རྒྱ་ནག་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་འདས་པའི་ཉིན་གྲངས་ ༤༡ ལྷག་གི་རིང་ལ་རྒྱ་གར་རྒྱལ་ཡོངས་སུ་ཐེམ་སྤང་གི་བཀའ་རྒྱ་བཏང་པའི་ཐོག་མང་ཚོགས་རྣམས་སོ་སོའི་ནང་དུ་བཞུགས་བཞིན་ཡོད་པ་དང་། ཁ་སང་ཕྱི་ཚེས་ ༤ ཉིན་ཐེམ་སྤང་གི་བཀའ་དེ་མཇུག་སྒྲིལ་ལ་ཉེ་བའི་མཚམས་འདིར་སླར་ཡང་རྒྱ་གར་དབུས་གཞུང་གིས་རིམས་ནད་སྔོན་འགོག་ལ་དམིགས་ཏེ་ཐེམ་སྤང་གི་བཀའ་རྒྱ་རིམ་པ་གསུམ་པ་དེ་བཏང་སྟེ། ཟླ་བ་འདིའི་ཕྱི་ཚེས་ ༡༧ བར་ཁྱོན་གཟའ་འཁོར་གཉིས་ཀྱི་རིང་ལ་མུ་མཐུད་ཕྱི་ལ་གང་བྱུང་མི་འགྲོ་པར་སོ་སོའི་ནང་དུ་བཞུགས་དགོས་ཀྱི་ཡོད་པ་རེད།
འོན་ཀྱང་ཐེངས་འདིའི་ཐེམ་སྤང་བཀའ་རྒྱའི་ནང་མང་ཚོགས་ཀྱི་འགྲོ་སྐྱོད་དང་། འཚོ་བའི་ལས་དོན་སོགས་ཀྱི་ཐད་ལ་ཅུང་གུ་ཡངས་སུ་བཏང་འདུག་པ་དང་། དེ་ཡང་མང་ཚོགས་རྣམས་ཉིན་ལྟར་སྔ་དྲོའི་ཆུ་ཚོད་ ༩ ནས་ཉིན་མོའི་ཆུ་ཚོད་ ༢ པའི་བར་མི་སྒེར་གྱི་ཉིན་རེའི་དགོས་མཁོ་ཉོ་རྒྱུ་སོགས་ཀྱི་སླད་དུ་ཕྱི་ལ་འགྲོ་ཆོག་པ་མ་ཟད། ཚོང་ཁང་རྣམས་ཀྱང་དེ་མཚུངས་ཀྱི་ཉིན་མོའི་ཆུ་ཚོད་ ༢ བར་སྒོ་ཕྱེ་ཆོག་གི་ཡོད་པ་རེད།
དེ་བཞིན་ཟ་ཁང་དང་ཇ་ཁང་རྣམས་ཀྱང་དེ་མཚུངས་ཀྱི་སྒོ་ཕྱེ་ཆོག་གི་འདུག་ཀྱང་ཞལ་ལག་མངགས་ཉོ་བྱས་ནས་ནང་དུ་ཁྱེར་ཆོག་པ་ལས་ཟ་ཁང་དུ་བཟའ་མི་ཆོག་གི་མི་འདུག དེ་བཞིན་དངུལ་ཁང་དང་གཞུང་སྒེར་གྱི་ལས་ཁུངས་ཁག་ཏུ་ཡང་ལས་བྱེད་གྲངས་ཚད་ངེས་ཅན་ཞིག་གིས་ལས་ཞུགས་བྱེད་ཆོག་པ་བཟོས་འདུག
དེ་བཞིན་བཞུགས་སྒར་ཀཱང་རཱ་རྫོང་ཁོངས་སུ་སྔ་དྲོའི་ཆུ་ཚོད་ ༥།༣༠ ནས་ ༧ བར་ལུས་སྦྱོང་ཆེད་ཕྱི་ལ་ཕེབས་ཆོག་གི་འདུག་པ་དང་། གུ་ཡངས་དུས་ཚོད་དེའི་སྐབས་སུ་ཚོང་བདག་དང་མང་ཚོགས་རྣམས་ཀྱིས་ཕྱི་བསྐྱོད་སྐབས་ཁ་རས་ངེས་པར་དུ་བཞེས་དགོས་ཀྱི་ཡོད་པར་འཁོད་འདུག
རྩ་བའི་ཐེངས་འདིའི་རྒྱ་གར་རྒྱལ་ཡོངས་ཐེམ་སྤང་གི་བཀའ་རྒྱ་རིམ་པ་གསུམ་འདི་ཟླ་བ་འདིའི་ཕྱི་ཚེས་ ༡༧ བར་གནས་ཀྱི་ཡོད་པ་དང་། རྒྱ་གར་ནང་ལ་ད་ལྟའི་ཆ་ལ་ཏོག་དབྱིབས་རིམས་ནད་ཕོགས་པ་མི་གྲངས་ ༤༦༤༣༣ ལྷག་དང་། འདས་གྲོངས་སུ་ཕྱིན་པའི་མི་གྲངས་ ༡༥༠༠ ལྷག་ཆགས་ཀྱི་ཡོད་པ་རེད།
