ཁེ་ན་ཌའི་ཨོན་ཊ་རོའི་མངའ་སྡེར་ལོ་ལྟར་༸སྐུའི་འཁྲུངས་སྐར་གྱི་ཟླ་བ་སྟེ་ཕྱི་ཟླ་ ༧ པ་དེ་ Tibetan Heritage Month བོད་ཀྱི་རིག་གཞུང་གཅེས་ནོར་གྱི་ཟླ་བ་ཞེས་སྲུང་བརྩི་ཞུ་རྒྱུ་གཏན་འབེབས་གནང་དོན་ལྟར་འདི་ལོར་ཐུན་མོང་མ་ཡིན་པའི་བོད་ཀྱི་རིག་གཞུང་གཅེས་ནོར་གྱི་ཟླ་བ་ཐེངས་དང་པོ་དེ་སྲུང་བརྩི་ཞུ་བཞིན་ཡོད་པ་རེད།
གཞི་རྩའི་བོད་ཀྱི་རིག་གཞུང་གཅེས་ནོར་གྱི་ཟླ་བ་ཞེས་སྲུང་བརྩི་ཞུ་རྒྱུ་བྱུང་བ་དེ་ནི་སྔ་ལོ་ ༢༠༢༠ ལོའི་ཕྱི་ཟླ་ ༩ ནང་ལ་ཁེ་ན་ཌའི་ཨོན་ཊ་རོའི་མངའ་སྡེའི་མང་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་བོད་ཀྱི་སྐྱེས་མ་བུ་འཁྲིད་དཀར་པོ་ཆེ་ལགས་ཀྱིས་ཡུལ་དེའི་གྲོས་ཚོགས་སུ་བོད་ཀྱི་རིག་གཞུང་གཅེས་ནོར་གྱི་ཟླ་བ་ཞེས་སྲུང་བརྩི་ཞུ་རྒྱུ་དང་འབྲེལ་བའི་ཁྲིམས་འཆར་ཞིག་ཆེད་འདོན་གནང་བར་གྲོས་ཚོགས་འཐུས་མི་རྣམ་པས་སྤྱི་མོས་ཀྱིས་རྒྱབ་སྐྱོར་གནང་ཐོག་གཏན་འབེབས་གནང་བ་ཞིག་ཡིན་པ་རེད། སྐབས་དེར་བུ་འཁྲིད་དཀར་པོ་ཆེ་ལགས་ཀྱིས་ཕྱི་ཟླ་བདུན་པ་འདི་ཁེ་ན་ཌའི་ཆེས་མཐོའི་མི་སེར་ཡིན་པ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཚིགས་ཁྱད་པར་ཅན་དང་བསྟུན་བོད་ཀྱི་རིག་གཞུང་གཅེས་ནོར་གྱི་ཟླ་བ་ཞེས་སྲུང་བརྩི་ཞུ་གཏན་ཁེལ་བ་ནི་བོད་མི་རིགས་ཀྱི་སོར་ཆུད་ཀྱི་མཚོན་རྟགས་ཤིག་ཆགས་ཀྱི་ཡོད་པར་གསུངས་ཡོད།
འདི་ག་རླུང་འཕྲིན་ཁང་གིས་ད་རེས་ཁེ་ན་ཌའི་ཨོན་ཊ་རོའི་མངའ་སྡེར་བོད་ཀྱི་རིག་གཞུང་གཅེས་ནོར་གྱི་ཟླ་བ་ཐེངས་དང་པོ་དེ་སྲུང་བརྩི་ཞུ་བཞིན་པ་དང་འབྲེལ་ཏེ་བུ་འཁྲིད་དཀར་པོ་ཆེ་ལགས་སུ་བཀའ་འདྲི་ཁག་ཅིག་ཞུས་པར་ཁོང་གིས་ང་ཚོ་བོད་པ་རྣམས་ཕྱིའི་ལུང་པ་འདྲ་མིན་ནང་གནས་བཞིན་ཡོད་སྟབས་སོ་སོའི་མི་རིགས་ཀྱི་ངོ་བོ་མ་བརླག་པ་གནང་གལ་ཏུ་ངོས་འཛིན་ཐོག་ས་གནས་ཨོན་ཊ་རོའི་མངའ་སྡེའི་གྲོས་ཚོགས་འཐུས་མི་ཡིན་པའི་དབང་ཚད་དང་། ལྷག་པར་དུ་དོ་བདག་རང་ཉིད་བོད་པ་ཞིག་ཀྱང་ཡིན་པའི་འགན་ཆགས་ཀྱི་ཡོད་པར་བརྟེན་ས་གནས་སུ་བོད་ཀྱི་རིག་གཞུང་གཅེས་ནོར་གྱི་ཟླ་བ་སྲུང་བརྩི་ཞུ་ཐུབ་སླད་ལོ་གཅིག་ལྷག་གི་རིང་སྐུ་ལས་སྐྱོན་སྐོར་དྲན་གསོ་གནང་སོང་། 
ཁོང་ནས་བོད་ཀྱི་རིག་གཞུང་གཅེས་ནོར་གྱི་ཟླ་བ་ཞེས་པ་དེ་གྲོས་ཚོགས་ནས་གཏན་འབེབས་ཟིན་པའི་ཁྲིམས་ཤིག་ཆགས་ཀྱི་ཡོད་སྟབས་ས་གནས་གཞུང་ནས་བོད་པའི་མི་རིགས་དང་རིག་གཞུང་ལ་ཆེ་མཐོང་དང་ངོས་འཛིན་ཡོད་པའི་མཚོན་རྟགས་ཤིག་ཀྱང་ཆགས་ཡོད་པ་དང་། བོད་མིའི་ངོས་ནས་གོ་སྐབས་འདི་དམ་འཛིན་གནང་རྒྱུ་གལ་ཆེན་པོ་རེད་ཅེས་གསུངས་ཡོད། 
ད་རེས་ཁེ་ན་ཌའི་ཨོན་ཊ་རོའི་མངའ་སྡེའི་ནང་དུ་ཆེས་ཐོག་མ་བོད་ཀྱི་རིག་གཞུང་གཅེས་ནོར་གྱི་ཟླ་བ་སྲུང་བརྩི་དང་འབྲེལ་བའི་ལས་རིམ་ཐོག་མ་དེ་ཕྱི་ཚེས་ ༤ ཉིན་དྲྭ་ཐོག་བརྒྱུད་གནང་ཡོད་པ་ལྟར་སྐབས་དེར་བཀའ་ཟུར་བདེ་སྐྱིད་ཆོས་དབྱངས་ལགས་དང་ཨོན་ཊ་རོའི་མངའ་སྡེའི་གྲོས་ཚོགས་འཐུས་མི་བོད་ཀྱི་སྐྱེས་མ་བུ་འཁྲིད་དཀར་པོ་ཆེ་ལགས་གཙོས་ས་གནས་བོད་རིགས་ཚོགས་པ་ཁག་གི་སྐུ་ཚབ་སོགས་ནས་བོད་མཐོ་སྒང་ནས་ཨོན་ཊ་རོ་བར་ཞེས་པའི་བརྗོད་གཞི་འོག་ཁེ་ན་ཌ་དང་བོད་མིའི་དབར་གྱི་འབྲེལ་བའི་བྱུང་རིམ་དང་ས་གནས་བོད་རིགས་ཚོགས་པ་ཁག་གི་ལོ་རྒྱུས་སོགས་ཀྱི་ཐོག་ལ་གླེང་མོལ་གནང་འདུག
གངས་ལྗོངས་ཆོས་ལྡན་གླིང་གི་ཚོགས་གཙོ་ཚེ་རིང་དབང་རྒྱལ་ལགས་སུ་ཞལ་པར་བརྒྱུད་བོད་ཀྱི་རིག་གཞུང་གཅེས་ནོར་གྱི་ཟླ་བ་སྲུང་བརྩི་དང་འབྲེལ་མཛད་རིམ་སྐོར་རྒྱུས་ལོན་ཞུས་པའི་སྐབས་སུ་ཁུལ་དེར་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཁག་གིས་ཐུགས་འགན་བཞེས་པའི་ཐོག་བོད་ཀྱི་རིག་གཞུང་དང་འབྲེལ་བའི་མཛད་རིམ་སྣ་མང་ཞིག་གོ་སྒྲིག་གནང་རྒྱུ་དང་། ལྷག་དོན་ཟླ་ ༧ ཚེས་ ༡༠ ཉིན་གངས་ལྗོངས་ཆོས་ལྡན་གླིང་གིས་གོ་སྒྲིག་ཐོག་བོད་ཀྱི་རིག་གཞུང་ངོ་སྤྲོད་དང་འབྲེལ་བའི་མཛད་རིམ་དང་། ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ཕྱི་ཚེས་ ༡༩ ནས་ ༢༣ བར་གློག་བརྙན་གཟིག་འབུལ་གྱི་མཛད་རིམ་ཞིག་ཀྱང་གོ་སྒྲིག་ཞུ་རྒྱུ་ཡིན་སྐོར་གསུངས་ཡོད།
དེ་བཞིན་ས་གནས་བོད་རང་བཙན་སློབ་ཕྲུག་ཚོགས་པས་ཕྱི་ཚེས་ ༢༦ ནས་ ༣༠ བར་ཡར་ཐོན་ཚོང་ལས་གཉེར་བཞིན་པའི་བོད་པའི་གཞོན་སྐྱེས་ཁག་ཅིག་དང་གླེང་མོལ་གྱི་ལེ་ཚན་དང་། ཨོན་ཊ་རོའི་ས་གནས་བེུད་ལྷན་ཚོགས་དང་ས་གནས་མདོ་མདོ་ཁམས་ཆུ་བཞི་སྒང་དྲུག་གཉིས་ཀྱིས་ཕྱི་ཚེས་ ༡༤ རེས་གཟའ་ལྷག་པ་ལྷག་དཀར་དང་བསྟུན་བོད་ཆོལ་ཁ་གསུམ་གྱི་ཐུན་མོང་མ་ཡིན་པའི་ཆས་གོས་འགྲེམས་སྟོན་དང་གཞས་སྣ་འཁྲབ་སྟོན་སོགས་ཀྱི་མཛད་རིམ་གོ་སྒྲིག་ཞུ་འཆར་འདུག
གཞི་རྩའི་ཁེ་ན་ཌའི་རྒྱལ་ཁབ་དེ་ནི་བོད་མི་ཚོར་སྐྱབས་བཅོལ་གྱི་རོགས་གནང་མཁན་ཕྱིའི་རྒྱལ་ཁབ་ཐོག་མའི་གྲས་ཤིག་ཡིན་པ་དང་དེའི་ནང་ནས་ཡུལ་དེའི་ཨོན་ཊ་རོའི་མངའ་སྡེ་ལྟ་བུར་མཚོན་ན་ཁེ་ན་ཌ་ནང་བོད་མི་ཐོག་མ་འབྱོར་སའི་ས་ཚིགས་ཤིག་ཡིན་པ་མ་ཟད་ད་ལྟའི་ཆ་ལ་མངའ་སྡེ་དེའི་ནང་ཁྱོན་བོད་མི་དྲུག་སྟོང་ལྷག་གནས་སྡོད་བྱེད་བཞིན་ཡོད་པ་རེད། མངའ་སྡེ་དེའི་གྲོས་ཚོགས་ནས་ཕྱི་ཟླ་བདུན་པ་འདི་བོད་ཀྱི་རིག་གཞུང་གཅེས་ནོར་གྱི་ཟླ་བ་ཞེས་སྲུང་བརྩི་ཞུ་རྒྱུར་གཏན་འབེབས་གནང་བ་ནི་ད་བར་བཙན་བྱོལ་བོད་མིའི་ལོ་རྒྱུས་ཁྲོད་ཕྱིའི་རྒྱལ་ཁབ་ཅིག་ནས་བོད་ཀྱི་མི་རིགས་དང་རིག་གཞུང་ལ་ཆེ་མཐོང་དང་སྦྲགས་ལོ་ལྟར་སྲུང་བརྩི་ཞུ་རྒྱུའི་དུས་ཚིགས་ཤིག་ཁྲིམས་ཐོག་ནས་གཏན་འབེབས་གནང་བ་ཆེས་ཐོག་མ་དེ་ཆགས་ཀྱི་ཡོད་པ་རེད།
