དེང་སྐབས་བོད་ནང་ཏོག་དབྱིབས་གཉན་རིམས་ ༡༩ ཁྱབ་གདལ་ཆེས་ཆེར་འགྲོ་བཞིན་ཡོད་པ་དང་བསྟུན། དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་ཀྱི་གཞོན་ནུའི་ལྷན་ཚོགས་ཀྱི་གོ་སྒྲིག་འོག་གདུང་སེམས་མཉམ་བསྐྱེད་ཀྱི་མཆོད་འབུལ་ཚོགས་སོང་།
དེ་རིང་ཉིན་རྒྱབ་ཕྱག་ཚོད་ ༢ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སེར་སྐྱ་མང་ཚོགས་འདུ་འཛོམས་ཀྱིས་གཞིས་བཞུགས་བོད་མི་རྣམས་ཀྱི་རྐྱེན་ངན་བར་ཆད་ཐམས་ཅད་དང་། ལྷག་དོན་ད་ལྟའི་ཆར་དབྱིབས་རིམས་ནད་ཁྱབ་གདལ་གྱི་ཛ་དྲག་གནས་སྟངས་གཙོས་འབྱུང་བཞིའི་འཇིག་པ་ཐམས་ཅད་མྱུར་དུ་ཞི་བ་དང་། དེ་བཞིན་གཞིས་བཞུགས་བོད་མི་རྒྱ་ཆེ་མང་ཚོགས་ལ་གདུང་སེམས་མཉམ་བསྐྱེད་མཚོན་ཕྱིར་བསྔོ་སྨོན་མཆོད་འབུལ་རྒྱས་པ་ཞིག་ཚོགས་ཡོད།
རྩ་བའི་ཉེ་ལམ་བོད་ཀྱི་ས་ཁུལ་ཁག་ཏུ་ཏོག་དབྱིབས་གཉན་རིམས་ཁྱབ་གདལ་ཤུགས་ཆེར་འགྲོ་བཞིན་པའི་ཁྲོད་བོད་ནང་རྒྱ་ནག་གཞུང་གིས་བོད་ཀྱི་ས་གནས་གང་སར་སྒོ་རྒྱ་བསྡམས་པའི་ཁྲིམས་གཞི་ལག་བསྟར་བྱེད་བཞིན་པ་དང་། གནས་ཚུལ་དེ་དང་འབྲེལ་ནས་རྒྱ་ནག་དམར་ཤོག་ཚོགས་པའི་འཕྲོད་བསྟེན་དང་བདེ་ཐང་ལྷན་ཚོགས་ཀྱིས་གསལ་བསྒྲགས་སྤེལ་བར་ཕྱི་ཚེས་ ༢༣ ཉིན་བོད་རང་སྐྱོང་ལྗོངས་ཟེར་བའི་ནང་ཏོག་དབྱིབས་གཉན་རིམས་གསར་དུ་ཕོག་མཁན་གྱི་གྲངས་ཐོར་ཁྱོན་མི་ ༥༦༦ བྱུང་ཡོད་པ་དང་། དེ་བཞིན་ཁ་སང་ཕྱི་ཚེས་ ༢༤ ཉིན་མི་ ༥༥༨ དང་དེ་དག་ལས་ཁྱོན་མི་གྲངས་ ༥༢༡ ལ་ནད་རྟགས་མེད་གང་ཡང་མེད་སྐོར་བཀོད་འདུག རྒྱ་ནག་དབུས་གཞུང་གི་བརྙན་འཕྲིན་གྱི་དྲ་ལམ་ཐོག་ཏུ་སྤེལ་བའི་གནས་ཚུལ་ལ་གཞིགས་ན་ད་ལྟའི་ཆར་ཁྱོན་མི་གྲངས་ ༤༧༠༠༠ ལྷག་ཟུར་བཀག་འོག་བཞག་ཡོད་པ་རེད་འདུག
དེ་བཞིན་བོད་ནང་གི་བརྒྱུད་ལམ་ཁག་ལ་གཞིགས་ཚེ་ཁ་སྔོན་རྒྱ་ནག་དམར་ཤོག་ཚོགས་པས་གཞིས་ཀ་རྩེ་ཁུལ་དུ་ཏོག་དབྱིབས་གཉན་རིམས་དེ་དང་འབྲེལ་བའི་ལས་བྱེད་ཁྱོན་ ༧༧ ལ་ལས་ཀ་འཐུས་ཚང་མེད་པར་སྐྱོན་བརྗོད་བྱས་ཏེ་དེ་དག་ལས་ལས་བྱེད་ ༡༠ གནས་དབྱུང་བཏང་འདུག་པ་དང་། བདུན་ཕྲག་སྔོན་མར་ལས་བྱེད་ ༥ གནས་དབྱུང་བཏང་ཡོད་པ་རེད།
གཞི་རྩའི་བོད་ནང་ཉེ་ལམ་གཉན་རིམས་འགོག་ཐབས་དང་འབྲེལ་བའི་སྒྲིག་ཁྲིམས་ལས་འགལ་ཡོད་ཚུལ་འོག་རྒྱ་གཞུང་གི་ཉེན་རྟོག་པས་བོད་མི་ཁག་གཅིག་འཛིན་བཟུང་བྱས་པ་དང་སྐབས་འགར་བོད་མི་རྣམས་ལ་གཉན་རིམས་ནད་དུག་ལ་ཁག་དཀྲིས་ཏེ་དོན་མེད་སུན་གཙེར་བཟོ་བཞིན་ཡོད་པ་རེད།
