ཉེ་ལམ་བོད་ཕྲུག་ཁྱིམ་སྡེའི་སྤྱི་ཁྱབ་ཡིག་ཚང་གིས་དེ་རིང་ནས་བཟུང་ཟླ་དུས་ཚེས་གྲངས་རིམ་པར་གཏན་འབེབས་ཀྱིས་སློབ་མ་རྣམས་སློབ་གྲྭར་རིམ་འབྱོར་དགོས་པའི་གསལ་བསྒྲགས་གནང་གནང་བ་ལྟར་དེ་རིང་དངོས་སུ་སློབ་ཕྲུག་རྣམས་སློབ་གྲྭར་འབྱོར་བཞིན་འདུག སྤྱིར་ད་ཆ་ཏོག་དབྱིབས་གཉན་རིམས་ཁྱབ་གདལ་བྱུང་ནས་ལོ་གཅིག་ལྷག་འགྲོ་མུས་ཁྲོད་འདིར་རྒྱ་གར་དབུས་ས་གཉིས་ཀྱིས་སློབ་གྲྭ་ཁག་ཚོགས་འཐུས་ཆོག་པའི་བཀོད་ཁྱབ་གནང་ཡོད་པ་ལྟར་བོད་ཕྲུག་ཁྱིམ་སྡེས་དེ་རིང་འཛིན་རིམ་ལྔ་པ་དང་བརྒྱད་པ། བཅུ་པ་དང་བཅུ་གཉིས་ཀྱི་སློབ་མ་རྣམས་གསར་ཞུགས་ཚོ་སློབ་གྲྭར་འབྱོར་དགོས་པ་དང་། ཕྱི་ཚེས་ ༡༡ ཉིན་འཛིན་རིམ་དྲུག་པ་དང་དགུ་པའི་སློབ་ཕྲུག དེ་བཞིན་ཕྱི་ཚེས་ ༢༢ ཉིན་འཛིན་རིམ་བཞི་པ་མན་གྱི་སློབ་མ་རྣམས་སློབ་གྲྭར་འབྱོར་དགོས་པ། སློབ་གྲྭར་འབྱོར་ཚེ་བདུན་ཕྲག་གཅིག་གི་རིང་འགོག་དབྱེ་ཟུར་འཇོག་དུ་བཞུགས་དགོས་པའི་བཀོད་ཁྱབ་གནང་ཡོད་པ་རེད།བཀོད་ཁྱབ་གཞིར་བཟུང་དེ་རིང་དྷ་སྟེང་བོད་ཁྱིམ་དུ་འཛིན་རིམ་ལྔ་པ་དང་བརྒྱད་པ། བཅུ་པ་དང་བཅུ་གཉིས་ཀྱི་གསར་ཞུགས་སློབ་མ་རྣམས་སློབ་གྲྭར་འབྱོར་བཞིན་པ་དང་བསྟུན་སློབ་གྲྭའི་ལས་བྱེད་ཚོས་སློབ་ཕྲུག་རྣམས་ཀྱི་ཅ་དངོས་ལ་དུག་སེལ་དང་རྒྱལ་སྒོར་ཚ་བ་ཡོད་མེད་བརྟག་དཔྱད་སོགས་གནང་གི་འདུག གཞི་རྩའི་སློབ་གྲྭའི་བཀོད་ཁྱབ་ལམ་སྟོན་ལ་གཞིགས་ན། ཕྲུ་གུ་རྣམས་སློབ་གྲྭར་བསྐྱོད་པར་ཕ་མའི་ངོས་ནས་མོས་མཐུན་ཡོད་པའི་ངོས་སྦྱོར་འགན་ཡིག་དང་ཏོག་དབྱིབས་གཉན་རིམས་ ༡༩ བརྟག་དཔྱད་གནང་བའི་ངོས་འབྱོར། འཛིན་རིམ་དགུ་པ་ཡན་གྱི་སློབ་མ་རྣམས་ནས་ལག་ཐོགས་ཁ་པར་སོགས་མཉམ་འཁྱེར་ཆོག་པར་མ་ཟད་ཁ་པར་སོགས་བེད་སྤྱོད་གཏོང་ཕྱོགས་ཐད་སློབ་གྲྭའི་འབྲེལ་ཡོད་ཚོས་སྟངས་འཛིན་དམ་དོན་གནང་རྒྱུ་དང་། སླད་མར་རྒྱ་གར་དབུས་ས་གཉིས་ནས་བཀོད་ཁྱབ་དང་སློབ་གྲྭ་ཚོགས་མ་ཐུབ་པའི་གནས་སྟངས་འབྱུང་ཚེ་སྐབས་དང་དུས་ལ་ཕ་མར་འབྲེལ་བ་གནང་རྒྱུ་ཡིན་པ་བཅས་འཁོད་འདུག སམ་བྷོ་ཊ་སྤྱི་ཁྱབ་ཡིག་ཚང་གིས་སློབ་སྡེ་སོ་སོའི་འགན་འཛིན་ནས་ས་གནས་ཀྱི་གནས་བབ་དང་ལམ་སྟོན་ལ་གཞིགས་ནས་སློབ་གྲྭ་ཚོགས་འཐུས་ཀྱི་ལམ་སྟོན་གནང་བའི་ཁྲོད་མེས་དབོན་གཙུག་ལག་དཔེ་སྟོན་སློབ་གྲྭའི་འཛིན་རིམ་དྲུག་པ་ནས་དགུ་པའི་སློབ་མ་རྣམས་ཟླ་ ༣ ཚེས་ ༡༥ ཉིན་ནས་འཛིན་གྲྭ་འཚོགས་རྒྱུ་དང་ཟླ་ ༤ ཚེས་ ༡ ཉིན་འཛིན་རིམ་དང་པོ་ནས་ལྔ་པ། དེ་བཞིན་སྔོན་འགྲོའི་འཛིན་གྲྭ་ཁག་ཟླ་ ༤ ཚེས་ ༡༥ ཉིན་འཚོགས་རྒྱུའི་གསལ་བསྒྲགས་གནང་ཡོད།མ་སུ་རི་བོད་ཁྱིམ་ལྟ་བུར་མཚོན་ན་ད་ལྟའི་ཆར་འཛིན་རིམ་བཅུ་པ་དང་བཅུ་གཉིས་ཀྱི་སློབ་ཕྲུག་རྣམས་ཡིག་རྒྱུགས་ནང་ཞུགས་དགོས་སྟབས་དེ་དག་གི་སློབ་མ་རྣམས་འབྱོར་བཞིན་པ་དང་། དེ་མིན་གྱི་འཛིན་གྲྭ་གཞན་རྣམས་རྗེས་སུ་འཚོགས་རྒྱུ་ཡིན་སྐོར་གསུངས་སོང་།