འཇར་མན་གཞུང་གིས་འདི་ལོའི་འགྲོ་བ་མིའི་ཐོབ་ཐང་གི་སྙན་ཐོ་བཅུ་བཞི་བ་དེ་འདོན་སྤེལ་བྱས་པའི་ནང་། རྒྱ་ནག་གི་དབང་བསྒྱུར་འོག་ཏུ། བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་བབ་ཧ་ཅང་ཛ་དྲག་གི་ངོ་བོར་གནས་ཡོད་པར་མངོན་གསལ་གནང་བ་དང་འབྲེལ། དྲག་གནོན་དང་མྱུལ་ཞིབ་ཀྱིས་མི་མང་བཀག་སྐྱིལ་ཡང་གཞི་རྒྱ་ཆེ་རུ་བཏང་ཡོད་ལུགས་དམིགས་བཀར་གྱིས་གསལ་འདོན་གནང་འདུག
འཇར་མན་གྱི་ Business Daily གསར་ཁང་གིས་སྤེལ་བའི་གནས་ཚུལ་ནང་། གཞི་རྩའི་འཇར་མན་གཞུང་གིས་འདས་པའི་ལོ་མང་ནས་རྒྱ་ནག་དང་འབྲེལ་བའི་ཕྱི་འབྲེལ་གྱི་སྲིད་བྱུས་ལ་གཟབ་གཟབ་གནང་བཞིན་ཡོད་པ་མ་ཟད། རྒྱ་ནག་ལ་ཕོག་ཐུག་བཏང་བ་ཡིན་ན་འཇར་མན་གྱི་བཟོ་ལས་ཀྱི་ཁྲོམ་རར་དོ་ཕོག་འགྲོ་ངེས་ཡིན་པར་དགོངས་བཞིན་ཡོད་ནའང་། ཐེངས་འདིར་འཇར་མན་གྱིས་རྒྱ་ནག་དང་འབྲེལ་བའི་ཕྱི་འབྲེལ་གྱི་གནས་བབ་དེའི་ཁ་ཕྱོགས་བསྒྱུར་བའི་ཐོག འགྲོ་བ་མིའི་ཐོབ་ཐང་གི་སྙན་ཐོ་ཆེད་འདོན་གྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཛ་དྲག་ཡིན་པར་མངོན་གསལ་གྱིས། རྒྱ་ནག་གི་བྱེད་བབ་དེར་སྐྱོན་བརྗོད་དྲག་པོ་གནང་འདུག
ཐེངས་འདིའི་སྙན་ཐོའི་ནང་དུ། རྒྱ་ནག་གི་ནང་དུ་སྤྱི་མང་གི་ཐོབ་ཐང་ཆེས་ཇེ་ཞན་དུ་འགྱུར་བཞིན་པར་མངོན་གསལ་གྱིས། ད་ཆ་རྒྱ་ནག་གི་ནང་དུ་ཆབ་སྲིད་དང་འབྲེལ་བའི་སྨྲ་བརྗོད་རང་དབང་དང་གསར་འགོད་རང་དབང་། དེ་བཞིན་ཆོས་ལུགས་དང་ཚན་རིག་སོགས་ཀྱི་རང་དབང་ལ་བཀག་སྡོམ་ཆེས་ཆེར་བྱེད་པ་མ་ཟད། འགྲོ་བ་མིའི་ཐོབ་ཐང་དང་འབྲེལ་བའི་ཞི་རྒོལ་ནང་ཞུགས་མཁན་རྣམས་དུས་ཡུན་རིང་པོ་བཙོན་འཇུག་བྱེད་བཞིན་པ་སོགས་ལུང་འདྲེན་གྱིས། རྒྱ་ནག་གི་ནང་དུ་ཁྲིམས་ལུགས་ལ་རྩིས་མེད་ཀྱི་ཐོག་ནས་དམར་ཤོག་སྲིད་གཞུང་ནི་མི་མང་ལ་བཤུ་གཞོག་བྱེད་སྤྱད་ཀྱི་ལག་ཆ་ལྟ་བུར་འགྱུར་བཞིན་ཡོད་སྐོར་ཡོངས་གྲགས་གནང་འདུག
གཞན་ཡང་སྙན་ཐོའི་ནང་། བོད་དང་ཤིན་ཅང་གི་ནང་དུ་ངལ་རྩོལ་བསྒྱུར་བཀོལ་ཤུགས་ཆེར་བྱེད་བཞིན་པ་མ་ཟད། མི་མང་གི་སྐྱེ་སྒོ་ཡང་ཚད་བཀག་བཟོས་ཏེ་སྟངས་འཛིན་བྱེད་ཀྱི་ཡོད་ལུགས་ངོ་སྤྲོད་ཀྱིས། འཇར་མན་གྱིས་ཞིབ་འཇུག་བྱས་པ་ལྟར་ན། དེ་ལྟ་བུའི་དྲག་གནོན་གྱི་སྲིད་བྱུས་དེ་ནི་རྒྱ་ནག་ནང་གི་གྲངས་ཉུང་མི་རིགས་རྣམས་ཀྱི་རིག་གཞུང་དང་ཆོས་ལུགས་རྣམས་རྒྱ་བསྒྱུར་བྱེད་རྒྱུར་དམིགས་ཡོད་པ་ཞིག་ཡིན་སྐོར་གསལ་འདོན་གྱིས། ཤིན་ཅང་གི་གཙོ་བྱས་པའི་གྲངས་ཉུང་མི་རིགས་རྣམས་ཀྱིས་རྒྱ་ནག་གིས་རྩ་འཛུགས་བྱས་པའི་སྲིད་གཞུང་གི་རིག་གཞུང་ལྟ་གྲུབ་དེར་བརྩི་སྲུང་བྱེད་དགོས་བ་ཞིག་བཟོས་ཡོད་སྐོར་ཕྱིར་བསྒྲགས་གནང་འདུག
གཞན་ཡང་རྒྱ་ནག་གིས་དུས་རྒྱུན་ནས་འཇིགས་སྐུལ་རིང་ལུགས་པར་གདོང་ལེན་གྱི་མིང་ཐོག་ནས་ཤིན་ཅང་ཁུལ་དུ་དེང་རབས་འཕྲུལ་ལས་ཀྱི་ཁྱད་ཆས་ལྡན་པའི་གསང་བའི་མྱུལ་ཞིབ་ཀྱི་ལྟ་སྲུང་ལག་བསྟར་བྱེད་བཞིན་ཡོད་སྐོར་དང་སྦྲགས་ནས། ཕྱི་ཕྱོགས་སུ་སུ་ཡོད་པའི་ཡུ་གུར་བཙན་བྱོལ་བ་རྣམས་ཀྱིས་རྒྱ་ནག་གིས་ཡུ་གུར་གྱི་རིག་གཞུང་རྩ་གཏོར་གཏོང་གི་ཡོད་པར་སྐྱོན་བརྗོད་ཀྱིས། རྒྱལ་སྤྱིའི་སྤྱི་ཚོགས་ཀྱིས་ཤིན་ཅང་གི་ནང་དུ་ཞིབ་འཇུག་བྱེད་དགོས་བའི་ཞུ་སྐུལ་གནང་བཞིན་པར་འཁོད་འདུག
ཕྱོགས་མཚུངས་སྙན་ཐོ་དེའི་ནང་དུ། བོད་དང་ཤིན་ཅང་ཙམ་མ་ཡིན་པར། རྒྱ་ནག་གིས་ཧོང་ཀོང་གི་ཁུལ་དུ་བདེ་འཇགས་ཀྱི་ཁྲིམས་གཞི་ལག་བསྟར་བྱེད་ཕྱོགས་ལ་ཡང་བློ་འཚབ་ཡོད་པར་བརྗོད་དེ། ད་ཆ་རྒྱ་ནག་གི་དབང་འཛིན་གསར་བའི་ལམ་ལུགས་ཀྱི་ནང་དུ། ཧོང་ཀོང་གི་སྤྱི་མང་གི་རང་དབང་བརླགས་བཞིན་པ་མ་ཟད། ཕྱོགས་འགལ་གྱི་ཆབ་སྲིད་ཚོགས་པ་དང་རང་དབང་ལྡན་པའི་གསར་ལམ་ཁག་ལ་བཙན་དབང་གི་ཤུགས་རྐྱེན་ཆེན་པོ་ཐེབས་བཞིན་ཡོད་སྐོར་མངོན་གསལ་གནང་འདུག
སྙན་ཐོ་དེ་ཕྱི་ལོ་ཐོན་པ་དང་། འཇར་མན་ནང་གི་ CDU ཞེས་པའི་འགྲོ་བ་མིའི་ཐོབ་དང་འབྲེལ་བའི་ཆབ་སྲིད་ཚོགས་པའི་ཆེད་མཁས་བ་སྐུ་ཞབས Michael Brand ལགས་ཀྱིས་ཐེངས་འདིའི་འཇར་མན་གྱི་ཕྱི་སྲིད་ལས་དོན་ཚན་པས་སྙན་ཐོ་དེ་འདོན་སྤེལ་གནང་བར་བསྔགས་བརྗོད་གནང་སྟེ། རྒྱ་ནག་གི་སྲིད་དབང་སྒེར་གཅོད་ཀྱི་བཙན་རྒྱལ་དེ་ནི་ད་ཆ་རྒྱལ་སྤྱིའི་སྤྱི་ཚོགས་ཀྱི་བརྟན་བརླིང་ལ་ཉེན་ཁ་ཞིག་ཆགས་ཡོད་སྐོར་མངོན་གསལ་གྱིས། ཡུ་རབ་རྒྱལ་ཚོགས་ཀྱིས་ཨ་རིའི་སྲིད་འཛིན་ཇཱོ་བྷ་ཊན་(Joe Biden) དང་ལྷན་དུ་མཉམ་ལས་ཀྱིས། རྒྱ་ནག་གི་སྲིད་དབང་སྒེར་གཅོད་ཀྱི་ལམ་ལུགས་ལ་ཁ་གཏད་གཅོག་དགོས་བའི་གོམ་སྟབས་གསར་བ་ཞིག་ལག་བསྟར་བྱེད་དགོས་བར་སྐུལ་མ་གནང་འདུག
གཞི་རྩའི་ཟླ་བ་སྔོན་མའི་ཕྱི་ཚེས་ ༡༨ ཉིན་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ཉན་ཞིབ་ལས་རིམ་ཞིག་ཚོགས་པའི་ཐོག རྒྱལ་སྤྱི་བོད་དོན་ལས་འགུལ་ཁང་གི་ འཇར་མན་སྡེ་ཚན་གྱི་ངེས་སྟོན་པ་སྐུ་ཞབས་ Kai Muller ལགས་ཀྱིས་མཉམ་ཞུགས་གནང་སྟེ། རྒྱ་གཞུང་གིས་བོད་དེ་རྒྱ་སྡེར་བསྒྱུར་ཐབས་ཀྱིས་བོད་ཀྱི་ཆོས་དང་རིག་གཞུང་རྩ་མེད་གཏོང་བཞིན་པ་དང་། བོད་མིའི་ཆོས་དད་རང་དབང་རྩིས་མེད་རྡོག་རོལ་དང་། བོད་མི་རྣམས་གང་བྱུང་འཛིན་བཟུང་བཀང་ཉར་བྱེད་བཞིན་པ་སོགས་དང་འབྲེལ་ནས། བོད་ནང་གི་གནས་བབ་ཛ་དྲག་ཆགས་ཡོད་སྐོར་གསུངས་ཡོད་པ་རེད།
