རིང་མིན་ཟླ་བ་རྗེས་མར་སུད་སི་ཇི་ནི་ཝ་གྲོང་ཁྱེར་དུ་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་སྐབས་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་དུས་བཀག་བསྐྱར་ཞིབ་ཐེངས་ ༤ འཚོགས་འཆར་ཡོད་པ་དང་བསྟུན་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་ཁག་གཅིག་གིས་སྲིད་འཛིན་ཇོ་བྷ་ཌན་སྲིད་གཞུང་གིས་རྒྱལ་ཚོགས་ཀྱི་རྒྱ་ནག་ཐོག་གི་དུས་བཀག་བསྐྱར་ཞིབ་ཚོགས་འདུ་སྐབས་རྒྱ་ནག་གཞུང་གིས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་ཛ་དྲག་གི་གནས་སྟངས་དེ་དག་སྐོར་ངེས་པར་དུ་གླེང་སློང་གནང་དགོས་པའི་ཞུ་སྐུལ་གནང་འདུག
ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་དང་ལྕམ་སྐུ་ Nancy Pelosi ལགས། དེ་བཞིན་ལྕམ་སྐུ་ Young Kim ལགས། སྐུ་ཞབས་ Raja Krishnamoorthi ལགས་སོགས་ཁྱོན་གྲོས་ཚོགས་འཐུས་མི་ ༢༤ མཐུན་མོང་གིས་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken ལགས་ཀྱི་མཚན་ཐོག་བརྒྱུད་སྲིད་འཛིན་སྐུ་ཞབས་ Joe Biden མཆོག་གི་སྲིད་གཞུང་ལ་ཕུལ་བའི་ཞུ་སྐུལ་ནང་དེ་སྔ་ཕྱི་ལོ་ ༢༠༡༨ ལོར་རྒྱ་ནག་དང་འབྲེལ་བའི་རྒྱལ་ཚོགས་ཀྱི་དུས་བཀག་བསྐྱར་ཞིབ་ཚོགས་འདུ་ཐེངས་གསུམ་པ་ཚོགས་ཏེ་ད་ཆ་ལོ་ངོ་ལྔ་ཙམ་འགྲོ་བཞིན་པའི་རིང་ལ་རྒྱ་ནག་གཞུང་གི་སྲིད་བྱུས་ཆེས་དམ་བསྒྲགས་འོག་རྒྱ་ནག་སྤྱི་དང་ལྷག་པར་བོད་ནང་གི་གནས་སྟངས་ལ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པར་མ་ཟད། གཞི་རིམ་མང་གི་འདུ་འཛོམས་དང་ཆབ་སྲིད་རང་དབང་། དཔལ་འབྱོར་དང་སྤྱི་ཚོགས་ཀྱི་གོ་སྐབས། བོད་ཀྱི་ཐུན་མིན་རིག་གཞུང་སྲུང་སྐྱོབ་ཀྱི་རང་དབང་སོགས་ཀྱི་གནས་སྟངས་རྣམས་སྔར་ལས་ཆེས་ཛ་དྲག་ཏུ་ཕྱིན་ཡོད་ཅེས་གསལ་འདོན་གནང་འདུག
ལྷག་དོན་འདས་པའི་ལོ་དུས་དེ་དག་རིང་ལ་རྒྱ་ནག་གཞུང་གིས་བོད་མི་རྣམས་སོ་སོའི་སྲོལ་རྒྱུན་གྱི་ས་གནས་ནས་བཙན་དབང་ཐོག་གཞིས་སྤོའི་ལས་གཞི་ཤུགས་ཆེར་སྤེལ་བ་དང་། ཆོས་ཕྱོགས་ཀྱི་གནང་སྒོ་ཁག་ལ་དམ་བསྒྲགས། མང་ཚོགས་རྣམས་ལ་ངལ་རྩོལ་ལས་རིགས་སྐུལ་བ་དང་ཆབ་སྲིད་སློབ་གསོ་སྤེལ་བ། བོད་ཕྲུག་རྣམས་བཙན་དབང་གིས་གཏན་འཇགས་སློབ་གྲྭ་ཁག་ཏུ་བཅུག་པ་སོགས་ཀྱི་སྲིད་བྱུས་དང་ལས་གཞི་སྣ་ཚོགས་ཤིག་ལག་བསྟར་རྒྱ་བསྐྱེད་བཏང་བ་དེ་ནི་བོད་ཀྱི་ཐུན་མོང་མ་ཡིན་པའི་རིག་གཞུང་དང་མི་རིགས་ཀྱི་ངོ་བོ་རྩ་མེད་བཟོ་རྒྱུའི་ཐབས་བྱུས་ཤིག་ཆགས་ཀྱི་ཡོད་པར་འགྲེལ་བརྗོད་དང་སྦྲགས། སྲིད་འཛིན་སྐུ་ཞབས་བྷ་ཌན་མཆོག་གིས་དབུ་ཁྲིད་པའི་ཨ་རི་གཞུང་གིས་སླེབས་ལ་ཉེ་བའི་རྒྱ་ནག་ཐོག་གི་དུས་བཀག་བསྐྱར་ཞིབ་ཀྱི་ཚོགས་འདུའི་གོ་སྐབས་དམ་འཛིན་གནང་སྟེ་རྒྱ་ནག་གཞུང་གིས་བོད་ནང་ལ་གཞི་རྩའི་འགྲོ་བའི་ཐོབ་ཐང་བརྩི་མེད་རྡོར་རོག་དང་། བོད་དང་བོད་མིའི་ཐོག་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཁག་གི་ཐོག་གླེང་སློང་གནང་དགོས་པར་གསུངས་འདུག
རྒྱལ་ཚོགས་སུ་ཡོད་པའི་ཨ་རི་གཞུང་གི་སྐུ་ཚབ་ཀྱིས་ཀྱང་རྒྱ་ནག་དང་འབྲེལ་བའི་བསྐྱར་ཞིབ་ལས་དོན་སྐབས་རྒྱ་ནག་གི་ངོ་ཚབ་མི་སྣ་ཚོར་བོད་ནང་གི་གནས་སྟངས་སྐོར་ངེས་པར་དུ་འདྲི་རྩད་ནན་པོ་གནང་དགོས་པའི་ཞུ་སྐུལ་དང་སྦྲགས་ཏེ་འདི་ནི་ཨ་རི་གཞུང་གིས་བོད་དང་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ཐད་འགན་བཞེས་ཐུབ་པའི་ལས་དོན་ཞིག་ཀྱང་རེད་ཅེས་གསུངས་འདུག
གྲོས་ཚོགས་འཐུས་མི་རྣམ་པའི་ཞུ་སྐུལ་དེ་དང་འབྲེལ་ནས་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས་ཨ་རི་གྲོས་ཚོགས་ཀྱི་ངོས་ནས་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་བྱ་སྤྱོད་དེ་དག་ངོས་ལེན་མེད་པའི་བརྡ་ལན་གསལ་པོ་ཞིག་མཚོན་ཐུབ་ཀྱི་ཡོད་པར་འགྲེལ་བརྗོད་དང་སྦྲགས། སྐུ་ཞབས་ Antony Blinken ལགས་ཀྱིས་གྲོས་ཚོགས་ཀྱི་ཞུ་སྐུལ་དང་བརྡ་ལན་དེ་ཐུགས་ལ་བཅངས་ཏེ་རྒྱ་ནག་གཞུང་དང་དེའི་ངོ་ཚབ་མི་ཚོར་བོད་དོན་སྐོར་གླེང་སློང་དང་འདྲི་རྩད་ནན་པོ་གནང་བའི་ཐུགས་རེ་ཡོད་སྐོར་གསུངས་འདུག
གཞི་རྩའི་ལོ་བཞི་རེའི་མཚམས་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སྐབས་ཚོགས་མི་རྒྱལ་ཁབ་རྣམས་ཀྱིས་རྒྱལ་ཚོགས་ནས་གཏན་འབེབས་གནང་བའི་འགྲོ་བ་མིའི་ཐང་གི་རྩ་འཛིན་ལམ་སྟོན་ཁག་ལག་བསྟར་ཚད་ལྡན་གནང་གི་ཡོད་མེད་སོགས་དང་འབྲེལ་རྒྱལ་ཁབ་སོ་སོ་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཀྱི་ལས་རིམ་ཞིག་གནང་སྲོལ་ཡོད་པ་ལྟར། རིམ་མིན་ཕྱི་ཟླ་ ༡ ཚེས་ ༢༣ ནས་རྒྱལ་ཚོགས་ནང་ལ་རྒྱ་ནག་དང་འབྲེལ་བའི་དུས་བཀག་བསྐྱར་ཞིབ་ཐེངས་བཞི་པ་དེ་དངོས་སུ་དབུ་འཛུགས་གནང་གི་ཡོད་པ་དང་། དུས་སྐབས་དེ་དང་བསྟུན་འདས་པའི་དུས་ཚོད་ནང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་རྒྱལ་སྤྱིའི་འགྲོ་བ་མིའི་ཐོབ་ཐང་མཐུན་ཚོགས་སོགས་ནས་བོད་ནང་གི་ཛ་དྲག་གནས་སྟངས་དང་འབྲེལ་བའི་སྙན་ཐོ་ འབྲེལ་ཡོད་རྒྱལ་ཚོགས་ཀྱི་ཚོགས་ཆུང་ཁག་ལ་ཕུལ་ཡོད་པ་རེད། འབྲེལ་ཡོད་པར་ཁག་སྤྱི་ཚོགས་དྲ་རྒྱ་ལས་བཏུས།
