རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་རིམས་ནད་དེ་ད་ཆ་འཛམ་གླིང་ཁྱོན་ཡོངས་སུ་ཁྱབ་གདལ་ཆེས་ཆེར་འགྲོ་བཞིན་པའི་ཛ་དྲག་གི་གནས་སྟངས་ཁྲོད་འདིར་ཁ་སང་དབྱིན་ཡུལ་རྒྱལ་ས་ལོན་ཊན་ནང་གནས་བཞུགས་རང་ལོ་ ༨༢ ཡིན་པ་བོད་མི་ཀ་ཤོད་པ་འཇམ་དབྱངས་ཆོས་རྒྱལ་ལགས་ཏོག་དབྱིབས་གཉན་རིམས་རྐྱེན་པས་འདས་གྲོངས་སུ་གྱུར་འདུག
རྩ་བའི་ཁ་སང་དམ་པ་ཁོང་འདས་གྲོངས་སུ་གྱུར་བའི་གནས་ཚུལ་ཐོས་འཕྲལ་འདི་ག་རླུང་འཕྲིན་ཁང་གིས་འབྲེལ་ཡོད་དབྱིན་ཡུལ་བོད་རིགས་ཚོགས་པའི་ཚོགས་གཙོ་དགྲ་ལྷ་ཚེ་རིང་ལགས་སུ་ཞལ་པར་བརྒྱུད་ནས་བཅར་འདྲི་ཞུས་པར་དམ་པ་ཁོང་ཏོག་དབྱིབས་རིམས་ནད་ཕོག་རྐྱེན་སྐུ་ཚེ་མ་ཟིན་པ་ཞིག་ཡིན་མིན་ཐད་ལ་གསལ་ཁ་མེད་ལུགས་འགྲེལ་བརྗོད་གནང་ཡོད། འོན་ཀྱང་རླུང་འཕྲིན་ཁང་གིས་དེ་རིང་སླར་ཁོང་ལ་བཅར་འདྲི་ཞུས་པར་ཁོང་གིས་དམ་པ་ཁོང་ཐོག་མར་སྨན་པ་བསྟེན་གཏུག་གནང་སའི་སྨན་ཁང་ནས་ཏོག་དབྱིབས་རིམས་ནད་ཕོག་པར་ཐག་གཅོད་གནང་སྐོར་གསུངས་སོང་བར་མ་ཟད་འདས་པོ་ཁོང་ཡུན་རིང་ནས་གློ་ཚད་ཀྱི་སྐྲན་ནད་ཕོག་ཡོད་པར་ངོ་སྤྲོད་གནང་ཡོད།
རྩ་བའི་ཀ་ཤོད་པ་འཇམ་དབྱངས་ཆོས་རྒྱལ་ལགས་དམ་པ་ཁོང་ཁ་སང་ཕྱི་ཚེས་ ༢༤ ཉིན་དབྱིན་ཡུལ་གྱི་ཐོ་རེངས་ཚོུད་ ༡།༢༥ ཐོག་དབྱིན་ཡུལ་གྱི་རྒྱལ་ས་ལོན་ཊན་ནང་རྟེན་གཞི་བྱས་པའི་ King’s hospital སྨན་ཁང་དུ་འདས་གྲོངས་སུ་གྱུར་ཡོད་པ་རེད། ཁོང་ནི་ཏོག་དབྱིབས་རིམས་ནད་རྐྱེན་པས་བཙན་བྱོལ་ནང་གི་བོད་མི་གྲོངས་མཁན་གཉིས་པ་དེ་ཆགས་ཀྱི་ཡོད་པ་རེད།
སྤྱིར་ད་རེས་འདས་གྲོངས་སུ་གྱུར་བའི་ཀ་ཤོད་པ་འཇམ་དབྱངས་ཆོས་རྒྱལ་དམ་པ་དེ་ཉིད་གཞུང་ས་དགའ་ལྡན་ཕོ་བྲང་གི་གཞུང་ཞབས་དམ་པ་ཀ་ཤོད་པ་ཆོས་རྒྱལ་ཉི་མ་ལྷུན་གྲུབ་ལགས་ཀྱི་བུ་ཡིན་པ་དང་། ཁོང་དེ་སྔ་བོད་རང་སྐྱོང་ལྗོངས་ཀྱི་ཡུལ་སྐོར་སྤྲོ་འཆམ་ལས་ཁུངས་ཀྱི་མཐོ་རིམ་དབུ་ཁྲིད་གནང་མྱོང་འདུག་པར་མ་ཟད་ཕྱི་ལོ་ ༡༩༩༡ ལོར་ཕྱི་རྒྱལ་ལ་གཞུང་འབྲེལ་གྱི་འཚམས་འདྲི་ཞིག་ཏུ་ཕེབས་སྐབས་དབྱིན་ཡུལ་དུ་སྐྱབས་བཅོལ་ཞུས་འདུག ད་བར་དམ་པ་ཁོང་དབྱིན་ཡུལ་དུ་གནས་བཞུགས་གནང་བའི་རིང་ས་གནས་སུ་རྟེན་གཞི་བྱས་པའི་བོད་གནས་ཁྱབ་སྤེལ་ཁང་དུ་ཕྱག་ལས་གནང་བ་དང་། ལོ་ཙཱ་བ། ཉམས་ཞིབ་པ། དེ་བཞིན་སློབ་སྟོན་པ་བཅས་ཀྱི་ཕྱག་ལས་གནང་མྱོང་འདུག 
ཁོང་གིས་དབྱིན་ཡིག་ཐོག་བོད་ས་མ་ཤོར་གོང་བོད་གཞུང་བཀའ་ཤག་ནང་བཀའ་བློན་གྱི་ཕྱག་ལས་གནང་མྱོང་མཁན་ཡབ་དམ་པ་ཀ་ཤོད་པ་ཆོས་རྒྱལ་ཉི་མ་ལྷུན་གྲུབ་ལགས་ཀྱིས་༧གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་དང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ཞབས་ཕྱི་ཞུས་པའི་ལོ་རྒྱུས་ཀྱི་ཕྱག་དེབ་ཅིག་བརྩམས་ཡོད་པ་རེད། འབྲེལ་ཡོད་སྐུ་པར་ཁག་དབུས་གཙང་ཆོལ་ཁའི་ངོ་དེབ།
