ཉེ་ལམ་རྒྱ་གཞུང་གིས་དབྱེ་བའི་ཀན་སུའུ་ཞིང་ཆེན་ཁུལ་དུ་རྟེན་གཞི་བྱས་པའི་མཁར་དམར་དགོན་པ་སྒོ་རྒྱག་དགོས་པ་དང་གྲྭ་བཙན་རྣམས་སྐྱ་སར་འབབ་དགོས་པའི་བཙན་བཀའ་བཏང་སྟེ་དགོན་པའི་གྲྭ་བཙུན་ཁག་ཅིག་གིས་དགོན་པའི་མདུན་ཐང་དུ་ཞལ་འདོན་གནང་སྟེ་སྲིད་གཞུང་གི་བཀའ་རྒྱར་ཞི་བའི་ངོ་རྒོལ་དང་ལ་ལས་ངོ་འབོད་སོགས་གནང་བའི་ཡིད་སྐྱོའི་གནས་ཚུལ་སྤྱི་ཚོགས་དྲྭ་ལམ་ཐོག་ཕྱིར་འགྱར་བྱུང་ཡོད་སྟབས། ཨ་རིར་རྟེན་གཞི་བྱས་པའི་བོད་རྒྱལ་ཡོངས་རང་བཙན་ལྷན་ཚོགས་དང་ཨ་བོད་མཛའ་འབྲེལ་ཚོགས་པ་གཉིས་ཀྱིས་རྒྱ་ནག་གཞུང་ཚབ་ལས་ཁང་མདུན་དུ་རྒྱ་གཞུང་གིས་བོད་བརྒྱུད་ནང་བསྟན་རྩ་མེད་གཏོང་རྒྱུའི་བྱུས་ངན་མཚམས་འཇོག་དང་གཞིས་ལུས་མང་ཚོགས་རྣམས་ཀྱི་ཆོས་དད་རང་དབང་བཙན་འཕྲོག་བྱེད་བཞིན་པར་ངོ་རྒོལ་གྱིས་ལས་འགུལ་སྤེལ་འདུག 
བོད་རྒྱལ་ཡོངས་རང་བཙན་ལྷན་ཚོགས་དང་ཨ་བོད་མཛའ་འབྲེལ་ཚོགས་པ་གཉིས་ཀྱི་གོ་སྒྲིག་འོག་ཕྱི་ཚེས་ ༦ ཉིན་གྱི་ཉིན་རྒྱབ་ཚོུད་ ༢ སྟེང་རྒྱ་ནག་གཞུང་ཚབ་ལས་ཁང་མདུན་དུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་བོད་ཀྱི་རྒྱལ་དར་དང་བོད་ལ་རང་དབང་དགོས། རྒྱ་གཞུང་གིས་བོད་བརྒྱུད་ནང་བསྟན་རྩ་མེད་བཟོ་རྒྱུའི་བྱུས་ངན་མཚམས་འཇོག་དགོས། གྲྭ་བཙུན་རྣམས་བཙན་དབང་གིས་ཕྱིར་ཕུད་དང་སྐྱ་སར་འབབ་དགོས་ཟེར་བ་ནི་རྒྱལ་ཁབ་ཀྱི་ཁྲིམས་དང་འགལ་བ་རེད་སོགས་འཁོད་པའི་འཕྲེད་དར་བསྣམས་ཏེ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག 
ཚོགས་པ་གཉིས་ཀྱིས་ཡོངས་ཁྱབ་གསལ་བསྒྲགས་སྤེལ་བར་མཁར་དམར་དགོན་པའི་གནད་དོན་དང་སྔ་ལོར་རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་ཁོངས་གཞིས་རྩེ་གྲོང་ཁྱེར་དིང་རི་རྫོང་རྒྱལ་ནོར་བྲག་ནག་གྲོང་ཚོའི་ནང་རྟེན་གཞི་བྱས་པའི་བཀྲ་ཤིས་སྟེང་འགྲོ་དགོན་པའི་དགེ་འདུན་པ་བཞིར་མི་ལོ་ ༥ ནས་ ༢༠ བར་གྱི་བཙོན་འཇུག་གི་ཁྲིམས་ཐག་བཅད་པ། དེ་བཞིན་ཟླ་ ༧ ཚེས་ ༢༠ ཡས་མས་ཤིག་ལ་བོད་མདོ་སྨད་རྔ་པ་རྫོང་སྤྲོ་ཚིགས་དགོན་པའི་རང་ལོ་ ༤༥ ཙམ་ཡིན་པའི་དགེ་བསྐོས་དཀོན་མེ་ལགས་རྒྱ་གཞུང་ཉེན་རྟོག་པས་རྒྱུ་མཚན་གང་ཡིན་གསལ་བཤད་མེད་པར་འཛིན་བཟུང་བྱས་པ་མ་ཟད། ༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་པར་བརྟེན་བོད་མི་ཁག་ཅིག་འཛིན་བཟུང་བྱས་ཡོད་པའི་གནད་དོན་ཁག་ལུང་འདྲེན་གྱིས་ རྒྱ་གཞུང་ནས་གཞིས་ལུས་མང་ཚོགས་རྣམས་ཀྱི་ཆོས་དད་རང་དབང་བཙན་འཕྲོག་བྱེད་ཀྱི་ཡོད་སྟབས་བོད་རང་བཙན་སླར་གསོ་མ་བྱུང་བར་དུ་རྒྱ་དམར་གཞུང་ལ་མཐའ་གཅིག་ཏུ་ངོ་རྒོལ་ཡོད་ཅེས་དགོས་འདུན་ཆེད་བཀོད་གནང་འདུག 
སྐབས་དེར་ཨ་བོད་མཛའ་འབྲེལ་ཚོགས་པའི་ཚོགས་གཞོན་ངག་དབང་བཀྲ་ཤིས་ལགས་ཀྱིས་ རྒྱ་ནག་གི་གཉའ་གནོན་འོག་ཡོད་པའི་བོད་མི་དང་ཧོང་ཀོང་བ། དེ་བཞིན་ཤར་ཏུར་ཀི་སི་ཏན། ཐེ་ཝན་སོགས་ནས་རྒྱ་ནག་ལ་ཁ་གཏད་གཅོག་ཕྱིར་མཉམ་ལས་ཀྱིས་རྡོག་རྩ་གཅིག་སྒྲིལ་གནང་དགོས་གལ་ཡིན་པར་གསུངས་འདུག་པ་མ་ཟད། རྒྱ་གཞུང་གིས་མཁར་དམར་དགོན་པས་ཕྱི་ལོ་ ༢༠༢༠ ལོར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་ཀྱི་གནས་སྟངས་སྐབས་དགོན་པའི་བླ་མས་ཕྱོགས་ཐམས་ཅད་དུ་ཁྱབ་པའི་སློབ་མ་རྣམས་ལ་འབོད་སྐུལ་གནང་དོན་ལྟར་ཞལ་འདེབས་ཕོན་ཆེ་བསྡུ་རུབ་གནང་སྟེ་མང་ཚོགས་ལ་རོགས་སྐྱོར་གྱི་ལས་གཞི་སྤེལ་བར་འབྲེལ་བ་བཏགས་ནས་དགོན་པ་སྒོ་རྒྱག་དགོས་པ་དང་གྲྭ་བཙུན་རྣམས་སྐྱ་བབས་དགོས་པའི་བཙན་བཀའ་བཏང་ཡོད་པ་དེ་ནི་ཁ་གཡར་ས་ཙམ་ལས་དོན་ངོ་མར་བོད་བརྒྱུད་ནང་བསྟན་རྩ་མེད་གཏོང་ཐབས་ཡིན་པ་དང་གནད་དོན་དེ་དག་བརྒྱུད་བོད་ནང་ཆོས་དད་རང་དབང་མེད་པ་མངོན་གསལ་ཆགས་ཡོད་སྐོར་གསུངས་པའི་བརྙན་པར་སྤྱི་ཚོགས་དྲ་ལམ་ཐོག་མཇལ་རྒྱུ་འདུག
དེ་བཞིན་ལས་འགུལ་ཐོག་མཉམ་ཞུགས་གནང་མཁན་ཧོང་ཀོང་གི་ལས་འགུལ་བ་ཞིག་གིས་རྒྱ་གཞུང་གིས་བོད་ནང་བྱུས་ངན་གྱི་སྲིད་བྱུས་ལག་བསྟར་བྱེད་བཞིན་པ་དེ་འགྲིག་ཐབས་མེད་པ་དང་ལྷག་པར་དུ་རྒྱ་ནག་གཞུང་དེ་བོད་དང་ཧོང་ཀོང་ཙམ་མིན་པར་འཛམ་བུ་གླིང་སྤྱིར་ཉེན་ཁ་ཆེན་པོ་ཞིག་ཏུ་གྱུར་ཡོད་སྟབས། གལ་ཏེ་ང་ཚོས་ད་ལྟ་ནས་རྒྱ་ནག་ལ་གདོང་ལེན་དང་རྒྱ་ནག་གིས་བྱེད་ཕྱོགས་ལ་གང་ཡང་མ་བརྗོད་པར་བཞུགས་ཚེ་སླད་མར་ངལ་བ་ཆེས་ཆེར་འཕྲད་མི་སྲིད་པ་མ་རེད་ཅེས་གསུངས་འདུག
