རྒྱལ་སྤྱིའི་ཁྱོན་དུ་བཅའ་བཞུགས་ནང་བསྟན་ཆོས་བརྒྱུད་པ་ཡོངས་ཀྱི་དད་གུས་རྩིགས་ཆེར་ཞུ་ཡུལ་བྱང་ཆུབ་ལྗོན་ཤིང་གྱི་མྱུ་གུ་ཞིག་ཨོ་སི་ཊོ་ལི་ཡར་ཆེས་ཐོག་མར་གདན་འདྲེན་ཞུས་འདུག
ཨོ་སི་ཊོ་ལི་ཡའི་ mirage news གསར་ཁང་གིས་གནས་ཚུལ་སྤེལ་བར་ཡུལ་དེའི་ Bendigo གྲོང་ཁྱེར་ནང་རྟེན་གཞི་བྱས་པའི་༸གོང་ས་༸སྐྱབས་མགོན་ཆེན་པོ་མཆོག་གི་མཚན་ཐོག་ཟུང་འབྲེལ་གནང་བའི་ the Great Stupa of Universal Compassion ཡི་ Bodhi Dhamma Vihara ཞེས་པའི་དགོན་པར་ཨོ་སི་ཊོ་ལི་ཡའི་ཞིང་ལས་གྱི་ལོ་རྒྱུས་ཁྲོད་དུ་ད་བར་བྱུང་མྱོང་མེད་པ་ཕྱི་ལོ་སྔོན་གྱི་ལོ་ ༢༨༨ སྐབས་སུ་རྒྱ་གར་གྱི་གནས་མཆོག་རྡོ་རྗེ་གདན་ནས་ཤྲི་ལངྒར་གདན་འདྲེན་ཞུས་པའི་བྱང་ཆུབ་ལྗོན་ཤིང་གི་ལྡོང་པོ་ལས་སླར་མྱུ་གུ་ཞིག་གདན་འདྲེན་ཞུས་ཡོད་པ་དང་།ཨོ་སི་ཊོ་ལི་ཡའི་ཞིང་ལས་བདེ་འཇགས་ལས་ཁང་གིས་རྒྱལ་ཁབ་ཀྱི་ཞིང་ལས་དང་རྩི་ཤིང་གི་བདེ་འཇགས་ལ་གཞིགས་ཏེ་བྱང་ཆུབ་ལྗོན་ཤིང་གི་མྱུ་གུ་དེ་ལོ་གཅིག་གི་རིང་གཞུང་གི་ལྟ་རྟོག་འོག་ཟུར་བཀག་བཞག་འདུག
ཨོ་སི་ཊོ་ལི་ཡའི་ཞིང་ལས་བདེ་འཇགས་ལས་ཁང་གི་གཙོ་འཛིན་ Andrew Tongue ལགས་ཀྱིས་ཨོ་སི་ཊོ་ལི་ཡར་གདན་འདྲེན་ཞུས་པའི་བྱང་ཆུབ་ལྗོན་ཤིང་གི་མྱུ་གུ་དེ་ནི་དེ་སྔ་གནས་མཆོག་རྡོ་རྗེ་གདན་དུ་བྱང་ཆུབ་ལྗོན་ཤིང་གི་དྲུང་དུ་སྟོན་པ་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་བྱང་ཆུབ་ལྗོན་ཤིང་དང་། དེ་སྔ་རྒྱ་གར་ནས་ཤྲི་ལངྒར་ལྗོན་ཤིང་དེའི་མྱུ་གུ་ཞིག་གདན་འདྲེན་ཞུས་པའི་བརྒྱུད་པའི་མྱུ་གུ་ཞིག་ཡིན་པར་ངོ་སྤྲོད་གནང་བ་དང་འབྲེལ། སྐབས་རེ་རྩི་ཤིང་གི་རྒྱུད་ལ་ན་ཚ་འདྲ་མིན་ཡོང་གི་ཡོད་སྟབས་རྒྱལ་ཁབ་ཀྱི་ཞིང་ལས་ཀྱི་བདེ་འཇགས་ལ་གཞིགས་ཏེ་གཟའ་འཁོར་རྟག་པར་རྩི་ཤིང་གི་ནད་རིགས་ཕོག་མིན་ལ་དཔྱད་དེ་ཟླ་བ་བཅིུས་རིང་ཁུལ་དེར་ཟུར་བཀག་ལ་བཞག་རྒྱུ་དང་། ཕྱི་ལོ་ ༢༠༢༢ ཟླ་ ༥ ནང་ Bodhi Dhamma Vihara ཞེས་པའི་དགོན་པར་གདན་འདྲེན་ཞུ་རྒྱུ་ཡིན་པ་གསུངས་འདུག
འདི་ལོའི་ཕྱི་ཟླ་ ༥ པའི་ནང་བྱང་ཆུབ་ལྗོན་ཤིང་གི་མྱུ་གུ་དེ་ཤྲི་ལངྒ་ནས་གདན་ཞུ་གནང་སྐབས་ཤོག་བུ་དང་འགྱིག་ཤོག་གི་ཁུག་མའི་ནང་ལེགས་པར་ཐུམ་སྒྲིལ་ནས་གདན་འདྲེན་ཞུས་ཡོད་ཀྱང་། ཨོ་སི་ཊོ་ལི་ཡར་འབྱོར་སྐབས་ལྡོང་པོའི་རྩ་བ་དང་ལོ་མ་ནས་འབུ་སྲིན་ཁག་ཅིག་རྙེད་སོན་བྱུང་སྟབས། རྩི་ཤིིང་གི་ནད་རིགས་བརྟག་དཔྱད་བྱེད་མཁན་ཚོས་གཙང་བཟོ་བྱས་ཏེ་ཉེར་མཁོའི་ཚ་དྲོད་ཁག་ལེགས་པར་སྐྲུན་པའི་སྒོ་ནས་ལྟ་རྟོག་བྱེད་མུས་ཡིན་པ་དང་། ད་ཆ་བྱང་ཆུབ་ལྗོན་ཤིང་གི་མྱུ་གུའི་གནས་སྟངས་ཡག་པོ་ཡོད་པ་མ་ཟད། རིང་ཚད་མི་ཊར་གཅིག་ཙམ་རིང་དུ་སོང་ཡོད་སྐོར་འགྲེལ་བརྗོད་གནང་འདུག
