབ་དགོས་སྐོར་གསུང་པ་དང་ཆབས་ཅིག ཉིན་མཚན་དུས་དྲུག་ཏུ་སྤྱི་ཚོགས་ཞབས་ཞུ་སྒྲུབ་མཁན་དེ་དག་ནི་སྟོན་པའི་སློབ་མ་ངོ་མ་ཞིག་ཡིན་པ་དང་། ཆེས་ཛ་དྲག་གི་དུས་ཚིགས་འདིར་རང་ཉིད་གཙོས་རང་གྱི་ནང་མི་རྣམས་གཅེས་སྐྱོང་གནང་བའི་ཐོག་གཞན་ལ་རོགས་འདེགས་ཞུས་པ་བརྒྱུད་ང་ཚོ་ཚང་མ་མགྱོགས་མྱུར་དཀའ་ངལ་ལས་གྲོལ་བའི་སྨོན་ལམ་ཡོད་ཅེས་གསུངས་སོང་།
གཞི་རྩའི་༸གོང་ས་མཆོག་གིས་དེ་རིང་གི་དུས་སྟོན་ཐོག་བསྩལ་བའི་གསུང་འཕྲིན་དེ་ཁ་སང་ཕྱི་ཚེས་ ༦ ཉིན་ཡོངས་ཁྱབ་འདོན་སྤེལ་གནང་ཡོད་པ་དང་། ༸གང་ཉིད་མཆོག་གི་གསུང་འཕྲིན་དེའི་ནང་དུ་བདག་ཅག་གི་སྟོན་པ་མཆོག་གིས་དེ་སྔ་བསྩལ་བའི་བཀའ་ཆོས་དེ་དག་འཛམ་གླིང་སྤྱི་དང་ལྷག་པར་དུ་དེང་གི་དུས་འདིར་ཕན་རླབས་ཆེན་པོ་ཡོད་པར་ཐུགས་རེ་ཡོད་སྐོར་སོགས་བཀའ་གནང་བ་དང་འབྲེལ། དེང་སྐབས་ང་ཚོས་དཀའ་ངལ་ལ་གདོང་ལེན་བྱེད་པའི་བརྒྱུད་རིམ་ནང་འགྲོ་བ་མི་གཅིག་གྱུར་གྱི་བསམ་བློ་དེ་དགོས་ངེས་ཅན་ཞིག་ཆགས་ཡོད་པར་ལམ་སྟོན་བསྩལ་འདུག་པ་མ་ཟད། འགྲོ་བ་མི་རྣམས་ལ་མཚོན་ན་ཕྱི་ཚུལ་མི་འདྲ་བའི་ཁྱད་པར་ཡོད་ཀྱང་འགྲོ་བ་མིའི་རང་བཞིན་དེ་ནི་ཞི་བདེ་དང་བདེ་སྐྱིད་འདོད་པ་གཅིག་མཚུངས་ཡིན་པ་དང་། ནང་པ་སངས་རྒྱས་པའི་གཞུང་ནས་ཀྱང་ང་ཚོའི་བློ་དེ་སྒོམ་གྱི་ཐོག་ནས་བཅོས་དགོས་པ་མ་ཟད། བློ་དེའང་ཞི་བདེ་བག་ཕེབས་དང་བྱམས་བརྩེ། སྙིང་རྗེ། གཏོང་ཕོད། བཟོད་བསྲན་བཅས་གོང་འཕེལ་གཏོང་དགོས་གལ་ཡིན་པའི་ལམ་སྟོན་བསྩལ་དོན་ལྟར་ང་རང་ཚོའི་ཉིན་རེའི་འཚོ་བའི་ཁྲོད་དེ་དག་གི་ཤུགས་རྐྱེན་ཐེབས་པ་ཞིག་བྱེད་དགོས་ཞེས་བཀའ་བསྩལ་འདུག
༸གོང་ས་མཆོག་གིས་ད་དུང་༸གང་ཉིད་མཆོག་ནང་པའི་དགེ་སློང་ཞིག་ཡིན་པའི་ཆ་ནས་དཔལ་ནཱ་ལེནྡཱའི་སྲོལ་རྒྱུན་རིག་གནས་རྒྱུད་འཛིན་མཁན་ཞིག་ལ་ངོས་བཞེས་གནང་གི་ཡོད་པ་མ་ཟད། རྒྱ་གར་ནང་གི་དཔལ་ནཱ་ལེནྡཱའི་སློབ་གཉེར་དེ་དག་གཏན་ཚིགས་རིག་པའི་ཐོག་ནས་གནང་སྲོལ་ཡོད་པ་དེ་ཧ་ཅང་གི་ཚད་མཐོ་པོ་ཡོད་སྐོར་བཀའ་བསྩལ་བ་དང་འབྲེལ། དུས་རབས་ཉེར་གཅིག་གི་ནང་པ་ཞིག་ཡིན་ཚེ་ནང་པའི་རིག་གནས་ལ་སློབ་གཉེར་དང་སངས་རྒྱས་ཀྱི་བཀའ་ཆོས་ལ་ཉམས་ཞིབ་གནང་དགོས་གལ་ཡིན་པ་མ་ཟད་སྔར་གྱི་ནཱ་ལེནདཱའི་མཁན་པོ་ཚོས་གནང་བ་ལྟར་གཏན་ཚིགས་རིག་པར་དཔྱད་དགོས་པ་ནི་ཤིན་ཏུ་ནས་གལ་ཆེན་པོ་ཡིན་པར་ལམ་སྟོན་མཛད་འདུག
༸གོང་ས་མཆོག་གིས་བསྩལ་བའི་གསུང་འཕྲིན་གྱི་མཇུག་ཏུ་ཆེས་གཉན་འཕྲང་ཅན་གྱི་ད་ལྟའི་དུས་ཚིགས་འདིར་རང་རེས་ནང་མི་དང་གཉེན་འབྲེལ་འདས་གྲོངས་སུ་གྱུར་པའི་སྡུག་བསྔལ་དང་རང་གི་འཕྲོད་བསྟེན་གྱི་ཉེན་ཚབས་སོགས་ལ་བརྟེན་ནས་ང་ཚོ་ཚང་མ་ཁྱིམ་ཚང་གཅིག་གི་ནང་མི་ལྟར་རྡོག་རྩ་གཅིག་སྒྲིལ་དང་མཉམ་འབྲེལ་བྱེད་དགོས་གལ་ཡིན་པར་ལམ་སྟོན་མཛད་པ་དང་ཆབས་ཅིག ང་ཚོས་ངེས་པར་དུ་འགྲོ་བ་མི་གཅིག་གྱུར་ཡིན་པའི་གནས་བབ་ལ་བསམ་གཞིགས་ནན་པོ་བྱེད་དགོས་པ་མ་ཟད། བྱམས་བརྩེ་དང་ལྡན་པའི་སྒོ་ནས་ཕན་ཚུན་གཅིག་ཕན་གཅིག་གྲོགས་བྱེད་དགོས་པ་དང་དེ་ལྟར་བྱས་ཚེ་གོ་ལ་ཧྲིལ་པོར་སྔོན་ཆད་མ་བྱུང་བའི་གྲུབ་འབྲས་གཡུར་དུ་ཟ་བ་ཞིག་ཐོན་ངེས་ཡིན་པར་ལམ་སྟོན་བཀའ་དྲིན་ཆེ་བར་བསྩལ་འདུག
དྲ་རྒྱ་བརྒྱུད་གོ་སྒྲིག་ཞུས་པའི་དེ་རིང་གི་ཆོས་ཕྱོགས་ཀྱི་མཛད་སྒོ་དེའི་ཐོག་གཞན་ཡང་དཔལ་ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་གིས་ད་ཆ་ཏོག་དབྱིབས་ནད་དུག་གི་ཆེས་ཛ་དྲག་གི་དུས་སྐབས་འདི་དང་འབྲེལ་ནས་འགྲོ་བ་མིའི་རིགས་ཚང་མ་ཁྱིམ་ཚང་གཅིག་གི་མི་ཡིན་པའི་འདུ་ཤེས་ཀྱི་ཐོག་ནས་བྱམས་བརྩེ་དང་སྙིང་རྗེ་ལག་ལེན་གྱི་ཐོག་ནས་གཅིག་ཕན་གཅིག་གྲོགས་གནང་གལ་ཆེན་པོ་ཡིན་པར་བཀའ་གནང་བ་དང་འབྲེལ། བདག་ཅག་གི་སྟོན་པས་བཀའ་གནང་བ་ལྟར། རིམས་ནད་འདི་བརྒྱུད་ནས་ང་ཚོ་རང་ཉིད་ཀྱི་ཚེ་སྲོག་གི་མཚོན་པའི་འཇིག་རྟེན་གྱི་བྱ་དངོས་ཡོད་ཚད་མི་རྟག་པ་ཡིན་པའི་རང་བཞིན་རྙེད་ཡོད་པ་དང་། ཕྱོགས་གཅིག་ནས། རིམས་ནད་ཁྱབ་བརྡལ་སྔོན་འགོག་དང་འབྲེལ་ནས་སྲིད་གཞུང་གི་ཁྱིམ་སྡོད་བཀའ་རྒྱའི་འོག་ཏུ་བཟོ་ལས་ཁང་གི་གཙོས་འགྲོ་བ་མིའི་རིགས་ཀྱི་སྤྱོད་སྒོར་གྱུར་བའི་འཕྲུལ་ལས་ཡོད་ཚད་གནས་སྐབས་མཚམས་འཇོག་གནང་བ་དེས་གོ་ལའི་གནམ་གཤིས་ཇེ་ཡག་ཏུ་ཕྱིན་ཏེ་མཁའ་རླུང་གཙང་མ་ཆགས་ཡོད་པར་ལུང་འདྲེན་གྱིས། གནས་སྟངས་འདིའི་ཁྲོད་ང་ཚོས་འགྲོ་བ་མིའི་རིགས་ཀྱིས་ཕྱིའི་སྣོད་བཅུད་ལ་གནོད་སྐྱོན་ག་ཚོད་ཅིག་བྱེད་ཀྱི་ཡོད་པ་གསལ་བོ་ཆགས་ཡོད་སྟབས། མ་འོངས་བར་བསླབ་བྱ་འདི་དང་དུ་བླངས་བའི་ཐོག་ནས་ཁོར་ཡུག་གཙང་མ་དང་དོན་དན་གྱི་མི་ཚེ་ཞིག་སྐྱེལ་རྒྱུ་གལ་ཆེན་པོ་ཡིན་པའི་ལམ་སྟོན་མཛད་འདུག
ཕྱོགས་མཚུངས་༸འབྲི་གུང་༸སྐྱབས་མགོན་ཆེ་ཚང་རིན་པོ་ཆེ་མཆོག་གིས་ཀྱང་དེང་སྐབས་འཛམ་གླིང་ཡོངས་རྫོགས་རིམས་ནད་ཀྱི་དངངས་སྐྲག་གི་འོག་ཏུ་འཚོ་བཞིན་ཡོད་སྟབས།་སངས་རྒྱས་བཅོམ་ལྡན་འདས་ཀྱིས་སྔོན་ཆད་ནས་ལུང་དུ་བསྟན་པ་བཞིན། འགྲོ་བ་མི་ཡོད་ཚད་སྐྱེ་རྒ་ན་འཆིའི་སྡུག་བསྔལ་ལས་ཐར་ཐབས་མེད་པའི་གནས་ལུགས་འགྲེལ་བརྗོད་དང་སྦྲགས། རིམས་ནད་དེ་ལ་དངངས་སྐྲག་བྱས་པ་ཙམ་གྱིས་ཐར་ཐབས་མེད་པར་གཙོ་བོ་འདུ་འཛོམས་ཡོད་སར་མི་འགྲོ་བར་རང་ཁྱིམ་དུ་སྡོད་རྒྱུ་གལ་ཆེན་པོ་ཡིན་པར་བཀའ་གནང་བ་དང་སྦྲགས། ཐེངས་འདིའི་རིམས་ནད་ཀྱི་ཁྲོད་གོད་ཆག་བྱུང་བའི་སྐྱེ་འགྲོ་ཡོངས་ལ་གདུང་སེམས་མཉམ་སྐྱེད་དང་ལྷན་དུ། ཁོང་རྣམས་གང་མགྱོགས་སྡུག་བསྔལ་ལས་ཐར་བའི་ཐུགས་སྨོན་སྐྱབས་འཇུག་གནང་སོང་།
རྩ་བའི་རྒྱ་ནག་ཝུ་ཧན་ནས་ཁྱབ་བརྡལ་བྱུང་བའི་ཏོག་དབྱིབས་ནད་དུག་དེས་རྐྱེན་གྱིས་འཛམ་གླིང་ས་ཕྱོགས་གང་སར་ཐེམ་སྤང་གི་བཀའ་བརྒྱའི་འོག་ཆོས་ཕྱོགས་ཀྱི་བྱེད་སྒོ་དང་མི་མང་འདུ་འཛོམས་སོགས་གནང་ཆོག་གི་མེད་སྟབས། རྒྱལ་སྤྱིའི་ནང་པའི་མཐུན་ཚོགས་ཀྱི་ངོས་ནས་ཀྱང་ཐད་གཏོང་གི་ལམ་ནས་སྤྱི་ཚོགས་དྲ་ལམ་ངོ་དེབ་དང་། youtube དེ་བཞིན་instagram སོགས་ཀྱི་བརྒྱུད་དེ་འདི་ལོའི་ Buddha Purnima ཆོས་ཕྱོགས་ཀྱི་དུས་སྟོན་སྲུང་བརྩི་ཞུས་པའི་ཆོས་ཕྱོགས་ཀྱི་མཛད་སྒོའི་ཐོག་གནས་ཆེན་ངོ་སྤྲོད་དང་། དེ་བཞིན་༸གོང་ས་མཆོག་གི་དབུས་པའི་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་དང་། ༸དཔལ་ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག ༸འབྲི་གུང་ཆེ་ཚང་རིན་པོ་ཆེ་མཆོག དེ་བཞིན་ ༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག བ་ཀུ་ལ་རིན་པོ་ཆེ་མཆོག མཆོག་སྤྲུལ་རྒྱང་ཁང་རིན་པོ་ཆེ་མཆོག དགའ་ལྡན་ཤར་རྩེ་མཁན་ཟུར་བྱང་ཆུབ་ཆོས་ལྡན་མཆོག་སོགས་བོད་ཀྱི་བླ་སྤྲུལ་ཁག་ཅིག་གིས་བཀའ་སློབ་ལམ་སྟོན་གནང་སོང་བ་མ་ཟད། རྒྱ་གར་གྱི་སྲིད་བློན་མོ་དི་མཆོག་དང་། གཞན་བློན་ཆེན་ཁག་ཅིག དེ་བཞིན་འཛམ་གླིང་ས་ཕྱོགས་གང་སར་གནས་བཞུགས་ནང་པའི་བླ་ཆེན་སོགས་ཁྱོན་གནད་ཡོད་མི་སྣ་༢༩ ལྷག་གིས་མཉམ་ཞུགས་ཀྱིས་གསུང་འཕྲིན་དང་བཀའ་སློབ་ལམ་སྟོན་བསྩལ་གནང་མཛད་ཡོད་པ་མ་ཟད། དོ་དགོང་ ༦།༣༠ ཐོག་སླར་ཡང་གནས་མཆོག་རྡོ་རྗེ་གདན་ནས་ཆོས་ཕྱོགས་ཀྱི་གནང་སྒོ་ཁག་ཅིག་ཐད་གཏོང་ཞུ་རྒྱུ་རེད་འདུག
