བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཟླ་བ་འདིའི་ཚེས་ ༢༡ ནས་ཉིན་གྲངས་གསུམ་རིང་ཨ་རིའི་རྒྱལ་ས་ཝ་ཤིན་ཊོན་ཌི་སིར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པར་ཚོགས་བཅར་གནང་རྒྱུ་དང་དེ་བཞིན་ཨ་རིར་ཕེབས་ཞོར་དུ་ ཨ་རིའི་གྲོང་ཁྱེར་བཞིའི་ནང་ས་གནས་བོད་རིགས་དང་མཇལ་འཕྲད་གནང་རྒྱུ་སོགས་ཀྱི་ཆེད་གཞུང་འབྲེལ་ཕྱོགས་ཕེབས་གནང་ཡོད་པ་ལྟར། ཕྱི་ཚེས་ ༡༨ དང་ ༡༩ ཉིན་ཨ་རི་བྱང་ཀེ་ལི་ཕོར་ནེ་ཡ་དང་མི་ནི་སོ་ཊ་ས་གནས་བོད་རིགས་དང་མཇལ་འཕྲད་གནང་འདུག
ད་བར་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ཚེས་ ༡༨ ཉིན་གྱི་ཞོགས་པར་ས་གནས་མི་མང་ལ་མཇལ་འཕྲད་ཀྱིས་གསུང་བཤད་ལས་རིམ་དང་ཉིན་རྒྱབ་གཞོན་སྐྱེས་དང་ལྷན་དུ་མཇལ་འཕྲད། དེ་བཞིན་ཕྱི་དྲོ་ཆོས་ཚོགས་ཁག་གི་འགན་འཛིན་དང་བླ་མ། དགེ་བཤེས་སོགས་དང་མཇལ་མོལ་གནང་བར་མ་ཟད། ཕྱི་ཚེས་ ༡༩ ཉིན་མི་ནི་སོ་ཊར་ཕེབས་ཐོན་གྱིས་ས་གནས་བོད་མིའི་སྤྱི་མཐུན་ཚོགས་པའི་ཚོགས་ཁང་རྙིང་པར་བོད་རིགས་གཞོན་སྐྱེས་དང་ཐུག་འཕྲད་གནང་བ་དང་། མི་ནི་སོ་ཊ་བོད་མིའི་སྤྱི་མཐུན་ཚོགས་པའི་ཚོགས་ཁང་གསར་པར་ས་གནས་བོད་རིགས་མང་ཚོགས་དང་མཇལ་འཕྲད་གནང་ཡོད།
ཨ་རིའི་སེན་ཕེ་རེན་སི་ཀོར་རྟེན་གཞི་བྱས་པའི་ཇེ་ཨེཕ་ཀེ་ཚོགས་ཁང་ནང་ས་གནས་མང་ཚོགས་དང་དང་མཇལ་འཕྲད་གནང་སྐབས་མང་གཙོའི་ཀ་བ་གསུམ་གྱི་འགན་དབང་ཆ་བགོས་ཀྱིས་ལྗིད་སྙོམས་སྟངས་འཛིན་མིང་དོན་མཚུངས་པ་ཞིག་ཡོང་རྒྱུ་ནི་གལ་གནད་ཆེན་པོ་ཡིན་སྐོར་གསུངས་པ་དང་སྦྲགས། བོད་ཀྱི་ལོ་རྒྱུས་ཁྲོད་ཀྱི་གནས་བབ་ལ་ཕྱིར་གཟིགས་གནང་གལ་ཡིན་པ་དང་ལྷག་པར་དུ་རྒྱ་སྡེ་དང་བོད་སྡེ་གང་ཡིན། ལྷ་སྡེ་དང་མི་སྡེའི་ཐ་སྙད་དེ་དག་རེ་རེ་བཞིན་སྤྱོད་ཀྱི་ཡོད་མེད་རྒྱུ་མཚན་དང་བཅས་ཤེས་ཚེ་ཆོལ་གསུམ་པོ་ཕན་ཚུལ་དབར་རྩོད་དགོས་དོན་གང་ཡང་མེད་སྐོར་གསུངས་པ་དང་ཆབས་ཅིག གང་ལྟར་༸གོང་ས་མཆོག་གི་བཀའ་དགོངས་གསལ་པོར་རྟོགས་ཐུབ་པ། ཁྲིམས་དང་སྒྲིག་གཞི་ཤེས་པ། དེ་བཞིན་ལོ་རྒྱུས་ཤེས་པ་ཡིན་ན་མང་གཙོ་ཚད་ལྡན་ནང་འགྲོ་ཐུབ་རྒྱུའི་ཆ་རྐྱེན་ཚང་བ་རེད་ཅེས་གསུངས་འདུག
སྲིད་སྐྱོང་མཆོག་གིས་བཙན་བྱོལ་བོད་མིའི་གྲངས་འབོར་ཚད་ལྡན་དང་སྒྲིག་འཛུགས་ནས་མཐུན་རྐྱེན་སྦྱོར་སྤྲོད་ཚད་ལྡན་ཡོང་རྒྱུ། དེ་བཞིན་མ་འོངས་ལས་གཞི་དང་ལས་འཆར་རྣམས་རྒྱུ་མཚན་དང་ལྡན་པའམ་དངོས་ཡོད་གནས་སྟངས་དང་མཐུནཔ་ཞིག་ཡོང་ཐབས་སླད་དུ་འདི་ལོའི་ཕྱི་ཟླ་ ༧ པའི་ནང་ལས་ཉིན་ ༡༦ རིང་ཕྱི་དྲིལ་ལས་ཁུངས་བརྒྱུད་མི་འབོར་གྲངས་བཤེར་བྱ་རྒྱུའི་ལས་གཞི་ཞིག་དབུ་འཛུགས་གནང་རྒྱུ་ཡིན་སྟབས། མང་ཚོགས་ཀྱི་ངོས་ནས་ཚགས་ཚུད་ཐོག་མཉམ་ཞུགས་གནང་གལ་ཡིན་པ་གསུངས་འདུག
ཉིན་རྒྱབ་ཀེ་ལི་ཕོར་ནི་ཡ་བོད་རིགས་ཚོགས་པའི་སྤྱི་ཁང་དུ་བོད་རིགས་གཞོན་སྐྱེས་གྲངས་ ༥༠ ཙམ་དང་ཟུར་དུ་མཇལ་འཕྲད་ཀྱིས་ཁོང་རྣམས་ལ་བྱང་ཨ་རིར་བོད་རིགས་ཐོག་མར་ཕེབས་སྟངས་དང་འབྲེལ་སྐབས་ ༡༦ པའི་བཀའ་ཤག་གི་ལས་གཞི་གཞོན་སྐྱེས་རྣམས་ནས་དང་བླངས་བོད་དོན་ཞུ་གཏུག་ལས་འགུལ་ནང་མཉམ་ཞུགས་གནང་དགོས་གལ་སྐོར་གསུང་བཤད་གནང་འདུག་པར་མ་ཟད། རྒྱ་ནག་གིས་བོད་ཐོག་དབང་བསྒྱུར་བྱེད་བཞིན་པ་དེ་རྒྱ་གཞུང་གིས་རྒྱལ་སྤྱིའི་ཐོག་ཁྲིམས་མཐུན་བཟོ་ཐབས་འབད་བརྩོན་བྱེད་བཞིན་ཡོད་པ་དང་རྒྱ་ནག་དམར་པོའི་གཞུང་གིས་བོད་པའི་ལོ་རྒྱུས་ལ་འཁྱོག་བཤད་བྱེད་བཞིན་ཡོད་པ་སོགས་ད་ལྟའི་བོད་ནང་གི་ཛ་དྲག་གནས་སྟངས་ཞིབ་རྒྱས་ངོ་སྤྲོད་གནང་འདུག
ཕྱི་དྲོར་སེན་ཕེ་རེན་སི་ཀོར་ཡོད་པའི་ཆོས་ཚོགས་ཁག་གི་འགན་འཛིན་དང་སྐུ་ཚབ་ལྷན་མཇལ་མོལ་གནང་བར་རང་རེའི་སྤྱི་ཚོགས་རང་ཁ་རང་གསོ་ཡོང་རྒྱུ་སླད་ཆོས་ཚོགས་ཁག་ནས་རྒྱ་གར་དུ་རྒས་གསོ་ཁང་ལྟ་བུར་མཐུན་རྐྱེན་སྦྱོར་སྤྲོད་གནང་རྒྱུར་རེ་བསྐུལ་གནང་བ་དང་སྦྲགས་བོད་མིའི་སྒྲིག་འཛུགས་ཀྱིས་ཀྱང་མཐུན་འགྱུར་རམ་འདེགས་གང་ཐུབ་ཞུ་རྒྱུ་ཡིན་ཞེས་སོགས་གསུངས་འདུག
ཕྱི་ཚེས་ ༡༩ ཉིན་གྱི་སྔ་དྲོ་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་མངའ་སྡེ་མི་ནི་སོ་ཊར་ཕེབས་ཐོན་གནང་སྟེ་དང་ཐོག་གྲོང་ཁྱེར་ St. Paul དུ་ས་གནས་བོད་མིའི་སྤྱི་མཐུན་ཚོགས་པའི་ཚོགས་ཁང་རྙིང་པར་བོད་རིགས་གཞོན་སྐྱེས་དང་ཐུག་འཕྲད་ཀྱིས་གསུང་བཤད་གནང་བ་དང་། དེ་རྗེས་མི་ནི་སོ་ཊའི་གྲོང་ཁྱེར་ Isanti དུ་མི་ནི་སོ་ཊ་བོད་མིའི་སྤྱི་མཐུན་ཚོགས་པའི་ཚོགས་ཁང་གསར་པར་ས་གནས་བོད་རིགས་མང་ཚོགས་དང་མཇལ་འཕྲད་ཀྱིས་གསུང་བཤད་དང་མང་ཚོགས་ཀྱི་བཀའ་འདྲིར་ལན་འདེབས་གསལ་བཤད་གནང་ཡོད།
ས་གནས་མང་ཚོགས་དང་མཇལ་མོལ་སྐབས་ད་བར་སྲིད་སྐྱོང་མཆོག་གིས་སྲིད་སྐྱོང་གི་ཐུགས་འགན་བཞེས་པ་ནས་བཟུང་ཆབ་སྲིད་ཀྱི་ལས་དོན་དང་སྤྱི་ཚོགས་བདེ་དོན་ཐད་ལ་ཕྱག་ལས་གང་གནང་བ་དང་མ་འོངས་ལས་གང་སྤེལ་འཆར་སོགས་ངོ་སྤྲོད་དང་སྦྲགས། འདས་པའི་ལོ་ངོ་ ༦༠ ནས་བོད་ཀྱི་གནད་དོན་དེ་མཇའ་ལྟ་བུར་མ་ཡལ་བ་གནས་ཐུབ་པ་ནི་༸གོང་ས་མཆོག་༸སྐུ་རྐྱང་གི་བཀའ་དྲིན་ཁོ་ནར་བརྟེན་ནས་བྱུང་བ་ཞིག་དང་། མ་འོངས་ལོ་ངོ་དྲུག་ཅུ་ནང་བོད་ཀྱི་གནད་དོན་དེ་གནས་དང་མ་གནས་ནི་༸གོང་ས་མཆོག་གིས་གསོལ་སྩལ་མཛད་པའི་མང་གཙོའི་སྲོལ་བཟང་དེ་གཅེས་འཛིན་གནང་བའི་སྒོ་ནས་དབུ་ཁྲིད་དང་མི་མང་ནསནུས་པ་མཉམ་སྤུངས་གནང་ལག་ཡིན་པ་ལས་ཆོལ་ཁ་དང་ཆོས་བརྒྱུད་རྩོད་པ་དེས་རང་གཞན་སུ་ལའང་ཕན་ཐོགས་མེད་སྐོར་གསུངས་འདུག
