ཟླ་བ་སྔོན་མའི་ཚེས་ ༢༩ དང་ ༣༠ དེ་བཞིན་ཕྱི་ཚེས་ ༣༡ བཅས་ཀྱི་ཉིན་ཞག་རིམ་པར་བོད་པའི་དྭང་སློབ་ཀྱི་དམག་མི་དང་རྒྱ་ནག་གཞུང་གི་དམག་མི་དབར་ལ་གདོང་ཐུག་བྱུང་ཡོད་པ་དང་། ལྷག་དོན་འཕགས་བོད་གཉིས་ཀྱི་ས་མཚམས་སུ་བོད་པའི་དྭང་ཞབས་པ་རྣམས་ནས་ས་ཁམས་མྱུལ་ཞིབ་གནང་སྐབས་དེ་སྔ་ས་འོག་ཏུ་བཞག་པའི་འབར་རྫས་ཤིག་གས་འཐོར་བྱུང་ནས་དྭང་སློབ་རུ་ཤོག་ཨང་བདུན་པའི་མེ་ཏོག་གཉིས་ཅན་གྱི་བརྒྱ་དཔོན་ཉི་མ་བསྟན་འཛིན་ལགས་འདས་གྲོངས་སུ་གྱུར་བའི་གནས་ཚུལ་ཐོན་ནས་ཉིན་གྲངས་ ༡༠ ཕྱིན་པའི་དུས་མཚམས་འདིར་ཁ་སང་རེས་གཟའ་ཟླ་བ་ཉིན་བཞུགས་སྒར་རྡ་རམ་ས་ལའི་གསེར་སྐྱ་མང་ཚོགས་རྣམས་ཀྱིས་ཕྱག་ཏུ་སྐུ་གཤེགས་དམ་པ་ཉི་མ་བསྟན་འཛིན་ལགས་ཀྱི་སྐུ་པར་དང་བོད་ཀྱི་རྒྱལ་དར་བསྣམས་ཏེ་ཁོང་ལ་གདུང་སེམས་མཉམ་བསྐྱེད་ཞུ་ཕྱིར་མེག་གྷན་ཁྲོམ་གཞུང་དུ་མར་མེ་ཁྲོམ་སྐོར་གནང་སོང་།
ཁ་སང་ཚེས་ ༧ ཉིན་གྱི་ཕྱི་དྲོ་ཚོུད་ ༥༌༣༠ སྟེང་རྡ་ས་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་གནང་བའི་ཐོག་ས་གནས་མང་ཚོགས་ནས་རྡ་ས་མེག་གྷན་ཁྲོམ་གཞུང་རང་དུ་མར་མེ་ཁྲོམ་སྐོར་ཐེངས་གསུམ་གནང་སོང་བ་དང་། སྐབས་དེར་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཟུར་དང་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས་མང་ཚོགས་འདུ་འཛོམས་དང་མར་མེ་ཁྲོམ་སྐོར་གནང་དོན་སོགས་ངོ་སྤྲོད་གནང་བ་དང་སྦྲགས། ཟླ་བ་འདིའི་ཚེས་ ༡ ཉིན་ཡོངས་གྲགས་མིན་པར་ཉམས་དམའ་བོའི་ཐོག་ནས་དམ་པ་ཁོང་གི་སྐུ་ཕུང་ནང་ལ་གདན་ཞུ་གནང་བར་བློ་ཕམ་བྱུང་སྐོར་གསུངས་པ་དང་ཆབས་ཅིག གཟའ་འཁོར་གཅིག་གི་ནང་ལ་འགྱུར་ལྡོག་ཆེན་པོ་བྱུང་ཡོད་པ་གསུངས་སོང་། 
ཁོང་གིས་ད་དུང་ད་ལན་འཕགས་བོད་གཉིས་ཀྱི་ས་མཚམས་སུ་འབར་རྫས་གས་འཐོར་དོན་རྐྱེན་ཁྲོད་བོད་མི་ཞིག་གི་སྐུ་སྲོག་ཤོར་ཡོད་ཀྱང་། འཕགས་བོད་གཉིས་ཀར་རྒྱལ་ཁ་ཆེན་པོ་ཐོབ་པ་མ་ཟད་དམ་པ་ཁོང་གི་མཚན་སྙན་ཐོག་ནས་བོད་མི་རིགས་དང་བོད་རྒྱལ་ཁབ་དང་བཅས་པར་དགའ་སྤོབས་གནང་འོས་ཀྱི་གནད་དོན་ཞིག་ཏུ་གྱུར་ཡོད་པར་ཚོར་ཤུགས་ཆེན་པོས་གསུངས་སོང་།
དེ་བཞིན་ཁོང་གིས་ཕྱི་ཟླ་བ་ ༦ ནས་རྒྱ་དཀར་ནག་གཉིས་ཀྱི་དམག་མིའི་དབར་དྲག་པོའི་གདོང་ཐུག་གི་གནད་དོན་ཁྲོད་རྒྱ་ནག་གི་དམག་མི་རྒྱ་གར་ས་མཚམས་སུ་བཙན་འཛུལ་བྱས་པར་བརྟེན་རྒྱ་གར་དང་བོད་མི་གཉིས་རྒྱ་ནག་གིས་བརྙས་བཅོས་གཏང་ཡུལ་གཅིག་པ་ཆགས་ཡོད་སྟབས་རྒྱ་གར་གྱི་གནད་ཡོད་མི་དང་མང་ཚོགས་ཀྱིས་བོད་དོན་གླེང་བའི་དུས་སྐབས་ཤིག་ཤར་ཡོད་སྐོར་གསུངས་སོང་།
བོད་མི་མང་སྤྱི་འཐུས་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་གིས་ཁོང་སྐུ་སྒེར་གྱི་ཐོག་ནས་ཆེད་བཅར་གནང་སྐོར་གསལ་བཤད་གནང་སོང་བ་དང་། སྐུ་གཤེགས་དམ་པ་ཉི་མ་བསྟན་འཛིན་ལགས་ཀྱིས་གཙོས་པའི་དེ་སྔའི་བོད་དམག་ཚོས་བཙན་བྱོལ་བོད་མིའི་གནས་ཡུལ་རྒྱ་གར་གྱི་བདེ་སྲུང་སླད་དུ་རྒྱ་ནག་དང་འཐབ་རྒོལ་གནང་སྟེ་རང་སྲོག་བློས་བཏང་གནང་བ་དེ་ནི་ཆེས་ཐོག་མ་མིན་སྐོར་གསུངས་སོང་།
དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་ཀྱང་དྭང་སློབ་དམག་སྒར་གྱི་གནས་སྟངས་དེ་ནི་གསང་བའི་གནད་དོན་ཞིག་ཡིན་པ་ལྟར་གཞོན་ནུ་ལྷན་ཚོགས་ཀྱིས་གསང་གནས་རང་ལ་དམ་བཟུང་གིས་ནང་དོན་དེ་བོད་མི་རིགས་ཀྱི་འཐབ་རྩོད་དང་འབྲེལ་བ་ཡོད་དོན་བཞིན་ཕྱག་ལས་གནང་སྒོ་ཁག་ཞུས་ཡོད་པ་གསུངས་སོང་།
དེ་བཞིན་ཁོང་གིས་ཕྱི་ལོ་ ༡༩༦༢ ལོར་བོད་པའི་དྭང་སློབ་ཀྱི་དམག་སྒར་ཆེད་འཛུགས་གནང་བའི་དགོས་དམིགས་ལྟར་ད་བར་ལོ་ངོ་ ༥༨ འགྲོ་ཟིན་ཀྱང་ཐོག་མའི་དམིགས་ཡུལ་བཞིན་དྭང་སློབ་བོད་དམག་དག་གིས་དཔའ་ངར་ཞུམ་པ་མེད་པར་མུ་མཐུད་གནས་ཡོད་པའི་བརྡ་ལན་ཞིག་སྤྲད་ཡོད་པ་གསུངས་ཡོད།
དམ་པ་ཁོང་དམག་སར་འདས་གྲོངས་སུ་གྱུར་བའི་གནས་ཚུལ་ཐོན་འཕྲལ་བཙན་བྱོལ་བོད་མི་དང་རྒྱ་གར་བ། དེ་བཞིན་དེ་སྔ་དམག་སྤྱི་གནང་མྱོང་མཁན་རྒྱ་གར་གྱི་ཆེས་མཐོའི་མི་སྣ་དང་རྒྱ་གར་གྱི་གསར་ཁང་ཁག་གིས་ཀྱང་ཁོང་དང་ཤུལ་ལུས་ནང་མིར་གདུང་སེམས་མཉམ་བསྐྱེད་དང་ཡི་རང་བསྔགས་བརྗོད། ཆེ་བསྟོད་བཅས་ཞུ་མུས་ཡིན་པ་རེད།
ཁ་སང་སྐུ་ཕུང་ཞུགས་འབུལ་གནང་སྐབས་རྒྱ་གར་གཞུང་འཛིན་ཚོགས་པ་ BJP རྒྱལ་ཡོངས་དྲུང་ཆེ་སྐུ་ཞབས་ Ram Madhav ལགས་ཀྱིས་གཙོས་པའི་གཞུང་འཛིན་ཚོགས་པའི་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། དེ་བཞིན་ཆེས་མཐོའི་མི་སྣ་ཁག་ཅིག་ནས་གདུང་སེམས་མཉམ་བསྐྱེད་དང་ཆེ་བསྟོད་མཚོན་ཕྱིར་ཆེད་བཅར་གནང་ཡོད་པ་རེད།
ལྷག་དོན་ཁ་སང་དང་དེ་རིང་བཅས་བོད་མིའི་གནས་ཡུལ་གཞིས་སྒར་ཁག་ཏུ་ས་གནས་བོད་ཀྱི་གཞོན་ནུ་ལྷན་ཚོགས་དང་དྭང་ཞབས་ཟུར་ཚོགས། ས་གནས་བོད་ཀྱི་བེུད་ལྷན་ཚོགས་སོགས་གཞུང་འབྲེལ་མིན་པའི་ཚོགས་སྐྱིད་ཁག་གིས་བཞུགས་སྒར་དྷ་ས་གཙོས་སྦེལ་ཀོབ། མོན་གྷོ་འདོད་རྒུ་གླིང་། ཀོ་ལོ་གྷལ། སྡེ་ར་ལྡུན། ལྡི་ལི་སོགས་སུ་མཆོད་འབུལ་སྨོན་ལམ་དང་མར་མེ་ཁྲོམ་སྐོར་གྱི་ལས་འགུལ་རྒྱ་གང་ཆེ་གནང་བཞིན་འདུག
