ཟླ་ ༡༢ ཚེས་ ༡༧ ནས་ ༢༤ བར་རྒྱ་གར་བྱང་ཕྱོགས་ཤི་རི་ནཱ་གཱར་ནང་གནས་སྡོད་བོད་རིགས་ཁ་ཆེའི་དགེ་སློབ་བཅས་ཡོད་པའི་རུ་ཁག་གཅིག་བཞུགས་སྒར་དུ་བོད་མིའི་སྒྲིག་འཛུགས་དང་བོད་སློབ་ཁག གཞུང་འབྲེལ་མིན་པའི་ཚོགས་སྡེ་ཁག་ལ་ཆེད་བསྐྱོད་ཀྱིས་བོད་ཀྱི་རིག་གཞུང་དང་སྒྱུ་རྩལ་སོགས་རྒྱུས་ལོན་གྱི་ཤེས་ཡོན་ལྟ་སྐོར་གནང་བཞིན་ཡོད་པ་རེད།
བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་མཐུན་འགྱུར་དང་དེ་སྔ་བོད་རིགས་ཁ་ཆེ་བའི་དངོས་བྱུང་གློག་བརྙན་བཟོ་སྐྲུན་པ་སྐལ་བཟང་འཛིགས་མེད་ལགས་ཀྱིས་རྐང་འགན་བཞེས་ཐོག་ཤི་རི་ནཱ་གཱར་ནང་རྟེན་གཞི་བྱས་པའི་ Tibetan public school ནས་ཡིན་པའི་བོད་རིགས་ཁ་ཆེའི་སློབ་མ་ ༡༥ དང་བོད་རིགས་ཁ་ཆེའི་དགེ་རྒན་ ༣ དེ་བཞིན་ཕ་མའི་སྐུ་ཚབ་གཉིས་བཅས་ཕེབས་ཡོད་པ་དང་བསྟུན། དེ་རིང་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་། སྤྱི་འཐུས་ལྷན་ཚོགས། བོད་ཀྱི་དཔེ་མཛོད་ཁང་། དབུས་སྨན་རྩིས་ཁང་བཅས་ལ་འཚམས་གཟིགས་གནང་ཡོད་པ་རེད།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་གྲོས་ཚོགས་ཀྱི་བྱུང་རབས་དང་འཕེལ་རིམ་སོགས་ངོ་སྤྲོད་གནང་བ་དང་འབྲེལ། ང་ཚོའི་ཕ་ཡུལ་དེ་བོད་ལ་ཡོད་པ་དང་ད་ཆ་ང་ཚོ་མིའི་ལུང་པར་གྱར་ནས་གནས་ཡོད་ནའང་བོད་ཀྱི་རང་དབང་སླར་གསོའི་ཆེད་དུ་མང་གཙོའི་ལམ་ལུགས་དང་མཐུན་པའི་སྒྲིག་འཛུགས་ཤིག་ཡོད་པ་མ་ཟད། སྒྲིག་འཛུགས་དེའང་སྲིད་དོན་ཚོགས་པ་མེད་པའི་སྒྲིག་འཛུགས་དམིགས་བསལ་བ་ཞིག་ཡིན་སྐོར་གསུངས་ཡོད་པ་རེད།
དེ་བཞིན་བོད་མིའི་སྒྲིག་འཛུགས་ཀྱི་ཤེས་རིག་དྲུང་ཆེ་ཀརྨ་སེང་གེ་ལགས་ཀྱིས་ཤེས་རིག་ལས་ཁུངས་ཀྱི་གནང་སྒོ་ཁག་ངོ་སྤྲོད་གནང་བ་དང་། ལོ་ལྟར་ཤེས་རིག་ལས་ཁུངས་ཀྱིས་གོ་སྒྲིག་འོག་སློབ་གྲྭའི་རྒན་བདག་དང་། སློབ་མ། དགེ་རྒན་བཅས་ལ་ཟབ་སྦྱོང་འདྲ་མིན་གོ་སྒྲིག་གནང་མུས་ཡིན་སྐོར་དང་། དེར་མཉམ་ཞུགས་གནང་བློ་ཡོད་ཚེ་དེ་ལྟར་གོ་སྒྲིག་ཞུ་ངེས་ཡིན་ཞེས་གསུངས་ཡོད། 
ཐེངས་འདིའི་ཤེས་ཡོན་ལྟ་སྐོར་དུ་ཆེད་བཅར་ཞུས་པའི་བོད་རིགས་ཁ་ཆེ་བའི་སློབ་མ་ཁག་གཅིག་དང་དགེ་རྒན་བཅས་ལ་ཤེས་ཡོན་ལྟ་སྐོར་དང་འབྲེལ་བའི་བཅར་འདྲི་ཁག་གཅིག་ཞུས་ཡོད།
གཞི་རྩའི་རྒྱ་ནག་གིས་བོད་ལ་དབང་སྒྱུར་བྱས་རྗེས་གཞིས་ཀ་རྩེ་དང་ལྷ་སར་གནས་སྡོད་བོད་པ་ཁ་ཆེའི་ཁྱིམ་ཚང་བརྒྱ་སྐོར་ཞིག་རང་གི་ཕ་མེས་ནས་ཡོད་པའི་ཆོས་ལུགས་རྒྱུན་འཛིན་ཐུབ་རྒྱུ་གཙོ་བོར་དམིགས་ཏེ་རྒྱ་གར་ལ་ཕྱིར་ལོག་གིས་ཡུལ་འདིའི་མི་སེར་བཞེས་ཡོད་པ་དང་། ད་ལྟའི་ཆར་བོད་རིགས་ཁ་ཆེ་ཁ་ཤས་ཀྱི་ཁྱིམ་ཚང་བོད་ཀྱི་རྒྱལ་ས་ལྷ་སར་ཡོད་པ་དང་། ལ་ལ་ནི་རྒྱ་གར་གྱི་ཧི་མཱ་ལ་ཡའི་རི་རྒྱུད་ཀྱི་གྲོང་སྡེ་ཁག་ཏུ་གནས་སྡོད་བྱེད་བཞིན་ཡོད་ཀྱང་། བཙན་བྱོལ་བའི་བོད་རིགས་ཁ་ཆེ་བ་མང་ཆེ་ཤོས་ནི་ཀཱཤམིར་ནང་འཚོ་སྡོད་གནང་གི་ཡོད་པ་རེད། དེ་སྔ་བོད་ནང་རྒྱལ་མཆོག་ལྔ་པ་ཆེན་པོའི་༸སྐུ་དུས་སུ་བོད་པའི་ཁ་ཆེ་བ་ཚོར་གཟིགས་པ་ཆེན་པོ་ཡོད་པའི་ལོ་རྒྱུས་ལྡན་པ་ལྟར། ༸གོང་ས་མཆོག་ནས་ཀྱང་སྔ་རྗེས་སུ་རྒྱ་གར་བྱང་ཕྱོགས་ Srinagar ནང་གི་བོད་རིགས་ཁ་ཆེ་བ་ཚོས་བོད་སྐད་ཧ་ཅང་ཡག་པོ་བསྐྱོན་པར་བསྔགས་བརྗོད་མཛད་ཡོད་པ་མ་ཟད། སྒོས་སུ་བོད་རིགས་གཅིག་མཚུངས་ཤིག་ཡིན་སྟབས་བོད་མིའི་རང་དབང་གི་འགན་ཡང་གཅིག་མཚུངས་ཡོད་པ་བཀའ་བསྩལ་ཡོད་པ་རེད།
