ཁེ་ན་ཌའི་རྒྱལ་ས་ཨོ་ཊ་ཝར་རྟེན་གཞི་བྱས་པའི་ཨོན་ཊ་རི་ཡོ་མངའ་སྡེའི་གྲོས་ཚོགས་ཀྱི་ངོས་ནས་ལོ་ལྟར་ཕྱི་ཟླ་བདུན་པ་དེ་བོད་ཀྱི་ཕ་མེས་ནས་བརྒྱུད་པའི་རིག་གནས་གཅེས་ནོར་གྱི་ཟླ་བར་ངོས་འཛིན་གནང་རྒྱུའི་ཁྲིམས་འཆར་ལ་སྤྱི་མོས་ཀྱི་ཐོག་ནས་གཏན་བེབས་གནང་འདུག 
ཁྲིམས་འཆར་དེ་ཨོན་ཊ་རི་ཡོ་མངའ་སྡེའི་ Parkdale – High Park མང་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་བོད་ཀྱི་སྐྱེས་མ་བུ་འཁྲིད་དཀར་པོ་ཆེ་ལགས་ཀྱིས་གྲོས་ཚོགས་སུ་འདོན་སྤེལ་གནང་བ་བཞིན་གྲོས་ཚོགས་ཀྱི་ངོས་ནས་དེར་སྤྱི་མོས་ཀྱིས་རྒྱབ་སྐྱོར་གནང་སྟེ་ཁྲིམས་གཞིར་གཏན་འབེབས་གནང་བ་དང་འབྲེལ། ཁ་སང་བོད་ཀྱི་སྐྱེས་མ་བུ་འཁྲིད་དཀར་པོ་ཆེ་ལགས་ཀྱིས་སྒེར་གི་དྲ་གནས་དང་ངོ་དེབ་སོགས་ཀྱི་བརྒྱུད་ནས་གཏམ་བཟང་གི་གནས་ཚུལ་དེ་ཡོངས་གྲགས་གནང་བ་དང་སྦྲགས། ཕྱི་ཟླ་བདུན་པའི་ནང་དུ་ཁེ་ན་ཌའི་ཆེས་མཐོའི་མེར་སེར་ཡིན་པ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་འཁྲུངས་སྐར་དང་བསྟུན། ཟླ་བ་དེ་འཛམ་གླིང་ས་ཕྱོགས་གང་སར་གནས་པའི་བོད་མི་ཡོད་དོ་ཅོག་ལ་ཆེས་གལ་འགངས་ཆེན་པོ་ཆགས་ཡོད་པ་མ་ཟད་བོད་མི་རིགས་ཀྱི་སོར་ཆུད་ཀྱི་མཚོན་རྟགས་ཤིག་ཀྱང་ཆགས་ཀྱི་ཡོད་པ་གསུངས་འདུག ལྷག་པར་དུ་ཁྲིམས་འཆར་དེ་བརྒྱུད་ནས་བོད་དོན་གོ་རྟོགས་དང་ཨོན་ཊ་རི་ཡོ་བོད་མི་རྣམས་ཀྱིས་སྤྱི་ཚོགས་ལ་ཞབས་འདེགས་ཇི་ཙམ་ཞུ་བཞིན་ཡོད་པ་མངོན་གསལ་གནང་རྒྱུར་ཆེད་དམིགས་ཀྱིས་ཁྲིམས་འཆར་དེ་གྲོས་ཚོགས་སུ་ངོ་སྤྲོད་གནང་ཡོད་སྐོར་ཞིབ་རྒྱས་གསུངས་འདུག ཁོང་བྱང་ཨ་རིར་སྤྱི་ཚོགས་ཀྱི་ལས་གནས་ཐོག་འདེམས་ཐོན་བྱུང་བའི་བོད་མི་ཐོག་མ་དེ་ཆགས་དོན་ལྟར་དགའ་སྤོབས་ཧ་ཅང་ཆེན་པོ་བྱུང་ཞེས་དང་ས་ཁུལ་དེར་བོད་མིའི་སྤྱི་ཚོགས་ཀྱི་ཆེད་དུ་འཐབ་རྩོད་གནང་ཐུབ་པར་བརྟེན་དེ་བས་ཀྱང་དགའ་སྤོབས་ཆེན་པོ་བྱུང་སྐོར་གསུངས་ཡོད། ཐེངས་འདིའི་རྒྱལ་ཁ་ནི་བོད་མི་གཅིག་པོའི་རྒྱལ་ཁ་མ་ཡིན་པར་སྤྱི་ཚོགས་ཡོངས་ཀྱི་རྒྱལ་ཁ་ཡང་ཡིན་པ་གསུངས་འདུག
ལྕམ་བུ་འཁྲིད་དཀར་པོ་ཆེ་ལགས་ནི། བྱང་ཨ་མི་རི་ཀའི་ནང་གྲོས་ཚོགས་སུ་འདེམས་ཐོན་བྱུང་བའི་བོད་རིགས་ཐོག་མ་དེ་ཡིན་པ་དང་། ཨོན་ཊ་རི་ཡོ་མངའ་སྡེ་དེ་ཡང་འཛམ་གླིང་ནང་དུ་བོད་ཀྱི་རིག་གནས་གཅེས་ནོར་གྱི་ཟླ་བ་ཞེས་གཏན་འབེབས་གནང་མཁན་ཆེས་ཐོག་མ་དེ་ཆགས་ཀྱི་ཡོད་པ་རེད། ལྕམ་དཀར་པོ་ཆེ་ལགས་ཀྱིས་ཁྲིམས་འཆར་དེར་ Ontario བོད་རིགས་ཚོགས་པ་དང་ས་གནས་བོད་ཀྱི་གཞོན་ནུ་དང་བེུད། ཆུ་བཞི་སྒང་དྲུག བོད་རང་བཙན་སློབ་ཕྲུག་ཚོགས་པ་སོགས་ས་གནས་བོད་མིའི་གཞུང་འབྲེལ་མ་ཡིན་པའི་ཚོགས་པ་ཡོངས་ནས་རྒྱབ་སྐྱོར་གནང་ཡོད་པ་གསུངས་འདུག དེ་རིང་དྲ་ཐོག་ཏུ་འཛམ་གླིང་ས་ཕྱོགས་གང་སར་གནས་པའི་བོད་མི་དང་བོད་དོན་རྒྱབ་སྐྱོར་བ་རྣམས་ནས་བོད་ཀྱི་སྐྱེས་མ་བུ་འཁྲིད་དཀར་པོ་ཆེ་ལགས་ཀྱི་ཕྱག་ལས་ལ་ཡི་རངས་བསྔགས་བརྗོད་དང་ཐུགས་རྗེ་ཆེ་ཞེས་གསུང་མཁན་མང་དག་ཅིག་འདུག
