དེ་རིང་ཕྱི་ལོ་ ༢༠༢༡ ཟླ་ ༡ ཚེས་ ༢༧ ཉིན་གྱི་ཞོགས་པར། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་སྤྱིའི་སྤྱི་ཚོགས་འདྲ་མིན་གྱི་གྲོང་སྡེའི་སྤྱི་ཁྱབ་པ་ཁག་ཅིག་དང་ལྷན་དུ་བྱམས་བརྩེ་ལྡན་པའི་དབུ་ཁྲིད་ཅེས་པའི་བརྗོད་གཞིའི་ཐོག་གསུང་བཤད་གནང་བ་བརྒྱུད་ནས་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་སྩལ་སོང་།
དེ་ཡང་དེ་རིང་གི་གྲོང་སྡེ་སྤྱི་ཁྱབ་པ་རྣམས་དང་ལྷན་གྱི་བཀའ་མོལ་གྱི་ལས་རིམ་དེ་ནི། ཨ་རིའི་གྲོང་སྡེ་སྤྱི་ཁྱབ་པ་ཁག་གི་ལྷན་ཚོགས་དང་། དབྱིན་ཡུལ་དུ་རྟེན་གཞི་བྱས་པའི་སྲིད་བྱུས་བགྲོ་གླེང་བསྟི་གནས་ཁང་། དེ་བཞིན་རྒྱལ་སྤྱིའི་སྟོབས་ལྡན་གྱི་གྲོང་ཁྱེར་འབྲེལ་མཐུད་ཚོགས་པ་གསུམ་གྱི་གོ་སྒྲིག་གི་འོག ཨ་རི་དང་ཁ་ན་ཌ། དེ་བཞིན་ནོར་ཝེ་དང་ཧྥུ་ལི་པེན་སོགས་ཀྱི་རྒྱལ་ཁབ་མང་པོ་ཞིག་གི་གྲོང་སྡེ་སྤྱི་ཁྱབ་པ་ཁག་ཅིག་གིས་འཛུལ་ཞུགས་ཀྱི་ཐོག མགོན་པོ་གང་ཉིད་མཆོག་ནས་བྱམས་བརྩེ་ལྡན་པའི་དབུ་ཁྲིད་ཅེས་པའི་བརྗོད་གཞིའི ཐོག་བཀའ་སློབ་ལམ་སྟོན་མཛད་སོང་།
མཛད་རིམ་གྱི་ཐོག་མར། མགོན་པོ་གང་ཉིད་མཆོག་གིས་དུས་རྒྱུན་ནས་འགྲོ་བ་མིའི་གཅིག་གྱུར་གྱི་འདུ་ཤེས་གོང་སྤེལ་གཏོང་ཐབས་ཀྱི་ཐོག་ལ་ཐུགས་བརྩོན་གནང་གི་ཡོད་པར་བཀའ་སྩལ་བ་དང་འབྲེལ་ནས། ཚན་རིག་པ་རྣམས་ཀྱིས་སྤྱི་ཚོགས་ཀྱི་སེམས་ཅན་རྣམས་ནི་དུས་རྒྱུན་ནས་གཅིག་ལ་གཅིག་རྟེན་ཡིན་པའི་འདུ་ཤེས་ཡོད་པར་གསུངས་ཡོད་པ་ལྟར། འགྲོ་བ་མི་ཡང་སྤྱི་ཚོགས་སེམས་ཅན་ཁོངས་སུ་གཏོགས་པ་ཡིན་དུས། རང་ལྟ་མཆོག་འཛིན་གྱིས་ངའི་རྒྱལ་ཁབ་དང་ངའི་མི་རིགས། དེ་བཞིན་ངའི་ནང་མི་ཞེས་རང་ཁོ་ན་གཅེས་འཛིན་གྱི་བློ་དེ་དོར་ནས། གོ་ལ་གཅིག་འགྱུར་གྱི་དུས་རབས་དང་མཐུན་པའི་ཐོག་ནས་འགྲོ་བ་མི་ཡོད་ཚད་གཅིག་གྱུར་ཡིན་པའི་འདུ་ཤེས་གོང་སྤེལ་བཏང་བ་བརྒྱུད་དེང་གི་སྤྱི་ཚོགས་ནང་གི་དཀའ་ངལ་མང་པོ་ཞིག་མིས་བཟོས་བ་ཤ་སྟག་ཡིན་སྟབས། འགྲོ་བ་མི་ཡོད་ཚད་ཀྱིས་གཅིག་གྱུར་གྱིས་རང་གི་བྱེད་ལས་ཀྱིས་གྲུབ་པའི་དཀའ་ངལ་རྣམས་སེལ་ཐབས་སུ་མཉམ་ལས་གནང་གལ་ཆེ་བའི་ལམ་སྟོན་བཀའ་སློབ་མཛད་གནང་སོང་།
དེ་བཞིན་མགོན་པོ་གང་ཉིད་མཆོག་གིས་ནུབ་ཕྱོགས་ཀྱི་དེང་རབས་ཀྱི་ཤེས་ཡོན་ལམ་ལུགས་ཀྱི་ནང་དུ་དངོས་གཙོ་རིང་ལུགས་གཙོ་ཆེར་འཛིན་བཞིན་ཡོད་པར་བཀའ་གནང་བ་དང་འབྲེལ་ནས། སྤྱི་ཚོགས་ཀྱི་ནང་དུ་དཔལ་འབྱོར་དང་ཆབ་སྲིད་ཀྱི་སྟོབས་ཤུགས་ཁོ་ནའི་འགྲོ་བ་མིའི་རིགས་ཀྱི་འབྲེལ་འདྲིས་ཀྱི་ཁྲོད་དུ་ཡིད་ཆེས་སྐྲུན་ཐབས་མེད་པར་བཀའ་གནང་སྟེ། གནའ་བོའི་རྒྱ་གར་གྱི་རིག་གཞུང་གི་ནང་དུ་འཚེ་མེད་ཞི་བ་དང་བྱམས་སྙིང་རྗེ་སོགས་ཀྱི་འགྲོ་བ་མིའི་རིགས་ཀྱི་ནང་སེམས་ཀྱི་དཔལ་ཡོན་ཐད་ཀྱི་ལྟ་གྲུབ་ཁག་ཡོད་པ་ལྟར། དེང་རབས་ཀྱི་ཤེས་ཡོན་ཀྱིལམ་ལུགས་ནང་དུ་མིའི་རིགས་ཀྱི་ནང་སེམས་ཀྱི་ལོངས་སྤྱོད་ལྟ་བུའི་སློབ་ཚན་ཁག་གཏན་འབེབས་བྱེད་རྒྱུ་གལ་ཆེན་པོ་ཡིན་པར་བཀའ་གནང་སོང་།
དེ་རིང་གི་བཀའ་སློབ་ཀྱི་ལས་རིམ་དེ་ལེགས་པར་གྲུབ་མཚམས་སུ་རྒྱལ་སྤྱིའི་སྤྱི་ཚོགས་སྣ་མང་གི་གྲོང་སྡེ་སྤྱི་ཁྱབ་པ་ཁག་ཅིག་གིས་བཀའ་འདྲི་དགོངས་སྐོར་ཞུས་པའི་ཁྲོད། ཨ་རིའི་ནང་གི་གྲོང་སྡེ་སྤྱི་ཁྱབ་པ་ཞིག་གིས་འདས་བའི་ལོ་འགའི་རིང་ལ་ཨ་རིའི་གཙོ་བྱས་པའི་སྤྱི་ཚོགས་གང་སར་དབྱེ་འབྱེད་ཀྱི་རིགས་ཤུགས་ཆེར་བྱུང་ཡོད་སྟབས། མགོ་ཁྲིད་ཅིག་ཡིན་པའི་ཆ་ནས་མི་མང་ནང་དུ་མཐུན་ལམ་རྡོག་རྩ་གཅིག་སྒྲིལ་གནང་སྟངས་ཀྱི་སྐོར་ནས་བཀའ་འདྲི་ཞུས་པར་མགོན་པོ་མཆོག་གིས། སྤྱི་ཡོངས་ཀྱི་ཆ་ནས་སྤྱི་ཚོགས་ཀྱི་ནང་དུ་མི་རེ་ཟུང་གི་བྱ་སྤྱོད་ལས་མི་རིགས་དཀར་ནག་གི་དབྱེ་འབྱེད་དང་། དེ་བཞིན་ཨ་རི་དང་པོ་ཡིན་ཟེར་མཁན་རེ་ཟུང་བྱུང་ཡོད་པ་ནི་ནོར་འཁྲུལ་ཡིན་པར་བཀའ་གནང་སྟེ། སྤྱི་ཡོངས་ཀྱི་ཆ་ནས་ཨ་རི་རྒྱལ་ཁབ་ནི་རང་དབང་གི་འཛམ་གླིང་ལ་སྣེ་ཁྲིད་གནང་མཁན་གྱི་རྒྱལ་ཁབ་གལ་ཆེན་ཞིག་ཡིན་སྟབས། ཨ་རིའི་རྒྱལ་ཁབ་ཀྱི་གཞི་བརྩའི་ཞི་བདེ་དང་རང་དབང་གི་བླ་སྲོག་ལ་འགྱུར་བ་འགྲོ་བཞིན་པ་ཞིག་ལ་ངོས་འཛིན་གནང་གི་མེད་པར་བཀའ་ལན་སྩལ་སོང་།
དེ་བཞིན་ནོར་ཝེ་ནས་ཡིན་པའི་སྤྱི་ཁྱབ་པ་ཞིག་གིས་དམག་འཐབ་དང་དབུལ་ཕོངས་སོགས་དང་འབྲེལ་བའི་བཀའ་འདྲི་ཞུས་པར་མགོན་པོ་གང་ཉིད་མཆོག་གིས་འཛམ་གླིང་གི་དམག་ཆེན་གཉིས་བའི་རྗེས་ནས་བཟུང་། མགོ་ཁྲིད་རྣམས་ཀྱིས་དཀའ་ངལ་ཆུང་ཆུང་ཞིག་ལ་ཞིབ་ཚགས་ཀྱིས་ལྟ་རྒྱུ་དེ་མིན་པར། དཀའ་ངལ་ག་རེ་ཡིན་ཡང་གཞི་རྒྱ་ཆེ་ནས་དགོངས་བ་བཞེས་རྒྱུ་དེ་གལ་ཆེན་པོ་ཡིན་པ་ལྟར། སྔོན་ཆད་རྒྱལ་ཁབ་སོ་སོས་རྡུལ་ཕྲན་མཚོན་ཆ་ཡོད་ན་སྤོབས་པ་སྐྱེད་བཞིན་ཡོད་ནའང་། རིམ་པའི་འཛམ་གླིང་གི་ནང་དུ་རྡུལ་ཕྲན་མཚོན་ཆ་སོགས་མེད་པར་བཟོས་ཡོད་པ་དེ་ནི་ཁྱོན་ཡོངས་ཀྱི་སྤྱི་ཚོགས་ལེགས་ལམ་དུ་སོང་ཡོད་པའི་མིག་དཔེ་ཞིག་ཡིན་པར་བཀའ་གནང་སྟེ། དེང་གི་དུས་རབས་འདིར་གླིང་ཕྲན་དང་གླིང་ཕྲན་དབར་དང་། དེ་བཞིན་རྒྱལ་ཁབ་དང་རྒྱལ་ཁབ་བར་དུ་ཞི་བདེ་ངང་ནས་མཉམ་གནས་བྱེད་རྒྱུ་དེ་གལ་ཆེན་པོ་ཡིན་པར་བཀའ་གནང་སོང་། 
གཞི་རྩའི་སྔར་ལོའི་རིམས་ནད་ཁྱབ་བརྡལ་བྱུང་བ་ནས་བཟུང་། མགོན་པོ་གང་ཉིད་མཆོག་གིས་དྲ་རྒྱའི་ལམ་ནས་ཆོས་འབྲེལ་བཀའ་དྲིན་བསྐྱངས་བ་དང་། དེ་བཞིན་འཛམ་གླིང་གི་ཚོགས་སྡེ་སྣ་ཚོགས་ཀྱི་གསོལ་འདེབས་ལྟར་བཀལ་སློབ་ལམ་སྟོན་གྱི་མཛད་རིམ་སྐྱོང་བཞིན་པ་ལྟར། དེ་རིང་གི་མཛད་རིམ་དེ་དང་བཞུགས་སྒར་ནས་དྲྭ་རྒྱ་བརྒྱུད་དེ་རྒྱ་བོད་དབྱིན་གསུམ་གྱི་གཙོ་བྱས་པའི་སྐད་ཡིག་སྣ་མང་གི་ཐོག་ནས་རྒྱང་སྲིང་གནང་ཡོད་པ་རེད།
