སུད་སི་དང་ལིག་ཏེན་སིཊཡན་བོད་རིགས་མི་མང་ཁྱབ་ཁོངས་ཨར་གྷའོ་ཚོགས་ཆུང་གི་གཟའ་མཇུག་བོད་ཡིག་སློབ་གྲྭ་དང་ཚོགས་ཆུང་གི་རིག་གཞུང་སྡེ་ཚན་གཉིས་ཀྱིས་གཙོ་འགན་བཞེས་ཐོག་ས་གནས་བོད་སློབ་ཀྱི་དགེ་ལས་ཕ་མ་དང་སློབ་ཕྲུག་རྣམས་ཀྱིས་བོད་ཀྱི་སྐད་ཡིག་དང་འབྲེལ་བའི་བྱེད་སྒོ་འདྲ་མིན་གཉེར་བ་བརྒྱུད་བོད་ཀྱི་རིག་གཞུང་ཉིན་མོ་ཐེངས་གསུམ་པ་སྲུང་བརྩི་ཞུས་ཡོད།བོད་ཀྱི་རིག་གཞུང་ཉིན་མོ་ཞེས་པའི་དམིགས་ཡུལ་གཙོ་བོ་ནི། ས་གནས་སུ་དགེ་ལས་ཕ་མ་རྣམས་འདུ་འཛོམས་གནང་བའི་ཐོག་ནས་བོད་ཀྱི་སྐད་ཡིག་དང་རིག་གཞུང་སོགས་ཀྱི་ཐོག་ཕན་ཚུན་དབར་གོ་བསྡུར་སྦྱང་བཤད་གནང་ཆེད་ཡིན་པ་རེད།ཡོ་རོབ་རྒྱལ་ཁབ་སུད་སི་ནང་ཕྱི་ལོ་ ༡༩༦༠ ཙམ་ནས་བོད་མི་སྐྱབས་བཅོལ་བ་ཐོག་མ་འབྱོར་ཞིང་། བོད་མི་མི་རབས་རྒན་པ་ཚོས་ས་གནས་སུ་འཚར་ལོངས་འབྱུང་བཞིན་པའི་བོད་ཕྲུག་ན་གཞོན་ཚོར་བོད་མི་རིགས་ཀྱི་སྐད་ཡིག་དང་རིག་གཞུང། དེ་བཞིན་གོམས་སྲོལ་བཟང་པོ་རྣམས་མི་ཉམས་རྒྱུན་འཛིན་ཡོང་ཐབས་སུ་ཆེད་དམིགས་གནང་སྟེ་བོད་མི་གནས་སྡོད་ས་གནས་ཁག་ཏུ་བོད་པའི་གཟའ་མཇུག་སློབ་གྲྭ་ཆེད་འཛུགས་གནང་ཡོད།ད་ཆ་སུད་སི་དང་ལིག་ཏེན་སིཊཡན་བོད་རིགས་མི་མང་ཁྱབ་ཁོངས་སུ་བོད་པའི་གཟའ་མཇུག་སློབ་གྲྭ་ཁག་ ༢༢ དང་སློབ་ཕྲུག་གྲངས་ ༤༧༥ ཙམ་ཡོད་པ་རེད། དེའི་ཁོངས་ནས་ཨར་གྷའོ་ཚོགས་ཆུང་གཟའ་མཇུག་བོད་ཡིག་སློབ་གྲྭ་ནི་ཕྱི་ལོ་ ༢༠༠༥ ལོར་ས་གནས་སུ་གསར་འཛུགས་གནང་ཡོད་པ་ལྟར་ད་ཆ་སྔོན་འགྲོ་ནས་འཛིན་རིམ་བཞི་པ་བར་སློབ་མ་ ༦༠ ལྷག་ཡོད་པ་རེད།