སྔར་ལོ་རྒྱ་ནག་གིས་རྒྱལ་ཁབ་ཀྱི་གསང་བ་ཕྱི་ལ་བསྒྲགས་པ་དང་སྤྱི་ཚོགས་ཀྱི་བདེ་འཇགས་དཀྲུག་པའི་ཉེས་མིང་འོག་འཛིན་བཟུང་བྱས་ཏེ་ལོ་གཅིག་དང་ཟླ་གསུམ་ཀྱི་བཙོན་ཐག་བཅད་པའི་སེར་ཤུལ་རྫོང་གི་བུད་མེད་སྒྲོལ་དཀར་ལགས་ཟླ་འདིའི་ཚེས་ ༡༥ ཉིན་ཀློད་གྲོལ་བཏང་ཡོད་ཀྱང་། ད་ཆ་ཁོང་ངལ་རྩོལ་གྱི་དབང་གིས་ནད་གཅོང་དུ་གྱུར་འདུག
གཞི་རྩའི་སྔར་ལོའི་ཕྱི་ཟླ་ ༤ ཚེས་ ༢༩ ཉིན་སྒྲོལ་དཀར་ལགས་ཀྱི་ཚ་བོ་དབང་ཆེན་ལགས་དང་། རོགས་པ་བློ་བཟང་ལགས་དང་ཡོན་ཏན་ལགས་གསུམ་གྱིས་རི་མགོར་བསང་གསོལ་བཏང་བ་དང་བསྟུན་ནས། ༧པན་ཆེན་ཆུང་སྲིད་རིན་པོ་ཆེ་མཆོག་འཕྲལ་དུ་ཀློད་གྲོལ་གཏོང་དགོས་པ་དང་། ༧རྒྱལ་བ་༧པཎ་ཆེན་རྣམ་གཉིས་བོད་རང་ཡུལ་ནས་མཇལ་འཛོམས་གནང་དགོས་པའི་སྐད་འབོད་གནང་བར་བརྟེན་རྒྱ་ནག་ཉེན་རྟོག་པས་ཁོང་རྣམས་འཕྲལ་དུ་འཛིན་བཟུང་བྱས་ཡོད་པ་རེད། གནད་དོན་དེ་དང་འབྲེལ་ནས། སྒྲོལ་དཀར་ལགས་ཀྱིས་ཁོང་རྣམ་གསུམ་འཛིན་བཟུང་བྱས་པའི་གནས་ཚུལ་ཕྱི་ལ་བཤད་པར་བསྙད་ནས་འཛིན་བཟུང་བྱས་ཏེ་ཁམས་མི་ཉག་ཉིང་ཞུ་བུད་མེད་བཙོན་ཁང་དུ་ལོ་གཅིག་དང་ཟླ་བ་གསུམ་གྱི་བཙོན་འཇུག་ཁྲིམས་ཐག་བཅད་དེ་ས་སྒོ་རྡོ་སློག་གི་ངལ་རྩོལ་བསྒྱུར་བཀོལ་ཤུགས་ཆེན་བྱེད་དུ་བཅུག་ཡོད་འདུག
ཁོང་མོ་བཙོན་གྲོལ་ཐོབ་པའི་གནས་ཚུལ་དང་འབྲེལ་ནས། འདི་གའི་གསར་འགོད་པས་ཕྱི་ལོགས་སུ་ཡོད་པའི་སྒྲོལ་དཀར་ལགས་ཀྱི་སྤུན་མཆེད་དོན་གྲུབ་བཀྲ་ཤིས་ལགས་སུ་ཁ་པར་གྱི་ལམ་ནས་བཅར་འདྲི་ཞུས་པར་ཁོང་གིས། ད་ཆ་ཁོང་ཀློད་གྲོལ་བཏང་ཡོད་ཀྱང་བཙོན་ཁང་དུ་ངལ་རྩོལ་བསྒྱུར་བཀོད་ཤུགས་ཆེན་བྱས་རྐྱེན། རྐང་ལག་བཞི་ནད་གཅོང་དུ་གྱུར་ནས་གཡོ་འགུལ་བྱེད་དཀའ་བའི་གནས་སུ་གྱུར་ཡོད་པ་དང་། ཚེས་བཅུ་དྲུག་གི་ཉིན་སྨན་ཁང་དུ་ཁྲིད་ནས་རྐང་ལག་ལས་རྣག་ཁྲག་ཕྱིར་འཐེན་བྱས་རྗེས་རང་ཁྱིམ་དུ་ལོག་ཏེ་མུ་མཐུད་དུ་སྨན་བཅོས་བྱེད་བཞིན་ཡོད་སྐོར་ངོ་སྤྲོད་གནང་སོང་།
གཞི་རྩའི་སྒྲོལ་དཀར་ལགས་བཙོན་གྲོལ་ཐོབ་ཡོད་ནའང་། ད་ཆ་ཁོང་གི་གཟུགས་གཞིའི་འཕྲོད་བསྟེན་གྱི་གནས་བབ་ཛ་དྲག་གི་ངང་གནས་ཡོད་པ་མ་ཟད། ཁ་པར་གྱི་ལམ་ནས་གཞན་ལ་འབྲེལ་འདྲིས་ཀྱང་བྱས་མི་ཆོག་པའི་བཀའ་རྒྱ་འོག་ཀློད་གྲོལ་བཏང་སྟབས་ཁོང་རང་ཁྱིམ་དུ་བཟང་བཙོན་གྱི་ཚུལ་གྱིས་གནས་ཡོད་འདུག
