Monthly Archives: September, 2016

རྒྱ་ནག་གཞུང་གིས་བོད་ཀྱི་རང་འབྱུང་ཁོར་ཡུག་གི་གནས་སྟངས་སྤྱི་དང་། སྒོས་སུ་བོད་ནང་གི་འཁྱག་རོམ་ཞུར་ཚད་དང་། མཚོ། མཚེའུ་བཅས་གས་འཐོར་བྱུང་བའི་གནས་ཚུལ་རྣམས་གསང་རྒྱ་བྱེད་བཞིན་པ་དེས་བོད་ཀྱི་རྒྱུག་ཆུ་ཆེ་ཁག་རྒྱུག་ཡུལ་ཨེ་ཤེ་ཡའི་རྒྱལ་ཁབ་བལ་ཡུལ་དང་རྒྱ་གར་ནང་ལ་ཆུ་ལོག་དང་ས་རུལ་སོགས་རང་འབྱུང་ཁོར་ཡུག་དང་འབྲེལ་བའི་རྐྱེན་ངན་རྣམས་འགོག་སྲུང་བྱེད་པར་དཀའ་ངལ་ཆེན་པོ་འཕྲད་བཞིན་པ་མངོན་བརྗོད་གནང་འདུག དེ་ཡང་དེ་རིང་བི་བི་སི་ BBC གསར་ཁང་གི་དྲ་གནས་ཐོག་གསར་ཁང་དེའི་ཁོར་ཡུག་སྡེ་ཚན་གྱི་གསར་འགོད་པ་སྐུ་ཞབས་ Navin Singh ལགས་ཀྱིས་རྒྱ་གར་དང་བལ་ཡུལ་གཉིས་ཀྱི་ནང་ཆུ་ལོག་དང་ས་རུལ་སོགས་འབྱུང་བའི་འཇིག་པ་འཕྲད་བཞིན་པའི་ཐོག་ལ་དཔྱད་གཏམ་ཞིག་སྤེལ་འདུག་པ་དང་། དེའི་ནང་ཁོང་གིས་རྒྱ་གར་དང་བལ་ཡུལ་གྱི་ས་གནས་ཁག་ཅིག་ཏུ་ཆུ་ལོག་དང་ས་རུལ་སོགས་ཁོར་ཡུག་དང་འབྲེལ་བའི་རྐྱེན་ངན་མི་ཉུང་བ་ཞིག་འཕྲད་པ་དེ་ནི་གཙོ་བོ་རྒྱ་གཞུང་དང་འབྲེལ་ཡོད་ལས་བྱེད་རྣམས་ནས་བོད་ཀྱི་གནམ་གཤིས་འགྱུར་ལྡོག་དང་། ལྷག་པར་དུ་བོད་ཀྱི་འཁྱག་རོམ་ཞུར་ཚད་དང་། མཚོ། མཚེའུ་སོགས་གས་འཐོར་བྱུང་བའི་གནས་ཚུལ་རྣམས་བལ་ཡུལ་དང་རྒྱ་གར་གྱི་འབྲེལ་ཡོད་ལས་བྱེད་རྣམས་དང་གོ་བསྡུར་མ་བྱེད་པར་གསང་རྒྱ་བཞག་རྐྱེན་ཡིན་པ་གསལ་བཏོན་གནང་འདུག ཁོང་གིས་རྒྱ་ནག་གཞུང་གིས་ཁོར་ཡུག་དང་འབྲེལ་བའི་གནས་ཚུལ་རྣམས་གསང་རྒྱ་བྱས་པ་ཙམ་མ་ཟད། བོད་ཀྱི་ས་ཁུལ་ཁག་ཏུ་གཏེར་ཁ་བསྔོག་འདོན་དང་གཙང་པོ་ཆེ་ཁག་གི་ཐོག་ཏུ་ཆུ་མཛོད་གསར་རྒྱག་གི་ལས་གཞི་སོགས་རྒྱ་ཆེ་སྤེལ་བ་དེས་བོད་ཀྱི་གཤམ་འོག་ཏུ་ཡོད་པའི་རྒྱ་གར་དང་བལ་ཡུལ། འབྲུག་ཡུལ་དང་དེ་བཞིན་བྷང་ལ་དེ་ཤ་བཅས་ཀྱི་ནང་ལ་ཆུའི་འཇིག་པ་སོགས་ཁོར་ཡུག་དང་འབྲེལ་བའི་རྐྱེན་ངན་སྔར་ལྷག་འཕྲད་སྲིད་སྐོར་ཉེན་བརྡ་ཡང་བཏང་འདུག དེ་བཞིན་འདི་ལོའི་ཟླ་ ༧ པའི་ནང་བོད་ཀྱི་མཐའ་མཚམས་སུ་ཆགས་པའི་བལ་ཡུལ་གྱི་ Liping དང་།  Barabise ས་གནས་སུ་ཆུ་ལོག་གྱི་དོན་རྐྱེན་འོག་གནོད་འཚེ་ཕོག་པའི་ས་གནས་ཡུལ་མི་དང་ཁུལ་དེའི་གཞུང་འབྲེལ་མི་སྣ་ཁག་ཅིག་ལ་བཅར་འདྲི་ཞུས་འདུག་པ་དང་། སྐབས་དེར་ས་གནས་གཞུང་གི་ལས་བྱེད་ཟུར་པ་ Gokarna Dawadi ལགས་ཀྱིས་ས་རུལ་དང་ཆུ་ལོག་བྱུང་སའི་གཙང་པོ་ Bhotekoshi ཞེས་པ་དེ་བོད་ནས་བབ་ཀྱི་ཡོད་སྟབས། གཙང་པོ་དེ་ནས་ས་རུལ་དང་ཆུ་ལོག་སོགས་ཀྱི་གནས་ཚུལ་འགོག་སྲུང་བྱེད་པར་བོད་ནང་ཡོད་པའི་རྒྱ་གཞུང་ལས་བྱེད་རྣམས་ལ་འབྲེལ་བ་ལན་མང་བྱས་ཀྱང་རྒྱ་གཞུང་གིས་གཙང་པོ་དེའི་སྐོར་གནས་ཚུལ་གང་ཡང་གོ་བསྡུར་མ་བྱས་པར་བརྟེན།  ཆུ་ལོག་མངོན་འགོག་གི་ལས་གཞི་སྤེལ་རྒྱུར་དཀའ་ངལ་ཆེན་པོ་འཕྲད་ཡོད་པ་འགྲེལ་བརྗོད་གནང་འདུག ཁོང་གིས་བོད་ནས་རྒྱ་གར་ནང་བབ་བཞིན་པའི་ Brahmaputra དང་། Koshi གཙང་པོ་སོགས་ནས་དེ་སྔ་ཕྱི་ལོ་ ༢༠༠༠ དང་། ༢༠༠༨ བཅས་སུ་རྒྱ་གར་གྱི་ཤར་ཕྱོགས་མངའ་སྡེ་བི་ཧར་དང་བྱང་ཤར་མངའ་སྡེ་ཨ་རུ་ནཱ་ཅལ་གཉིས་ནང་ཆུའི་འཇིག་པ་ཤུགས་ཆེ་བྱུང་བའི་གནས་ཚུལ་དང་འབྲེལ། རྒྱ་གར་དབུས་གཞུང་གིས་ཆུའི་འཛིན་སྐྱོང་སྡེ་ཚན་གྱི་ཚོགས་གཙོ་སྐུ་ཞབས་ Ghanashyam Jha ལགས་སུ་བཅར་འདྲི་ཞུས་པར་ཁོང་གིས་བོད་ནང་གི་གནམ་གཤིས་འགྱུར་ལྡོག་རྐྱེན་པས་ཆུ་ལོག་སོགས་ཀྱི་གནོན་འཚེ་བྱུང་བཞིན་པར་བློ་འཚབ་ཆེན་པོ་ཡོད་ཀྱང་། དེ་ལས་ཚབས་ཆེ་བ་ནི་རྒྱ་གཞུང་གིས་བོད་ཀྱི་གཙང་པོ་ཆེ་ཁག་ཐོག་ཏུ་ཆུ་མཛོད་རྒྱག་བཞིན་པ་དེ་ཡིན་པ་མ་ཟད། གལ་སྲིད་མ་འོངས་པར་ཆུ་མཛོད་དེ་དག་ནས་ཆུ་ཕོན་ཆེན་དུས་གཅིག་ལ་གཏང་ཚེ་རྒྱ་གར་སོགས་ཀྱི་ནང་ཆུའི་གནོད་འཚེ་ཤུགས་ཆེ་བྱུང་ངེས་རེད་ཅེས་བརྗོད་འདུག  

བོད་མིའི་སྒྲིག་འཛུགས་ཀྱི་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་དེ་རིང་ལྷ་སྤྱི་ཚོགས་ཞབས་ཞུ་ཚོགས་པའི་གོ་སྒྲིག་ཞུས་པའི་བཅར་འདྲིའི་ལས་རིམ་ཞིག་གི་ཐོག མི་གཅིག་ལ་འོས་གཉིས་ཀྱི་ཐོབ་ཐང་དེ་མང་གཙོའི་ལྟ་གྲུབ་དང་འགལ་ཡོད་པ་དགོངས་ཀྱི་མེད་པ་དང་། མ་འོངས་པར་བོད་མི་མང་ཆོས་བརྒྱུད་སྤྱི་འཐུས་དགོས་མིན་དེ་ཆོས་པ་ཚོས་ཐག་གཅོད་གནང་ཡག་ཡིན་པ་གསུངས་འདུག སྒྲ་མཛོད།

ཉན་པ།: Listen ཕབ་ལེན། Download ཐེ་ཝན་གྲོས་ཚོགས་ཀྱི་ཚོགས་གཙོས་༸གོང་ས་མཆོག་ཁུལ་དེར་ག་དུས་ཕེབས་ན་དགའ་བསུ་ཡོད་ཅེས་གསུངས་འདུག ཁྲི་ཟུར་ཟམ་གདོང་རིན་པོ་ཆེ་མཆོག་གིས་མ་འོངས་པ་ཆོས་བརྒྱུད་སྤྱི་འཐུས་དགོས་མིན་དེ་ཆོས་པ་ཚོས་ཐག་གཅོད་གནང་ཡག་ཡིན་པ་གསུངས་པ། སྤྱི་ཟུར་བསྟན་འཛིན་དགོན་པོ་ལགས་དགོངས་པ་རྫོགས་པ། བོད་མིའི་སྒྲིག་འཛུགས་ནས་ཉམ་ཐག་དབྱེ་ཞིབ་གསལ་པོ་ཞིག་གནང་མེད་སྐོར་གསུངས་འདུག Wednesday 07/09/2016 Dalai Lama Welcomed by legislative Speaker: Taiwan Religious sects can only decide on the need of Religious Parliamentarian: Prof Samdhong Rinpoche TPiE pays respect to Late former Chithue Tenzin Gonpo High Level Public Welfare Assessment Committee submits report to Kashag

བཙན་འབྱོལ་བོད་མིའི་ཉམ་ཐག་ལྟ་ཞིབ་ཚོགས་ཆུང་གི་ཚོགས་གཙོ་བཀའ་ཟུར་ཚེ་རིང་ཕུན་ཚོགས་མཆོག་གིས་བོད་མིའི་སྒྲིག་འཛུགས་ཀྱི་ངོས་ནས་འདས་པའི་ལོ་བཅུའི་ནང་བཙན་བྱོལ་བོད་མིའི་སྤྱི་ཚོགས་ཁྲོད་དངོས་ཡོད་ཀྱི་ཉམ་ཐག་ཡིན་མིན་དབྱེ་ཞིབ་གནང་ཐུབ་མེད་པ་གསལ་པོ་ཞིག་རེད་འདུག་ཅེས་གསུངས་སོང་། དེའང་འདི་ལོའི་ཕྱི་ཟླ་ ༣ ཚེས་ ༢༣ ཉིན་ ༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཕྱི་ལོ་ ༡༩༡༦ ལོར་བོད་ཀྱི་རྒྱལ་ས་ལྷ་སར་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༠ ཐམ་པ་འཁོར་བའི་སྲུང་བརྩིའི་མཛད་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་སྨན་རྩིས་ཁང་གི་བོད་སྨན་སྡེ་ཚན་གཉིས་ནས་ས་གནས་མང་ཚོགས་ཀྱི་འཕྲོད་བསྟེན་སྔོན་འགོག་དང་ཉམ་ཐག་ལྟ་སྐྱོང་ཐད་འཐུས་ཤོར་ཕྱིན་ཡོད་པའི་བཀའ་སློབ་ལྕི་མོ་ཞིག་ཕེབས་ཡོད་པར་བརྟེན། དེ་དོནའཛིན་སྐྱོང་བཀའ་ཤག་གི་ངོས་ནས་ནད་རིགས་སྔོན་འགོག་དང་ཉམ་ཐག་ལྟ་ཞིབ་སླད་དུ་ཟུར་དུ་དམིགས་བསལ་ཚོགས་ཆུང་ཞིག་ཆེད་བཙུགས་གནང་ཡོད་པ་རེད། ཉམ་ཐག་ལྟ་ཞིབ་ཚོགས་ཆུང་གི་ཉམས་ཞིབ་ལས་དོན་དེ་འདི་ལོའི་ཟླ་ ༤ ཚེས་ ༢༩ ཉིན་བཀའ་ཟུར་ཚེ་རིང་ཕུན་ཚོགས་མཆོག་གིས་སྣེ་ཁྲིད་པའི་འོག་ནང་སྲིད་དྲུང་ཟུར་བཀྲིས་ཕུན་ཚོགས་ལགས།  ནང་སྲིད་དྲུང་འཕར་ཚེ་དབང་སྒྲོལ་མ་ལགས། འཕྲེད་བསྟེན་དྲུང་འཕར་ཚེ་དབང་དངོས་འགྲུབ་ལགས་དང་ཤེས་རིག་ཟུང་དྲུང་འཆི་མེད་ཚེ་དབྱངས་ལགས་བཅས་མི་ལྔ་ཡོད་པའི་ཚོགས་ཆུང་དེས་ཉམ་ཐག་ལྟ་སྐྱོང་གི་ཉམས་ཞིབ་ལས་དོན་དབུ་འཛུགས་གནང་ཡོད་པ་དང་། ཉེ་བའི་ཆར་འདས་པའི་ཟླ་བ་གསུམ་ལྷག་ནང་གི་ཉམ་ཐག་ཉམས་ཞིབ་ལས་དོན་གནང་པའི་གྲུབ་དོན་ཇི་སོན་གྱི་སྙནན་ཐོ་ཞིག་འཛིན་སྐྱོང་བཀའ་ཤག་ལ་ཕུལ་འདུག

ཐེ་ཝན་གྲོས་ཚོགས་ཀྱི་ཚོགས་གཙོ་སྐུ་ཞབས་ su Jai quan ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ནམ་ཕེབས་ཀྱང་དགའ་བསུ་ཡོད་ཅེས་གསུངས་འདུག དེ་ཡང་ཁ་ཉིན་ཚེས་ ༥ ཉིན་བཞུགས་སྒར་དུ་ཆེད་བཅར་ཞུས་པའི་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་མི་ཡིན་པ་ཐེ་ཝན་གྲོས་ཚོགས་ཀྱི་འཐུས་མི་སྐུ་ཞབས་ Freddy Lim ལགས་དང་ལྕམ་ Kulas Yotaka ལགས་རྣམ་གཉིས་ཀྱིས་༸གོང་ས་སྐྱབས་མགོན་ཆེན་པོ་མཆོག་ཐེ་ཝན་དང་ཁུལ་དེའི་གྲོས་ཚོགས་སུ་ཆིབས་བསྒྱུར་ཡོང་བའི་གཞུང་འབྲེལ་གསོལ་འདེབས་ཞུས་པར་མགོན་པོ་༸གང་ཉིད་མཆོག་གིས་ཀྱང་མ་འོངས་པར་༸གང་ཉིད་མཆོག་ཐེ་ཝན་ནང་ལ་ཕེབས་ཐུབ་རྒྱུའི་རེ་བ་ཡོད་ཅེས་བཀའ་ལན་མཛད་ཡོད་པ་རེད། དེ་མཚུངས་སུ་ཚེས་ ༥ ཉིན་ཐེ་ཝན་ནང་རྟེན་གཞི་བྱས་པའི་གསར་ཁང་ཁག་གི་གསར་འགོད་པ་རྣམས་ཀྱིས་ཁུལ་དེའི་གྲོས་ཚོགས་ཚོགས་གཙོ་སྐུ་ཞབས་ Su Jai - quan ལགས་སུ་གྲོས་ཚོགས་འཐུས་མི་རྣམས་ནས་༸གོང་ས་མཆོག་ཐེ་ཝན་ནང་གདན་ཞུ་ཕུལ་བ་དངོས་འབྲེལ་ཡིན་མིན་ཐོག་བཅར་འདྲི་ཞུས་འདུག་པ་དང་། སྐབས་དེར་ཚོགས་གཙོ་སྐུ་ཞབས་ Su Jai - quan ལགས་ཀྱིས་གནད་དོན་དེ་ནི་བདེན་པ་ཡིན་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་ཐེ་ཝན་དང་ཐེ་ཝན་གྱི་གྲོས་ཚོགས་སུ་ནམ་ཕེབས་རུང་ང་ཚོའི་ངོས་ནས་དགའ་བསུ་ཡོད་ཅེས་ལན་འདེབས་གནང་ཡོད་པ་རེད། ལྷག་པར་དུ་ཁོང་གིས་ཁྲིམས་བཟོ་ལྷན་ཚོགས་སམ་གྲོས་ཚོགས་དེ་ནི་མང་ཚོགས་ཀྱི་བསམ་ཚུལ་བརྗེ་རེས་གནང་ས་དང་མང་གཙོའི་རང་དབང་ལོངས་སུ་སྤྱོད་སའི་སྡིངས་ཆ་གཙོ་ཆེ་ཞིག་ཡིན་པར་འགྲེལ་བརྗོད་དང་། ཐེ་ཝན་དང་ཐེ་ཝན་གྱི་གྲོས་ཚོགས་ནང་ལ་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པའི་རང་དབང་དང་མང་གཙོའི་ཐོག་ལ་ཕྱག་ལས་གནང་མཁན་གྱི་སྐྱེས་བོ་སུ་འདྲ་ཞིག་ཡིན་རུང་དེར་དགའ་བསུ་ཡོད་ཅེས་གསུངས་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་སྤྱི་ལོ་ ༡༩༩༧ དང་། ༢༠༠༡ དེ་བཞིན་སྤྱི་ལོ་ ༢༠༠༩ བཅས་སུ་ཐེ་ཝན་ནང་ལ་ཆིབས་སྒྱུར་བཀའ་དྲིན་བསྐྱངས་གནང་མཛད་ཡོད་པ་ཟད། བར་སྐབས་ཤིག་ནས་ཁུལ་དེའི་ནང་གི་ཆབ་སྲིད་དཀའ་རྙོག་དང་རྒྱ་གཞུང་གི་གནོན་ཤུགས་སོགས་རྐྱེན་པས་ཐེ་ཝན་ནང་པའི་ཆོས་ཚོགས་དང་མང་གཙོ་དོན་གཉེར་བའི་ཆབ་སྲིད་ཚོགས་པ་ཁག་ཅིག་གིས་༸གང་ཉིད་མཆོག་ལ་གདན་ཞུའི་གསོལ་འདེབས་ལན་མང་ཞུས་ཡོད་ཀྱང་ད་བར་ཆིབས་བསྒྱུར་བསྐྱང་ཐུབ་མེད་པ་རེད།

སྐབས་གསུམ་རིང་བོད་མི་མང་མདོ་སྨད་སྤྱི་འཐུས་གནང་མྱོང་མཁན་སྤྱི་ཟུར་བསྟན་འཛིན་མགོན་པོ་ལགས་ཁ་སང་སྔ་ཐོག་སྙུང་གཞི་རྐྱེན་པས་བཞུགས་སྒར་བདེ་ལེགས་སྨན་ཁང་དུ་དགོངས་པ་རྫོགས་པའི་གནས་ཚུལ་བྱུང་འདུག རྩ་བའི་བསྟན་འཛིན་མགོན་པོ་ལགས་དམ་པ་ཁོང་ནི། ཕྱི་ལོ་ ༡༩༦༠ ལོར་བོད་མཚོ་སྔོན་ཞིང་ཆེན་མཚོ་ལྷོ་ཁུལ་མང་ར་རྫོང་དུ་འཁྲུངས་ཞིང་། ༡༩༨༧ ལོར་རྒྱ་གར་དུ་བཙན་བྱོལ་འབྱོར་རྗེས་བོད་མིའི་དམངས་གཙོ་ཚགས་ཤོག་དང་མ་འོངས་པ་བོད་ཀྱི་གསར་འཕྲིན་ལས་ཁང་ནང་གསར་འགྱུར་དང་འབྲེལ་བའི་ཕྱག་ལས་གནང་ཡོད་པ་མ་ཟད། རྡ་ས་བདེ་དོན་ཚོགས་ཆུང་གི་དྲུང་ཆེ་དང་རྡ་སར་ཡོད་པའི་རྒྱལ་ཞེན་ལྷན་ཚོགས་པའི་ནང་ཕྱག་ལས་གནང་འདུག སྤྱི་ཟུར་བསྟན་འཛིན་མགོན་པོ་ལགས་ཀྱིས་ད་དུང་མདོ་སྨད་དབུས་རྒྱུན་གྱི་དྲུང་གཞོན་དང་མདོ་སྨད་སྤྱི་འཐུས་ཀྱི་བར་བརྒལ་འོས་བསྡུ་བརྒྱུད་བོད་མི་མང་སྤྱི་འཐུས་སྐབས་བཅུ་གཉིས་པ་དང་བཅུ་གསུམ་པ། དེ་བཞིན་སྐབས་བཅུ་བཞི་པའི་མདོ་སྨད་སྤྱི་འཐུས་བཅས་གནང་མྱོང་ཡོད་པ་རེད། དེ་རིང་བོད་མི་མང་སྤྱི་འཐུས་ལྷན་ཚོགས་ཀྱིས་བློ་ཕམ་ཆེན་པོས་དམ་པ་ཁོང་ལ་མྱ་ངན་གུས་འདུད་ཀྱི་བསྒྲགས་གཏམ་ཞིག་སྤེལ་ཡོད་པ་དང་། དེའི་ནང་ལ་ཁོང་གིས་བོད་མིའི་སྒྲིག་འཛུགས་དང་རྒྱ་ཆེའི་མང་ཚོགས་ཀྱི་དོན་དུ་ཞབས་ཞུ་མཐར་སོན་གནང་པའི་མཛད་རྗེས་ལ་ཡི་རངས་བསྔགས་བརྗོད་ཞུས་པ་དང་སྦྲགས་ཏེ་ཚེ་རབས་ཕྲེང་བ་ནས་བསགས་པའི་སྡིག་སྒྲིབ་བྱང་ཞིང་། མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་ཐོབ་པ་དང། དེ་བཞིན་དམ་པ་དེ་ཉིད་ཀྱི་ཤུལ་ལུས་ནང་མི་ཉེ་འབྲེལ་རྣམས་ལ་གདུང་སེམས་མཉམ་སྐྱེད་ཀྱི་ཐུགས་གསོ་བཅས་གནང་འདུག

ཉན་པ།: Listen ཕབ་ལེན། Download ༸གོང་ས་མཆོག་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་མགོན་དུ་དབུ་བཞུགས་མཛད་རྒྱུ་རེད་འདུག ༸གོང་ས་མཆོག་གིས་ཨ་མ་ཊེ་རེ་ས་དམ་པར་ཡེ་ཤུའི་སྐྱེས་ཆེན་དམ་པའི་མཚན་གནས་ཕུལ་བར་འཚམས་འདྲི་བསྩལ་འདུག ཆོས་རིག་བཀའ་བློན་མཆོག་གིས་སྨན་རི་ཁྲི་འཛིན་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་འདུག ཧོང་ཀོང་གི་མང་གཙོའི་ལས་འགུལ་བ་ཁག་ཅིག་གྲོས་ཚོགས་འཐུས་མིར་བདམས་ཐོན་བྱུང་བ། སྦིར་བོད་ཁམས་བཟོ་གཞིས་ཚོགས་པ་དབུ་བརྙེས་ནས་ལོ་༥༠འཁོར་བའི་དུས་ཆེན་སྲུང་རྩི་ཞུས་པ། གླུ་གཞས་ལས་རིམ། ནང་མ་གླུ་གཞས། Tuesday 06/09/2016 Dalai Lama leaves for 18 days visit to Belgium, France and Poland Dalai Lama expresses joy at Sanctification of Mother Teresa New generation of pro-democracy activists win seats in Hong Kong's LegCo Religion Kalon offers ‘Tenshug’ to Bon religious head Menri Trizin Rinpoche MUSIC FEATURE: Nangma Tibetan Traditional Song

 དེ་རིང་ཟླ་ ༩ ཕྱི་ཚེས་ ༦ ཉིན་གུང་ཚོུད་ ༡༢།༢༠ ཙམ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དྷ་ས་བཞུགས་སྒར་ནས་ཡུ་རོབ་ཁུལ་དུ་ཆིབས་བསྒྱུར་མཛད་གནང་སོང་།  མགོན་པོ་༸གང་ཉིད་མཆོག་དང་སྟོན་འཁོར་ལྷན་རྒྱས་ལྗགས་སྨིན་གྲུབ་རྗེས་བཞུགས་སྒར་༸རྒྱལ་བའི་ཕོ་བྲང་ནས་ཕེབས་ཐོན་གྱིས་ཡུ་རོབ་ཡུལ་གྲུ་སྦེལ་ཇམ་དང་ཕ་རན་སི་བཅས་སུ་ཆིབས་སྒྱུར་བསྐྱངས་ཡོད་པ་རེད། མགོན་པོ་༸གང་ཉིད་མཆོག་ཐེངས་འདིའི་ཡུ་རོབ་ནང་གི་མཛད་འཆར་བསྐྱང་རྒྱུའི་ཁྲོད་ཡོ་རོབ་རྒྱལ་ཁབ་བྷེལ་ཇམ་དང། ཕ་རན་སི། དེ་བཞིན་པོ་ལན་ཌི་བཅས་སུ་ཉིན་གྲངས་གསུམ་རིང་མཛད་འཕྲིན་བསྐྱང་གནང་རྒྱུ་ཡིན་པ་དང། ༸གོང་ས་༸སྐྱབས་མགོན་ཆེན་པོ་མཆོག་ཟླ་འདིའི་ཚེས་ ༧ ཉིན་ཡུ་རོབ་རྒྱལ་ཁབ་བྷེལ་ཇམ་དུ་ཞབས་སོར་བདེ་བར་འཁོད་གནང་གི་ཡོད་པ་རེད། སྦར་སེལ་བོད་ཀྱི་སྐུ་ཚབ་དོན་གཅོད་བཀྲིས་ཕུན་ཚོགས་ལགས་ཀྱིས་མཛད་འཆར་ཁག་འགྲེལ་བརྗོད་གནང་དོན་ལ། ༸གང་ཉིད་མཆོག་གིས་ཚེས་ ༨ ཉིན་ཁུལ་དེའི་རྒྱལ་ས་ Brussels ནང་དུ་ཚོགས་རྒྱུའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ ༧ པའི་དབུ་འབྱེད་ཀྱི་མཛད་སྒོར་ཚོགས་མགོན་དུ་དབུ་བཞུགས་མཛད་རྒྱུ་དང་། ཕྱི་ཚེས་ ༩ ནས་དབུ་འཛུགས་ཀྱིས་ཚེས་ ༡༡ བར་ཁུལ་དེའི་བྷོ་ཛར་སྒྱུ་རྩལ་བསྟི་གནས་ཁང་དུ་ཡུ་རོབ་སེམས་དང་སྲོག་གི་ལྷན་ཚོགས་ཐོག་ཚོགས་མགོན་དུ་ཆིབས་སྒྱུར་བསྐྱང་གནང་མཛད་རྒྱུ།  དེ་བཞིན་ས་གནས་མང་ཚོགས་དང། བོད་རིགས་བཅས་ཁག་སོ་སོར་བཀའ་སློབ་བསྩལ་རྒྱུ་མ་ཟད།  དེ་རྗེས་ཚེས་ ༡༢ ཉིན་བྷེལ་ཇམ་གྱི་རྒྱལ་ས་ Brussels ནང་དུ་རྟེན་གཞི་བྱས་པའི་ Louvain གཙུག་ལག་སློབ་གཉེར་ཁང་དུ་ཆོས་ལུགས་མཐུན་སྒྲིལ་གྱི་ལྷན་ཚོགས་ཐོག་ཆིབས་སྒྱུར་གྱིས་དབུ་བཞུགས་མཛད་རྒྱུ་བཅས་ཀྱི་མཛད་འཆར་བཀྲིན་ཆེ་བ་བསྐྱང་རྒྱུ་ཡིན་པ་གསུངས་སོང་། ད་དུང་ཁོང་གིས་༸གོང་ས་མཆོག་གིས་བྷེལ་ཇམ་ནང་གི་མཛད་འཆར་ཁག་ལེགས་པར་གྲུབ་རྗེས། ཕ་རན་སི་རྒྱལ་ས་པེ་རིས་དུ་ཕྱི་ཚེས་ ༡༣ དང་། ༡༤ བཅས་ཉིན་གཉིས་རིང་བོད་རིགས་རྣམས་ལ་བཀའ་སློབ་དང། བཟོད་སྒོམ་དང་གུས་བརྩི་ཞེས་པའི་བརྗོད་གཞིའི་འོག་གོ་སྒྲིག་ཞུས་པའི་ཆོས་ལུགས་མཐུན་སྒྲིལ་ལྷན་ཚོགས་ཐོག་བཀའ་སློབ་མཛད་རྒྱུ་དང་། དེ་བཞིན་ཚེས་ ༡༥ ནས་དབུ་འཛུགས་ཀྱིས་ཚེས་ ༡༩ བར་ཕ་རན་སའི་ Strasbourg གྲོང་ཁྱེར་དུ་བོད་ཀྱི་ནང་ཆོས་མཐུན་ཚོགས་ནས་ཇི་ལྟར་གསོལ་འདེབས་ཞུ་དོན་བཞིན། ཁུལ་དེའི་དད་ལྡན་མང་ཚོགས་ལ་དཔལ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་དང་ཐུགས་རྗེ་ཆེན་པོའི་བཀའ་དབང་བསྩལ་རྒྱུ། དེ་བཞིན་གནད་ཡོད་མི་སྣ་ཁག་དང་མཇལ་འཕྲད་མཛད་རྒྱུ་མ་ཟད། ། ཁྱད་པར་དུ་ཁུལ་དེར་རྟེན་གཞི་བྱས་པའི་ཡོ་རོབ་གྲོས་ཚོགས་ཀྱི་ཕྱི་སྲིད་ལྷན་ཁང་གིས་ཇི་ལྟར་གདན་ཞུ་ཕུལ་དོན་ལྟར། ༸གང་ཉིད་མཆོག་གིས་བཀའ་སློབ་བཀྲིན་བསྩལ་རྒྱུ་སོགས་ཀྱི་མཛད་འཆར་ཡོད་སྐོར་གསུངས་སོང་།

ཁ་ཉིན་ཚེས་ ༤ ཉིན་ཡོ་རོབ་ཀྱི་གྲོང་ཁྱེར་ Vatican City ནང་རྟེན་གཞི་བྱས་པའི་ཡེ་ཤུའི་མཆོད་ཁང་ St.Peters ཞེས་པར་མང་ཚོགས་ཆིག་ཁྲི་ལྷག་འདུ་འཚོམས་གནང་ཐོག་ཡེ་ཤུའི་བླ་ཆེན་ Pope Francis མཆོག་གིས་ཡེ་ཤུའི་རྗེ་བཙུན་མ་འམ་ཡོངས་གྲགས་སུ་ཨ་མ་ཊེ་རེ་ས་ Mother Teresa དམ་པ་ཁོང་ འདས་གྲོངས་སུ་གྱུར་ནས་ལོ་ངོ་ ༡༩ འཁོར་རྗེས་ཁོང་གིས་དེ་སྔ་འཛམ་གླིང་སྤྱི་དང་སྒོས་སུ་རྒྱ་གར་འཕགས་པའི་ཡུལ་གྱི་ས་གནས་ཡུལ་མི་སྐྱོ་བོ་དང་ནད་གཅོང་རྣམས་ལ་གཟིགས་སྐྱོང་རྒྱ་ཆེ་གནང་པའི་མཛད་རྗེས་ལ་ཆེ་བསྟོད་ཀྱིས་དམ་པ་ཁོང་ལ་ཡེ་ཤུའི་སྐྱེས་བུ་དམ་པ་ཞེས་ཆེས་མཐོའི་མཚན་གནས་ཕུལ་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་མཆོག་ཐུགས་ཆེས་དགྱེས་ཚོར་བྱུང་སྐོར་གྱི་གསུང་འཕྲིན་ཞིག་རྒྱ་གར་མངའ་སྡེ་ནུབ་བྷེན་གྷལ་ West  Bengal ནང་གྱི་རྒྱལ་ས་ Kolkata ལ་རྟེན་གཞི་བྱས་པའི་ཨ་མ་ཊེ་རི་ས་དམ་པ་དེ་ཉིད་ཀྱི་ཡེ་ཤུའི་དགེ་རྩའི་ Missionaries of Charity ཞེས་པའི་མཚན་ཐོག་ཏུ་བསྩལ་འདུག གསུང་འཕྲིན་དེའི་ནང་འཁོད་དོན་ལ། ༸གང་ཉིད་མཆོག་གིས་ཨ་མ་ཊེ་རེ་ས་དམ་པ་དེ་ཉིད་ཀྱིས་སྐུ་ཚེ་ཧྲིལ་པོའི་རིང་ལ་འགྲོ་བ་མི་རིགས་སྤྱི་དང་། ལྷག་དོན་ཕ་མ་དང་མགོན་སྐྱབས་བྲལ་བའི་ཉམ་ཐག་ནད་གཅོང་དང་དབུལ་ཕོངས་རྣམས་ལ་དབྱེ་མེད་ཀྱིས་བྱམས་སྐྱོང་གནང་པའི་མཛད་རྗེས་ལ་ཡི་རངས་བསྔགས་བརྗོད་དང་སྦྲགས། ད་རེས་དམ་པ་ཁོང་ལ་ཡེ་ཤུའི་སྐྱེས་བུ་དམ་པའི་མཚན་གནས་ཐོབ་པར་དགེ་རྩའི་ནང་ཕྱག་ལས་གནང་མཁན་དང་། རྗེས་མཇུག་རྣམས་ལྷན་ ༸གང་ཉིད་མཆོག་ལའང་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་བ་དང་། དེ་སྔ་མགོན་པོ་མཆོག་དམ་པ་ཁོང་དང་མཇལ་འཕྲད་བྱུང་སྐབས་དང་། སྔར་ལོ་དམ་པ་ཁོང་གི་དགེ་རྩར་ཕེབས་ཏེ་དམ་པ་ཁོང་གི་ཕྱག་རོགས་ཡེ་ཤུའི་བཙུན་མ་རྣམས་པ་དང་མཇལ་འཕྲད་མཛད་པ་གཙོས། གནས་གཟིགས་གནང་སྐབས་ཨ་མ་ཊེ་རེ་ས་དམ་པ་ཁོང་ནི་གང་ཟག་མིག་དཔེ་འོས་པ་ཞིག་རེད་འདུག་སྙམ་པའི་ཐུགས་ཚོར་བྱུང་མྱོང་ཡོད་སྐོར་ཡང་བཀའ་བསྩལ་འདུག   མཐར་དོན་མགོན་པོ་༸གང་ཉིད་མཆོག་གིས་ཇི་སྲིད་དབུལ་ཕོངས་གནས་པ་དེ་སྲིད་དུ་དགེ་རྩ་ཚོགས་པའི་ལས་དོན་དག་ལ་འགེགས་མེད་རྒྱུན་སྐྱོང་ཡོང་ཐུབ་པར་ཐུགས་སྨོན་ཡང་མཛད་འདུག གཞི་རྩའི་ཨ་མ་ཊེ་རེ་ས་དམ་པ་ཁོང་ནི་སྤྱི་ལོ་ ༡༩༡༠ ལོར་ཡོ་རོབ་ཀྱི་ Albania རྒྱལ་ཁབ་ནང་འཁྲུངས་ཤིང་རིམ་པས་རྒྱ་གར་ནང་གནས་སྡོད་བྱེད་དེ་ས་གནས་ཡུལ་མི་ཉམས་ཐག་རྣམས་ལ་ལྟ་སྐྱོང་སླད་རང་ཉིད་ཀྱི་དགེ་རྩ་ཚོགས་པ་ Missionaries of Charity  ཞེས་པ་ཆེད་འཛུགས་གནང་པ་མ་ཟད། ད་ལྟའི་ཆར་དམ་ཁོང་གི་དགེ་རྩ་ཚོགས་པ་དེ་ལ་རྒྱལ་སྤྱིའི་རྒྱལ་ཁབ་ ༡༡༣ ལྷག་གི་ནང་ལ་དེའི་ཡན་ལག་བཙུགས་ཐུབ་ཡོད་པ་དང་། དེ་དག་ནང་ཕྱག་ལས་གནང་མཁན་ཡེ་ཤུའི་བཙུན་མ་ ༤༥༠༠ ལྷག་ཡོད་པ་རེད། དམ་པ་ཁོང་སྤྱི་ལོ་ ༡ ༩༩༧ ལོར་འདས་གྲོངས་སུ་གྱུར་ཡོད་ཀྱང་། ཁོང་གི་མཛད་རྗེས་དེ་དག་ལ་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པའི་ལྷོ་ཨ་ཕི་རི་ཀའི་ཡེ་ཤུའི་ཆོས་དཔོན་ Desmond Tutu སོགས་རྒྱལ་སྤྱིའི་དབུ་ཁྲིད་མང་པོས་ཡི་རངས་ཀྱི་ཆེ་བསྟོད་ཤུགས་ཆེ་གནང་བཞིན་ཡོད་པ་དང་། ལྷག་དོན་དམ་པ་ཁོང་སྐུ་འཚོ་བཞུགས་སྐབས་ཏེ་སྤྱི་ལོ་ ༡༩༧༩ ལོར་ནོ་བེལ་ཞི་བདེའི་གཟེངས་རྟགས་སོགས་རྒྱལ་སྤྱིའི་གཟེངས་རྟགས་ཆེ་གྲས་ཁག་ཅིག་ཀྱང་བཞེས་མྱོང་ཡོད་པ་རེད།