འཛམ་གླིང་ས་ཕྱོགས་གང་སར་བོད་མི་གཙོ་བོར་གྱུར་པའི་༸གོང་ས་མཆོག་ལ་དད་མོས་ཞུ་མཁན་མང་ཚོགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཚན་སྙན་སྲུང་སྐྱོབ་དང་མགོན་པོ་མཆོག་ལ་གཞི་མེད་ལོག་འགྲེལ་གྱི་གསར་འགྱུར་སྤེལ་མཁན་གསར་ཁང་ཁག་ལ་ངོ་རྒོལ་གྱི་ལས་འགུལ་གཅིག་རྗེས་གཉིས་མཐུད་ཀྱིས་སྤེལ་བཞིན་ཡོད་པ་ལྟར། ཕྱི་ཟླ་ ༤ ཚེས་ ༡༩ ཉིན་སུད་སི་གྲོང་ཁྱེར་ཛུ་རིག་ནང་མང་ཚོགས་སྟོང་ཕྲག་ལྷག་འདུ་འཛོམས་གནང་སྟེ་ང་ཚོ་རྟག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་ཡོད་ཅེས་པའི་འབོད་ཚིག་སྒྲོག་བཞིན་གཞི་རྒྱ་ཆེ་བའི་ཞི་བའི་གོམ་བགྲོད་ལས་འགུལ་སྤེལ་སོང་།
སུད་སི་དང་ལིག་ཏེན་སིཊཡན་བོད་རིགས་མི་མང་གི་སྣེ་ཁྲིད་འོག་ས་གནས་སུ་ཡོད་པའི་གཞུང་འབྲེལ་མིན་པའི་ཚོགས་པ་ཁག་དང་སེར་སྐྱ་མང་ཚོགས་སྟོང་ཕྲག་ལྷག་གིས་སུད་སི་ཛུ་རིག་གྲོང་ཁྱེར་གྱི་ Werdmuhleplatz ཐང་ཆེན་ནས་དབུ་འཛུགས་ཀྱིས་ཛུ་རིག་གྲོང་ཁྱེར་ནང་ཡོད་པའི་སུད་སི་རྒྱལ་ཡོངས་འགྲེམས་སྟོན་ཁང་བར་ཕྱག་ཏུ་༸གོང་ས་གི་༸སྐུ་པར་དང་བོད་ཀྱི་རྒྱལ་དར་བསྣམས་པར་མ་ཟད། བརྒྱུད་ལམ་ཐོག་རྒྱ་དམར་གཞུང་གཙོས་དེ་འབྲེལ་གསར་ཁང་ཁག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་སྐུར་འདེབས་དང་གཞི་མེད་ལོག་འགྲེལ་གྱི་གསར་འགྱུར་དེ་རིགས་སྤེལ་མཚམས་འཇོག་དགོས་པ་སོགས་ཀྱི་འབོད་ཚིག་འཁོད་པའི་ཤོག་བྱང་བསྣམས་ཤིང་། ལྷག་པར་ས་གནས་བོད་མི་ཚོས་དེ་འབྲེལ་མགོན་པོ་༸གང་ཉིད་མཆོག་ལ་མཚན་སྙན་མེད་པ་བཟོ་རྒྱུའི་བྱ་ངན་དེ་ལྟར་སྤེལ་བར་མཐའ་གཅིག་ཏུ་ངོ་རྒོལ་ཡོད། ང་ཚོ་རྟག་ཏུ་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་ཡོད་ཅེས་གཞི་རྒྱ་ཆེ་བའི་ཞི་བའི་གོམ་བགྲོད་ལས་འགུལ་སྤེལ་ཡོད།
དེ་བཞིན་རི་དགོན་ཆོས་འཁོར་གྱི་དགོན་མཁན་རིན་པོ་དབུ་བཞུགས་ཐོག་སེར་སྐྱ་མི་མང་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་ཡུན་རིང་བརྟན་པའི་༸རྒྱལ་བའི་ཞབས་བརྟན་དང་སྒྲོལ་མ་སོགས་གསོག་སྒྲུབ་གནང་ཡོད་པ་རེད།