དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གྲོང་ཁྱེར་སླེ་ནས་སྤྱི་ལེ་ ༡༨ ཙམ་གྱི་སར་ཆགས་པའི་ཤེས་རབ་སྐྱེད་ཚལ་དཔེ་མཛོད་ཁང་དབུ་འབྱེད་རབ་གནས་བཀྲིན་སྩལ་གནང་མཛད་འདུག
ཤེས་རབ་སྐྱེད་ཚལ་གླིང་དཔེ་མཛོད་ཁང་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་གཞིར་བཟུང་སྐྱབས་རྗེ་ཁྲིག་སེ་རིན་པོ་ཆེ་མཆོག་གིས་ཐུགས་འགན་གཙོ་བཞེས་ཐོག་བཞེངས་བསྐྲུན་གནང་པ་ཞིག་ཡིན་པ་དང་།
དེ་རིང་དཔེ་མཛོད་ཁང་དངོས་སུ་དབུ་འབྱེད་ཀྱི་མཛད་སྒོའི་ཐོག་སླེ་གྲོང་ཁྱེར་གཡས་གཡོན་གྱི་སློབ་ཕྲུག་དང་། མང་ཚོགས་བཅས་མི་གྲངས་དུ་མ་འདུ་འཛོམས་བྱུང་ཡོད་པ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར། དེ་རིང་སླར་ཡང་མང་ཚོགས་ཚང་མས་མཛའ་བརྩེའི་རྣམ་འགྱུར་བཏོན་པར་ཐུགས་རྗེ་ཆེ་ཞུས་དང་སྦྲགས། ལ་དྭགས་མང་ཚོགས་ཀྱི་མཐུན་སྒྲིལ་ལ་ཡིད་རངས་བསྔགས་བརྗོད་མཛད་དེ། ༸གང་ཉིད་ཀྱི་ཐུགས་བསྐྱེད་དམ་བཅའ་བཞིའི་ནང་ནས་ཆོས་ལུགས་ཕན་ཚུན་དབར་མཐུན་འབྲེལ་གོང་སྤེལ་ཡོང་ཐབས་སྐོར་བཀའ་སྩལ་གནང་པ་དང་སྦྲགས། མང་ཚོགས་ཚང་མའི་ངོས་ནས་རང་ཉིད་ཀྱི་རྒྱལ་ཁབ་དང་། མི་རིགས། ཆོས་ལུགས་བཅས་ལ་ཞེན་ཆགས་གཅིག་པུ་མིན་པར་རྒྱ་ཆེ་ས་ནས་གོ་ལ་གཅིག་འགྱུར་གྱི་འདུ་ཤེས་ཐོག་བསམ་བློ་གཏང་དགོས་པ་དང་། སེམས་བཟང་པོ་བྱེད་རྒྱུ་དེ་རང་གཞན་ཀུན་གྱི་ཞི་བདེའི་རྩ་བ་ཡིན་པ་བཅས་ཀྱི་ལམ་སྟོན་སྩལ་གནང་ཡོད། 
༸གང་ཉིད་ནས་ད་དུང་། བོད་ཀྱི་ནང་པའི་ཆོས་དང་སྐད་ཡིག་བཅས་པ་དུས་ཪབས་བདུན་པ་བརྒྱད་པ་ནས་ཡོད་པའི་བྱུང་རབས་ལོ་རྒྱུས་ངོ་སྤྲོད་སྩལ་གནང་མཛད་པ་དང་བསྟུན། བོད་པའི་སྐད་དང་ཡི་གེ་རྒྱུན་སྤྱོད་བྱེད་མཁན་ཚོར་དཔལ་ན་ལན་ཌའི་ནང་པའི་ཆོས་ཀྱི་གོ་དོན་གཏིང་ཟབ་པོ་ཡོད་པ་དང་། དེའི་དཔེ་མཚོན་ནི། ཆབ་སྲིད་ཀྱི་ཐོག་ནས་བོད་དེ་རྒྱ་ནག་དམར་པོའི་བཙན་དབང་འོག་ཏུ་གནས་ཡོད་རུང་། ཆོས་ཕྱོགས་ཀྱི་ཐོག་ནས་དེང་སྐབས་རྒྱ་རིགས་ཤེས་ཡོན་ཅན་མང་པོ་ཞིག་གིས་བོད་ཀྱི་ནང་ཆོས་ལ་ཡིད་རང་བསྔགས་བརྗོད་དང་སྦྲགས་ཉམས་ལེན་བྱེད་མཁན་རྗེ་མང་དུ་འགྲོ་བཞིན་པའི་སྐོར་ཡང་བཀའ་སྩལ་འདུག 
༸གོང་ས་༸སྐྱབས་མགོན་ཆེན་པོ་མཆོག་གི་སྐབས་དེར་ད་དུང་། གོ་ལའི་ཚ་དྲོད་འཕེལ་བཞིན་སྐོར་མང་ཚོགས་ལ་དྲན་སྐུལ་དང་སྦྲགས། རྒྱ་གར་གྱི་ཁོར་ཡུག་ལས་འགུལ་བ་དམ་པ་ Bahuguna མཆོག་ནས་གང་ཉིད་ལ་ཧི་མ་ལ་ཡའི་རི་རྒྱུད་ཁག་ཏུ་ ཤིང་ནག་འདེབས་འཛུགས་མང་ཙམ་བྱ་དགོས་པའི་ལམ་སྟོན་གནང་པ་ལྟར། མང་ཚོགས་ཚང་མའི་ངོས་ནས་དེ་ལྟར་གནང་དགོས་པའི་སྐུལ་མ་ཡང་མཛད་ཡོད་པ་རེད། 
མཛད་སྒོའི་ཐོག་སློབ་ཕྲུག་ཁག་གཅིག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་འདྲི་ལམ་སྟོན་ཁག་གཅིག་ཞུས་པ་མ་ཟད། སྐབས་དེར་ཤེས་རབ་སྐྱེད་ཚལ་གླིང་དཔེ་མཛོད་ཁང་དངོས་སུ་གསར་འཛུགས་ཀྱི་ཐུགས་འགན་བཞེས་མཁན་སྐྱབས་རྗེ་ཁྲིག་སེ་རིན་པོ་ཆེ་མཆོག་ནས། ༸གོང་ས་མཆོག་༸གང་ཉིད་ཀྱི་དཔེ་མཛོད་དངོས་སུ་དབུ་འབྱེད་བཀྲིན་བསྐྱངས་བར་ཐུགས་རྗེ་ཆེ་ཞུས་དང་། ལྷག་པར་ད་བར་༸གང་ཉིད་ཀྱིས་ལམ་སྟོན་དང་དགོངས་གཞི་གཞིར་བཟུང་མ་འོངས་པར་ཡང་དེ་ལྟར་མུ་མཐུད་ཞུ་རྒྱུའི་དམ་བཅའ་ཡང་ཕུལ་གནང་མཛད་ཡོད།
གཞི་རྩའི་ཤེས་རབ་སྐྱེད་ཚལ་གླིང་དཔེ་མཛོད་ཁང་དེ་ནི། ཕྱི་ལོ་ ༢༠༡༨ ལོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐྱབས་རྗེ་ཁྲིག་སེ་རིན་པོ་ཆེ་མཆོག་ལ་ལ་དྭགས་མི་མང་དང་། དེ་བཞིན་ཕྱི་ཕྱོགས་ཀྱི་མང་ཚོགས་བཅས་ལ་ཤེས་ཡོན་གྱི་ལྟེ་གནས་དཔེ་མཛོད་ཞིག་འཛུགས་བསྐྲུན་ཡོང་ཐབས་ཀྱི་ལམ་སྟོན་གནང་པ་གཞིར་བཟུང་ཕྱི་ལོ་ ༢༠༢༠ ལོའི་ལས་འཆར་ལེགས་གྲུབ་ཟིན་པ་ཞིག་དང། དཔེ་མཛོད་ཁང་གི་ངོས་ནས་རྒྱུན་དུ་སློབ་ཕྲུག་རྣམ་ལ་ཆོས་ལུགས་ལ་མ་བརྟེན་པའི་བཟང་སྤྱོད་དང་། ལྷག་པར་ཕྱི་ནང་མང་ཚོགས་ལ་ནང་ཆོས་ངོ་སྤྲོད་དང་། རྒན་པ་ཚོར་ཡི་གེ་བྲིས་ཀློག་སོགས་ཀྱི་ཟབ་སྦྱོང་ཡང་གནང་གི་ཡོད་པ་རེད། ཤེས་རབ་སྐྱེད་ཚལ་གླིང་དཔེ་མཛོད་ཀྱི་འགན་འཛིན་དགེ་བཤེས་འཇམ་དབྱངས་བཀྲིས་ལགས་ཀྱིས་དེའི་སྐོར་འདི་ག་རླུང་འཕྲིན་ཁང་ལ་ངོ་སྤྲོད་གནང་ཡོད།
