བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་མུམ་བྷེ་ཡི་འཕྲུལ་རིག་མཐོ་རིམ་སློབ་གཉེར་ཁང་ Indian Institute of Technology (IIT) ཁྱབ་ཁོངས་ཀྱི་ Techfest དྲ་ཐོག་གསུང་བཤད་ཀྱི་ལས་འཆར་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་ལྟར། The Purpose of Life འམ་མི་ཚེའི་དོན་སྙིང་ཞེས་པའི་བརྗོད་གཞི་ཐོག་བཀའ་སློབ་སྩལ་བ་དང་སྦྲགས་ཏེ་མགོན་པོ་༸གང་ཉིད་མཆོག་གིས་རྒྱ་གར་གྱི་གནའ་བོའི་རིག་གཞུང་དེ་བདེ་སྐྱིད་ལྡན་པའི་སྤྱི་ཚོགས་དང་རྒྱལ་ཁབ་ཀྱི་གཞི་མ་ཡིན་པ་བཀའ་སྩལ་སོང་། 
དེ་རིང་སྔ་དྲོ་ཕྱག་ཚོད་ ༩ ཐོག་བཞུགས་སྒར་༸རྒྱལ་བའི་གཟིམ་ཆུང་ནས་མགོན་པོ་༸གང་ཉིད་མཆོག་གིས་རྒྱ་གར་གྱི་གནའ་བོའི་རིག་གནས་དང་དེང་དུས་ཀྱི་ཤེས་ཡོན་གཉིས་ཇི་ལྟར་ཟུང་འབྲེལ་གནང་དགོས་པའི་ཐད་བཀའ་སློབ་དང་འདི་བཞིན་སློབ་ཕྲུག་རྣམས་པས་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་མཛད་ཡོད་པ་རེད།
སྐབས་དེར་༸གོང་ས་མཆོག་གིས་སྙིང་རྗེ་དང་འཚེ་མེད་ཞི་བའི་ལྟ་གྲུབ་དེ་རྒྱ་གར་ནང་ལོ་ངོ་སྟོང་ཕྲག་གོང་ནས་དར་སྲོལ་ཡོད་ཅིང་། ལྷག་པར་དུ་རྒྱ་གར་གྱི་ལྟ་གྲུབ་པ་དང་བསམ་བློ་བ་རྣམས་ཀྱིས་ཀྱང་རིག་པ་དང་མཐུན་པའི་ཐོག་ནས་འཚེ་མེད་ཞི་བ་དང་སྙིང་རྗེའི་སྐོར་གསུངས་ཡོད་པ་མ་ཟད། དེང་གི་ཆར་འཛམ་གླིང་སྤྱིར་ལྟ་གྲུབ་དེ་ཉེ་བར་མཁོ་བ་ཞིག་ཆགས་ཡོད། གལ་ཏེ་ང་ཚོས་དུས་ཀུན་སྙིང་རྗེ་དང་འཚེ་མེད་ཞི་བའི་ཐབས་ལམ་ཕྱག་བསྟར་གནང་རྒྱུར་ཐུགས་སྣང་མང་ཙམ་བཞེས་ཐུབ་ཚེ་འཛམ་གླིང་འདི་ཞི་བདེ་ལྡན་པའི་ཁོར་ཡུག་ཞིག་ཏུ་བསྐྲུན་ངེས་ཡིན་པ་བཀའ་སྩལ་སོང་། 
༸གོང་ས་མཆོག་གིས་རྒྱ་གར་གྱི་གནའ་བོའི་རིག་གནས་དེ་དག་ཤེས་ཡོན་གྱི་ངོ་བོའི་ཐོག་ངོས་འཛིན་དགོས་པ་དང་འཚེ་མེད་ཞི་བ་དང་སྙིང་རྗེ་གཞིར་བཞག་པའི་རྒྱ་གར་གྱི་གནའ་བོའི་རིག་གཞུང་གི་ལྟ་གྲུབ་དེ་དེང་རབས་ཀྱི་འཛམ་གླིང་ལ་ཉེར་མཁོ་ཞིག་ཆགས་སྟབས། ད་ཆ་རྒྱ་གར་གྱི་གནའ་བོའི་རིག་གནས་དེ་ཉར་ཚགས་ཙམ་མིན་པར་དེ་དག་བསྐྱར་གསོ་གནང་དགོས་གལ་ཡིན་པར་ལམ་སྟོན་མཛད་པར་མ་ཟད། རྒྱ་གར་གྱི་གནའ་བོའི་རིག་གནས་དེ་བདེ་སྐྱིད་ལྡན་པའི་སྤྱི་ཚོགས་དང་རྒྱལ་ཁབ་ཀྱི་གཞི་རྩ་ཡིན་སྟབས་རྒྱ་གར་བ་ཚོས་གནའ་བོའི་རིག་གཞུང་དེ་དག་ཐད་ཐུགས་སྣང་མང་ཙམ་བཞེས་དགོས་པ་དང་རྒྱལ་ཁབ་གཞན་ཚོར་དེ་འབྲེལ་ཐད་ལམ་སྟོན་གནང་དགོས་སྐོར་བཀའ་སྩལ་ཡོད།
ཐེངས་འདིའི་བཀའ་སློབ་ཀྱི་ལས་རིམ་གྲུབ་མཚམས་སུ་སློབ་ཕྲུག་ཚོས་མགོན་པོ་༸གང་ཉིད་མཆོག་ལ་བརྗོད་གཞི་སྣ་མང་ཐོག་བཀའ་འདྲི་ཞུས་དོན་ལྟར་དེའི་ཁྲོད་སློབ་ཕྲུག་ཞིག་གིས་སློབ་གཉེར་བྱེད་རྒྱུ་དེ་ནི་རང་ཉིད་ལ་ཤེས་ཡོན་ཐོབ་ཐབས་ཤིག་ཡིན་ཀྱང་། དེང་རབས་འགྲན་རྩོད་དབང་གིས་བརྒྱ་ཆ་མཐོ་པོ་རག་ཐབས་སུ་སློབ་གཉེར་བྱེད་ཀྱི་ཡོད་སྟབས་འགྲན་སེམས་མེད་པར་སློབ་གཉེར་ཇི་ལྟར་བྱེད་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་སྤྱིར་གཞན་ལ་དམིགས་དཔེ་བཟང་པོ་གནང་ཐབས་ཀྱིས་ཀུན་སློང་ཐོག་འགྲན་སེམས་གནང་ན་དེ་ནི་འགྲན་སེམས་ལེགས་པོ་ཞིག་ཡིན་པ་དང་། དེས་གཞན་ལ་སེམས་འགུལ་ཐེབས་ཐབས་ལ་རོགས་འདེགས་ཡང་ཞུ་ཡི་ཡོད་པར་བརྟེན་ལས་དོན་གང་ཞིག་གཉེར་ཡང་གང་ཟག་སོ་སོའི་ཀུན་སློང་ལ་རག་ལུས་ཀྱི་ཡོད་སྐོར་བཀའ་སྩལ་སོང་། 
སློབ་མ་གཞན་ཞིག་གིས་ལུས་སེམས་གཉིས་ཀྱི་བདེ་འཇགས་དང་འབྲེལ་ནས་བཀའ་འདྲི་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས་ལུས་བདེ་ཐང་ཡོང་བར་སེམས་ཁམས་ཀྱི་འཕྲོད་བསྟེན་ ལེགས་པོ་ཞིག་དགོས་པ་དང་སྒོས་སུ་འཚེ་མེད་ཞི་བ་དང་སྙིང་རྗེ་ཀུན་ནས་བསླངས་པའི་བསམ་བློ་དེས་སེམས་བག་ཕེབས་ངང་གནས་ཐུབ་པ་དང་། ལྷག་པར་དུ་མི་ཚེར་ངལ་བ་ཇི་འདྲ་ཞིག་འཕྲད་པ་དེའི་ཚོད་ཀྱིས་གདོང་ལེན་གནང་ཐུབ་ངེས་ཡིན་པ་བཀའ་སྩལ་བ་དང་སྦྲགས་བོད་ནང་གི་གནད་དོན་ཛ་དྲག་རིགས་གསན་ཚེ་༸སྐུ་རླུང་མི་བཞེངས་པར་དེ་མ་ཐག་ཏུ་རྒྱ་ནག་དམར་ཤོག་ཚོགས་པའི་འབྲེལ་ཡོད་དཔོན་རིགས་ཚོ་དང་ལས་བྱེད་ཚོའི་ཆེད་ཐུགས་སྨོན་མཛད་ཀྱི་ཡོད་སྐོར་བཀའ་སྩལ་བ་དང་འབྲེལ། རྒྱ་གར་གྱི་གནའ་བོའི་རིག་གནས་ལས་འཚེ་མེད་ཞི་བ་དང་སྙིང་རྗེའི་ལྟ་གྲུབ་ཀྱིས་དོན་དམ་པའི་ཐོག་ལུས་སེམས་གཉིས་ཀའི་བདེ་འཇགས་ལ་ཕན་ཐོགས་ཆེན་པོ་ཆགས་ཀྱི་ཡོད་པ་ལྟར་ཕྱག་བསྟར་གནང་དགོས་སྐོར་བཀའ་ལན་བཀྲིན་ཆེ་བ་སྩལ་ཡོད། 
གཞི་རྩའི་མགོན་པོ་༸གང་ཉིད་མཆོག་གི་མཛད་འཆར་ཐུགས་གཏན་ཁེལ་བར་གཞིགས་ན། རིང་མིན་ཚེས་ ༢༧ ཉིན་བྱང་ཨ་རིའི་ས་གནས་བོད་རིགས་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་དྲ་ལམ་བརྒྱུད་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་བཀའ་ཆོས་སྩལ་རྒྱུ་ཡིན་པ་རེད།
