Monthly Archives: May, 2017

ཁ་སང་ཟླ་ ༥ ཚེས་ ༢༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིའི་ནང་སྙན་གྲགས་ཆེ་བའི་རྒྱ་གར་གྱི་མཁས་དབང་དང་། རྩོམ་བྲིས་པ། དབུས་གཞུང་གི་བློན་ཆེན་བཅས་གནང་མྱོང་ཡོད་པའི་སྐུ་ཞབས་ Arun Shourie མཆོག་གིས་ཉེ་ཆར་རྩོམ་བྲིས་གནང་པའི་ Two Saint འམ་རྒྱ་གར་གྱི་བླ་ཆེན་སྐྱེས་བུ་དམ་པ་གཉིས་ཀྱི་ལོ་རྒྱུས་ཕྱག་དེབ་དབུ་འབྱེད་མཛད་ཡོད་པ་རེད། ལྡི་ལི་གསར་པའི་ IIC རྒྱ་གར་དང་རྒྱལ་སྤྱའི་ལྟེ་གནས་ཀྱི་ཚོགས་ཁང་ཞིག་ཏུ་གོ་སྒྲིག་ཞུས་པའི་ཕྱག་དེབ་དབུ་འབྱེད་ཀྱི་མཛད་སྒོར་དེ་སྔོན་སྲིད་བློན་གཞོན་པ་གནང་མྱོང་ཡོད་པའི་སྐུ་ཞབས་ L K Advani མཆོག་གིས་དབུས་པའི་ཆབ་སྲིད་ཚོགས་པ་འདྲ་མིན་གྱི་གནད་ཡོད་མི་སྣ་མང་དག་ཞིག་ཆེད་ཕེབས་གནང་འདུག་པ་མ་ཟད། གསར་ཁང་གྲགས་ཅན་ཁག་གི་རྩོམ་བྲིས་པ་དང་། སྤྱི་ཚོགས་ཞབས་ཞུ་བ། ཆོས་ལུགས་ཀྱི་དབུ་ཁྲིད་སོགས་ཁྱོན་མི་གྲངས་ ༣༠༠ བརྒལ་བ་ཞིག་འདུ་འཛོམས་བྱུང་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་སྐུ་ཞབས་ Arun Shourie མཆོག་གི་རིགས་མྱུག་གི་ལྷན་དུ་ཕྱག་དེབ་དེ་དབུ་འབྱེད་གནང་ཡོད་པ་དང། ཕྱག་དེབ་རྩོམ་བྲིས་པ་མཆོག་ནས་༸གོང་ས་མཆོག་ལ་མཛད་སྒོའི་ཐོག་དེང་གྱི་འཛམ་གླིང་དང་གནའ་བོའི་རྒྱ་གར་གྱི་ཤེས་བྱའི་སྐོར་ལམ་སྟོན་བཀའ་སློབ་བརྩལ་གནང་ཡོང་བའི་གསོལ་འདེབས་ཞུ་དོན་ལྟར། མགོན་པོ་༸གང་ཉིད་མཆོག་ནས་སྤྱིར་བཏང་རྒྱ་གར་མི་མང་ཚོས་དེང་དུས་ཀྱི་ཤེས་ཡོན་ཐོག་ནས་ཕྱིའི་དངོས་པོའི་མཐུན་རྐྱེན་ཐོག་མདུན་བསྐྱོད་བྱེད་མུས་ཡིན་ཀྱང་། གལ་སྲིད་དེ་དང་ཟུང་དུ་རང་ཉིད་སོ་སོའི་གནའ་བོའི་རིག་གཞུང་དག་ལ་དོ་སྣང་ཆེ་ཙམ་གནང་ཐུབ་ཚེ་རྒྱལ་ཁབ་གཞན་ལ་མེད་པའི་རྩ་ཆེའི་རིག་གཞུང་དེའི་རིན་ཐང་ཤེས་པ་ཙམ་མ་ཟད། མི་ཚེ་ཡང་བདེ་སྐྱིད་དང་ལྡན་པ་ཞིག་ཡོང་གི་རེད་ཅེས་ལམ་སྟོན་བསྩལ་གནང་སོང་། ལྷག་དོན་༸གོང་ས་མཆོག་གིས་ངོས་རང་གི་བསམ་བློ་ལྟར་བྱ་ཚེ་འཛམ་གླིང་ནང་རྒྱལ་ཁབ་ཁག་ ༢༠༠ ལྷག་ཙམ་ཡོད་པ་ལས་རྒྱ་གར་ནི་ཕྱིའི་དངོས་པོའི་མཐུན་རྐྱེན་དང་ནང་སེམས་ཀྱི་རིན་ཐང་གཉིས་ཟུང་སྦྲེལ་གྱི་བེད་སྤྱོད་བྱེད་ཐུབ་མཁན་གྱི་རྒྱལ་ཁབ་གཅིག་པོ་དེར་ངོས་འཛིན་གནང་གི་ཡོད་ཅེས་སོགས་བཀའ་སློབ་བསྩལ་ཡོད། ༸གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་ལས་བློ་དང་ཤེས་པའི་རྣམ་གཞག་དེ་ཚོ་ཆོས་དང་འབྲེལ་བ་མེད་པའི་གནད་དོན་ཞིག་ཏུ་ངོས་འཛིན་གནང་གི་ཡོད་པ་བཀའ་བསྩལ་གནང་སྟེ། ནང་སེམས་ཀྱི་བདེ་སྐྱིད་ཟེར་སྐབས་མིག་བཙུམ་ནས་སྨོན་ལམ་བརྒྱབ་པ་ཙམ་མིན་པར་མིག་ཕྱེ་སྟེ་མཐོང་རྒྱ་ཆེ་ཙམ་བྱེད་དགོས་པ་མ་ཟད། གནད་དོན་ལ་རིག་པའི་ལམ་ནས་དཔྱད་དེ་བློ་དང་ཤེས་པའི་རྣམ་གཞག་ལ་འགྱུར་བ་གཏོང་ཐུབ་པ་ཞིག་བྱ་དགོས་གལ་ཡིན་པའི་ལམ་སྟོན་མཛད་པ་དང་ཆབས་ཅིག རྒྱ་གར་གྱི་རྩ་ཆེའི་རིག་གཞུང་དེ་དག་ནི་དེང་དུས་ཀྱི་ཚན་རིག་དང་ཟུང་སྦྲེལ་ཐོག་འགྲོ་ཐུབ་མཁན་གྱི་ལྟ་གྲུབ་རྩ་ཆེན་ཞིག་ཡིན་སྐོར་སོགས་ལམ་སྟོན་བཀའ་སློབ་བཀྲིན་ཆེ་བ་བརྩལ་གནང་ཡོད། དཔེ་དེབ་དབུ་འབྱེད་ཀྱི་མཛད་སྒོ་དེའི་ཐོག་རྒྱ་གར་གྱི་ཁྲིམས་ཁང་གོང་མའི་ཁྲིམས་རྩོད་པ་སྐུ་ཞབས་ Fali S Nariman མཆོག་དང་། རྒྱ་གར་གྱི་ཕྱི་སྲིད་དྲུང་ཆེ་སོགས་ཀྱི་ཕྱག་ལས་གནང་མྱོང་མཁན་སྐུ་ཞབས་ Shyam Saran དང་དེ་བཞིན་མཁས་དབང་ Dr. Ambarish Sarwik བཅས་ནས་ཀྱང་དཔེ་དེབ་དེ་དང་འབྲེལ་བའི་གསུང་བཤད་གནང་པ་མ་ཟད། བོད་མིའི་བླ་ན་མེད་དབུ་ཁྲིད་སྤྱི་ནོར་ ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་ཆོས་ལུགས་མཐུན་འབྲེལ་བཅས་ཀྱི་ཐད་ཐུགས་འགན་ཆེ་བཞེས་གནང་པའི་མཛད་འཕྲིན་ཁག་ལ་ཞལ་གཅིག་གྲགས་ཀྱི་ཡི་རངས་བསྔགས་བརྗོད་ཤུགས་ཆེ་གནང་ཡོད་པ་རེད། རྒྱལ་ས་ལྡི་ལི་གཉིས་ཀྱི་ནང་མཛད་འཕྲིན་ཁག་ལེགས་པར་གྲུབ་བསྟུན། དེ་རིང་སྔ་དྲོ་ཚོུད་ ༡༢།༣༠ ཐོག་བཞུགས་སྒར་དུ་༸ཞབས་སོར་བདེ་བར་འཁོད་གནང་སོང་། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ནས་འདས་པའི་བདུན་ཕྲག་འདིའི་ནང་རྒྱལ་ས་ལྡི་ལི་ཙམ་མ་ཟད། རྒྱ་གར་ལྷོ་ཕྱོགས་གྲོང་ཁྱེར་སྦེང་ལོར་ནང་ཆིབས་བསྒྱུར་གྱིས་ཉིན་གཅིག་གི་མཛད་འཆར་བཀའ་དྲིན་བསྐྱངས་ཡོདཔ་རེད། དེའང་མགོན་པོ་༸གང་ཉིད་མཆོག་ཚེས་ ༢༢ ཉིན་བཞུགས་སྒར་ནས་སྦེང་ལོར་ཕྱོགས་སུ་ཕེབས་ཐོན་གྱིས་ཚེས་ ༢༣ ཉིན་རྒྱ་གར་གྱི་རྩ་ཁྲིམས་གསར་བཟོ་གནང་མཁན་དང་སྤྱི་ཚོགས་དྲང་བདེན་དང་ཕོ་མོ་འདྲ་མཉམ་བཅས་ཀྱི་ཐོག་ཆེས་མཛད་རྗེས་སྙན་གྲགས་ཆེ་བའི་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་ཀྱིས་སྤྱི་ཚོགས་ཁྲོད་དྲང་བདེན་གྱི་ཁྲིམས་ལུགས་ལག་བསྟར་དགོས་པའི་སྐོར་དང་མི་རིགས་འདྲ་མཉམ་སྐོར་གྱི་བརྗོད་གཞིའི་ཐོག་ལམ་སྟོན་བཀའ་སློབ་བརྩལ་བ་དང་ཆབས་ཅིག མངའ་སྡེའི་ཡུལ་སྐོར་སྤྲོ་འཆམ་བློན་ཆེན་མཆོག་དང་སྐོར་སྲུང་དཔོན་རིགས་སོགས་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་ཡོད་པ་རེད། ཁ་ཉིན་༸གོང་ས་མཆོག་སྦེང་ལོར་ནས་རྒྱལ་ས་ལྡི་ལིར་ཆིབས་ཞལ་བསྒྱུར་གནང་སྟེ། ཁུལ་དེར་རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་བཞིན་གསར་ཁང་དེའི་ལས་བྱེད་རྣམས་ལ་བླང་དོར་གྱི་ལམ་སྟོན་བཀའ་སློབ་བརྩལ་གནང་པ་དང་། དེ་བཞིན་ཁ་སང་རྒྱ་གར་གྱི་བློན་ཆེན་ཟུར་པ་ Arun Shourie མཆོག་གིས་རྩོམ་བྲིས་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་བ་སོགས་ཀྱི་མཛད་འཕྲིན་བསྐྱངས་ཡོད་པ་རེད། མཛད་འཆར་ལྟར་ན། སང་ཉིན་ཚེས་ ༢༧ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མང་ཚོགས་ལ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་བསྩལ་རྒྱུ་རེད་འདུག

ཉན་པ།: Listen ཕབ་ལེན། Download ༸གོང་ས་མཆོག་དགུང་ལོ་ ༩༠ ལ་ཕེབས་སྐབས་༸སྐུའི་ཡང་སྲིད་ཐོག་དགོངས་བཞེས་ནན་པོ་གནང་རྒྱུ་ཡིན་ཞེས་བཀའ་བསྩལ་འདུག སྲིད་སྐྱོང་མཆོག་གིས་བོད་ཀྱི་གྲོགས་པོ་ཚོས་བོད་དོན་ལ་མུ་མཐུད་རྒྱབ་སྐྱོར་གནང་སྐྱོང་ཡོང་བ་ཞུས་འདུག བཙུན་མ་རྣམས་ལ་ཚན་རིག་ཟབ་སྦྱོང་ཐོག་མ་གནང་འགོ་ཚུགས་འདུག ས་ག་ཟླ་བ་དང་བསྟུན་བཞུགས་སྒར་དུ་ནང་ཆོས་ངོ་སྤྲོད་ཀྱི་ལས་རིམ་ཞིག་དབུ་འཛུགས། ས་ག་ཟླ་བའི་ངོ་སྤྲོད། Thursday 25/05/2017 I will decide on reincarnation when I reach 90: HHDL at Indian Express Adda Sikyong calls for continued support to Tibet at Washington DC ETSI begins science workshop for Tibetan Nuns Special introduction to Buddhism program begins in Dharamsala Introduction to Saka Dawa by Yangteng Rinpoche

ཨ་རིའི་ Georgia མངའ་སྡེ་ནང་དུ་རྟེན་གཞི་བྱས་པའི་  Emory གཙུག་ལག་སློབ་གཉེར་ཁང་དང་བཞུགས་སྒར་བོད་ཀྱི་དཔེ་མཛོད་ཁང་ཟུང་སྦྲེལ་ཐོག་ནས་ ༢༠༡༤ ནས་གདན་ས་ཁག་གི་དགེ་འདུན་པ་རྣམས་ལ་ལོ་ལྟར་དབྱར་ཁ་ཟླ་བ་གཅིག་ལྷག་ཙམ་རིང་ལ་ཚན་རིག་གི་ཟབ་སྦྱོང་ཞིག་དངོས་སུ་ལག་བསྟར་གནང་བཞིན་ཡོད་པ་ལྟར། འདི་ལོའི་དགེ་འདུན་པ་ཚོའི་ཟབ་སྦྱོང་དེ་ཟླ་བ་འདིའི་ཚེས་ ༡༧ ནས་དབུ་འཛུགས་གནང་ཡོད་པ་དང་། ཁ་སང་ཚེས་༢༤ ཉིན་བྱེས་ཀྱི་གདན་ས་འབྲས་སྤུངས་བློ་གསལ་གླིང་དུ་བོད་པའི་བཙུན་མ་ཁག་གཅིག་ལ་ཚན་རིག་གི་ཟབ་སྦྱོང་ཐོག་མ་གནང་འགོ་ཚུགས་འདུག ཐེངས་འདིའི་བཙུན་མའི་ཟབ་སྦྱོང་དེ་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་མཐུན་འགྱུར་གནང་པ་ཞིག་ཡིན་པ་དང་། ཟབ་སྦྱོང་ནང་སྒྲོལ་མ་གླིང་དང་དགའ་ལྡན་ཆོས་གླིང་། འཇམ་དབྱངས་ཆོས་གླིང་དང་བྱང་ཆུབ་ཆོས་གླིང་། དེ་བཞིན་བཤད་སྒྲུབ་དར་རྒྱས་གླིང་བཅས་རྒྱ་གར་ནང་གི་བཙུན་དགོན་ཆེ་གྲས་ལྔའི་བཙུན་མ་ ༣༧ ནས་ལྷན་ཞུགས་གནང་འདུག ཨེ་མོ་རི་དང་བོད་ཀྱི་ཚན་རིག་ལས་རིམ་གྱི་ལོ་རྩ་བ་རྒན་པ་བཙོན་འགྲུས་ལགས་སུ་བཙུན་མའི་ཚན་རིག་གི་ཟབ་སྦྱོང་སྐོར་ལ་བཅར་འདྲི་ཞུས་པར། ཁོང་གིས་འདི་ནི་གཙོ་བོ་༸གོང་ས་མཆོག་གི་དགོངས་གཞི་བསྒྲུབ་རྒྱུ་དང་། ཁོང་ཚོར་སྤྱི་ཚོགས་ནང་ཞབས་ཞུའི་ལས་དོན་ཚགས་ཚུད་ནུས་པ་ལྡན་པ་ཡོང་ཆེད་དུ་དམིགས་པ་ཞིག་ཡིན་པ་གསུངས་སོང་། གཞི་རྩའི་ཨ་རིའི་ Emory གཙུག་ལག་སློབ་ཁང་དང་བོད་ཀྱི་དཔེ་མཛོད་ཁང་ཟུང་སྦྲེལ་ཐོག་ཚན་རིག་གི་ལས་འཆར་དེ་ཐོག་མ་ ༢༠༠༨ ལོར་འགོ་ཚུགས་འདུག་པ་དང་། ༢༠༡༤ ནས་དངོས་སུ་གཞི་བསླབ་གཞི་གཏན་འབེབས་ཐོག་ཁྱོན་ལོ་དྲུག་གི་ཚན་རིག་སློབ་སྦྱོང་གནང་གི་ཡོད་པ་རེད།  ལོ་དྲུག་པོ་དེའི་ནང་གཙོ་བོ་དབང་རྩའི་ཚན་རིག་དང་སྐྱེས་དངོས་ཚན་རིག དེ་བཞིན་དངོས་ཁམས་ཚན་རིག་དང་ནུབ་ཕྱོགས་ཀྱི་ལྟ་གྲུབ་སོགས་ཀྱི་ཐོག་སློབ་ཁྲིད་གནང་གི་འདུག

རྒྱ་གར་གྱི་རྒྱལ་ས་ལྡི་ལིར་རྒྱ་གར་གྱི་ Indian Express གསར་ཁང་གིས་གོ་སྒྲིག་ཞུས་པའི་གླེང་སྟེགས་ཐོག་ལ་བོད་མིའི་བླ་ན་མེད་པའི་དབུ་ཁྲིད་སྤྱིནོར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་མཆོག་དགུང་ལོ་ ༩༠ ལ་ཕེབས་སྐབས་༸སྐུའི་ཡང་སྲིད་ཐོག་དགོངས་བཞེས་ནན་པོ་གནང་རྒྱུ་ཡིན་ཅེས་བཀའ་བརྩལ་སོང་། ཁ་སང་ཟླ་ ༥ ཚེས་ ༢༤ ཉིན་རྒྱབ་ཏུ་ལྡི་ལི་གསར་པའི་ Taj Mansingh མགྲོན་ཁང་དུ་གོ་སྒྲིག་ཞུས་པའི་ Indian Express གསར་ཁང་གི་ Express Adda ཞེས་པའི་གླེང་མོལ་གྱི་ལས་རིམ་ཐོག་ལ་༸གོང་ས་མཆོག་གིས་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་པོ་སྟེ། ཆོས་དད་ཡོད་མེད་ལ་མ་ལྟོས་པར་ང་ཚོ་ཚང་མ་འགྲོ་བ་མི་གཅིག་པ་ཡིན་པའི་ཆ་ནས་ནང་སེམས་ཀྱི་བདེ་སྐྱིད་གལ་ཆེ་ཡིན་པ་དང་། དེ་ཡང་འགྲོ་བ་མི་ལ་རང་ཆས་སུ་ཡོད་པའི་བྱམས་པ་དང་བརྩེ་བ། ཚན་རིག་པས་ཞིབ་འཇུག་གནང་པའི་རྒྱུ་མཚན་ཁག་གཞི་རྩར་བཟུང་སྟེ་བདེ་སྐྱིད་ཀྱི་རྩ་བ་དེ་བྱམས་བརྩེ་ཡིན་པ་ངོ་སྤྲོད་གནང་པ་མ་ཟད། འཛམ་གླིང་ཐོག་གི་ཆོས་ལུགས་ཚང་མའི་དབར་ཞི་མཐུན་མཉམ་གནས་ཡོང་ཐབས། དེ་བཞིན་བོད་མི་ཞིག་ཡིན་པའི་ཆ་ནས་བོད་ཀྱི་ཆོས་དང་རིག་གཞུང་ཁོར་ཡུག་བཅས་པ་སྲུང་སྐྱོབ་ཡོང་ཐབས་སོགས་ལ་སྐུ་ལས་སྐྱོན་བཞིན་ཡོད་སྐོར་ངོ་སྤྲོད་གནང་ཡོད་པ་རེད། མགོན་པོ་༸གང་ཉིད་མཆོག་ལ་༸སྐུའི་ཡང་སྲིད་ཀྱི་གན་དོན་ཐོག་བཀའ་འདྲི་ཞུས་པའི་བཀའ་ལན་དུ། ངོས་ཀྱིས་ཕྱི་ལོ་ ༡༩༦༩ སྐབས་ནས་ཏཱ་ལའི་བླ་མའི་སྐུ་ཕྲེང་རྒྱུན་མཐུད་དགོས་དང་མི་དགོས་དེ་བོད་མི་མང་ལ་རགས་ལུས་ཡོད་པའི་གཞུང་འབྲེལ་གྱི་གསལ་བསྒྲགས་ཤིག་བྱས་པ་ཡིན། ངོས་ནས་དུས་ཚོད་དེ་གཏན་གཏན་དྲན་གསོས་ཀྱི་མི་འདུག འོན་ཀྱང་དུས་ནས་དུས་སུ་ང་ཚོ་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པ་འདུ་འཛོམས་གནང་སྟེ་ཡང་སྲིད་སྐོར་བཀའ་མོལ་རིམ་པ་གནང་ཡོད་པ་མ་ཟད། བར་སྐབས་འདུ་འཛོམས་བྱུང་བའི་ཚོགས་འདུ་ཞིག་གི་ཐོག་ངོས་རང་ལོ་ ༩༠ ཙམ་ལ་སླེབས་པའི་སྐབས་དེར་ངོས་ཀྱི་ཡང་སྲིད་སྐོར་ནན་ཏན་གྱིས་སྐད་ཆ་བཤད་རྒྱུའི་ཐག་གཅོད་བྱུང་ཡོད་པ་རེད་ཅེས་བཀའ་བསྩལ་གནང་སོང་། མགོན་པོ་༸གང་ཉིད་མཆོག་གིས་༸སྐུའི་ཡང་སྲིད་སྐོར་ལ་བཀའ་འདྲི་ཞུས་པ་དེར་བཀའ་ལན་བརྩལ་བ་དང་། ལྷག་དོན་རྒྱ་ནག་གཞུང་གི་ཐོག་ནས་ངོས་ཀྱི་ཡང་སྲིད་ཀྱི་གནད་དོན་ཐད་ལ་བོད་མི་ལས་དངངས་སྐྲག་མང་བ་ཡོད་པའི་རྣམ་པ་ཞིག་འདུག་ཅེས་བཀའ་བསྩལ་གནང་ཡོད་པ་རེད། ངོས་ནས་སྐབས་རེ་རྩེད་མོ་དང་སྦྲགས་ཏེ་གལ་ཏེ་རྒྱ་ནག་གཞུང་ལ་ངོས་ཀྱི་ཡང་སྲིད་སྐོར་དངངས་སྐྲག་དེ་འདྲ་ཡོད་པ་ཡིན་ན། ཡང་སྲིད་ཀྱི་གནད་དོན་ལ་ཐེ་བྱུས་མ་བྱེད་པའི་སྔོན་ལ་དང་པོ་རྒྱ་ནག་དམར་ཤོག་ཚོགས་པའི་ངོས་ནས་སྐྱེ་བ་སྔ་ཕྱི་ཁས་ལེན་བྱེད་དགོས་པ་མ་ཟད། སྲིད་འཛིན་མའོ་ཀྲུའུ་ཞི་དང་། ཏིང་ཞའོ་ཕིང་བཅས་ཀྱི་ཡང་སྲིད་ངོས་འཛིན་བྱེད་དགོས་པ་རེད། དེ་རྗེས་གཞི་ནས་ངོས་ཀྱི་ཡང་སྲིད་སྐོར་ཐེ་བྱུས་བྱས་པ་ཡིན་ན་བཟང་སྤྱོད་དང་མ་འགལ་བ་ཞིག་ཡོང་གི་རེད། གལ་སྲིད་དེ་འདྲ་མེད་པ་ཡིན་ན་ཐེ་བྱུས་བྱེད་པའི་དགོས་པ་གང་ཡང་མེད་པ་རེད། ལོ་རྒྱུས་ལ་བལྟས་ཚེ་རྒྱ་ནག་གོང་མ་ཁག་གཅིག་ནང་པ་ཡིན་པའི་ཆ་ནས་ཆོས་ཡོན་འབྲེལ་བའི་ཐོག་ནས་པཎ་ཆེན་རིན་པོ་ཆེ་མཆོག་དང་ཏཱ་ལའི་བླ་མའི་ཡང་སྲིད་ལ་རང་བཞིན་གྱི་བློ་འཚབ་ཡོད་པའི་གནས་ཚུལ་བྱུང་ཡོད་ཅེས་བཀའ་བསྩལ་གནང་སོང། མགོན་པོ་༸གང་ཉིད་གིས་སྐབས་དེར་རྒྱ་ནག་གི་མའོ་དུས་རབས་ནས་ད་ལྟ་བར་གྱི་དུས་རབས་དེ་དག་ནང་རྩ་བའི་ཆབ་སྲིད་ཀྱི་ལྟ་གྲུབ་དང་ལམ་ལུགས་དེ་རང་འཇག་གནས་ཡོད་ཀྱང་། དུས་ཚོད་དང་བསྟུན་ཏེ་གནས་སྟངས་ལ་འགྱུར་བ་ཆེན་པོ་ཕྱིན་ཡོད་སྐོར་བཀའ་གནང་པ་དང་སྦྲགས། ལྷག་པར་དུ་ད་ལྟའི་སྲིད་འཛིན་ཞི་ཅིང་ཕིང་ལ་ཆ་མཚོན་པ་ཡིན་ན་རྒྱ་ནག་གི་དཔལ་འབྱོར་གྱི་གནས་སྟངས་ལ་ཡར་རྒྱས་ཆེན་པོ་ཞིག་ཕྱིན་ཡོད་པ་མ་ཟད། དེ་མཚུངས་གནད་དོན་གཞན་གྱི་ཐོག་ལ་ཡང་འགྱུར་བ་ཤུགས་ཆེན་པོ་ཞིག་ཕྱིན་པ་ཡོད་པ་རེད། ཞི་ཅིང་ཕིང་གིས་ལྐོག་ཟ་རུལ་སུངས་ཐོག་འཛིན་པའི་སྲིད་བྱུས་བཅས་ལ་བསྔགས་བརྗོད་མཛད་པ་དང་ཆབས་ཅིག རྒྱ་མི་རིགས་ནི་ལོ་རྒྱུས་དང་རིག་གཞུང་ལྡན་པའི་མི་རིགས་ཤིག་ཡིན་པའི་ཁར། ལས་ཀ་རུ་ངར་པོ་བྱེད་ཐུབ་མཁན་གྱི་མི་རིགས་ཤིག་ཡིན་པ་སོགས་བཀའ་བརྩལ་དང་འབྲེལ་གནས་སྟངས་ཁྱོན་ཡོངས་ནས་བལྟས་ཚེ་མ་འོངས་པར་བོད་ཀྱི་དཀའ་ངལ་སེལ་བར་རེ་བ་ཡོད་པའི་བཟང་པོའི་ཆ་ཞིག་གཟིགས་ཀྱི་ཡོད་པ་བཀའ་གནང་ཡོད། དེ་བཞིན་༸གོང་ས་མཆོག་ལ་རིང་མིན་མགོན་པོ་༸གང་ཉིད་ཨ་རིར་ཆིབས་བསྒྱུར་གནང་སྐབས་ཨ་རིའི་སྲིད་འཛིན་གསར་པ་ Donald Trump མཆོག་དང་མཇལ་འཕྲད་གནང་རྒྱུའི་མཛད་རིམ་ཡོད་མེད་དང་། ༸གོང་ས་མཆོག་ནས་སྲིད་འཛིན་ཊམ་ཐོག་དགོངས་ཚུལ་ཇི་འདྲ་ཡོད་དམ་ཞེས་བཀའ་འདྲི་ཞུས་པར། ༸གོང་ས་མཆོག་གིས་ངོས་རང་ཨ་མི་རི་ཀར་དངོས་གནས་དགའ་མཁན་ཞིག་ཡིན། ཨ་རི་ནི་རང་དབང་ཅན་གྱི་འཛམ་གླིང་སྣེ་ཁྲིད་བྱེད་མཁན་གྱི་རྒྱལ་ཁབ་ཞིག་ཏུ་ངོས་འཛིན་བྱེད་ཀྱི་ཡོད། འོན་ཀྱང་ཨ་རིའི་མི་གང་ཟག་གཅིག་གི་གནད་དོན་སྐོར་ལ་ངོས་ནས་ཞུ་ཚོད་ཐིག་གི་མི་འདུག། ད་ལྟ་འཕྲལ་དུ་དེའི་སྐོར་བཤད་ན་སྔ་དྲག་ཡོད་སྟབས། དེ་ལས་གང་ཡང་མ་གསུང་པར་བཞུགས་ན་ལེགས་པ་མེད་དམ་ཞེས་བཀའ་གནང་ཡོད། རྩ་བའི་ཁ་སང་ལྡི་ལི་གསར་པའི་ Taj Mansingh མགྲོན་ཁང་དུ་གོ་སྒྲིག་ཞུས་པའི་ Indian Express གསར་ཁང་གི་ Express Adda ཞེས་པའི་གླེང་མོལ་གྱི་ལས་རིམ་ཐོག་ལ་༸གོང་ས་མཆོག་དབུ་བཞུགས་གཙོས། རྒྱ་གར་གྱི་གནད་ཡོད་ཆབ་སྲིད་མི་སྣ་དང་། དཔལ་འབྱོར་རིག་པ་བ། ཚོང་འབྲེལ་མི་སྣ། མཁས་དབང་དང་ཕྱི་རྒྱལ་གཞུང་ཚབ་ཁག་ཅིག་གི་མི་སྣ་སོགས་ཁྱོན་མི་གྲངས་ ༣༠༠ བརྒལ་བ་ཞིག་འདུ་འཛོམས་བྱུང་འདུག

བཞུགས་སྒར་དུ་བོད་པའི་སློབ་གྲྭ་ཁག་ཅིག་གིས་ཤེས་ཡོན་འགན་འཛིན་དང་རྒྱུས་སྟོན་པ་རྣམས་ལ་ཤེས་ཡོན་སྲིད་བྱུས་སྐོར་གོ་རྟོགས་སྤེལ་བའི་ཟབ་སྦྱོང་ཞིག་དབུ་འཛུགས་གནང་པའི་ཐོག བཀའ་བློན་ཁྲི་ཟུར་སློབ་དཔོན་ཟམ་གདོང་རེན་པོ་ཆེ་མཆོག་གིས ་ང་ཚོས་སློབ་ཕྲུག་རྣམས་ལ་མི་ཡི་འདུ་ཤེས་འཛིན་དགོས་པ་ལས་ཁོང་རྣམས་ཁྲོམ་རའི་ནང་དུ་འཚོང་བྱེད་ཀྱི་རྒྱུ་ཆ་ཞིག་ཏུ་ལྟ་ན་ནོར་འཁྲུལ་ཡིན་པ་གསུངས་གནང་སོང་། དེ་རིང་ཟླ་ ༥ ཚེས་ ༢༤ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་ཤེས་རིག་དྲུང་ཆེ་ཀརྨ་སེང་གེ་ལགས། ཤེས་རིག་ཤེས་ལྷན་ཚོགས་ཀྱི་འགན་འཛིན་ཚེ་རིང་བསམ་གྲུབ་ལགས མ་སུ་རི་བུ་ཁྱིམ་དྲུང་ཆེ་ཀརྨ་ཆུང་བདག་ལགས་བཅས་དབུ་བཞུགས་ཐོག བོད་ཕྲུག་ཁྱིམ་སྡེ་དང་སཾ་བྷོ་ཊ། དེ་བཞིན་བལ་ཡུལ་གངས་ཅན་བདེ་རྩ་སོགས་ཀྱི་ཤེས་ཡོན་འགན་འཛིན་རྣམ་པ་ལྷན་བཞུགས་གནང་ཡོད་པ་རེད། སློབ་དཔོན་ཟམ་གདོང་རིན་པོ་ཆེ་མཆོག་གིས་ཟབ་སྦྱོང་གི་ཚོགས་ཐུན་དང་པོའི་སྐབས་ཤེས་ཡོན་སྲིད་བྱུས་ཀྱི་སྤྱི་ཡོངས་བྱེད་སྒོ་ལམ་སྟོན་སྐོར་ལ་ལམ་སྟོན་གསུང་བཤད་གནང་པའི་ཁྲོད། གཞི་རྐང་བོད་མི་རིགས་དེ་མི་རིགས་གཞན་པ་ལས་ཟུར་དུ་དབྱེ་བ་ཕྱེས་ཐུབ་ཡག་ཅིག་དང་། མི་རིགས་གནས་བབ་མཚོན་ཐུབ་པ་དགོས་ཀྱི་ཡོད་ན་ཤེས་ཡོན་དང་ལེགས་བྱང་ཐམས་ཅད་ཀྱི་གཞི་རྩར་གྱུར་པའི་སྐད་ཡིག་དེ་ཕྱོགས་ཐམས་ཅད་ནས་སྲུང་སྐྱོབ་བྱེད་དགོས་པ་རེད། དེའང་ལོ་ན་ཆུང་ཤོས་ཀྱི་གནས་སྐབས་ནས་སྲུང་སྐྱོབ་བྱེད་དགོས་རྒྱུ་ཧ་ཅང་གལ་གནད་ཡིན་པ་གསུངས་སོང་། ལྷག་དོན་ཤེས་ཡོན་སྲིད་བྱུས་ནས་སློབ་ཚན་གང་འདྲ་བཞག་མ་བཞག་དང་འཛིན་གྲྭ་ཚོགས་སྟངས་དང་། དེ་བཞིན་རྒྱུགས་སྤྲོད་གཏོང་སྟངས་སོགས་ཀྱི་གནད་དོན་ཡན་ལག་གི་རྣམ་གྲངས་ཞིག་ཡིན་པ་གསུངས་པ་དང་སྦྲགས། གལ་འགངས་ཆེ་ཤོས་དེ་ལྟ་སྟངས་ཡིན་པ་ལམ་སྟོན་གནང་ཡོད། སྐབས་དེར་རིན་པོ་ཆེ་མཆོག་གིས་སློབ་སྦྱོང་གྱི་དམིགས་ཡུལ་ནི་མ་ཤེས་པ་ཤེས་པ་བཟོ་རྒྱུ་ལས་འཚོ་ཐབས་ཆེད་དུ་མིན་པ་དང་། ཤེས་ཡོན་ལ་ལྟ་སྟངས་དེ་ཡང་གནས་ཚུལ་མཁོ་སྤྲོད་བྱ་རྒྱུ་གཙོ་བོ་མིན་པར། སློབ་མ་རང་ངོས་ནས་གནས་ཚུལ་བརྟག་དཔྱད་བྱེད་ནས་ཤེས་ཐབས་བྱ་རྒྱུ་ཡིན་པ་མ་ཟད། ལྷག་པར་དུ་སློབ་ཕྲུག་ལ་ཁྲོམ་རའི་ནང་འཚོང་བྱེད་ཀྱི་རྒྱུ་ཆ་གཅིག་ལ་ལྟ་རྒྱུ་མེད་པའི་ལམ་སྟོན་གནང་སོང་། ད་དུང་རིན་པོ་ཆེ་མཆོག་གིས་དགེ་རྒན་གྱི་ལས་འགན་དང་སློབ་མར་ལྟ་སྟངས་སྐོར་གསུངས་པར་དགེ་སློབ་གཉིས་བར་ལ་བརྩེ་སེམས་ཅན་གྱི་ནང་ཚགས་མ་ཆགས་བར་དུ་ཕྱོགས་གཉིས་བར་མཉམ་རུབ་ཀྱིས་ཤེས་ཡོན་སྦྱོང་བརྡར་ཡག་པོ་ཡོང་ཐབས་མེད་སྐོར་མུ་མཐུད་ལམ་སྟོན་གནང་ཡོད། དེ་ལྟར་ན་སློབ་དཔོན་ཟམ་གདོང་རིན་པོ་ཆེ་མཆོག་གིས་བོད་མིའི་ཤེས་ཡོན་སྲིད་བྱུས་དེ་ལག་བསྟར་ཡོང་བར་གོང་དུ་ཞུས་པའི་ལྟ་སྟངས་དེ་དག་ཡང་དག་པ་དགོས་རྒྱུ་ཤིན་ཏུ་ནས་གལ་ཆེ་ཡིན་པའི་ཐོག སློབ་ཕྲུག་གི་སྤྱི་ཚོགས་དང་དགེ་རྒན་གྱི་སྤྱི་ཚོགས། དེ་བཞིན་ཕ་མ་དང་འཛིན་སྐྱོང་བཅས་བཞིའི་བར་ལ་འབྲེལ་བ་ཉེ་པོ་དང་གཏིང་ཟབ་དགོས་གལ་ཡིན་པ་ལམ་སྟོན་རྒྱ་ཆེ་གནང་ཡོད། རྩ་བའི་དེ་རིང་དང་སང་ཉིན་བཅས་སུ་ཚོགས་རྒྱུའི་ཟབ་སྦྱོང་གི་ལས་རིམ་དེའི་ནང་ཤེས་ཡོན་འགན་འཛིན་དང་རྒྱུས་སྟོན་པ་རྣམས་ལ་ ༢༠༠༤ ལོར་གཏན་འབེབས་གནང་པའི་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ལས་ཤེས་ཡོན་ངོ་བོ་དང་ངོས་འཛིན། ཤེས་ཡོན་སྤྲོད་པའི་དམིགས་ཡུལ། དགེ་རྒན་དང་ཤེས་ཡོན་སྲིད་བྱུས། དགེ་རྒན་དབུས་བཞག་དང་སློབ་ཕྲུག་དབུས་བཞག་སོགས་བརྗོད་གཞི་བརྒྱད་ཙམ་གྱི་ཐོག་ལ་སློབ་ཁྲིད་དང་དྲི་བ་དྲིས་ལན་བཅས་གནང་གི་འདུག

ཉན་པ།: Listen ཕབ་ལེན། Download ༸གོང་ས་མཆོག་རྒྱལ་ས་ལྡི་ལིར་༸ཞབས་སོར་བདེ་བར་འཁོད་འདུག སྲིད་སྐྱོང་མཆོག་གིས་ཨ་རིའི་སྲིད་འཛིན་མཆོག་ནས་༸གོང་ས་མཆོག་དང་མཇལ་འཕྲད་དགོས་པ་གསུངས་འདུག ཁྲི་ཟུར་ཟམ་གདོང་རིན་པོ་ཆེ་མཆོག་གིས་ང་ཚོས་སློབ་ཕྲུག་རྣམས་ལ་ཁྲོམ་རའི་ནང་འཚོང་བྱེད་ཅིག་ཏུ་ལྟ་རྒྱུ་མེད་པ་གསུངས་སོང་། ཨ་རིའི་རྒྱ་ནག་གཞུང་ཚབ་པས་ཆབ་སྲིད་བཙོན་པ་དང་ཐུག་འཕྲད་གནང་དགོས་པའི་འབོད་སྐུལ། བཀའ་སློབ་ཀྱི་ལེ་ཚན། ༸གོང་ས་མཆོག་གིས་ ༢༠༡༤ ལོར་ལ་དྭགས་སུ་རིགས་རུས་དབྱེ་འབྱེད་བྱ་རྒྱུ་མེད་པའི་བཀའ་སློབ། Wednesday 24/05/2017 Dalai Lama arrives in Delhi after completing Bangalore program Sikyong urges Trump to meet the Dalai Lama Samdhong Rinpoche speaks on Tibetan Education Policy in 3 days workshop New U.S. Ambassador to China should meet with civil society: Freedom House FEATURE: Dalai Lama speech on Caste system in Ladakh, 2014

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཡར་རྒྱས་ཚན་པ་དང་། རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གཉིས་ཐུན་མོང་གིས་ཇི་ལྟར་གདན་ཞུ་གསོལ་འདེབས་ཞུས་དོན་བཞིན་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་གྲོང་ཁྱེར་སྦེང་ལོར་ནང་དུ་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་མཛད་པ་དང་འདི་བཞིན་མཛད་འཆར་ཁག་ལེགས་གྲུབ་ཀྱིས་དེ་རིང་ཟླ་ ༥ ཚེས་ ༢༤ ཉིན་སྔ་དྲོ་ཚོུད་ ༧།༠༠ སྟེང་སྦེང་ལོར་གྲོང་ཁྱེར་ནས་མཁའ་ལམ་བརྒྱུད་རྒྱལ་ས་ལྡི་ལིར་ཆིབས་ཞལ་སྒྱུར་གནང་མཛད་ཡོད་པ་རེད། སྐབས་དེར་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཚན་པའི་དྲུང་ཆེ་མཆོག་དང་ལྷོ་སྤྱི་ཆོས་འཕེལ་ཐུབ་བསྟན་བཅས་གནམ་ཐང་དུ་ཕེབས་སྐྱེལ་ལ་ལྷན་བཅར་ཞུས་འདུག གཞི་རྩའི་ཁ་སང་ཚེས་ ༢༣ ཉིན་སྦེང་ལོར་ནང་དུ་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་ཀྱིས་ལམ་སྟོན་བཀའ་སློབ་བརྩལ་ཡོད་པ་དང་། དེ་བཞིན་མངའ་སྡེའི་ཡུལ་སྐོར་བློན་ཆེན་དང་སྐོར་སྲུང་དཔོན་སོགས་གནད་ཡོད་མི་སྣ་ཁག་ཅིག་ལ་མཇལ་འཕྲད་མཛད་ཡོད་པ་རེད། ཤེས་རྟོགས་བྱུང་བར་གཞིགས་ན། དེ་རིང་ཚེས་ ༢༤ ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་བདེ་བར་འཁོད་གནང་ཡོད་པ་དང་། རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་ལྟར། ཉིན་རྒྱབ་ཏུ་མགོན་པོ་༸གང་ཉིད་མཆོག་གི་བཞུགས་གནས་ Taj Mahal གསོལ་མགྲོན་ཁང་དུ་གསར་ཁང་དེའི་ལས་བྱེད་རྣམས་ལ་མཇལ་ཁ་དང་བླང་དོར་གྱི་ལམ་སྟོན་བཀའ་སློབ་བརྩལ་གནང་གི་ཡོད་པ་རེད། སང་ཉིན་ཚེས་ ༢༥ ཉིན་རྒྱལ་ས་ལྡི་ལིར་རྒྱ་གར་གྱི་བློན་ཆེན་ཟུར་པ་ Arun Shouri མཆོག་གིས་ལྗགས་རྩོམ་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་གནང་རྒྱུའི་མཛད་རིམ་ཡོད་པ་རེད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཉེ་ཆར་ཨ་རིའི་སྲིད་འཛིན་ Donald Trump མཆོག་ནས་སྲིད་འཛིན་གྱི་ཐུགས་འགན་བཞེས་ཏེ་ཆེས་ཐོག་མའི་གཞུང་འབྲེལ་འཚམས་གཟིགས་གནང་པའི་ནང་ Saudi Arabia ནང་གི་རྒྱལ་པོ་དང། Israel སྲིད་བློན་ Benjamin Netanyahu མཆོག དེ་བཞིན་ Vatican ནང་ཡི་ཤུ་བླ་ཆེན་ Pop Francis མཆོག་དང་མཇལ་འཕྲད་གནང་པ་དང་སྦྲགས། ཡུལ་དེའི་ནང་གི་ཡི་ཤུ་དང་ཁ་ཆེ། དེ་བཞིན་ཇིའུ་བཅས་འཛམ་གླིང་ནང་གི་ཆོས་ལུགས་ཆེ་ཁག་གསུམ་གྱི་རྗེས་འབྲང་པ་ཚོ་དང་འབྲེལ་མོལ་བསྐྲུན་གནང་པ་ལྟར། སྲིད་འཛིན་མཆོག་ནས་༸གོང་ས་ཏཱ་ལའི་བླ་མ་མཆོག་དང་ཡང་མཇལ་འཕྲད་གནང་དགོས་ཀྱི་རེད་ཅེས་གསུངས་འདུག དེའང་སྲིད་སྐྱོང་མཆོག་གིས་ཨ་མི་རི་ཀའི་ The Hill གསར་ཤོག་ཐོག་སྲིད་འཛིན་ Donald Trump མཆོག་ནས་༸གོང་ས་མཆོག་དང་མཇལ་འཕྲད་གནང་དགོས་ཞེས་པའི་དཔྱད་རྩོམ་ཞིག་སྤེལ་འདུག་པ་དང། དེའི་ནང་གཙོ་བོ་སྲིད་སྐྱོང་མཆོག་གིས་༸གོང་ས་ཏཱ་ལའི་བླ་མ་མཆོག་ནི་འཛམ་གླིང་ཐོག་ཡོངས་སུ་གྲགས་པའི་ནང་པའི་ཆོས་ལུགས་ཀྱི་དབུ་ཁྲིད་གལ་ཆེ་ཞིག་ཡིན་པ་མ་ཟད། འཚེ་མེད་ཞི་བ་དང་བྱམས་བརྩེ། འདྲ་མཉམ། དེ་བཞིན་བརྩེ་བའི་བདག་ཉིད་མཚོན་དོན་ཞིག་ཡིན་སྟབས། སྲིད་འཛིན་ཌོ་ནལྜ་ཊམ་མཆོག་ནས་འདས་པའི་འཚམས་གཟིགས་ཁྲོད་ཆོས་ལུགས་གཞན་གྱི་དབུ་ཁྲིད་དང་དེའི་རྗེས་འབྲང་པ། དེ་བཞིན་རྒྱལ་ཁབ་ཀྱི་འགོ་ཁྲིད་བཅས་ལ་མཇལ་འཕྲད་གནང་པ་ལྟར། ༸གོང་ས་མཆོག་དང་ཡང་མཇལ་འཕྲད་གནང་དགོས་ཀྱི་རེད་ཅེས་གསུངས་འདུག དབུ་ཁྲིད་གཉིས་པོའི་དབར་མཇལ་འཕྲད་གནང་པ་དེའི་བརྒྱུད་ནས་འཛམ་གླིང་ནང་གཞི་རྩ་བའི་འཚེ་མེད་ཞི་བ་དང་ཞི་བདེ་གོང་འཕེལ་ཡོང་རྒྱུར་ཕན་ཐོགས་ཡོང་ངེས་ཡིན་པ་གསུངས་འདུག ལྷག་པར་དུ་ཨ་མི་རི་ཀའི་སྲིད་འཛིན་ George H W Bush མཆོག་གིས་གཙོས་ད་བར་ཨ་རིའི་སྲིད་འཛིན་རིམ་པས་༸གོང་ས་མཆོག་དང་མཇལ་འཕྲད་གནང་པ་དང་འབྲེལ། མཇལ་འཕྲད་རིམ་པ་གནང་པའི་ནང་འཛམ་གླིང་ནང་གི་ཆབ་སྲིད་དང་ཆོས་ཕྱོགས། དེ་བཞིན་གོ་ལའི་སྤྱི་ཚོགས་ཁྱོན་ཡོངས་ཀྱི་དཀའ་ངལ་སེལ་ཐབས་ཐོག་བཀའ་བསྡུར་གནང་ཡོད་པ་མ་ཟད། དེང་གི་དྲག་སྤྱོད་དང་རྙོག་གླེང་ཆེ་བའི་སྤྱི་ཚོགས་ཀྱི་ངལ་བ་དང་འབྲེལ་དབུ་ཁྲིད་རྣམ་གཉིས་དབར་མཇལ་འཕྲད་བརྒྱུད་ནས་དཀའ་ངལ་དེ་དག་གི་ཐོག་ལ་བཀའ་བསྡུར་གནང་རྒྱུའི་གོ་སྐབས་ཤིག་ཡོད་པ་འགྲེལ་བརྗོད་གནང་འདུག ད་དུང་དཔྱད་རྩོམ་དེའི་ནང་བོད་དེ་འཛམ་གླིང་ནང་འགྲོ་བ་མིའི་ཐོབ་ཐང་གི་གནས་སྟངས་ཆེས་སྡུག་ཤོས་གཉིས་པ་ཆགས་ཡོད་པ་དང་། ཕྱི་ལོ་ ༢༠༠༩ ལོར་ནས་ད་བར་བོད་ནང་རང་ལུས་མེར་སྲེག་གནང་མཁན་ཁྱོན་བོད་མི་ ༡༤༩ བྱུང་ཡོད་པ་རེད། རྒྱ་ནག་གཞུང་གིས་བོད་ས་བཙན་བཟུང་བྱས་པ་ནས་བཟུང་ བོད་མིའི་ཆོས་དང་རིག་གཞུང་། སྐད་ཡིག་སོགས་རྩ་མེད་གཏོང་བཞིན་པའི་གནས་སྟངས་སོགས་ལུང་འདྲེན་གྱིས་ཨ་རིའི་སྲིད་འཛིན་ Donald Trump མཆོག་ནས་དེ་ལྟ་བུའི་བོད་ནང་གི་ཛ་དྲག་གནས་སྟངས་ངེས་པར་དུ་མཁྱེན་ཐོག་དཀའ་ངལ་ཇི་ལྟར་སེལ་དགོས་མིན་ལ་དགོངས་པ་བཞེས་དགོས་ཀྱི་རེད་ཅེས་སོགས་གསུངས་ཡོད་པ་རེད། དེ་བཞིན་དེང་སྐབས་ཨ་རི་དང་རྒྱ་ནག་དབར་འབྲེལ་ལམ་གོང་འཕེལ་འགྲོ་བཞིན་པའི་དུས་སྐབས་དང་བསྟུན། སྲིད་འཛིན་ Trump མཆོག་ནས་གོ་སྐབས་ཆེ་བཞེས་ཀྱིས་རྒྱ་ནག་གི་སྲིད་འཛིན་ཞི་ཅིང་ཕིང་དང་ལྷན་དུ་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་གནད་དོན་སྐོར་ལ་གླེང་སློང་གནང་དགོས་པ་དང་། ལྷག་དོན་སྲིད་འཛིན་མཆོག་གིས་སྲིད་འཛིན་གྱི་ལས་འཁུར་བཞེས་པ་ནས་ད་བར་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་མེད་སྟབས། དེ་དོན་གང་མགྱོགས་བསྐོ་གཞག་གནང་སྐྱོང་ཡོང་བའི་རེ་འདུན་ཡང་བཏོན་འདུག རྩ་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ད་ལྟ་ཨ་རིའི་ནང་དུ་གཞུང་འབྲེལ་ཕྱོགས་བསྐྱོད་གནང་བཞིན་ཡོད་པ་དང་། སྲིད་སྐྱོང་མཆོག་གིས་ཁ་སང་ཚེས་ ༢༣ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཨ་རིའི་ Utah མངའ་སྡེའི་གྲོས་ཚོགས་གོང་མའི་འཐུས་མི་སྐུ་ཞབས་ Mike Lee མཆོག་དང་། གྲོས་ཚོགས་གོང་མའི་ཚོགས་གཞོན་སྐུ་ཞབས་ Orrin Hatch མཆོག དེ་བཞིན་བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern མཆོག་དང་དེ་སྔའི་འཛམ་གླིང་མཉམ་འབྲེལ་རྒྱལ་ཚོགས་ནང་ཨ་རིའི་གཞུང་ཚབ་གནང་མྱོང་མཁན་སྐུ་ཞབས་ Mr. Harper མཆོག་བཅས་དང་མཇལ་འཕྲད་གནང་སྟེ་བོད་ནང་གི་ཛ་དྲག་གནས་སྟངས་དང་བོད་རྒྱ་འབྲེལ་མོལ་སྐོར་གླེང་སློང་གནང་འདུག གཞན་ཡང་སྲིད་སྐྱོང་མཆོག་ནས་དབྱིན་ཡུལ་ནང་གི་འབར་རྫས་གཏོར་རྒོལ་དོན་རྐྱེན་འོག་ཤི་རྨས་བྱུང་བ་རྣམས་ལ་ཐུགས་གསོ་གནང་འདུག དེ་ཡང་ཟླ་བ་འདིའི་ཚེས་ ༢༢ ཉིན་དགོང་མོ་དབྱིན་ཡུལ་གྱི་གྲོང་ཁྱེར་ Manchester མང་ཚོགས་སྟོང་ཕྲག་དུ་མ་འདུ་འཛོམས་བྱུང་བའི་རོལ་དབྱངས་མཚན་ཚོགས་ཐོག་གློ་བུར་དུ་འབར་རྫས་གཏོར་རྒོལ་བྱུང་ནས། མི་གྲངས་ ༢༢ ཚེ་སྲོག་ཤོར་བ་དང་། ༥༥ ལྷག་རྨས་སྐྱོན་ཚབས་ཆེན་ཕོག་པའི་ཡིད་སྐྱོའི་གནས་ཚུལ་ཐོན་ཡོད་སྟབས། ཁ་སང་སྲིད་སྐྱོང་མཆོག་གིས་ཡུལ་དེའི་སྲིད་བློན་ལྕམ་སྐུ་ Theresa May མཆོག་གི་མཚན་ཐོག་ལ་ཐུགས་གསོའི་འཕྲིན་ཡིག་གཅིག་ཕུལ་འདུག སྲིད་སྐྱོང་མཆོག་གིས་བློ་ཕམ་ཆེན་པོ་དང་སྦྲགས། དབྱིན་ཡུལ་གྱི་གཞུང་མང་གཉིས་ལ་གདུང་སེམས་མཉམ་བསྐྱེད་ཞུས་འདུག་པ་དང་། བློ་ཡུལ་དུ་ཤོང་དཀའ་བའི་བྱུང་རྐྱེན་དེའི་འོག་ཚེ་སྲོག་ཤོར་བ་རྣམས་ཀྱི་རྗེས་ཤུལ་ནང་མི་སྤུན་མཉེན་རྣམས་ལ་ཐུགས་གསོ་དང་། རྨས་སྐྱོན་ཕོག་པ་རྣམས་ལ་མགྱོགས་མྱུར་དྲག་སྐྱེད་ཡོང་བའི་སྨོན་འདུན་ཞུས་འདུག་པ་མ་ཟད། ལྷག་པར་དུ་མྱ་ངན་བྱེད་བཞིན་པའི་དུས་སྐབས་འདིར་བོད་མིའི་སྒྲིག་འཛུགས་དང་གཞིས་བྱེས་བོད་མི་ཡོངས་རྫོགས་དབྱིན་ཇིའི་གཞུང་མང་གཉིས་ལ་གདུང་སེམས་མཉམ་སྐྱེད་ཞུ་བཞིན་ཡོད། ལས་ངན་འདི་ལྟ་བུ་སྤེལ་མཁན་ལ་ཁྲིམས་ཐོག་ནས་དྲང་བདེན་གྱི་ཐག་གཅོད་ཡོང་རྒྱུར་ཡིད་ཆེས་ཡོད་པ་གསུངས་འདུག  

རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཡར་རྒྱས་ཚན་པ་དང་། རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གཉིས་ཐུན་མོང་གིས་ཇི་ལྟར་གདན་ཞུ་གསོལ་འདེབས་ཞུས་དོན་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཟླ་ ༥ ཚེས་ ༢༣ ཉིན་རྒྱ་གར་གྱི་རྩ་ཁྲིམས་གསར་བཟོ་གནང་མཁན་དང་སྤྱི་ཚོགས་དྲང་བདེན་དང་ཕོ་མོ་འདྲ་མཉམ་བཅས་ཀྱི་ཐོག་ཆེས་མཛད་རྗེས་སྙན་གྲགས་ཆེ་བའི་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་ཀྱིས་སྤྱི་ཚོགས་ཁྲོད་དྲང་བདེན་གྱི་ཁྲིམས་ལུགས་ལག་བསྟར་དགོས་པའི་སྐོར་དང་མི་རིགས་འདྲ་མཉམ་སྐོར་གྱི་བརྗོད་གཞིའི་ཐོག་ལམ་སྟོན་བཀའ་སློབ་བརྩལ་གནང་མཛད་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ Dr.B.R. Ambedkar དམ་པ་དེ་ཉིད་ནི་རྒྱ་གར་གྱི་རྩ་ཁྲིམས་གསར་གཏོད་གནང་པ་དང་། ལྷག་པར་དུ་རྒྱ་གར་ནང་དུ་རིགས་དམན་པའི་མི་རིག ས་ལ་དབྱེ་འབྱེད་ཀྱིས་མཐོང་ཆུང་བྱེད་པའི་ལམ་ལུགས་ལ་བསྒྱུར་བཅོས་གནང་པའི་རླབས་ཆེན་གྱི་བྱ་གཞག་ལ་ཡི་རངས་བསྔགས་བརྗོད་གནང་པ་དང་འབྲེལ། སྤྱིར་རིགས་དམན་པར་དབྱེ་འབྱེད་དང་མཐོང་ཆུང་བྱེད་པ་དེ་ནི་ཆོས་ལུགས་ནང་ནས་བྱུང་བ་ཞིག་མིན་པར་དེ་ནི་མིའི་སྤྱི་ཚོགས་དང་བསམ་བློ་གཏོང་སྟངས་ཐོག་ནས་བྱུང་བ་ཞིག་ཡིན་པས་ད་ལྟའི་དུས་འདིར་ལམ་ལུགས་དེ་དག་རྩ་བ་ནས་མེད་པ་བཟོ་དགོས་གལ་ཡིན་པའི་ལམ་སྟོན་བཀའ་སློབ་མཛད་ཡོད། ༸གོང་ས་མཆོག་ནས་མུ་མཐུད་མི་སུ་འདྲ་ཞིག་ཡིན་རུང་མིའི་ནུས་པ་གཅིག་མཚུངས་ཡོད་སྟབས་རིགས་དམན་པ་ཚོས་རང་ཉིད་ལ་རིགས་དམན་པ་ཡིན་བསམ་པའི་བག་འཁུམས་པའི་བསམ་བློ་དོར་ཏེ་རང་ཉིད་ལ་འགྲོ་བ་མི་སྤྱི་མཚུངས་ཀྱི་ནུས་པ་ཡོད་བསམ་ནས་རང་གིས་རང་ལ་གདེང་ཚོད་དང་སྤོབས་པ་བསྐྱེད་དགོས་གལ་ཡིན་པ་སོགས་ཀྱི་བཀའ་སློབ་བརྩལ་ཡོད་པ་རེད། ༸གོང་ས་མཆོག་གིས་དེ་སྔོན་མགོན་པོ་༸གང་ཉིད་མཆོག་ལྷོ་ཨ་ཕི་རི་ཁའི་ནང་དུ་ཕེབས་སྐབས་ཁྱེད་རང་ཚོོ་རང་དབང་ཐོབ་ཡོད་པས་ད་ནས་སྤོབས་པ་དང་གདེང་ཚོད་ཡོད་པའི་སྒོ་ནས་ལས་ཀ་བྱེད་དགོས་ཞེས་བཀའ་བརྩལ་སྐབས་ཡུལ་དེའི་མི་རིགས་ཀྱིས་ང་ཚོ་མི་ནི་རིགས་ནག་པོ་ཡིན་སྟབས་རང་བཞིན་གྱིས་སྐྱོ་བ་ཡོད་ཅེས་ལན་འདེབས་བྱས་པ་ཞིག་ལུང་འདྲེན་གནང་པ་དང་ཆབས་ཅིག མི་རིགས་དང་ཤ་མདོག་གི་ཁྱད་པར་གང་ཡིན་ཡང་མི་ཚང་མར་ནུས་པ་གཅིག་མཚུངས་ཡོད་སྟབས་རིགས་དམན་པ་ཚོས་སློབ་སྦྱོང་ལ་དོ་སྣང་གནང་ཚེ་རང་ཉིད་ཙམ་མིན་པར་སྤྱི་ཚོགས་ཁྱོན་ལ་ཕན་པའི་ཞབས་འདེགས་བསྒྲུབ་ཐུབ་ངེས་ཡིན་པའི་བཀའ་ནན་བརྩལ་ཡོད་པ་རེད། སྐབས་དེར་མཛད་སྒོའི་སྐུ་མགྲོན་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Siddaramaiah མཆོག་དང་སྤྱི་ཚོགས་བདེ་དོན་བློན་ཆེན་སྐུ་ཞབས་ Sri. H. Anjaneya མཆོག རྒྱ་གར་གྱི་ཕྱོགས་འགལ་ཚོགས་པའི་གྲོས་ཚོགས་ཀྱི་དབུ་ཁྲིད་སྐུ་ཞབས་ Malikarjuna Kharge མཆོག མངའ་སྡེའི་གྲོས་ཚོགས་ཀྱི་ཚོགས་གཙོ་དང་ཕྱོགས་འགལ་ཚོགས་པའི་ཚོགས་གཙོ། བློན་ཆེན་སོགས་གནད་ཡོད་མི་སྣ་མང་དག་ཞིག་ཕེབས་གནང་པ་མ་ཟད། ཁོང་རྣམ་པ་གསུམ་གྱིས་ Dr.B.R. Ambedkar དམ་པ་དེ་ཉིད་སྐུ་འཚོ་བཞུགས་སྐབས་ཀྱི་མཛད་རྗེས་ལ་རྗེས་དྲན་ཆེ་བསྟོད་ཀྱི་གསུང་བཤད་གནང་པ་དང་། དེ་བཞིན་ཀ་ན་ཊ་ཀ་མངའ་སྡེ་གཞུང་ནས་རིགས་དམན་པ་ཚོར་དམིགས་བསལ་གཟིགས་སྐྱོང་གནང་བཞིན་པའི་ཁར། ཤེས་ཡོན་དང་དཔལ་འབྱོར་སོགས་ཀྱི་འཛུགས་སྐྲུན་ལས་འཆར་མང་པོ་ཞིག་ཡོད་པ་སོགས་ཀྱི་གསུང་བཤད་གནང་ཡོད་པ་རེད། ལྷག་དོན་རྒྱ་གར་གྱི་ཕྱོགས་འགལ་ཚོགས་པའི་གྲོས་ཚོགས་ཀྱི་དབུ་ཁྲིད་སྐུ་ཞབས་ Malikarjuna Kharge མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིངའདིའི་ནང་གི་མི་ས་ཡ་མང་པོས་གུས་བརྩི་ཞུ་ཡུལ་གྱི་སྐྱེས་བུ་ཁྱད་དུ་འཕགས་པ་ཞིག་ཡིན་པ་སོགས་ཀྱི་ཆེ་བསྟོད་ཀྱང་རྒྱ་ཆེ་ཞུས་གནང་ཡོད། རྩ་བའི་དེ་རིང་གི་མཛད་སྒོ་དེའི་ཐོག་ལ་སྐུ་མགྲོན་རྣམ་པ་དང་གནད་ཡོད་མི་སྣ། དེ་བཞིན་མང་ཚོགས་སོགས་ཁྱོན་མི་གྲངས་ ༢༠༠༠ ལྷག་ཕེབས་ཡོད་པ་རེད་འདུག ཤེས་རྟོགས་བྱུང་བར་གཞིགས་ན།  སང་ཚེས་ ༢༤ ཉིན་༸གོང་ས་མཆོག་སྦེང་ལོར་ནས་ཆིབས་ཞལ་བསྒྱུར་གནང་སྟེ་རྒྱ་གར་གྱི་རྒྱལ་ས་ལྡི་ལིར་ཕེབས་གནང་གི་ཡོད་པ་དང་། རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་བཞིན་གསར་ཁང་དེའི་ལས་བྱེད་རྣམས་ལ་བླང་དོར་གྱི་ལམ་སྟོན་བཀའ་སློབ་བརྩལ་གནང་རྒྱུ་དང་། དེ་རྗེས་ཕྱི་ཚེས་ ༢༥ ཉིན་རྒྱལ་ས་ལྡི་ལིར་རྒྱ་གར་གྱི་བློན་ཆེན་ཟུར་པ་ Arun Shouri མཆོག་གིས་ལྗགས་རྩོམ་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་གནང་རྒྱུའི་མཛད་རིམ་ཡོད་པ་རེད་འདུག