ཁ་སྔོན་རེས་གཟའ་ལྷག་པའི་ཉིན་ཨ་མི་རི་ཀའི་གྲོས་ཚོགས་འཐུས་མི་རྣམས་ཀྱིས་འོས་འདེམས་འཐུས་ཚོགས་ཀྱི་འོས་ཤོག་གྲངས་བཤེར་གནང་སྟེ་ཨ་རིའི་སྲིད་འཛིན་གཞོན་པ་ཟུར་པ་དང་མང་གཙོ་ཚོགས་པའི་སྲིད་འཛིན་གྱི་འོས་མི་སྐུ་ཞབས་ Joe Biden མཆོག་ལ་རྒྱལ་ཁ་ཐོབ་པའི་ངེས་གཏན་གྱི་གསལ་བསྒྲགས་ཁྲོད་འཁྱུར་ ཉེ་སྲིད་འཛིན་སྐུ་ཞབས་ Donald Trump མཆོག་གི་རྒྱབ་སྐྱོར་བ་རྣམས་ཀྱིས་ཨ་རིའི་གྲོས་ཚོགས་ཀྱི་ཚོགས་ཁང་ནང་དུ་ངོ་རྒོལ་གྱི་ལས་འགུལ་ཤུགས་ཆེ་སྤེལ་ཡོད་པ་ལྟར་དེའི་ཁྲོད་མི་རེ་ཟུང་གིས་བོད་ཀྱི་རྒྱལ་དར་བསྣམས་ནས་ངོ་རྒོལ་གྱི་ལས་འགུལ་ནང་མཉམ་ཞུགས་གནང་ཡོད་སྟབས། ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་དེ་ནི་བློ་ཚབ་གནང་ཡུལ་ཞིག་ཏུ་གྱུར་ཡོད་པར་གསུངས་སོང་། 
སྲིད་འཛིན་སྐུ་ཞབས་ Trump མཆོག་གི་རྒྱབ་སྐྱོར་བ་རྣམས་ནས་གྲོས་ཚོགས་ཀྱི་སྒེའུ་ཁུང་བཅག་ནས་གྲོས་ཚོགས་ཀྱི་ཚོགས་ཁང་དུ་རྒོལ་མཆོང་བྱས་ཡོད་པ་དང་། ཟིང་འཁྲུག་དེའི་ཁྲོད་མི་བཞི་རྐྱེན་འདས་སུ་གྱུར་བར་མ་ཟད་མི་གྲངས་ ༦༨ ཙམ་ཞིག་འཛིན་བཟུང་བྱས་ཡོད་པ་རེད། ལྷག་པར་དུ་གྲོས་ཚོགས་ཀྱི་མདུན་དུ་ Trump ཡི་རྒྱབ་སྐྱོར་བ་རྣམས་ཀྱིས་ཨ་རིའི་རྒྱལ་དར་སོགས་འཁྱེར་ནས་ངོ་རྒོལ་བྱེད་བཞིན་པའི་སྐབས་དེར་མི་རེ་ཟུང་ཞིག་གིས་བོད་ཀྱི་རྒྱལ་དར་འཁྱེར་ཏེ་ལས་འགུལ་ནང་དངོས་སུ་མཉམ་ཞུགས་བྱེད་བཞིན་པའི་འདྲ་པར་སྤྱི་ཚོགས་དྲ་ལམ་ནང་ཁྱབ་གདལ་ཆེས་ཆེར་འགྲོ་བཞིན་འདུག
གནད་དོན་དེའི་ཐད་ཨ་རིའི་བོད་ཀྱི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་མི་རི་ཀའི་ཟིང་འཁྲུག་ཁྲོད་ཁག་ཅིག་གིས་བོད་ཆས་གྱོན་ནས་བོད་ཀྱི་རྒྱལ་དར་བསྣམས་པ་མཇལ་རྒྱུ་ཡོད་པ་དེ་ནི་བློ་འཚབ་གནང་གཞི་ལས་མ་འདས་པ་དང་། སྤྱིར་ཁོང་རྣམས་བོད་པ་ཡིན་མིན་ཞུ་ཚོད་དཀའ་ནའང་སྤྱི་ཚོགས་དྲ་རྒྱའི་ཐོག་དེ་འབྲེལ་འདྲ་པར་སོགས་ཁྱབ་གདལ་འགྲོ་བཞིན་པར་བརྟེན་དེའི་ཐད་ཐུགས་གཟབ་གནང་དགོས་སྐོར་གསུངས་སོང་། ལྷག་པར་དུ་བོད་དོན་གྱི་འཐབ་རྩོད་འཚོ་བཞུགས་རིང་དུས་དང་རྣམ་པ་ཀུན་ཏུ་གཞུང་འཛིན་དང་ཆབ་སྲིད་ཚོགས་པ་ཚང་མའི་ངོས་ནས་རྒྱབ་སྐྱོར་དགོས་པ་དང་སྒོས་ཨ་རིའི་མི་སེར་ཡིན་ན་ཆབ་སྲིད་ཀྱི་ལས་འགུལ་སོགས་ནང་མཉམ་ཞུགས་གནང་ཆོག་གི་ཡོད་ཀྱང་། དེ་དག་སོ་སོ་སྒེར་གྱི་ངོས་ནས་གནང་དགོས་པ་ལས་བོད་ཀྱི་རྒྱལ་དར་དང་བོད་མིའི་སྤྱིའི་མིང་འཁྱེར་ནས་ཟིང་འཁྲུག་འདི་རིགས་ལ་མཉམ་ཞུགས་གནང་བ་དེའི་ཐོག་ནས་ཤུགས་རྐྱེན་གཞན་ཞིག་ལ་ཐེབས་ཉེན་ཡོད་སྟབས། དེ་འབྲེལ་ཐད་སྒེར་སོ་སོ་ནས་ཡིད་གཟབ་གནང་དགོས་སྐོར་གསུངས་ཡོད། ད་དུང་ཁོང་གིས་ཨ་མི་རི་ཀའི་ཆབ་སྲིད་ཚོགས་པ་དང་གཞུང་འཛིན་གྱིས་ད་བར་བོད་ཀྱི་གནད་དོན་ལ་རྒྱབ་སྐྱོར་གནང་གི་ཡོད་པ་དང་ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔ་ནས་ཚོགས་པ་གང་འདྲ་ཞིག་གི་གཞུང་འཛིན་གནང་མིན་ལ་མ་ལྟོས་པར་སྤྱི་ཡོངས་དང་ལྷན་མཛའ་གྲོགས་གནང་གི་ཡོད་སྟབས་ང་ཚོས་ཀྱང་དེ་ལྟར་གནང་དགོས་གལ་ཡིན་པར་འབོད་སྐུལ་གནང་སོང་།
དེ་དོན་སྤྱི་ཚོགས་དྲ་ལམ་ཐོག་བོད་མི་ཁག་ཅིག་གིས་སྤྱིར་ལས་འགུལ་ནང་མཉམ་ཞུགས་གནང་དང་མི་གནང་སོ་སོའི་འདོད་མོས་ཡིན་ཀྱང་། ཟིང་འཁྲུག་འདིའི་ཁྲོད་བོད་ཀྱི་རྒྱལ་དར་བསྣམས་པ་ནི་ནོར་ཡིན་པ་དང་། ལ་ལས་རྒྱལ་དར་བསྣམས་མཁན་དེ་དག་བོད་མི་ཡིན་པར་ཐེ་ཚོམ་གནང་མཁན་དང་། དེ་བཞིན་མི་དེ་དག་གིས་བོད་མི་སྤྱི་ཡོངས་ཀྱི་སྐུ་ཚབ་མཚོན་གྱི་མ་རེད་ཅེས་སྐྱོན་བརྗོད་ཀྱིས་མཆན་བཀོད་གནང་འདུག་པ་དེ་ལྟར་ཡང་། ཁག་ཅིག་གིས་ལྟ་བ་དང་ལངས་ཕྱོགས་མ་འདྲ་བ་ཡོད་པ་དེ་དག་ལ་གུས་བརྩི་གནང་དགོས་ཀྱི་རེད་ཅེས་བརྗོད་མཁན་ཡང་འདུག བོད་མི་གཞན་ཁག་ཅིག་གིས་མི་དེ་དག་སུ་ཡིན་མིན་རྩད་གཅོད་ནན་པོ་གནང་དགོས་ཀྱི་རེད་ཅེས་བརྗོད་ཀྱི་འདུག་པར་མ་ཟད། བོད་མི་དེ་དག་གིས་འདུ་འཛོམས་ནང་མཉམ་ཞུགས་གནང་བ་ལས་ཟིང་འཁྲུག་ནང་ཆ་ཤས་ལེན་མེད་པས་དག་སེལ་གནང་མཁན་ཡང་བྱུང་འདུག 
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ད་བར་ཨ་རིའི་སྤྱི་མཐུན་ཚོགས་པ་དང་མང་གཙོ་ཚོགས་པ་གཉིས་ཀས་བོད་དོན་སླད་རྒྱབ་སྐྱོར་གནང་བར་མ་ཟད། ང་ཚོའི་གཅིག་ལ་རྒྱབ་སྐྱོར་དང་གཞན་ལ་སྐྱོན་བརྗོད་ཀྱི་གནང་ཕྱོགས་དེ་མཚམས་འཇོག་གནང་དགོས་པ་དང་ལྷག་པར་དུ་ལས་འགུལ་འདི་རིགས་ལ་བོད་ཀྱི་རྒྱལ་དར་བསྣམས་རྒྱུ་སོགས་ཀྱི་བྱ་སྤྱོད་ལ་ཡིད་གཟབ་དང་དགོངས་བཞེས་གནང་གལ་སྐོར་གསུངས་སོང་། 
གཞི་རྩའི་སྲིད་འཛིན་ Trump མཆོག་གིས་ཨ་རིའི་འོས་བསྡུ་ཆེན་མོ་ཟིན་མ་ཐག་འོས་བསྡུ་དེ་དྲང་བདེན་བྱུང་མེད་སྐོར་བརྗོད་ཡོད་ཀྱང་། ཁ་སྔོན་གྱི་ཟིང་འཁྲུག་རྗེས་ཁོང་གིས་སྲིད་འཛིན་གྱི་འོས་བསྡུ་ལས་ཕམ་ཉེས་བྱུང་བར་ངོས་ལེན་དང་སྦྲགས། Twitter དྲ་ལམ་ཐོག་བརྙན་ཐུང་བརྒྱུད་རེས་གཟའ་ལྷག་པའི་ཉིན་བྱུང་བའི་ཟིང་འཁྲུག་ལ་སྐྱོན་བརྗོད་དང་འབྲེལ། ཨ་རི་ནི་ཁྲིམས་ལུགས་ལྡན་པའི་རྒྱལ་ཁབ་ཅིག་ཡིན་པ་དང་སླད་མར་ཡང་དེ་ལྟར་གནས་རྒྱུ་ཡིན་སྟབས། ད་རེས་གྲོས་ཚོགས་ནང་སིམ་འཛུལ་བྱེད་མཁན་ཚོས་ཨ་རིའི་རྒྱལ་ཁབ་ཀྱི་སྐུ་ཚབ་མཚོན་གྱི་མེད་སྐོར་གསུངས་པ་དང་ཆབས་ཅིག ད་ལན་གྱི་ངོ་རྒོལ་བརྒྱུད་ཁྲིམས་འགལ་གྱི་བྱ་བར་ཞུགས་མཁན་ཚོར་ངེས་པར་དུ་ཉེས་ཆད་ཕོག་རྒྱུ་ཡིན་པ་གསུངས་འདུག
