སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་གྱི་སྔ་རོལ་དུ་ལྷ་སའི་གྲོང་ཁྱེར་སྤྱི་སྡེ་ཉེན་རྟོག་ལས་ཁང་གིས་བོད་མི་ཚོས་རྒྱལ་ཁབ་བདེ་འཇགས་ཟེར་བར་གནོད་སྐྱེལ་གཞིའི་ལས་དོན་སྤེལ་མཁན་རྣམས་ཀྱི་སྐོར་ཉེན་རྟོག་པར་རྩིས་སྤྲོད་གནང་ཚེ་དེར་བྱ་དགའ་སྤྲོད་རྒྱུའི་གསལ་བསྒྲགས་སྤེལ་འདུག
རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ཚེས་ ༨ ཉིན་སྤེལ་བའི་གནས་ཚུལ་ལ་གཞིགས་ན། ལྷ་སའི་གྲོང་ཁྱེར་སྤྱི་སྡེ་ཉེན་རྟོག་ལས་ཁང་གིས་ཟླ་༧ ཚེས་ ༤ ཉིན་མོར་སྤེལ་བའི་གསལ་བསྒྲགས་ནང་རྒྱལ་ཁབ་བདེ་འཇགས་ཟེར་བར་གནོད་སྐྱེལ་གཞིའི་ལས་དོན་སྤེལ་མཁན་རྣམས་རྩིས་སྤྲོད་གནང་ཚེ་རྒྱ་སྒོར་ ༣༠༠༠ ནས་ ༣༠༠།༠༠༠ བར་གྱི་བྱ་དགའ་སྤྲོད་རྒྱུ་ཡིན་པར་བཀོད་འདུག
གསལ་བསྒྲགས་ནང་འཁོད་པའི་དོན་ཚན་བཅུ་གཉིས་ཁྲོད་དོན་ཚན་བརྒྱད་པོ་ནི་ཐད་ཀར་བོད་མི་དང་འབྲེལ་བ་ཡོད་པ་ཞིག་ཡིན་པ་གསུངས་འདུག་ལ། དེ་དག་ནི་ཕྱི་ཕྱོགས་ཀྱི་ཚོགས་སྒེར་སོགས་དང་འབྲེལ་བ་བྱེད་པ་དང་། དེ་བཞིན་རྒྱལ་དར་གྱོན་པ་སོགས་གནང་ཚེ་ཁྲིམས་འགལ་ལ་ངོས་འཛིན་བྱ་རྒྱུ་ཡིན་པ་འཁོད་འདུག ལྷག་པར་དོན་ཚན་བདུན་པ་མཚོན་ན། དྲ་ཐོག་བརྒྱུད་བོད་རང་བཙན་དང་འབྲེལ་ལས་དོན་སྤེལ་བ་དང་རང་གི་བསམ་ཚུལ་རྣམས་ཡིག་ངག་གཉིས་ཀྱི་ཐོག་ནས་འདོན་རྒྱུ་སོགས་གནང་ཚེ་ཁྲིམས་འགལ་དུ་ངོས་འཛིན་བྱ་རྒྱུ་ཡིན་པ་གསལ་བཀོད་བྱས་འདུག
རྒྱ་ནག་གིས་བོད་མི་ཚོར་དམ་དྲག་བྱེད་པའི་བྱ་སྤྱོད་ལ་རྒྱལ་སྤྱིའི་བོད་དོན་ལས་འགུལ་ཁང་གིས་ཐུགས་ཚབ་དང་སྦྲགས་ད་རེས་ཀྱི་གསལ་བསྒྲགས་དེ་བཞིན་རྒྱ་གཞུང་གིས་རྐང་བོད་མི་ནང་ཁུལ་དབར་དཀྲུག་རྒྱུ་དང་། ཡིད་ཆེས་མེད་པ་བཟོ་སླད་ཆེད་མངགས་དེ་རིགས་ཀྱི་བྱ་སྤྱོད་སྤེལ་བཞིན་སྐོར་གསུངས་འདུག
གཞི་རྩའི་རྒྱ་གཞུང་གིས་ད་རེས་གསལ་བསྒྲགས་སྤེལ་བ་དེ་དེ་སྔོན་ཕྱི་ལོ་ ༢༠༡༨༌༡༩ གཉིས་སུའང་དེ་འབྲེལ་གྱི་བརྡ་ཐོ་གཅིག་མཚུངས་སྤེལ་ཡོད་པ་དང་། ཕྱི་ལོ་ ༢༠༡༩ ཟླ་ ༢ ནང་དྲ་ཐོག་བརྒྱུད་རྒྱ་ནག་དམར་ཤོག་ཚོགས་པ་དང་སྲིད་གཞུང་སོགས་ལ་ངོ་རྒོལ་བྱེད་མཁན་རྣམས་སྲིད་གཞུང་ལ་རྩིས་སྤྲོད་གནང་ཚེ་རྒྱ་སྒོར་ ༣༠༠༠༠༠ བར་གྱི་བྱ་དགའ་སྤྲོད་རྒྱུ་ཡིན་པའི་གསལ་བསྒྲགས་ཡང་སྤེལ་ཡོད་པ་རེད།
རྒྱལ་སྤྱིའི་བོད་དོན་ལས་འགུལ་ཁང་གིས་ལྷ་སའི་གྲོང་ཁྱེར་སྤྱི་བདེ་ལས་ཁང་ནས་༸གོང་ས་མཆོག་གི་༸སྐུའི་འཁྲུངས་སྐར་གྱི་ཉིན་གཉིས་ཀྱི་སྔ་རོལ་དུ་གསལ་བསྒྲགས་སྤེལ་བ་དེར་དོ་སྣང་བྱ་འོས་པ་ཞིག་དང་སྤྱིར་རྒྱ་གཞུང་གི་མིག་ལ་བོད་ནང་༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་དང་གོ་སྒྲིག་གནང་ན་ཁྲིམས་འགལ་ཞིག་ཏུ་ངོས་འཛིན་བྱེད་བཞིན་ཡོད་པ་དང་།ལྷག་པར་༸སྐུའི་འཁྲུངས་སྐར་ལ་རང་ཉིད་དངོས་སུ་ཞུགས་པ་ཙམ་མིན་པར་དྲ་ཐོག་བརྒྱུད་སྒྱུ་རྩལ་དང་སྙན་ངག རྩོམ་རིག་སོགས་ཀྱི་ཐོག་ནས་༸སྐུའི་འཁྲུངས་སྐར་སྲུང་བརྩི་ཞུས་པ་ཡིན་ན་སྲིད་གཞུང་ནས་དོ་ནན་པོའི་ཐོག་ནས་ཞིབ་འཇུག་བྱེད་པའི་གནས་སྟངས་ཆགས་ཀྱི་ཡོད་སྟབས། རྒྱ་ནག་གིས་རྒྱ་ཆེ་ས་ནས་སྤྱོད་བཞིན་པའི་རྒྱལ་ཁབ་ཀྱི་བདེ་འཇགས་ཟེར་བ་དེས་བོད་ནང་ལ་དམ་དྲག་གི་ཁོར་ཡུག་ཤུགས་ཆེ་བསྐྲུན་ཡོད་པ་གསུངས་འདུག
