དེ་རིང་ཕྱི་ཟླ་ ༧ ཚེས་ ༦ སྟེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་གྱི་རྟེན་འབྲེལ་ཉིན་མོར་ལྷོ་ཕྱོགས་ཧུན་སུར་རབ་རྒྱས་གླིང་གཞིས་ཆགས་སུ་རྟེན་གཞི་བྱས་པའི་རྫོང་དཀར་ཆོས་སྡེ་གྲྭ་ཚང་གིས་༸རྒྱལ་བའི་བཀའ་དགོངས་བསྒྲུབ་ཆེད་བོད་མི་ཉམ་ཐག་དང་ཉེ་འཁོར་དུ་བཞུགས་པའི་རྒྱ་གར་གྲོང་གསེབ་པ་ཁྱོན་མི་ཚང་ ༡༡༡༣ ལྷག་ལ་སྐམ་ཟས་བགོ་འགྲེམས་གནང་སྟེ་༸སྐུའི་འཁྲུངས་སྐར་སྲུང་བརྩི་ཞུས་སོང་།
རྫོང་དཀར་ཆོས་སྡེ་གྲྭ་ཚང་དུ་སྐུ་མགྲོན་གཙོ་བོ་མངའ་སྡེའི་གྲོས་ཚོགས་འཐུས་མི་སྐུ་ཞབས་ HP Manjunath ལགས་ཀྱིས་གཙོས་ས་གནས་འགོ་འཛིན། དགོན་པའི་མཁན་རིན་པོ་ཆེ་རྣམ་པ་བཅས་དབུ་བཞུགས་ཐོག་དགོན་པའི་ངོས་ནས་མགོན་པོ་༸གང་ཉིད་མཆོག་གི་བཀའ་དྲིན་དང་རྒྱ་གར་གཞུང་དམངས་གཉིས་ལ་བཀའ་དྲིན་རྗེས་དྲན་ཞུ་ཆེད་དེང་སྐབས་འཚོ་རྟེན་ཐོག་ངལ་བ་འཕྲད་པའི་ས་གནས་ཀྱི་བོད་མི་དང་རྒྱ་གར་བའི་ཁྱིམ་ཚང་ ༡༡༡༣ ལ་སྐམ་ཟས་སྦྱིན་གཏོང་གནང་ཡོད་པ་རེད།
རྫོང་དཀར་ཆོས་སྡེ་གྲྭ་ཚང་གི་མཁན་རེན་པོ་ཆེ་བྱམས་པ་བཟོད་པ་ལགས་ནས་རྒྱ་གར་ལྷོ་ཕྱོགས་མངའ་སྡེ་ཀ་ན་ཊ་ཀ་ནི་བོད་པའི་དགོན་པ་དང་བོད་མི་གནས་སྡོད་ཆེ་ཤོས་གནང་ཡུལ་ཞིག་ཡིན་སྟབས་ཁོང་རྣམས་ལ་བཀའ་དྲིན་རྗེས་དྲན་ཞུ་ཕྱིར་༸རྒྱལ་བའི་ཐུགས་དགོངས་བསྒྲུབ་སླད་ཉམ་ཐག་རྣམས་ལ་རོགས་སྐྱོར་གནང་སྐོར་གསུངས་སོང་།
གཞི་རྩའི་འཛམ་གླིང་ཁྱོན་ལ་གནས་པའི་བོད་མི་ཡོངས་ནས་རྣམ་པ་འདྲ་མིན་ཐོག་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ངང་ཞུ་བཞིན་ཡོད་པ་ལྟར། ༸དཔལ་ལྡན་རྒྱུད་སྨད་སློབ་གཉེར་ཁང་གི་རིན་པོ་ཆེ་མཆོག་གིས་ཀྱང་རབ་རྒྱས་གླིང་གཞིས་མི་ཡོངས་ལ་སྐམ་ཟས་རིགས་དང་དུག་སེལ་སྨན་རྫས། ཁ་རས་ལ་སོགས་སྦྱིན་གཏོང་གནང་བ་མ་ཟད་དེ་བཞིན་ཤིང་སྣ་འདེབས་འཛུགས་གནང་སོང་། 
སེར་བྱེས་མཁས་སྙན་གྲྭ་ཚང་ནས་༸རྒྱལ་བའི་བཀའ་དྲིན་རྗེས་དྲན་དུ་ཤིང་འབྲས་སྣ་མིན་ ༡༣༡༡༥ འདེབས་འཛུགས་གནང་སྟེ་༸སྐུའི་འཁྲུངས་སྐར་སྲུང་བརྩི་ཞུས་ཡོད།
