བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བལ་ཡུལ་ཤར་ཁུམ་བུའི་ཉེ་འདབས་ས་ཁུལ་ཁག་ནས་ཕེབས་པའི་དད་ལྡན་མི་མང་ཁག་ཅིག་ལ་དམིགས་བསལ་མཇལ་ཁ་དང་སྦྲགས། འཕགས་པ་སྤྱན་རས་གཟིགས་ཀྱི་གཟུངས་སྔགས་མ་ཎིའི་ལྗགས་ལུང་བཀྲིན་སྩལ་ཡོད་པ་མ་ཟད། འཕགས་པ་སྤྱན་རས་གཟིགས་ཀྱི་བྱིན་རླབས་ཐོབ་རྒྱུའི་རྒྱུ་གཙོ་བོ་དེ་སེམས་པ་བཟང་པོ་བྱ་རྒྱུ་དེ་ཡིན་པ་བཀའ་སློབ་བཀའ་དྲིན་སྩལ་འདུག
དེ་རིང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གི་༸བཞུགས་སྒར་༸རྒྱལ་བའི་ཕོ་བྲང་དུ་བལ་ཡུལ་ཤར་ཁུམ་བུའི་ཉེ་འདབས་ཀྱི་ས་ཁུལ་ཁག་ཅིག་ནས་ཕེབས་པའི་དད་ལྡན་མི་མང་རྣམས་ལ་མཇལ་ཁ་སྩལ་ཐོག མགོན་པོ་༸གང་ཉིད་མཆོག་གིས་འཕགས་པ་སྤྱན་རས་གཟིགས་དང་འཇམ་དཔལ་དབྱངས། ཕྱག་ན་རྡོ་རྗེ་གསུམ་པོ་ནི་སངས་རྒྱས་ཐམས་ཅད་ཀྱི་བརྩེ་བ་དང་། མཁྱེན་པ། ནུས་པ་བཅས་ཀྱི་རང་གཟུགས་མཚོན་གྱི་ཡོད་པ་བཀའ་སྩལ་དང་སྦྲགས། འཕགས་པ་སྤྱན་རས་གཟིགས་ལ་མཚོན་ན་ང་ཚོ་བོད་གངས་ཅན་ལྗོངས་ལ་ཐུན་མོང་མ་ཡིན་པའི་ལས་འབྲེལ་ཡོད་པའི་ལྷ་སྐལ་ཞིག་ཡིན་པ་དང་། ང་ཚོ་བོད་པ་ཚོས་རྒྱུན་དུ་འཕགས་པ་སྤྱན་རས་གཟིགས་ཀྱི་གཟུངས་སྔགས་འདོན་པ་དང་གསོལ་བ་འདེབས་ཀྱི་ཡོད་སྐོར་བཀའ་སྩལ་དང་འབྲེལ། འཕགས་པ་སྤྱན་རས་གཟིགས་ཀྱི་བྱིན་རླབས་ཐོབ་རྒྱུའི་རྒྱུ་གཙོ་བོ་དེ་སེམས་པ་བཟང་པོ་བྱ་རྒྱུ་དེ་ཡིན་སྟབས། དེ་གལ་ཆེན་པོ་ཡིན་པའི་ལམ་སྟོན་བཀའ་དྲིན་སྩལ་འདུག
མ་ཟད་མགོན་པོ་༸གང་ཉིད་མཆོག་གིས་མཇལ་བཅར་མི་མང་རྣམས་ལ་འཕགས་པ་སྤྱན་རས་གཟིགས་ཀྱི་གཟུངས་སྔགས་མ་ཎིའི་ལྗགས་ལུང་བཀྲིན་སྩལ་ཡོད།
རྩ་བའི་དཔལ་ལྡན་དགའ་ལྡན་ཕོ་བྲང་གིས་ཡོངས་གྲགས་གནང་བའི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་ལྟར་ན། རིང་མིན་ཟླ་བ་ ༧ ནང་ལ་དྭགས་སུ་ཆིབས་བསྒྱུར་བཀའ་དྲིན་བསྐྱངས་ཏེ། དེ་ཚེས་ ༢༡ ནས་ ༢༢ བར་ཁུལ་དེའི་ཞི་བ་ཚལ་གསུང་ཆོས་ར་བར་རྒྱས་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཆོས་དང་། ཕྱི་ཚེས་ ༢༣ ཉིན་སྤྱན་རས་གཟིགས་ཀྱི་བཀའ་དབང་སྩལ་བཀྲིན་སྩལ་རྒྱུ་མ་ཟད། ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་བརྟན་བཞུགས་བསྡུས་པ་ཞིག་བསྟར་འབུལ་ཞུ་གཏན་ཁེལ་འདུག