རྒྱ་གཞུང་ནས་མང་རའི་འབྲོག་སྡེ་ཁག་ལ་དཀའ་ངལ་འཕར་མ་ཞིག་བཟོས་འདུག

བོད་ནང་གི་འབྲོག་སྡེ་རྣམས་དེ་རིང་སང་ཉིན་དབྱར་སར་འགྲོ་བཞིན་པའི་དུས་མཚམས་འདིར་རྒྱ་ནག་སྲིད་གཞུང་གིས་རྩྭ་ཕྱུགས་དོ་མཉམ་གྱི་བྱ་བ་ལེགས་པར་གྲུབ་ནས་ཁོར་ཡུག་སྲུང་སྐྱོབ་བྱ་རྒྱུར་ཁ་གཡར་ཏེ། ཉིན་ཤས་སྔོན་བོད་མདོ་སྨད་མཚོ་ལྷོ་ཁུལ་མང་ར་རྫོང་སུམ་མདོ་གྲོང་བརྡལ་གྱི་འབྲོག་སྡེ་ཁག་ལ་བྲེལ་མྱུར་བརྡ་སྦྱོར་ཞེས་པའི་ཉེན་བརྡའི་བརྡ་ཁྱབ་ཅིག་བཏང་སྟེ། ད་ལོ་ནས་བཟུང་ཁུལ་དེའི་འབྲོག་སྡེ་རྣམས་དབྱར་སར་འགྲོ་མི་ཆོག་པ་བཟོས་པ་དང་ཆབས་ཅིག གལ་ཏེ་སྲིད་གཞུང་གི་ཐག་གཅོད་ལ་སྣང་མེད་གཏང་ཚེ་ཁྲིམས་ཆད་ནན་པོ་བཀལ་རྒྱུ་ཡིན་པ་བཤད་འདུག
རྩ་བའི་སུམ་མདོ་གྲོང་བརྡལ་འོག་ལ་འབྲོག་སྡེ་བ་ ༡༦ ཡོད་པ་ཚང་མའི་འཚོ་རྟེན་ཕྱུགས་ལས་དང་ཞིང་ལས་ཡིན་སྟབས། དབྱར་དུས་རང་གི་རྟ་ནོར་ལུག་གསུམ་ཁུལ་དེའི་ཨག་རྩི་ཐང་དང་མང་སྟོད་ཅེས་པའི་གཞི་རྒྱ་ཆེ་བའི་རྩ་སར་ཕྱུགས་འཚོ་གནང་སྲོལ་ཡོད་པ་ཞིག་རེད་འདུག
བརྡ་ཁྱབ་དེའི་ནང་གསལ་བར། སུམ་མདོ་གྲོང་བརྡལ་སྲིད་གཞུང་གི་ཐག་གཅོད་ལྟར་ཨག་རྩི་ཐང་དང་མང་སྟོད་སོགས་ཀྱི་རྩྭ་སའི་ས་ཁྱོན་༼ཨེ་ཀར༽ ཁྲི ་༩༠ ལྷག་བཀག་སྡོམ་བྱ་རྒྱུ་ཡིན་སྐོར་བསྒྲགས་ཡོད་ནའང་། མང་ཚོགས་ཁ་ཤས་ནས་གཞུང་གི་ཐག་གཅོད་ལ་སྣང་མེད་དུ་བཏང་ནས་བཀག་སྡོམ་རྩ་སའི་ནང་འཛུལ་བ་དང་། ལྷག་པར་སྟག་ལུང་དང་རྒྱ་ཤིང་། དེ་བཞིན་བན་ཤུལ་དང་མཐའ་བ་སོགས་སྡེ་ཁག་ཅིག་ནས་དབྱར་ས་དེར་ཕྱུགས་འཚོ་ནས་བསྡད་ཡོད་པ་མིང་འདོན་དང་སྦྲགས། གལ་ཏེ་དུས་བཅད་ནང་ཚུད་ཐག་གཅོད་ལ་བརྩི་བཀུར་མ་ཞུ་ཚེ། ཆུང་ས་ནས་སྡེ་བ་དེའི་ད་ལོའི་རྩ་སའི་ཁ་གསབ་ཀྱི་བརྒྱ་ཆ་ ༥༠ འཐེན་རྒྱུ་དང་སྡེ་བའི་རྩ་སྲུང་གི་ལོ་ཧྲིལ་པོའི་ཕོག་གི་བརྒྱ་ཆ་ ༥༠ འཐེན་རྒྱུ་མ་ཟད། ཆེ་ས་ནས་ཁྲིམས་ཆད་ནན་པོ་གཅོད་རྒྱུ་ཡིན་པ་བཤད་འདུག་པས་ད་ཆ་ས་གནས་མང་ཚོགས་རྣམས་ཅི་བྱ་གཏོལ་མེད་དུ་གྱུར་ནས་ནོར་ལུག་འཚོ་སྐྱོང་བྱེད་པར་དཀའ་ངལ་འཕར་མ་ཅིག་སྤྲད་འདུག
གཞི་རྩའི་རྒྱ་ནག་གཞུང་ནས་ད་རེས་ཙམ་མ་ཡིན་པར་ལོ་གཉིས་སྔོན་དུ་བན་ཤུལ་བྱེ་སྣའི་འབྲོག་སྡེ་ཁུལ་དུ་བོད་མིའི་ཁང་ཁྱིམ་ཁག་ཅིག་བཙན་དབང་འོག་གཏོར་བཤིག་བཏང་པ་དང་རྩ་སར་ར་བ་སྐོར་ན་ཁྲིམས་འགལ་དུ་བརྗོད་ནས་མང་ཚོགས་ལ་དཀའ་ངལ་བཟོས་ཡོད།