འདི་ལོའི་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་དང་རྒྱལ་ཡོངས་ཆབ་སྲིད་གྲོས་ཚོགས་ཀྱི་ཚོགས་ཆེན་གཉིས་པོ་དེ་རིང་ཕྱི་ཟླ་ ༣ ཚེས་ ༥ ནས་འགོ་འཛུགས་ཀྱིས་ཚེས་ ༡༡ བར་འཚོགས་བཞིན་ཡོད་པ་དང་། ཐེངས་འདིའི་ཚོགས་འདུའི་ཐོག་རྒྱ་ནག་གི་ལོ་ལྔ་ཚན་གྱི་ལས་འཆར་ ༡༤ པ་དེ་གཏན་འབེབས་བྱེད་རྒྱུ་ཡིན་པར་མ་ཟད། མ་འོངས་ཕྱི་ལོ་ ༢༠༣༥ བར་གྱི་འཆར་སྣང་ཞེས་ལོ་ ༡༥ ཡི་འཆར་གཞི་གཏན་འབེབས་བྱེད་རྒྱུ་ཡིན་པ་བཅས་ཀྱི་ཐོག་ཐེངས་འདིའི་ཚོགས་འདུ་བརྒྱུད་ཧོ་ངཀོང་ནང་གི་འོས་བསྡུའི་འགྲོ་ལུགས་ལ་བསྒྱུར་བཅོས་གཏང་རྒྱུའི་གྲོས་གཞི་གཏན་འབེབས་བྱེད་ཀྱི་ཡོད་པ་རེད་འདུག
དེ་རིང་གི་ཚོགས་འདུ་གཉིས་པོ་དངོས་སུ་འགོ་འཛུགས་མ་བྱེད་གོང་ལ་ཁ་སང་སྐབས་ ༡༣ པའི་རྒྱ་ནག་མི་དམངས་འཐུས་མི་ཚོགས་ཆེན་གྱི་ཚོགས་ཐེངས་ ༤ པའི་མགྲིན་ཚབ་པ་ Zhang Yesui ཟེར་བས་ཐེངས་འདིའི་ཚོགས་འདུའི་གྲོས་གཞིའི་སྐོར་དང་འབྲེལ་བའི་གསར་འགོད་ལྷན་ཚོགས་ཐོག་རྒྱ་ནག་གི་ངོས་ནས་ཧོང་ཀོང་ནང་གི་འོས་བསྡུའི་འགྲོ་ལུགས་ཡར་རྒྱས་གཏང་རྒྱུར་དམིགས་སྟེ་ Patriots Governing Hong Kong འམ་ས་ཁུལ་དེ་རྒྱལ་ཞེན་ཅན་གྱི་མི་སྣ་ཚོས་སྐྱོང་རྒྱུའི་འགྲོ་ལུགས་ཞེས་དེ་སྔ་ཕྱི་ལོ་ ༡༩༨༠ ལོར་སྐབས་དེའི་རྒྱ་ནག་གི་འགོ་ཁྲིད་ཏིང་ཞའུ་ཕིང་གིས་ངོ་སྤྲོད་བྱས་པའི་འགྲོ་ལུགས་བཟོ་རྒྱུ་ཡིན་པར་བརྗོད་འདུག
Zhang Yesui ཡིས་རྒྱལ་ཡོངས་མི་དམངས་འཐུས་མི་ཚོགས་ཆེན་ལ་ཧོང་ཀོང་གི་གནད་དོན་ཐོག་ཐག་གཅོད་བྱ་རྒྱུའི་འགན་དང་དབང་ཚད་ཡོད་སྐོར་དང་འབྲེལ་ནས་སྔ་ལོ་ཧོང་ཀོང་ནང་དུ་ཟིང་འཁྲུག་གི་གནད་དོན་བྱུང་བ་ལྟར། ས་ཁུལ་དེར་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ཁྲིམས་སྒྲིག་ལག་བསྟར་དོན་འཁྱོལ་ཡོང་ཆེད་དང་རྒྱལ་ཞེན་ཅན་གྱི་ས་ཁུལ་སྐྱོང་རྒྱུའི་ལམ་ལུགས་དོན་སྨིན་སོན་ཕྱིར་དུས་དང་མཐུན་པའི་བསྒྱུར་བཅོས་གཏང་རྒྱུའི་དུས་ལ་བབ་ཡོད་པར་མངོན་གསལ་བྱས་ཡོད་འདུག
རྩ་བའི་སྔ་ལོའི་ཚོགས་ཆེན་ཐོག་ཧོང་ཀོང་བདེ་འཇགས་ཀྱི་ཁྲིམས་གཞི་གཏན་འབེབས་བྱས་པ་དང་འབྲེལ། རྒྱལ་སྤྱིའི་སྤྱི་ཚོགས་ཀྱི་སྐྱོན་བརྗོད་རིམ་པ་བྱས་དང་བྱེད་མུས་ལ་ལྟོས་མེད་སྔ་ལོའི་ལོ་དཀྱིལ་ནས་ཧོང་ཀོང་ནང་དུ་ཁྲིམས་གཞི་དེ་ལག་བསྟར་གྱིས་ཧོང་ཀོང་ནང་གི་མང་གཙོའི་ལས་འགུལ་བ་མང་དག་ཅིག་འཛིན་བཟུང་བྱེད་མུས་ཡིན་པ་རེད།
རླུང་འཕྲིན་ཁང་གིས་ཐེ་ཝན་སྐུ་ཚབ་དོན་གཅོད་དང་རྒྱ་ནག་ཉམས་ཞིབ་པ་ཟླ་བ་ཚེ་རིང་ལགས་སུ་འདི་ལོའི་རྒྱ་ནག་གི་ཚོགས་འདུ་གཉིས་པོའི་གནད་དགག་དང་དེའི་མཇུག་འབྲས་བཅས་ཀྱི་སྐོར་ལ་བཀའ་འདྲི་ཞུས་སྐབས་དེང་སྐབས་རྒྱ་ནག་ནང་གི་གནས་སྟངས་དང་ད་ལྟའི་ཚོགས་འདུའི་གྲོས་གཞི་བཅས་ཕྱོགས་ཡོངས་ལ་གཞིགས་ན་རྒྱ་ནག་དང་དེའི་དབང་སྒྱུར་འོག་ཡོད་པའི་ས་ཁུལ་ཁག་ཏུ་དམ་དྲག་སྔར་ལྷག་བྱེད་ཀྱི་ཡོད་པ་དང་། ཞི་ཅིན་ཕིང་གི་ངོས་ནས་གུ་ཡངས་དང་ཡར་རྒྱས་ཀྱི་ལམ་མ་ཡིན་པར་དེ་སྔའི་བསམ་བློ་དང་དུས་རབས་བསྐྱར་ལོག་བྱེད་བཞིན་ཡོད་པ་མངོན་རྒྱུ་ཡོད་སྐོར་གསུངས་སོང་།
ལོ་རྗེས་མ་སྟེ་ ༢༠༢༢ ལོར་སྲིད་འཛིན་ཞི་ཅིན་ཕིང་གི་ལོ་བཅུའི་ལས་ཡུན་རྫོགས་ཀྱི་ཡོད་སྟབས་ཐེངས་འདིའི་ཚོགས་འདུའི་ཐོག་མ་འོངས་པར་ཞི་ཅིན་ཕིང་གི་རྗེས་འཇུག་མངོན་གསལ་བྱེད་དགོས་ཀྱི་ཡོད་ཀྱང་། དེ་སྔ་ཞི་ཅིན་ཕིང་གིས་དབང་ཚད་མུ་མཐུད་བཟུང་རྒྱུའི་རྣམ་པ་ཆེད་བཏོན་བྱས་ཟིན་པ་དང་། འདི་ལོའི་ཚོགས་ཆེན་གཉིས་ཀྱི་གོང་དུ་རྒྱ་ནག་ནང་ཞི་ཅིན་ཕིང་གིས་གཙོ་སྐྱོང་འོག་ཏང་གི་ལོ་རྒྱུས་སློབ་སྦྱོང་དང་ཏང་གི་ལོ་རྒྱུས་སྐོར་གྱི་སློབ་གསོ་སྤེལ་བའི་ཀུན་སློང་ཚོགས་ཆེན་ཚོགས་པ། དེ་བཞིན་མ་འོངས་པར་གཞུང་འཛིན་མཁན་དང་རྩེ་གཅིག་ཏུ་ མའོ་ཙེ་ཏུང་གི་རྗེས་འབྲང་ཡིན་པ་ Hua Guofeng སྐྱེས་ནས་ལོ་ ༡༠༠ འཁོར་བའི་དུས་དྲན་གཟབ་རྒྱས་བསུ་ཞུས་ཡོད་པ་དང་། འདི་ལོ་དམར་ཤོག་ཚོགས་པ་དབུ་བརྙེས་ནས་ལོ་ ༡༠༠ འཁོར་བ་དང་བསྟུན་ཞི་ཅིན་ཕིང་ལ་གནད་འགག་ཆེན་པོ་ཆགས་ཀྱི་ཡོད་པ་བཅས་གཞིགས་ཏེ་རྒྱ་ནག་ཉམས་ཞིབ་པ་དང་བོད་ཀྱི་གནད་དོན་ཐོག་ཉམས་ཞིབ་པ་ཚོས་གསུངས་པར་ལོ་རྗེས་མར་ཞི་ཅིན་ཕིང་གི་ངོས་ནས་སྲིད་དབང་རྩིས་སྤྲོད་བྱེད་དཀའ་བའི་རྣམ་པ་མངོན་གསལ་ཆགས་ཡོད་པར་གསུང་མཁན་འདུག
