དེ་རིང་ཕྱི་ཟླ་༦ཚེས་ ༢༦ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་རྟེན་གཞི་བྱས་པའི་བཀའ་བརྒྱུད་ནཱ་ལེནྡཱ་དགོན་པས་གོ་སྒྲིག་འོག་དེ་གར་སྐུ་མགྲོན་གཙོ་བོ་མེ་སོར་རྒྱལ་པོ་ཀི་རི་ཤི་ནཱ་དྷདྷ་ཡ་དུ་བིར་ཅ་མ་ར་ཇ་Yaduveer Krishnadattaa chamraja མཆོག་དབུ་བཞུགས་ཐོག་དཔལ་༸རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དགུང་གྲངས་༣༤ ལ་ཕེབས་པའི་༸སྐུའི་འཁྲུངས་སྐར་ཟབ་རྒྱས་ངང་སྲུང་བརྩི་ཞུས་ཡོད་པ་རེད། རྒྱལ་པོ་མཆོག་གིས་དཔལ་༸རྒྱལ་བ་དབང་ཀརྨ་པ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་གནང་བ་དང་ཆབས་ཅིག་གསུང་བཤད་གནང་འདུག 
རྒྱལ་པོ་རང་ཉིད་དང་ཁོང་གི་ཡབ་མེས་གོང་མ་རྣམས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་དམིགས་བསལ་འབྲེལ་བ་ཡོད་པ་དང་རྒྱལ་པོ་རང་ཉིད་༸གོང་ས་མཆོག་དེ་སྔོན་ལྷོ་ཕྱོགས་ལ་ཞབས་སོར་འཁོད་སྐབས་མེ་སོར་དུ་མཇལ་འཕྲད་ཞུ་མྱོང་བ་མ་ཟད་དེ་བཞིན་ཁོང་གི་ཡབ་མེས་རྣམས་ཀྱིས་ཀྱང་༸གོང་ས་མཆོག་ལ་མཇལ་འཕྲད་ཞུ་མྱོང་ཡོད་ཅིང་༸གོང་ས་༸སྐྱབས་མགོན་ཆེན་པོ་མཆོག་ལ་དམིགས་བསལ་དད་གུས་ཡོད་སྐོར་གསུངས་འདུག གཞན་ཡང་བཀའ་བརྒྱུད་ནཱ་ལེནྡཱ་དགོན་པས་༸རྒྱལ་དབང་ཀརྨ་པའི་ཐུགས་དགོངས་དང་མཛད་འཕྲིན་ལ་ཞབས་འདེགས་ཆེད་དམིགས་བསལ་ཁོར་ཡུག་སྲུང་སྐྱོབ་ཐད་ཞབས་འདེགས་སྒྲུབ་བཞིན་པར་ཡིང་རངས་བསྔགས་བརྗོད་དང་འབྲེལ་རྒྱལ་པོའི་ངོས་ནས་ཀྱང་དེའི་ཐད་མཐུན་གྱུར་གང་དགོས་ཞུ་རྒྱུ་ཡིན་པ་གསུངས་འདུག
ད་དུང་མཛད་སྒོ་དེའི་ཐོག་རྒྱ་གར་ས་གནས་གྲོས་ཚོགས་གོང་འོག་གི་འཐུས་མི་བཞི་དང་། བོད་མིའི་སྒྲིག་འཛུགས་ཀྱི་སྐུ་ཚབ་སྦེལ་ཀོབ་ལུགས་བསམ་གཞིས་ཆགས་ཀྱི་ས་གནས་འགོ་འཛིན་ཐུབ་བསྟན་ཚེ་རིང་ལགས། དེ་བཞིན་བཀའ་བརྒྱུད་ནཱ་ལེནྡཱ་དགོན་པའི་དགོན་བདག་བླ་མ་ཀརྨ་བསམ་གཏན་གླིང་པ་མཆོག་གིས་འཁྲུངས་སྐར་དང་འབྲེལ་བའི་གསུང་བཤད་གནང་འདུག ལྷག་དོན་མེ་སོར་རྒྱལ་པོ་མཆོག་གིས་ལྗོན་ཤིང་འདེབས་འཛུགས་དང་། མཛད་སྒོ་དེར་སྦེལ་ཀོབ་བོད་ཀྱི་ལྷ་མོ་ཚོགས་པ་དང་རྒྱ་གར་རིག་གཞུང་གི་ངོས་ནས་རྟེན་འབྲེལ་མཆོད་དབྱངས་ཕུལ་ཡོད་པ་རེད། 
