ཚན་རིག་སློབ་ཚན་ཐོག་བརྒྱ་ཆ་མཐོ་ཤོས་སོན་པར་སྐུ་ཞབས་ཀཱ་ལམ་མཆོག་གི་རྗེས་དྲན་གསེར་གྱི་རྟགས་མ་ཐོབ་པ།

རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་ Mysore གྲོང་ཁྱེར་ནང་དུ་རྟེན་གཞི་བྱས་པའི་ JSS Academy of Higher education and Research ཞེས་པའི་གཙུག་ལག་སློབ་གཉེར་ཁང་དུ་ཚན་རིག་ཐོག་གཙུག་ལག་རབ་འབྱམས་པའི་སློབ་གཉེར་གནང་བཞིན་པ་བོད་མི་པདྨ་རྒྱལ་མཚན་ལགས་ལ་སློབ་ཁང་དེའི་ཚན་རིག་སྡེ་ཚན་ཁོངས་ནས་བརྒྱ་ཆ་མཐོ་ཤོས་སོན་པར་སྐུ་ཞབས་ཀཱ་ལམ་མཆོག་གི་རྗེས་དྲན་གསེར་གྱི་རྟགས་མ་ཐོབ་འདུགདེ་རིང་སྤྱི་ཚོགས་བརྒྱུད་ལམ་ངོ་དེབ་དང་ཨིནྶཊ་གྷརྨ་སོགས་ལ་པདྨ་རྒྱལ་མཚན་ལགས་ཀྱིས་གཙུག་ལག་སློབ་གཉེར་དེའི་ཚན་རིག་སྡེ་ཚན་ཁོངས་ནས་ཁོར་ཡུག་ཚན་རིག་ཐོག་བརྒྱ་ཆ་མཐོ་ཤོས་དང་དེ་བཞིན་ཚན་རིག་སྡེ་ཚན་ཁོངས་ནས་ཨང་རིམ་གཉིས་པ་སོན་པར་བརྟེན་རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཨབ་དུལ་ཀཱ་ལམ་མཆོག་གི་རྗེས་དྲན་གསེར་གྱི་རྟགས་མ་བཞེས་པའི་སྐུ་པར་དང་འབྲེལ་ནས་དེའི་སྐོར་གནས་ཚུལ་ཁྱབ་སྤེལ་གནང་བཞིན་འདུགརྩ་བའི་པདྨ་རྒྱལ་མཚན་ལགས་ནི་ཕྱི་ལོ་ ༢༠༠༥ ལོར་བོད་ནས་ཕེབས་པ་ཞིག་ཡིན་ཞིང་། གཞི་རིམ་འོག་མ་དང་འབྲིང་རིམ་བར་ཅོན་ཏཱ་ར་བོད་ཁྱིམ་དུ་སློབ་གཉེར་གནང་བ་དང་རྗེས་སུ་གཞི་རིམ་གོང་མ་སྦེལ་ཀོབ་བོད་ཁྱིམ་དུ་སློབ་གཉེར་གནང་མྱོང་ཡོད་པར་མ་ཟད། ཉེ་བའི་གཙུག་ལག་རབ་འབྱམས་པའི་སློབ་གཉེར་ཡང་གཙུག་ལག་སློབ་ཁང་དེ་ག་རང་ནས་གནང་ཡོད་པ་རེད། རྒྱ་གར་རྒྱལ་ཡོངས་བོད་རིགས་སློབ་མའི་མཐུན་ཚོགས་ཀྱི་སྤྱི་ཁྱབ་དྲུང་ཆེའི་ཕྱག་ལས་གནང་མྱོང་འདུགགསར་འགོད་པས་དེ་རིང་ཞལ་པར་བརྒྱུད་པདྨ་རྒྱལ་མཚན་ལགས་སུ་ཁོང་ལ་སྐུ་ཞབས་ཀཱ་ལམ་མཆོག་གི་རྗེས་དྲན་གསེར་གྱི་རྟགས་མའི་བྱ་དགའ་ཐོབ་པར་ཚོར་སྣང་ཇི་བྱུང་སོགས་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གིས་ད་རེས་གཟེངས་རྟགས་འདི་འདྲ་ཐོབ་སྟབས་རང་ཉིད་ཀྱིས་སློབ་སྦྱོང་ལ་འབད་བརྩོན་ཞུས་པའི་གྲུབ་འབྲས་ལེགས་སོན་བྱུང་འདུག་སྙམས་ནས་དགའ་ཚོར་ཆེན་པོ་བྱུང་ཡང་རྣམ་ཀུན་ནས་སྤྱི་ཚོགས་ཞབས་ཞུར་དོ་སྣང་ཆེན་པོ་ཡོད་པར་བརྟེན་དེ་དང་བསྡུར་ཚེ་དེ་ཙམ་དམིགས་བསལ་གང་ཡང་མ་བྱུང་ཞེས་གསུངས་སོང་བ་དང་། བོད་རིགས་གཞོན་སྐྱེས་རྣམས་ལ་རང་ཉིད་ཀྱི་སློབ་སྦྱོང་ལ་འབད་བརྩོན་རྒྱ་གང་ཆེ་གནང་དགོས་པ་དང་ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་སྩལ་དོན་ལྟར་བོད་ཀྱི་ཆོས་རིག་དང་འབྲེལ་ཐོག་ལ་ཞབས་ཞུའི་ཕྱག་ལས་གནང་དགོས་གལ་ཡིན་པའི་འབོད་སྐུལ་གནང་ཡོད།