བོད་རང་བཙན་སློབ་ཕྲུག་ཚོགས་པའི་ཚོགས་མི་ཁག་གཅིག་གིས་རྒྱ་ས་ལྡི་ལིར་རྒྱ་ནག་གི་ཕྱི་སྲིད་བློན་ཆེན་ Wang Yi མ་འབྱོར་བའི་ཚོུད་ཕྱེད་ཀའི་སྔ་རོལ་དུ་རྒྱ་མི་བོད་ནས་ཕྱིར་ཐོན་དགོས་པའི་ངོ་རྒོལ་གྱི་ལས་འགུལ་སྤེལ་འདུག
དེའང་དེ་རིང་ཐོ་རངས་ཚོུད་དང་པོ་ཡོལ་ཙམ་ལ་བོད་རང་བཙན་སློབ་ཕྲུག་ཚོགས་པའི་རྒྱ་གར་རྒྱལ་ཡོངས་ཀྱི་འགན་འཛིན་བསྟན་འཛིན་ཚེ་ལྷ་ལགས་ཀྱིས་གཙོས་པའི་ཚོགས་མི་ཁག་གཅིག་གིས་རྒྱལ་ས་ལྡི་ལིའི་ཟམ་ཆེན་ཞིག་གི་ཐོག་ནས་རིང་ཚད་ཧྤེ་ཊི་བཅིུས་ལྷག་ཡོད་པའི་རྒྱ་མི་ད་ལྟ་རང་བོད་ནས་ཕར་རྒྱུགས་ཤིག་ཞེས་པའི་རས་བྱང་ཞིག་བཤམས་འདུག་པ་མ་ཟད། སྐབས་དེར་ཚོགས་པའི་ལས་འགུལ་འགན་འཛིན་རིག་འཛིན་ཆོས་སྒྲོན་ལགས་ཀྱིས་བརྙན་པར་བརྒྱུད་ཐེངས་འདིའི་ལས་འགུལ་ཐོག་ནས་རྒྱ་ནག་གི་ཕྱི་སྲིད་བློན་ཆེན་ Wang Yi གཙོས་པའི་དཔོན་རིགས་ཁག་ལ་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནད་དོན་དང་བོད་ནང་བོད་མི་ ༡༦༠ ལྷག་གིས་རང་ལུས་མེར་བསྲེགས་གནང་བ་སོགས་ཀྱི་འགན་ཡོངས་རྫོགས་ཁྱེར་དགོས་པའི་བརྡ་ལན་སྤྲོད་བཞིན་ཡོད་པ་གསུངས་འདུགཁོང་གིས་ད་དུང་རྒྱ་གར་གྱི་ཕྱི་སྲིད་བློན་ཆེན་ལྕམ་ Sushma Swaraj མཆོག་ལའང་གོ་སྐབས་དེ་དམ་འཛིན་གནང་ཐོག་ Wang Yi དང་ལྷན་བོད་ཀྱི་གནད་དོན་ངེས་པར་དུ་གླེང་དགོས་པ་དང་། དེ་བཞིན་རྒྱ་དཀར་ནག་གཉིས་ཀྱི་མཛའ་འབྲེལ་དེའི་ཁྲོད་འགྲོ་བ་མིའི་ཐོབ་ཐང་གི་གནས་དོན་དེ་ནམ་ཡང་གློས་བཏང་གནང་རྒྱུ་མེད་པར་རེ་སྐུལ་ནན་པོ་ཞུས་འདུག
གཞི་རྩའི་རྒྱ་ནག་གི་ཕྱི་སྲིད་བློན་ཆེན་ Wang Yi དེ་རིང་ཚེས་ ༢༡ ཉིན་ཐོ་རངས་ཚོུད་ ༡༌༤༠ ཙམ་ལ་རྒྱལ་ས་ལྡི་ལིར་འབྱོར་ཡོད་པ་དང་། ཁོང་ནས་གཙོ་བོ་ཁུལ་དེའི་ནང་རྒྱ་གར་གྱི་ཕྱི་སྲིད་བློན་ཆེན་ལྕམ་སྐུ་ Sushma Swaraj མཆོག་དང་ལྷན་ཕྱོགས་གཉིས་དབར་གྱི་འཆར་ལོའི་འབྲེལ་ལམ་ཐོག་ཆེས་མཐོའི་ལྷན་ཚོགས་ཤིག་གནང་རྒྱུ་དང་། དེའང་འདི་ལོའི་ཟླ་ ༤ ཚེས་ ༢༧ དང་ ༢༨ བཅས་ཉིན་གཉིས་རིང་རྒྱ་ནག་གི་ Wuhan གྲོང་ཁྱེར་དུ་རྒྱ་གར་གྱི་སྲིད་བློན་མི་དཱི་དང་སྲིད་འཛིན་ཞི་ཅིང་ཕིང་གཉིས་དབར་ཕྱོགས་གཉིས་ཀྱི་འབྲེལ་ལམ་དམ་ཟབ་ཏུ་གཏང་རྒྱུ་གཙོ་གྱུར་རྒྱལ་སྤྱིའི་གནད་དོན་ཁག་གཅིག་གི་ཐོག་བསམ་ཚུལ་བརྗེ་ལེན་གྱི་ནང་མོལ་གྲོས་བསྡུར་གནང་ཡོད་པ་ལྟར། དེའི་མཇུག་སྐྱོང་ཚུལ་དུ་གནང་གི་ཡོད་པ་ཞིག་ཆགས་ཀྱི་འདུག
ལས་རིམ་ལྟར་ན། ཕྱི་སྲིད་བློན་ཆེན་ Wang Yi ནས་ཐེངས་འདིའི་གཞུང་འབྲེལ་ཕྱོགས་བསྐྱོད་སྐབས་རྒྱ་གར་གྱི་སྲིད་འཛིན་མཆོག་དང་ལྷན་མཇལ་མོལ་གནང་རྒྱུ་མ་ཟད་དེ་བཞིན་ Aurangabad དང་ Mumbai གྲོང་ཁྱེར་བཅས་སུའང་བསྐྱོད་ཀྱི་ཡོདཔ་རེད།