རྒྱ་གར་ནང་ནད་རླབས་གཉིས་པ་ཁྱབ་གདལ་ཆེས་ཆེར་འགྲོ་བཞིན་པའི་སྐབས་འདིར་བཙན་བྱོལ་བོད་མིའི་འདུས་སྡོད་ས་ཁུལ་ཁག་ཏུའང་ནད་གཞི་ཕོག་མཁན་ཇེ་མང་དུ་འགྲོ་བཞིན་པ་དང་། དུས་སྐབས་འདིའི་ཁྲོད་རྒྱ་གར་བྱང་ཕྱོགས་ནས་རྡ་རམ་ས་ལ་དང་། ལྡེ་ར་ལྡུན་གྱི་ཁྱབ་ཁོངས་བོད་མིའི་གཞིས་སྒར། ལྷག་པར་ལྷོ་ཕྱོགས་ཁུལ་དུ་ད་ལྟའི་ཆར་ནད་གཞི་ཕོག་མཁན་མང་ཤོས་དེ་བོད་མིའི་གཞིས་སྒར་ཆེ་ཤོས་མོན་གྷོ་འདོད་རྒུ་གླིང་ཆགས་ཀྱི་ཡོད་པ་རེད།
ནད་ཡམས་འདིའི་སྔ་ཕྱི་བར་གསུམ་དུ་ནད་པར་སྨན་བཅོས་དང་མྱུར་སྐྱོབ་ཀྱི་རླབས་ཆེན་ལས་དོན་ཁྲོད་མདུན་ཐོན་ཞབས་ཞུ་བ་མང་དག་ཅིག་ཡོད་པའི་ཁྲོད་མངོན་གསལ་ཆེ་བ་ནི་སྨན་ཞབས་པ་རྣམས་ཆགས་ཡོད། འདི་ག་རླུང་འཕྲིན་ཁང་ནས་དེ་རིང་རྒྱལ་སྤྱིའི་སྨན་ཞབས་པའི་ཉིན་མོ་དང་བསྟུན། དེ་རིང་གི་ལེ་ཚན་འདིའི་ནང་བོད་པའི་སྨན་ཞབས་པའི་ཁྲོད་མོན་གྷོ་འདོད་རྒུ་གླིང་ནང་ནད་ཡམས་ཁྱབ་གདལ་བྱུང་བ་ནས་བཟུང་ད་བར་ཕྱག་ལས་གནང་བཞིན་པ་སྨན་ཞབས་འགན་འཛིན་སྨན་ཞབས་པ་བསྟན་འཛིན་ཆོས་སྒྲོན་ལགས་སུ་ནད་ཡམས་ཀྱི་དུས་ཚིགས་དང་འབྲེལ་རང་ཉིད་སྒེར་གྱི་མྱོང་ཚོར་དང་ལྷག་པར་སྨན་ཞབས་པ་ཞིག་ཡིན་པའི་ཆ་ནས་ཉིན་རེར་ནད་གཞི་དེར་གདོང་ལེན་ཇི་ལྟར་གནང་གི་ཡོད་མེད་སོགས་ཀྱི་སྐོར་ཁོང་ལ་བཀའ་འདྲི་ཞུས་ཡོད།
ཏོག་དབྱིབས་གཉན་རིམས་ཀྱི་ནད་རླབས་གཉིས་པ་དེ་ཁྱབ་གདལ་མྱུར་བ་དང་ནད་རྟགས་ཡང་གསར་བ་ཁག་ཅིག་ཐོན་བཞིན་ཡོད་པས། ཆོས་སྒྲོན་ལགས་ཀྱིས་དུས་ཚིགས་འདིའི་ཁྲོད་མང་ཚོགས་ནས་དངངས་སྐྲག་གནང་རྒྱུ་མེད་པ་དང་། ལྷག་པར་སོ་སོ་རང་ཉིད་རྒྱུན་ལྡན་ནད་པ་དང་ཐད་ཀར་འབྲེལ་བ་ཡོང་བསྡད་ཀྱི་ཡོད་སྟབས། དོ་བདག་ནས་ནད་ཡམས་སྔོན་འགོག་གི་ཐབས་ལམ་ཡོད་ཚད་ཚུལ་མཐུན་ངང་བསྟེན་མུས་ཡིན་ཞེས་གསུངས་སོང་།
སྤྱིར་ཆོས་སྒྲོན་ལགས་ཀྱི་བཟའ་ཟླ་གཞིས་ཆགས་ལས་ཁུངས་ཀྱི་ཁ་ལོ་བ་ཡིན་པ་དང་ཁོ་མོར་ཕྲུ་གུ་གཉིས་ཡོད་པས། སོ་སོ་ངོས་ནས་དུས་ཀུན་ཏུ་གཟབ་ནན་སོགས་གནང་གི་ཡོད་སྐོར་དང་ལྷག་པར་དུ་རང་ཉིད་སྨན་ཞབས་པ་ཞིག་ཡིན་པའི་ཆ་ནས་སྐབས་རེ་ཕྱིར་སྨན་ཁང་གི་སྒྲིག་ཆས་གྱོན་ནས་ཕེབས་དགོས་པ་བྱུང་དུས་ཏོག་ཙམ་འཚེར་སྣང་ཡོང་གི་འདུག་ཅེས་གསུངས་ཀྱི་འདུག
མ་ཟད། ཁོང་གིས་མང་ཚོགས་ནས་ད་ལྟའི་ཛ་དྲག་གི་དུས་སྐབས་སུ་རང་ཉིད་ལ་ཏོག་དབྱིབས་ནད་གཞི་ཕོག་ཡོད་བསམ་པའི་ཀུན་སློང་ཁྱེར་བའི་ཐོག་གཟབ་ནན་གནང་དགོས་པ་དང་། དེ་ལྟར་གནང་ཚེ་ནད་གཞི་ཁྱབ་གདལ་འགོག་ཐབས་དང་སྔོན་འགོག་བཅས་རང་གཞན་གཉིས་ཀར་ཕན་ངེས་ཡིན་པ་གསུངས་སོང་། ཁོང་གིས་ད་དུང་ནད་རྟགས་རིགས་ཐོན་སྐབས་དེ་མ་ཐག་བརྟག་དཔྱད་གནང་སྟེ་ཟུར་བཀག་ཏུ་བཞུགས་དགོས་རྒྱ་གལ་ཆེན་ཡིན་ཚུལ་དང་། ཕྱོགས་མཚུངས་ཏོག་དབྱིབས་ནད་གཞི་ཕོག་ཀྱང་དངངས་སྐྲག་བྱེད་རྒྱུ་མེད་པར་རང་སེམས་ཞི་བར་གནས་དགོས་བར་གསུངས་སོང་།
