Monthly Archives: September, 2016

ཉན་པ།: Listen ཕབ་ལེན། Download གཟའ་འཁོར་གཅིག་གི་བསྐྱར་ཞིབ། སླར་ཡང་བདམས་ཐོན་བྱུང་བའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་སུ་བཅར་འདྲི། Sunday 11/09/2016 Week Review Interview with TYC President Tenzing Jigme

ཉན་པ།: Listen ཕབ་ལེན། Download བོད་ཀྱི་ཡིག་གཟུགས་སྒྱུ་རྩལ་སྐོར་གླེང་བ། Saturday 10/09/2016 Tibetan Arts and Culture: Interview on Tibetan calligraphy Arts

ཉན་པ།: Listen ཕབ་ལེན། Download ༸གོང་ས་མཆོག་གིས་སེམས་དང་སྲོག་ཀྱི་ཚོགས་འདུས་ནང་པ་དང་ཚན་རིག་པ་གཉིས་ཀར་ཕན་ཐོགས་རྒྱ་ཆེ་བྱུང་ཡོད་བཀའ་སྩལ་འདུག ༸གོང་ས་མཆོག་གིས་ཤེས་ཡོན་ནི་བྱམས་བརྩེ་ལྡན་པའི་འཛམ་གླིང་བསྐྲུན་རྒྱུའི་ལྡི་མིག་ཡིན་པ་བཀའ་སྩལ་འདུག སྲིད་སྐྱོང་མཆོག་གིས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་བརྒྱུད་རྒྱ་ནག་གཞུང་ལ་བོད་མི་རྣམས་ཁེར་རྐྱང་མིན་པའི་བརྡ་ལན་སྤྲོད་ཡོད་པ་གསུངས་འདུག ཀེ་ར་ལཱ་ནང་ནད་པ་བརྟག་དཔྱད་ཀྱི་སྨན་སྒར་ཚོགས་འདུག དམིགས་བསལ་ལེ་ཚན། Breakfastwala ཞེས་པའི་ཡར་ཐོན་ཚོང་ལས་ངོ་སྤྲོད། Friday 09/09/2016 Dalai Lama joins in a dialogue on ‘Power and Care’ organised by Mind and Life Europe ‘Education - the key to making a better world’: Dalai Lama International TSG Conference signals Tibetans are not alone in its struggle 52nd Wellbeing Tibetan Medical Camp concludes in Kerala DIASPORA FEATURE: BREAKFASTWALA at Delhi

དེ་རིང་ཟླ་ ༩ ཚེས་ ༩ ཉིན་བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་རྒྱལ་ཁབ་ Belgium ནང་སེམས་དང་སྲོག་གི་ལྷན་ཚོགས་དབུ་འབྱེད་བཀྲིན་མཛད་པ་དང་ཆབས་ཅིག ད་བར་འདས་པའི་ལོ་ངོ་ ༣༠ རིང་ནང་པའི་མཁས་པ་དང་ཚན་རིག་པ་མཁས་པ་འདྲ་མིན་དབར་བགྲོ་གླེང་ལྷན་ཚོགས་འདི་ལྟར་ཚོགས་པ་ལ་བརྟེན་ནས་ཕྱོགས་གཉིས་ཀར་ཕན་ཐོགས་རླབས་ཆེན་བྱུང་ཡོད་པ་བཀའ་བསྩལ་འདུག ཐེངས་འདིའི་ལྷན་ཚོགས་འདི་ནི་རྒྱལ་ས་ Brussels ནང་དུ་རྟེན་གཞི་བྱས་པའི་ Boar centre for fine arts ལྟེ་གནས་ཁང་དུ་ཚོགས་ཡོད་པ་རེད། སྐབས་དེར་༸གོང་ས་མཆོག་ཚོགས་དགོན་དུ་དབུ་བཞུགས་གཙོས། དབྱིན་ཡུལ་ Oxford གཙུག་ལག་སློབ་གཉེར་ཁང་གི་ཚོང་ལས་སློབ་དཔོན་སྐུ་ཞབས་ Prof. Sir Paul Collier མཆོག་དང་། Swiss Zurich གཙུག་ལག་སློབ་གཉེར་ཁང་གི་སེམས་ཁམས་རིག་པའི་སློབ་དཔོན་ལྕམ་ Dr. Alexandra མཆོག ༸སྐུའི་དབྱིན་སྐད་གསུང་བསྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་སོགས་ཡོ་རོབ་དང་ཨ་རིའི་ནང་གི་ནང་པའི་མཁས་པ་དང་ཚན་རིག་པ། དེ་བཞིན་མཁས་པ་ཁག་ཅིག་ཕེབས་ཡོད་པ་རེད་འདུག དེ་རིང་སྔ་ཐོག་ཡོ་རོབ་ནང་གི་སེམས་དང་སྲོག་གི་ལྷན་ཚོགས་ཀྱི་དབུ་འབྱེད་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ནང་པའི་མཁས་པ་དང་ཚན་རིག་པའི་དབར་ལ་ལྷན་ཚོགས་འདི་ལྟར་ཡོང་སྟངས་ཀྱི་བྱུང་རིམ་ལོ་རྒྱུས་ངོ་སྤྲོད་དང་སྦྲགས། ༸གང་ཉིད་མཆོག་ ༡༩༧༥ ལོར་ཡོ་རོབ་ནང་དུ་ཐོག་མར་ཕེབས་རྗེས་དེའི་ཚེ་དེའི་དུས་སུ་ཡོ་རོབ་ནང་དུ་འཕྲུལ་ཆས་དང་ཚན་རིག་སོགས་ཕྱིའི་དངོས་པོ་ཡར་རྒྱས་ཧ་ཅང་ཆེན་པོ་སོང་ཡོད་ནའང་། ཐུན་རྐྱེན་དེ་དག་ལོངས་སུ་སྤྱོད་མཁན་མང་ཚོགས་ཁྲོད་འགྲན་སེམས་དང་ཁྲག་དོག་སོགས་འཕེལ་རྒྱུ་ལས་སེམས་ཀྱི་བདེ་སྐྱིད་དེ་ཙམ་མེད་པ་གཟིགས་ཡོད་པ་དང་། དེ་ནས་༸གང་ཉིད་མཆོག་ལ་ཕྱིའི་དངོས་པོ་ཡར་རྒྱས་ཕྱིན་པ་དེས་ནང་སེམས་ཀྱི་བདེ་སྐྱིད་སྐྲུན་ཐུབ་ཀྱི་མེད་པ་ཐུགས་ཚོར་བྱུང་ཡོད་པ་བཀའ་གནང་འདུག མགོན་པོ་མཆོག་གིས་ནང་སེམས་ཀྱི་དཀའ་ངལ་སེལ་ཆེད་དང་མི་ཚེ་བདེ་སྐྱིད་ལྡན་པ་ཞིག་ཡོང་ཕྱིར་ངེས་པར་དུ་སེམས་ཀྱི་བདེ་སྐྱིད་དགོས་གལ་ཡིན་པ་དང་། སེམས་ཀྱི་ཞི་བདེ་སྐྲུན་ཆེད་སེམས་རྒྱུད་རང་བཅོས་ནས་ཡོང་དགོས་པ་ཞིག་ཡིན་སྟབས། དེ་ལ་བོད་པས་ལོ་ངོ་སྟོང་ཕྲག་རིང་ནས་བདག་གཅེས་ཉམས་ལེན་གནང་པའི་དཔལ་ན་ལེནྡྲ་ནས་བརྒྱུད་པའི་ཆོས་སྤྱི་དང་། ཁྱད་པར་དུ་སེམས་ཁམས་རིག་པའི་རྣམ་གཞག་ནས་ཕན་ཐོགས་རྒྱ་ཆེ་སྒྲུབ་ཐུབ་ཡོད་པ་དགོངས་ཏེ། ཚན་རིག་པ་དང་ནང་པའི་མཁས་པའི་དབར་གྱི་བགྲོ་གླེང་འདི་ཚོགས་པ་ཞིག་རེད་ཅེས་ལྷན་ཚོགས་ཀྱི་བྱུང་རིམ་སྐོར་བཀའ་གནང་ཡོད་པ་རེད། མགོན་པོ་མཆོག་གིས་ད་ཆ་ལོ་ངོ་ ༣༠ སོང་མཚམས་འདས་པའི་བགྲོ་གླེང་དང་མཁས་པའི་ལྷན་ཚོགས་དེ་དག་ལ་བརྟེན་ནས་ཕྱོགས་གཉིས་ཀར་ཤེས་བྱ་བློ་བསྐྱེད་དང་ཕན་ཐོགས་རླབས་ཆེན་བྱུང་ཡོད་སྐོར་བཀའ་བསྩལ་གནང་པ་མ་ཟད། སངས་རྒྱས་བཅོམ་ལྡན་འདས་ཀྱིས་ཀྱང་རང་གི་རྗེས་འབྲང་པ་ཚོར་བརྟག་དཔྱད་བྱ་རྒྱུ་གལ་ཆེ་སྐོར་བཀའ་གནང་ཡོད་པ་དེ་ནི་ཚན་རིག་དང་ཆེས་མཐུན་པ་ཞིག་ཆགས་ཡོད་ཅིང་། དད་པ་ཁོ་ནའི་རྗེས་སུ་འཇུག་པ་ཡིན་ན་དྲི་བ་ཡོང་ཡག་མེད་པ་དང་དྲི་བ་དང་བརྟག་དཔྱད་མ་བྱས་པར་དངོས་ཡོད་ཀྱི་གནས་ལུགས་ཇི་ཡིན་ཤེས་རྟོགས་ཐུབ་ཀྱི་མེད་པ་རེད་ཅེས་ལམ་སྟོན་གནང་འདུག སྒོས་སུ་༸གོང་ས་མཆོག་གིས་དེ་རིང་ཐེངས་འདིའི་ལྷན་ཚོགས་དེ་བཞིན་ཡོ་རོབ་ནང་དུ་ཚོགས་བཞིན་པ་འདི་ནི་ཧ་ཅང་གི་ཡག་པོ་ཡིན་པ་དང་༸གང་ཉིད་མཆོག་ཐུགས་དགྱེས་ཚོར་བྱུང་སོང་ཞེས་དང་། ཡོ་རོབ་གླིང་ཆེན་འདི་ནས་ལས་འཆར་འདི་ལྟ་བུ་འགོ་ཁྲིད་དེ་ཆོས་ལུགས་ཚང་མ་ནས་བསྟན་པའི་བྱམས་བརྩེ་བསླབ་བྱ་གོང་འཕེལ་ཐོག དངོས་པོ་ཡར་རྒྱས་དང་དུས་མཉམ་ནང་སེམས་ཀྱི་རྣམ་གཞག་སྐོར་ཤེས་ནས་ཕྱི་ལུས་པོ་དང་ནང་སེམས་གཉིས་ཀའི་བདེ་སྐྱིད་སྐྲུན་ཐུབ་པའི་རེ་བ་ཡོད་སྐོར་སོགས་ བཀའ་སློབ་རྒྱ་ཆེ་བསྩལ་གནང་ཡོད་པ་རེད། རྩ་བའི་སེམས་དང་སྲོག་གི་ལྷན་ཚོགས་ནི་དེ་རིང་ཚེས་ ༩ ནས་དབུ་འཛུགས་ཀྱིས་གནངས་ཚེས་ ༡༡ བར་ཉིན་གྲངས་གསུམ་རིང་ཚོགས་གནང་གི་འདུག་པ་དང་། ཐེངས་འདིའི་བགྲོ་གླེང་གི་བརྗོད་གཞི་གཙོ་བོ་ནི་ Power and care འམ་མིའི་ནུས་པ་དང་གུས་བརྩི་ཞེས་པ་དེ་ཡིན་པ་རེད།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྷེལ་ཇམ་གྱི་ RTBF བརྙན་འཕྲིན་གསར་ཁང་གི་བཅར་འདྲི་དང་ལེན་གནང་སྟེ་འཛམ་གླིང་འདི་བྱམས་བརྩེ་ལྡན་པ་ཞིག་ཡོང་རྒྱུའི་གནད་འགག་གཙོ་བོ་ཤེས་ཡོན་སློབ་གསོ་ལ་ཐུག་ཡོད་པ་ལམ་སྟོན་མཛད་འདུག དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཡོ་རོབ་རྒྱལ་ཁབ་བྷེལ་ཇམ་ནང་ཚོགས་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐོག་ཆིབས་སྒྱུར་མ་མཛད་གོང་ཡུལ་དེའི་ RTBF བརྙན་འཕྲིན་གསར་ཁང་གི་བཅར་འདྲི་དང་ལེན་གནང་འདུག སྐབས་དེར་གསར་ཁང་དེའི་སྤྱི་ཁྱབ་རྩོམ་སྒྲིག་པ་སྐུ་ཞབས་ Francois Mazure ལགས་ཀྱིས་ ༸གང་ཉིད་མཆོག་གི་༸སྐུའི་ཡང་སྲིད་ཕེབས་ཕྱོགས་སྐོར་དང་ས་གནས་སུ་ཚོགས་རྒྱུའི་སེམས་དང་སྲོག་གི་ལྷན་ཚོགས་སྐོར། དེ་བཞིན་ཉེ་ཆར་ཡོ་རོབ་ས་གནས་ཁག་ཅིག་ཏུ་འཇིགས་སྐུལ་དྲག་སྤྱོད་ཀྱི་གནས་ཚུལ་སོགས་ཀྱི་སྐོར་བཅར་འདྲི་ཞུས་འདུག གསར་འགོད་པས་༸གོང་ས་མཆོག་ལ་ཐེངས་འདིའི་སེམས་དང་སྲོག་གི་ལྷན་ཚོགས་ཀྱི་བརྗོད་གཞི་ Power and Care འམ་མིའི་ནུས་པ་དང་གུས་བརྩི་ཞེས་པའི་སྐོར་ལ་བཀའ་འདྲི་ཞུས་པར་༸གོང་ས་མཆོག་གིས་མིའི་ནུས་པ་དེ་བཟང་ངན་ཕྱོགས་གཉིས་ཀར་བདེ་སྤྱོད་གཏང་རྒྱུ་ཡོད་སྟབས། ནུས་པ་དེ་འཛམ་གླིང་ནང་གི་ཆོས་ལུགས་གཙོ་ཆེ་ཚང་མས་བསྟན་པའི་བྱམས་བརྩེ་དང་གཞན་ཕན་ཕྱོགས་སུ་བཏང་ཐུབ་ཚེ་ཕན་ཐོགས་རྒྱ་ཆེ་ཡོང་གི་ཡོད་པ་དང་། དེ་ལས་ལྡོག་སྟེ་ངན་ཕྱོགས་འཇུག་པ་ཡིན་ན་གནོད་སྐྱོན་ཚབས་ཆེ་བཟོས་ཀྱི་ཡོད་པ་བཀའ་གནང་འདུག ལྷག་དོན་དེང་གི་ཆར་འཛམ་གླིང་འདིའི་སྟེང་མི་དུང་ཕྱུར་ ༧ ཡོད་པ་དེ་དག་ཚང་མར་འཕྲད་བཞིན་པའི་ངལ་བ་ཀུན་འབྱུང་རྩ་ནི་དུས་རྒྱུན་གྱི་ཤེས་ཡོན་སློབ་གསོ་དང། ཉིན་རེའི་འཚོ་བའི་ནང་ཕྱིའི་དངོས་པོ་ཁོ་ནར་གཙོ་བོ་བཞག་པའི་དབང་གིས་ཡོང་བ་ཞིག་ཡིན་སྟབས། ང་ཚོས་དཀའ་ངལ་དེ་སེལ་ཆེད་ཀྱི་ལྡེ་མིག་གཙོ་བོ་ནི་ཤེས་ཡོན་སློབ་གསོ་ལ་ཐུག་ཡོད་པ་ལམ་སྟོན་བཀྲིན་བསྩལ་འདུག སྐབས་དེར་༸གོང་ས་མཆོག་གིས་དེང་གི་ཚན་རིག་པ་ཚོས་མིའི་ལྷན་སྐྱེས་ཀྱི་རང་བཞིན་བྱམས་བརྩེ་ལྡན་པ་ཞིག་ཡིན་པ་ལུང་འདྲེན་ཡང་གནང་འདུག དེ་བཞིན་སྐུ་ཞབས་ Mazure ལགས་ཀྱིས་མ་འོངས་པའི་༸གོང་ས་མཆོག་གི་༸སྐུའི་ཡང་སྲིད་བེུད་རྟེན་ཅན་དུ་ཕེབས་སྲིད་མིན་དང་། བེུད་འགོ་ཁྲིད་ཀྱིས་འཛམ་གླིང་ཡག་པ་ཞིག་ཡོང་མིན་སྐོར་བཀའ་འདྲི་ཞུས་སྐབས་༸གོང་ས་མཆོག་གིས་ད་ལྟའི་ཆར་འཛམ་གླིང་འདིའི་སྟེང་རྒྱལ་ཁབ་ ༢༠༠ ལྷག་ཡོད་པ་དེ་དག་གི་དབུ་ཁྲིད་བེུད་ཡིན་ཚེ་མི་གསོད་ཁྲག་སྦྱོར་གྱི་བྱ་སྤྱོད་རིགས་ཉུང་བ་ཡོང་རྒྱུར་ཕན་ཐོགས་ཡོད་སྐོར་བཀའ་གནང་པ་དང་སྦྲགས། ༸གང་ཉིད་མཆོག་གིས་གང་དུ་ཕན་འདོགས་བསྐྱེད་ཐུབ་པ་དེར་༸སྐུ་སྐྱེས་བཞེས་རྒྱུའི་ཐུགས་སྨོན་མཛད་ཀྱི་ཡོད་པ་བཀའ་གནང་འདུག གཞན་ཡང་བཅར་འདྲི་ལས་རིམ་དེའི་ཁྲོད་༸གོང་ས་མཆོག་གིས་ཉེ་ཆར་ Belgium གཙོས་པའི་རྒྱལ་ཁབ་ཁག་ཅིག་ཏུ་འཇིགས་སྐུལ་དྲག་སྤྱོད་པའི་གནས་ཚུལ་དང་འབྲེལ་བཀའ་འདྲི་ཞུས་པའི་བཀའ་ལན་དུ། གཙོ་བོ་ཁོང་ཁྲོས་དཀའ་ངལ་དེ་དག་སེལ་རྒྱུ་ལས་ལྡོག་སྟེ་སེམས་ཀྱི་ཞི་བདེ་དཀྲུགས་ནས་གནས་སྟངས་སྡུག་ཏུ་གཏོང་རྒྱུ་ལས་ཕན་ཐོགས་ཅི་ཡང་མེད་སྐོར་སོགས་བཀའ་བསྩལ་འདུག      ད་དུང་མགོན་པོ་༸གང་ཉིད་མཆོག་གིས་ལས་རིམ་དེའི་ཐོག་ནས་དེང་སྐབས་གོ་ལའི་གནམ་གཤིས་འགྱུར་ལྡོག་གྱི་རྐྱེན་པས་རང་འབྱུང་གི་གནོད་འཚེ་དཀའ་ངལ་མང་དག་ཞིག་འཕྲད་བཞིན་པར་བརྟེན།  ཁོར་ཡུག་སྲུང་སྐྱོབ་བྱ་རྒྱུ་ནི་ཧ་ཅང་གལ་ཆེན་པོ་ཡིན་པ་བཀའ་སྩལ་འདུག མཛད་འཆར་ལྟར་ན། དེ་རིང་ཟླ་ ༩ ཚེས་ ༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བྷེལ་ཇམ་གྱི་རྒྱལ་ས་སྦར་སེལ་ Brussels དུ་གོ་སྒྲིག་ཞུས་པའི་སེམས་དང་སྲོག་གི་མཁས་པའི་བགྲོ་གླེང་གི་ཚོགས་མགོན་དུ་ཆིབས་སྒྱུར་གྱིས་དབུ་བཞུགས་མཛད་ཀྱི་ཡོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དེ་བརྒྱུད་རྒྱ་ནག་གཞུང་ལ་བོད་དོན་འཐབ་རྩོད་ཁྲོད་བོད་མི་རྣམས་ཁེར་རྐྱང་མིན་པའི་བརྡ་ལན་ཤུགས་ཆེ་སྤྲོད་བཞིན་ཡོད་ཅེས་གསུངས་འདུག དེ་ཡང་ཁ་སང་ཟླ་ ༩ ཚེས་ ༨ ཉིན་ནས་འགོ་འཛུགས་ཀྱིས་སང་ཚེས་ ༡༠ བར་ཡོ་རོབ་རྒྱལ་ཁབ་བྷེལ་ཇམ་གྱི་རྒྱལ་ས་སྦར་སིལ་ནང་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པ་ཚོགས་བཞིན་ཡོད་པ་དང་འབྲེལ། ཚོགས་ཆེན་གྱི་སྔ་རོལ་ཏེ་ཚེས་ ༧ ཉིན་གྱི་དགོང་མོར་ཚོགས་ཆེན་གོ་སྒྲིག་ཚོགས་ཆུང་གིས་ཚོགས་བཅར་བ་ཡོངས་ལ་ཕེབས་བསུའི་གསོལ་སྟོན་ཞིག་བཤམས་འདུག་པ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཚོགས་བཅར་བ་ཡོངས་ལ་འཚམས་འདྲིའི་གསུང་བཤད་གནང་པ་དང་སྦྲགས། ད་བར་བོད་མིའི་ཞི་བའི་འཐབ་རྩོད་ལ་མུ་མཐུད་རྒྱབ་སྐྱོར་ཤུགས་ཆེ་གནང་བཞིན་པར་ཐུགས་རྗེ་ཆེ་ཞུས་པ་དང་། ཁྱད་པར་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དེས་རྒྱ་ནག་གཞུང་ལ་བོད་དོན་འཐབ་རྩོད་ཁྲོད་བོད་མི་རྣམས་ཁེར་རྐྱང་མིན་པའི་བརྡ་ལན་ཤུགས་ཆེ་སྤྲོད་བཞིན་ཡོད་ཅེས་གསུངས་འདུག ད་དུང་སྲིད་སྐྱོང་མཆོག་ནས་ད་རེས་ཀྱི་ཚོགས་ཆེན་ཐོག་བོད་ཀྱི་གྲོགས་པོ་རྙིང་པ་དང་གསར་པ་མང་པོ་ལྷན་འཛོམས་བྱུང་བ་དེས་བོད་མི་རྣམས་ལ་གདུང་སེམས་མཉམ་བསྐྱེད་དང་། བོད་ཀྱི་རྩ་དོན་སླར་གསོ་ཐུབ་རྒྱུའི་རེ་བ་དང་ཚོར་སྣང་འཕར་མ་ཞིག་སྐྲུན་བཞིན་ཡོད་པ་མ་ཟད། བཙན་བྱོལ་ནང་ལ་བོད་མི་འབུམ་གཅིག་དང་ཕྱེད་ཀ་ཙམ་ལས་མེད་ཀྱང་ད་བར་རྒྱལ་སྤྱིའི་ཐོག་བོད་དོན་དྲིལ་བསྒྲགས་རྒྱ་ཆེ་འགྲོ་བཞིན་པ་དེ་དག་གཙོ་བོ་བོད་དོན་རྒྱབ་སྐྱོར་བ་ཚོས་ཁ་ཞེ་གཉིས་མེད་ཐོག་རྒྱབ་སྐྱོར་གནང་དང་གནང་མུས་བཅས་ཀྱི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཞིག་ཡིན་སྐོར་གསུངས་ཡོད་པ་རེད། དེ་བཞིན་སྲིད་སྐྱོང་མཆོག་གིས་བོད་དོན་ལ་རྒྱབ་སྐྱོར་གནང་རྒྱུ་ནི་ལས་སླ་པོ་ཞིག་མ་ཡིན་པར། རྒྱབ་སྐྱོར་བ་རྣམས་ནས་རང་ཉིད་སྒེར་གྱི་དཔལ་འབྱོར་དང་དུས་ཚོད་སོགས་འགྲོ་གྲོན་མང་པོ་ཞིག་བཏང་ཡོད་སྐོར་གསུངས་པ་དང་འབྲེལ། ལོ་ན་བགྲེས་སོང་ཆགས་པའི་བོད་ཀྱི་གྲོགས་པོ་རྙིང་པ་རྣམས་གཙོ་བོར་གྱུར་པའི་ད་ལྟ་ཆོད་སེམས་བརྟན་པའི་ཐོག་བོད་དོན་ལ་རྒྱབ་སྐྱོར་གནང་བཞིན་པའི་བོད་ཀྱི་གྲོགས་པོ་གསར་རྙིང་ཡོངས་ལ་ཡི་རངས་བསྔགས་བརྗོད་དང་ཐུགས་རྗེ་ཆེ་ཞུས་པ་མ་ཟད། མ་འོངས་པར་བོད་ནང་རང་དབང་སླར་གསོ་བྱུང་སྐབས་ང་ཚོ་ཚང་མ་བོད་ཀྱི་རྒྱལ་ས་ལྷ་སར་མཇལ་བའི་སྨོན་འདུན་ཡོད་ཅེས་གསུངས་འདུག གཞི་རྩའི་ཐེངས་འདིའི་སྦར་སིལ་དུ་འཚོགས་བཞིན་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་བདུན་པ་དེ་ ཁ་སང་ཚེས་ ༨ ཉིན་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་ཆིབས་སྒྱུར་གྱིས་དབུ་འབྱེད་མཛད་ཡོད་པ་དང་། དེ་བཞིན་བོད་ཀྱི་སྐུ་ཚབ་དོན་གཅོད་ཁག་དང་བོད་མིའི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། དེ་བཞིན་རྒྱལ་སྤྱིའི་རྒྱལ་ཁབ་ཁག་ལྔ་བཅུ་ལྷག་ནས་ཆེད་བཅར་ཞུས་པའི་བོད་དོན་རྒྱབ་སྐྱོར་བ་༢༥༠ ལྷག་འདུ་འཛོམས་བྱུང་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་རྒྱལ་སྤྱི་བོད་དོན་རྒྱབ་སྐྱོར་ཚོགས་མི་རྣམས་ལ་བོད་ཀྱི་རིག་གཞུང་ཕྱུག་པོ་དེ་མི་ཉམས་རྒྱུན་འཛིན་གནང་རྒྱུ་ཤིན་ཏུ་ནས་གལ་ཆེ་ཡིན་པ་བཀའ་སྩལ་འདུག རྒྱ་གཞུང་གིས་བོད་ནང་གི་ཁོར་ཡུག་གནས་སྟངས་གསང་རྒྱ་བྱེད་བཞིན་པ་དེས་རྒྱ་གར་དང་བལ་ཡུལ་ནང་ཆུ་ལོག་སོགས་ཀྱི་སྔོན་འགོག་བྱེད་ཐུབ་ཀྱི་མེད་པ་བརྗོད་འདུག བཞུགས་སྒར་དུ་འཛམ་གླིང་ཕྱི་བཅོས་ཉིན་མོ་སྲུང་བརྩི་ཞུས་པ། འབྲས་ལྗོངས་ནས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ལག་བསྟར་གནང་རྒྱུ་གྲ་སྒྲིག་ཡིན་པ་གསུངས་འདུག Dengue སོགས་དུག་སྦྲང་ནད་རིགས་སྐོར་ལམ་སྟོན། Thursday 08/09/2016 Dalai Lama opens 7th International Conference of Tibet Support Group: Brussels India and Nepal concerns over Tibet flood advice gap Tibetans celebrates World Physiotherapy Day with ‘Free Physiotherapy Camp’: Dharamsala Sikkim government to implement Tibetan Rehabilitation Policy 2014 HEALTH FEATURE: Dengue awareness

དེ་རིང་ཟླ་ ༩ ཚེས་ ༨ ཉིན་བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་བྷེལ་ཇམ་གྱི་རྒྱལ་ས་ Brussels ནང་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པ་དབུ་འབྱེད་བཀྲིས་བསྐྱངས་པ་དང་ཆབས་ཅིག ཚོགས་ཆེན་ཐོག་བཅར་བའི་རྒྱ་རིགས་གཙོ་བོར་གྱུར་པའི་བོད་དོན་རྒྱབ་སྐྱོར་བ་རྣམས་ལ་ད་བར་བོད་དོན་ཐོག་དོན་དམ་གྱི་རྒྱབ་སྐྱོར་དང་གདུང་སེམས་མཉམ་བསྐྱེད་གནང་པར་བོད་མི་ས་ཡ་དྲུག་གི་ཚབ་ཞུས་ཏེ་ཐུགས་རྗེ་ཆེ་ཞེས་བཀའ་སྩལ་འདུག ཚོགས་ཆེན་དབུ་འབྱེད་མཛད་སྒོའི་ཚོགས་དགོན་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་གཙོས། ཡོ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ལྷན་ཚོགས་ཀྱི་ཚོགས་གཙོ་སྐུ་ཞབས་ Thomas Mann མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་སོགས་སྐུ་མགྲོན་དུ་ཕེབས་ཡོད་པ་རེད། དེའང་དེ་རིང་ས་གནས་ཀྱི་སྔ་དྲོ་ཚོུད་ ༡༠། ༠༠ སྟེང་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་ཆེན་དབུ་འབྱེད་ཀྱི་བཀའ་སློབ་བཀྲིན་བསྩལ་འདུག་པ་དང་། སྐབས་དེར་མགོན་པོ་༸གང་ཉིད་མཆོག་གིས་འཛམ་གླིང་རྒྱལ་ཁབ་འདྲ་མིན་ནས་བཅར་བའི་བོད་དོན་རྒྱབ་སྐྱོར་བ་བརྒྱ་སྐོར་ཡས་མས་ཙམ་ཞིག་ལ་༸སྐུའི་ཐུགས་བསྐྱེད་དམ་བཅའ་གསུམ་སྟེ། འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་དང་འཛམ་གླིང་ཆོས་ལུགས་མཐུན་འབྲེལ། དེ་བཞིན་༸སྐུ་ཉིད་བོད་མི་གཅིག་ཡིན་པའི་ཆ་ནས་བོད་ཀྱི་ཆོས་རིག་འཛིན་སྐྱོང་སྤེལ་གསུམ་མཛད་རྒྱུའི་སྐོར་ལ་བཀའ་སྩལ་གནང་འདུག་པ་མ་ཟད། ལྷག་པར་དུ་༸གང་ཉིད་མཆོག་གིས་ཕྱི་ལོ་  ༢༠༡༡ ལོ་ནས་བཟུང་ཆབ་སྲིད་ཀྱི་༸སྐུ་དབང་ཡོངས་རྫོགས་མང་ཚོགས་ཀྱིས་བདམས་པའི་ཆབ་སྲིད་ཀྱི་འགོ་ཁྲིད་ལ་གསོལ་བསྩལ་གནང་པ་དང་། དེ་བཞིན་བོད་མིའི་མང་གཙོའི་འགྱུར་བགྲོས་དང་འཕེལ་རིམ་སོགས་ཀྱི་སྐོར་ལ་བཀའ་སློབ་བསྩལ་འདུག མགོན་པོ་༸གང་ཉིད་མཆོག་གིས་ཚོགས་ཆེན་ཐོག་བཅར་བའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་༸སྐུའི་ཐུགས་བསྐྱེད་དམ་བཅའ་གསུམ་པོའི་ཐོག་དགོངས་པ་བཞེས་ནས་གང་ཐུབ་ཀྱིས་ལག་ལེན་འཁྱེལ་རྒྱུར་འབད་བརྩོན་དགོས་པའི་སྐུལ་མ་གནང་པ་དང་། ལྷག་དོན་ཚོགས་མི་རྣམས་ནས་བོད་ཀྱི་གནད་དོན་ངོ་མ་ཤེས་པའི་ཐོག་ནས་རྒྱབ་སྐྱོར་གནང་རྒྱུ་ཤིན་ཏུ་ནས་གལ་ཆེ་ཡིན་སྐོར་བཀའ་གནང་པ་དང་སྦྲགས། བོད་ཀྱི་གནད་དོན་འདི་ནི་ཆབ་སྲིད་ཁོ་ན་དང་འབྲེལ་བ་ཡོད་པ་ཞིག་ཏན་ནས་མ་ཡིན་ཞིང་། དེ་རིང་སང་ཉིན་དུས་རབས་ཉེར་གཅིག་པ་དང་འཚམ་པ་འཛམ་གླིང་ཞི་བདེ་དང་བྱམས་བརྩེ་ལྡན་པ་ཞིག་ཡོང་སླད་བོད་ཀྱི་རིག་གཞུང་ཕྱུག་པོ་དེ་མི་ཉམས་རྒྱུན་འཛིན་གནང་རྒྱུ་ནི་ཤིན་ཏུ་ནས་གལ་ཆེར་དགོངས་གནང་གི་ཡོད་སྐོར་ལམ་སྟོན་མཛད་འདུག ཁྱད་པར་དུ་༸གོང་ས་མཆོག་གིས་སྐབས་དེར་བཅར་བའི་རྒྱ་རིགས་བོད་དོན་རྒྱབ་སྐྱོར་བ་ཁག་ཅིག་ལ་དམིགས་བསལ་ཐུགས་རྗེ་ཆེ་ཞུ་དང་སྦྲགས། དོན་དམ་གྱི་བོད་རྒྱ་དཀའ་ངལ་སེལ་བ་ལ་རྒྱ་རིགས་ཚོས་རྒྱབ་སྐྱོར་ནི་ཧ་ཅང་གི་གལ་ཆེ་ཡིན་སྟབས། ཧན་རྒྱ་རིགས་ཆོས་གྲོགས་ཚོས་རྒྱ་མི་ཤེས་ཡོན་ཅན་སོགས་གཞན་ལ་བོད་ཀྱི་གནད་དོན་ངོ་མའི་སྐོར་གསུངས་རོགས་ཞེས་དང་། བོད་མིའི་གཉིས་སྨན་དབུ་མའི་ལམ་ནི་ཕྱོགས་གཅིག་གི་རྒྱལ་ཁའི་རང་བཞིན་མིན་སྟབས། རྒྱ་བོད་གཉིས་ཀར་ཕན་ཐོགས་ཡོད་པས་དེར་རྒྱ་རིགས་མང་པོ་ཞིག་གིས་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་གི་ཡོད་པ་བཀའ་བསྩལ་འདུག ༸གོང་ས་མཆོག་གིས་པེ་ཅིང་ནས་ནམ་ཡིན་ལ་ཆིག་སྒྲིལ་དང་བརྟན་ལྷིང་སྐོར་བཤད་བཞིན་ཡོད་ཀྱང། བརྟན་ལྷིང་གི་གཞི་རྩ་ཡིད་ཆེས་སྐྲུན་རྒྱུ་ལས་ལྡོག་སྟེ་ཁོང་ཚོའི་ད་ལྟའི་སྲིད་བྱུས་འདི་ནི་འཇིགས་སྣང་སྐྱེས་གཞི་ཞིག་ཆགས་ཡོད་སྟབས། འཇིགས་སྣང་འོག་བརྟན་ལྷིང་ནམ་ཡང་ཡོང་རྒྱུ་མེད་པར་བཀའ་ནན་མཛད་འདུག གཞི་རྩའི་ཡོ་རོབ་རྒྱལ་ཁབ་བྷེལ་ཇམ་གྱི་རྒྱལ་ས་ Brussels ནང་དུ་དེ་རིང་ནས་དབུ་འཛུགས་གནང་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པ་དེ་གནངས་ཚེས་ ༡༠ བར་ཉིན་གྲངས་གསུམ་རིང་འཚོགས་ཀྱི་ཡོད་པ་རེད།