རྒྱ་གར་ལྷོ་ཕྱོགས་ Karnataka མངའ་སྡེའི་ Uttara Kannada རྫོང་ནང་རྟེན་གཞི་བྱས་པའི་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནང་དུ་ཁ་སང་ཕྱི་དྲོ་ཕྱག་ཚོད་ ༤ པ་ཡོལ་ཙམ་ནས་མགོ་བཙུགས་ཏེ་སྐར་མ་ ༤༠ ཞེ་གྲངས་ཞིག་གི་རིང་ལ་དྲག་ཆར་རླུང་ཚུབ་ཤུགས་ཆེ་བྱུང་བའི་ཁྲོད། རྒྱ་ལམ་དགག་པ་དང་། ཁང་པའི་ཐོག་ཁྱེར་བ་སོགས་ཀྱི་དོན་རྐྱེན་ཁག་གཅིག་བྱུང་ཡང་མི་ཤི་སྐྱོན་ཆག་ཪིགས་བྱུང་མིན་འདུག
དེ་ཡང་དེ་རིང་སྔ་དྲོ་འདི་གའི་གསར་འགོད་པས་མོན་གྷོ་འདུད་རྒུ་གླིང་ས་གནས་འགོ་འཛིན་ལྷག་པ་སྒྲོལ་མ་ལགས་སུ་བཀའ་འདྲི་ཞུས་སྐབས། ཁོང་གི་ཁ་སང་གློ་བུར་ཐོབ་ཀྱག་ལ་ཆར་རླུང་རྒྱག་པའི་ཁྲོད། ས་གནས་སུ་ཤིང་སྡོང་མང་པོ་གས་པའི་རྐྱེན་གྱིས་རྒྱ་ལམ་བཀག་སྟེ་ད་ལྟའི་ཆར་ས་གནས་སུ་འགྲུལ་བཞུད་ཀྱི་དཀའ་ངལ་ཡོད་པ་དང་། དེ་བཞིན་ཁུལ་དེའི་ནང་རྟེན་གཞི་བྱས་པའི་འབྲས་སྤུངས་སྒོ་མང་གྲྭ་ཚང་གི་ཆོས་ར་གསར་པའི་ཁང་ཐོག་འཁྱེར་ཏེ་གྱོང་གུད་ཆེན་པོ་ཕོག་པ་དང་། གཞིས་གྲོང་དང་པོའི་སྤྱི་ཁང་གི་ཁང་ཐོག་ཁྱེར་བ། དེ་བཞིན་གཞིས་མི་རེ་བཟུང་ཞིག་གི་ཁང་པའི་ཐོག་ཁྱེར་བ་སོགས་ཀྱི་གནོན་སྐྱོན་ཕྲན་བུ་བྱུང་ཡོད་པ་དེ་ལྟར་ཡང་། མི་ཤི་སྐྱོན་ཆག་རིགས་གི་གནས་ཚུལ་གང་ཡང་བྱུང་མེད་སྐོར་དང་འབྲེལ། ས་གནས་འགོ་འཛིན་གྱི་ངོས་ནས་ས་གནས་ཀྱི་ཤིང་ནགས་ལས་ཁུངས་སུ་འབྲེལ་བ་གནང་སྟེ་ཤིང་སྡོང་གཙང་མ་བཟོ་རྒྱུ་དང་། ས་གནས་སུ་ཉེན་ཁ་མ་ཡལ་བར་དུ་དགོས་ངེས་ཀྱི་བྱེད་སྒོ་ཁག་གནང་མུས་རེད་འདུག
རྩ་བའི་ Karnataka ཁུལ་དུ་འདས་པའི་ཟླ་བ་བཞི་ཙམ་གྱི་རིང་ལ་དུས་ཐོག་ཆར་ཆུ་མ་བབས་པའི་རྐྱེན་གྱིས་ཞིང་པ་དང་མང་ཚོགས་རྣམས་ལ་དཀའ་ངལ་ཆེན་པོ་འཕྲད་བཞིན་པའི་ཁྲོད། ཁ་སང་རྒྱ་གར་གནམ་གཤིས་ཚན་པའི་གནམ་གཤིས་སྔོན་བརྡ་གསར་པ་ཞིག་སྤེལ་བར་གཞིག་ན། ཁ་སང་ནས་དབུ་འཛུགས་ཀྱི་ Uttara Kannada གཙོས་པའི་མངའ་སྡེའི་རྫོང་ཁག་ཁ་ཤས་ནང་དུ་ཆར་པ་བཏང་བ་དང་མཉམ་དུ་རླུང་ཚུབ་སོགས་ཡོང་སྲིད་པའི་ཉེན་བརྡ་བཏང་ཡོད་འདུག གནམ་ཤིས་སྔོན་བརྡར་གཞིག་ན། Uttara Kannada གཙོས་པའི་ས་ཁུལ་ཁག་གཅིག་ཏུ་དེ་རིང་ཚེས་ ༡༩ བར་ཆར་རླུང་རྒྱག་སྲིད་པ་དང་། མངའ་སྡེའི་ས་ཁུལ་གཞན་ཁག་གཅིག་གི་ནང་དུ་ཟླ་བ་འདིའི་ཚེས་ ༢༣ བར་ཆར་པ་འབབ་སྲིད་པ་གསུངས་འདུག
