Monthly Archives: September, 2018

ཕྷ་རན་སི་དང་འཇར་མ་ནི་གཉིས་ནས་རྒྱ་ནག་གཞུང་གིས་ཡུ་གུར་བ་གཙོ་བོར་གྱུར་བའི་ཁ་ཆེ་ས་ཡ་གཅིག་ཡས་མས་ཤིག་ལ་ཆབ་སྲིད་ཀྱི་སློབ་གསོ་སྤྲད་དེ་བཀག་སྐྱིལ་བྱས་པ་དེ་དག་གློད་བཀྲོལ་ཡོང་བར་མཉམ་འབྲེལ་རྒྱལ་ཚོགས་ནས་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་གནང་འདུག རྒྱ་ནག་གཞུང་གི་ནུབ་ཤིང་ཅང་གི་ཁུལ་དུ་ཡུ་གུར་བ་གཙོས་པའི་ཁ་ཆེ་ས་ཡ་གཅིག་ཡས་མས་ཤིག་ལ་ཆབ་སྲིད་ཀྱི་སློབ་གསོ་སྤྲད་དེ་བཀག་སྐྱིལ་བྱས་པའི་གནས་ཚུལ་དེ་ཟླ་བ་སྔོན་མའི་ནང་ཐོག་མར་ཕྱི་གྱར་བྱུང་སྐབས། རྒྱལ་སྤྱིའི་ཚོགས་སྡེ་ཁག་ནས་དེར་སྐྱོན་བརྗོད་ཤུགས་ཆེ་བྱས་ཡོད་པ་དེ་ལྟར་ཡང་། རྒྱ་ནག་གཞུང་གིས་དེར་ཁས་ལེན་མི་བྱེད་པར་ཤིང་ཅང་ནང་ཁ་ཆེ་དྲག་སྤྱོད་པ་དང་ཁ་བྲལ་རིང་ལུགས་པས་འཇིག་སྐུལ་གྱི་གནས་སྟངས་ཆགས་ཀྱི་ཡོད་ལུགས་བརྗོད་དེ་ལས་རིགས་ཀྱི་སློབ་གསོ་སྤྲད་པའི་བརྒྱུད་དྲག་སྤྱོད་པ་བཀག་འགོག་བྱེད་ཀྱི་ཡོད་ལུགས་བརྗོད་ཡོད་པ་རེད། Reuters གསར་སྤེལ་ཁང་གིས་སྤེལ་བའི་གནས་ཚུལ་ལྟར་ན། བདུན་ཕྲག་དེའི་རེས་གཟའ་མིག་དམར་ཚེས་ ༡༨ ཉིན་སུད་སི་ཇི་ཎི་ཝ་གྲོང་ཁྱེར་དུ་ཚོགས་བཞིན་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་ཐོག འཇར་མ་ནི་དང་། ཕྷ་རན་སི་གཞུང་གི་སྐུ་ཚབ་ནས་ཤིན་ཅང་ནང་གི་སློབ་གསོ་ཁང་དེ་དག་སྒོ་རྒྱག་དགོས་པ་དང། རྒྱལ་ཚོགས་ནས་གནད་དོན་དེའི་ཐོག་རྒྱ་ནག་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུག་ལ། དེ་ཉིན་རྒྱལ་ཚོགས་ཀྱི་ལྷན་ཚོགས་དང་བསྟུན་གནད་དོན་དེའི་ཐོག་ལ་ཟུར་ཚོགས་ཞིག་ཀྱང་ཚོགས་ཡོད་པ་རེད། ཟུར་ཚོགས་དེའི་ཐོག་བཅར་བའི་ཡུ་གུར་སྐྱབས་བཅོལ་བའི་མཐུན་ཚོགས་ཀྱི་གཙོ་འཛིན་dolkun Isa ལགས་ཀྱིས། རྒྱ་ནག་གཞུང་གིས་ཤིན་ཅང་ནང་སྤེལ་བཞིན་པའི་ལས་དོན་དེ་དག་ནི་ཡུ་གུར་མི་རིགས་ཀྱི་ངོ་བོ་མཐའ་དག་རྩ་མེད་བཟོ་ཐབས་སླད་ཆེད་དུ་སྤེལ་བ་ཞིག་ཡིན་སྐོར་གསུངས་བ་དང་འབྲེལ། རྒྱ་ནག་གཞུང་གིས་ཡུ་གུར་མི་རིགས་ཀྱི་ཐུན་མོང་མ་ཡིན་པའི་ཁྱད་ཆོས་མཚོན་པར་བྱེད་པའི་སྐད་ཡིག་དང་། རིག་གཞུང་། ཆོས་ལུགས་སོགས་ཡོངས་ལ་དྲག་གནོན་བྱེད་ཀྱི་ཡོད་པ་མ་ཟད། ཡུ་གུར་སྐྱབས་བཅོལ་བའི་ཁྱིམ་ཚང་རེ་རེ་ནས་ཉུང་མཐར་ནང་མི་རེ་རེ་རྒྱ་གཞུང་གིས་དོ་དམ་བཀག་སྐྱིལ་འོག་སྡུག་སྦྱོང་མྱོང་བཞིན་ཡོད་པ་བརྗོད་འདུག ད་དུང་ཁོང་གིས་རྒྱ་ནག་གཞུང་གིས་བཀག་ཉར་བྱས་པའི་ཁ་ཆེའི་མང་ཚོགས་ཁྲོད་ཁོང་རང་ཉིད་ཀྱི་གཅེན་པོ་དང་ཤིང་ཅང་གཙུག་ལག་སློབ་གྲྭ་ཆེན་མོའི་དགེ་རྒན་༥༦ ཡོད་སྐོར་གསུངས་བ་དང་འབྲེལ། མང་ཚོགས་ས་ཡ་གཅིག་ལྷག་མཉམ་དུ་དོ་དམ་བྱས་པའི་བྱ་སྤྱོད་དེ་རྒྱུ་མཚན་ཅི་འདྲ་ཞིག་བརྗོད་ཀྱང་། ལ་དག་ཡས་མེད་པ་དང་། རྒྱལ་ཚོགས་ཀྱི་འཐུས་མི་རྒྱལ་ཁབ་རྣམས་ནས་གནད་དོན་དེའི་ཐད་འཕྲལ་དུ་ཐེ་གཏོགས་བྱ་རྒྱུའི་འགན་དབང་ཡོད་རེད་ཅེས་གསུངས་འདུག གཞན་ཡང་རྒྱ་ནག་གི་གྲངས་ཉུང་མི་རིགས་ཀྱི་སྲིད་བྱུས་ཐོག་འཇར་མ་ནིའི་ཆེད་ལས་པ་སྐུ་ཞབས་Adrian Zenz ལགས་ཀྱིས་གཟུགས་སྐར་གྱི་པར་རིས་དང་བཀག་སྐྱིལ་ཁང་འཛུགས་བསྐྲུན་གྱི་རིན་འབབ། དེ་བཞིན་རྒྱ་རིགས་དགེ་རྒན་བསྐོ་བཞག་གི་གསལ་བསྒྲགས་བཅས་ལ་གཞིགས་ཏེ་རྒྱ་གཞུང་གིས་ཤིང་ཅང་ནང་བཀག་སྐྱིལ་ཁང་༡༠༠༠ ནས་༡༢༠༠ ལྷག་འཛུགས་བསྐྲུན་བྱས་པའི་ནང་ཉུང་མཐར་མི་འབུམ་ཕྲག་ཁ་ཤས་བཀག་བསྐྱིལ་བྱས་ཡོད་སྐོར་དང་འབྲེལ། རྒྱ་ནག་གི་ཆབ་སྲིད་སློབ་གསོ་སྤྲད་རྒྱུའི་ལས་དོན་དེའི་དམིགས་ཡུལ་གཙོ་བོ་ནི་མིའི་བསམ་བློ་དང་རང་མི་རིགས་ཀྱི་ངོ་བོ་བཅོས་བསྒྱུར་བྱ་རྒྱུ་དེ་ཡིན་པ་བརྗོད་འདུག

ཉན་པ།: Listen ཕབ་ལེན། Download ༸གོང་ས་མཆོག་གིས་འཇར་མ་ནིའི་ནང་འཚེ་མེད་ཞི་བའི་བགྲོ་གླེང་ཐོག་དབུ་ཞུགས་མཛད་པ། ༸གོང་ས་མཆོག་ལ་ Gandhidarshan རྒྱལ་སྤྱིའི་གཟེངས་རྟགས་འབུལ་རྒྱུ། ཆོས་རིག་དྲུང་འཕར་ཀརྨ་དགྲ་འདུལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པར་འོས་འདེམས། ཆོས་རིག་བཀའ་བློན་མཆོག་ལ་དགེ་བཤེས་མའི་གནས་བབ་སྐོར་འདྲི་རྩད་དང་ལས་གཞི་རྒྱུན་སྐྱོང་ཡོང་བའི་ཞུ་སྐུལ། རྒྱལ་ཚོགས་ཀྱི་མདུན་དུ་ཚོགས་ཁག་༡༣གྱིས་ཞི་ཅིང་ཕིང་ལ་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་སྤེལ་བ། Wednesday 19/09/2018 Dalai Lama leads conference on non-violence and Peace in Germany Dalai Lama to be conferred with Gandhi Darshan award Tibetan Parliament appoints Karma Damdul as new Justice Commissioner Tibetan MPs question Religion Kalon on ‘Geshema’ Resist Xi: Rally against China as UN begins 73rd session

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་རྒྱལ་ཁབ་འཇར་མ་ནི་ནང་ནོ་སྦེལ་ཞི་བདེའི་དེད་དཔོན་གཉིས་དང་། དེ་བཞིན་འཇར་མ་ནིའི་གྲོས་ཚོགས་ཀྱི་ཚོགས་གཞོན་བཅས་དང་ལྷན་འཚེ་མེད་ཞི་བའི་བགྲོ་གླེང་ཐོག་དབུ་བཞུགས་མཛད་འདུག ༸གོང་ས་མཆོག་ནས་ཁ་ཉིན་ཉི་ཐར་ལན་ཌི་ནང་གི་མཛད་འཆར་ཁག་བསྐྱངས་རྗེས་ཁ་སང་འཇར་མ་ནི་ Darmstadt གྲོང་ཁྱེར་དུ་༸ཞབས་སོར་བདེ་བར་འཁོད་པ་དང། མགོན་པོ་༸གང་ཉིད་མཆོག་ནས་དེ་རིང་འཇར་མ་ནི་བོད་དོན་རྒྱབ་སྐྱོར་ཚོགས་པ་ Tibet Initiative Deutschland (TID) དང་༸དཔལ་དགའ་ལྡན་ཕོ་བྲང་ཐེབས་རྩ་ཁང་གཉིས་ཟུང་འབྲེལ་ཐོག་ Darmstadt ནང་ནོ་སྦེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ Lech Walesa མཆོག་དང་རྒྱལ་སྤྱིའི་རྡུལ་ཕྲན་མཚོན་ཆ་བཀག་སྡོམ་ལས་འགུལ་ཁང་གི་གཙོ་འཛིན་ལྕམ་ Rebecca Johnson ལགས། དེ་བཞིན་འཇར་མ་ནི་གྲོས་ཚོགས་འོག་མའི་ཚོགས་གཞོན་ལྕམ་ Claudia Roth ལགས་བཅས་དང་ལྷན་དུ་འཚེ་མེད་ཞི་བའི་ཐབས་ལམ་སྐོར་བགྲོ་གླེང་གནང་ཡོད་པ་རེད། སྐབས་དེར་༸མགོན་པོ་མཆོག་གིས་རྒྱལ་སྤྱིའི་མང་ཚོགས་ནས་དྲག་པོའི་སྲིད་བྱུས་ལ་ཡིད་ཐང་ཆད་པ་དང།  འཛམ་བུ་གླིང་ནང་དཀའ་རྙོག་ཉུང་དུ་གཏང་རྒྱུའི་ཐབས་ལམ་གཙོ་བོ་དེ་འཚེ་མེད་ཞི་བའི་ཐབས་ལམ་ཡིན་པ་དང། དྲག་པོའི་བྱ་སྤྱོད་ལས་དྲག་པོའི་གྲུབ་འབྲས་མ་གཏོགས་དེའི་མཐའ་རྫོགས་རྒྱུ་མེད་སྐོར་བཀའ་བསྩལ་བ་མ་ཟད་དེ་སྔ་རོམ་རྒྱལ་ཁབ་ནང་ནོ་སྦེལ་ཞི་བདེ་གཟེངས་རྟགས་བཞེས་མཁན་གྱི་མི་སྣ་དེ་དག་གིས་རྒྱལ་སྤྱིའི་ཁྲོད་རྡུལ་ཕྲན་མཚོན་ཆ་མེད་པ་བཟོ་ཐབས་ཐད་ཚོགས་འདུ་ཞིག་ཚོགས་ཡོད་པ་ལྟར། རྡུལ་ཕྲན་མཚོན་ཆ་མེད་པ་བཟོ་སླད་ང་ཚོས་དུས་བཀག་ངེས་ཅན་ཞིག་བཟོ་དགོས་པ་དང། དེ་འབྲེལ་ཐོག་རྒྱལ་སྤྱིའི་ལས་འགུལ་ཞིག་དབུ་འཛུགས་གནང་གནད་ཡིན་སྐོར་སོགས་ལམ་སྟོན་བཀའ་བསྩལ་འདུག ༸གོང་ས་མཆོག་གིས་ད་དུང་ཡོ་རོབ་མཐུན་ཚོགས་ལྟ་བུ་རྒྱ་ནག་དང་རྒྱ་གར། དེ་བཞིན་ཉི་ཧོང་བཅས་མཉམ་འཛོམས་ཀྱིས་ཨེ་ཤ་ཡ་མཐུན་ཚོགས་ཤིག་ཆེད་བསྐྲུན་གནང་དགོས་པ་དང།  སྒོས་སུ་འཛམ་བུ་གླིང་སྤྱིའི་རྩོད་རྙོག་ཉུང་དུ་གཏང་བར་འཛམ་གླིང་གི་མཐུན་ཚོགས་ཤིག་ཆེད་འཛུགས་དགོས་སྐོར་ཡང་བཀའ་བསྩལ་འདུག ༸གོང་ས་མཆོག་གིས་རྒྱ་གར་གྱི་གནའ་བོའི་རིག་གནས་བསྐྱར་གསོ་དང་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་ལའང་བཀའ་སློབ་བསྩལ་བ་མ་ཟད། བཀའ་འདྲི་དགོངས་སྐོར་ཞུ་རྒྱུའི་ལས་རིམ་ཁྲོད་བོད་མི་ཚོས་དུས་དང་རྣམ་པ་ཀུན་ཏུ་རྒྱ་གཞུང་དང་གྲོས་མོལ་གནང་རྒྱུ་གྲ་སྒྲིག་ཡོད་སྐོར་བཀའ་ལན་བསྩལ་འདུག དེ་རིང་ Darmstadt གྲོང་ཁྱེར་དུ་ཚོགས་པའི་བགྲོ་གྲེང་ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་ནས་ཀྱང་ངོ་སྤྲོད་ཀྱི་གླེང་མོལ་ནང་བོད་ནང་གི་གནས་སྟངས་ངོ་སྤྲོད་དང་འབྲེལ། བོད་མི་ཚོས་རྣམ་པ་འདྲ་མིན་ཐོག་ནས་འཚེ་མེད་ཞི་བའི་འཐབ་རྩོད་གནང་བའི་བརྒྱུད་རྒྱ་གཞུང་གི་སྲིད་བྱུས་ལ་གདོང་ལེན་དང།  ལྷག་པར་དུ་རྒྱ་ནག་གི་ནོར་འཁྲུལ་ཅན་གྱི་སྲིད་བྱུས་འོག་བོད་མི་རང་ཉིད་ཀྱི་ངོ་བོ་དང་སྐད་ཡིག རིག་གཞུང་སོགས་བློ་སྤོབས་ཆེན་པོས་བདག་ཉར་གནང་བཞིན་པའི་སྐབས་འདིར་འཇར་མ་ནི་མི་མང་ནས་བོད་དོན་ཐོག་རྒྱབ་སྐྱོར་གནང་དགོས་གལ་ཆེ་ཡིན་པའི་རེ་སྐུལ་བཅས་ཞུས་འདུག

དེ་རིང་ཟླ་ ༩ ཚེས་ ༡༩ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ནང་ལ་ལོ་ངོ་བཞི་བཅུ་ལྷག་ཕྱག་ལས་གནང་མྱོང་ཡོད་པ་ད་ལྟའི་ཆོས་རིག་དྲུང་འཕར་ཀརྨ་དགྲ་འདུལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་མང་མོས་ཐོག་འོས་འདེམས་གནང་སོང་། བཙན་བྱོལ་བོད་མིའི་བཅའ་ཁྲིམས་ལེའུ་ ༦ དོན་ཚན་ ༦༣ ནང་གསེས་དང་པོའི་དགོངས་དོན་ལྟར། ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་སྤྱི་འཐུས་ལྷན་ཁང་གི་ཚོགས་གཙོ་སྦྲེལ་པོ་མཆོག དེ་བཞིན་སྲིད་སྐྱོང་མཆོག་བཅས་ནས་ཁྲིམས་ཞིབ་པ་ཆེ་བ་ཟུར་པ་བྱ་དུར་བསོད་ནམས་བཟང་པོ་ལགས་དང་། བཀའ་ཟུར་ཚེ་རིང་ཕུན་ཚོགས་མཆོག དབུས་འོས་བསྡུ་སྤྱི་ཁྱབ་འགན་འཛིན་ཟུར་པ་འཇམ་དཔལ་ཆོས་བཟང་ལགས་བཅས་ལས་གྲུབ་པའི་འོས་མི་འདེམས་སྒྲུག་ཚོགས་ཆུང་ཞིག་ཆེད་འཛུགས་གནང་དོན་ལྟར། དེ་རིང་གྲོས་ཚོགས་སུ་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་དང་ཆོས་རིག་དྲུང་འཕར་ཀརྨ་དགྲ་འདུལ་ལགས་རྣམ་གཉིས་ཁྲིམས་ཞིབ་པ་གཞན་གཅིག་གི་འོས་མིག་ཏུ་མཚན་འདོན་གནང་ཡོད་པ་རེད། དེ་རིང་གྲོས་ཚོགས་སུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་གི་ཆེད་དུ་ངོ་ཡོད་སྤྱི་འཐུས་ ༤༣ རྣམས་ཀྱིས་འོས་ཤོག་འཕེན་པའི་ཁྲོད་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་སུ་འོས་གྲངས་ ༢༡ དང་ཆོས་རིག་དྲུང་འཕར་ཀརྨ་དགྲ་འདུལ་ལགས་སུ་འོས་གྲངས་ ༢༡ དེ་བཞིན་རྩིས་མེད་སོང་བའི་གྲངས་ ༡ བཅས་བྱུང་སྟབས་ངོ་ཡོད་སྤྱི་འཐུས་ལས་དགོས་ངེས་འོས་གྲངས་མ་ཚང་བར་བརྟེན་ཚོགས་གཙོ་མཆོག་གིས་དེ་འབྲེལ་ལས་རིམ་རེ་ཞིག་འཕར་འགྱངས་དང་བསྐྱར་དུ་འོས་འཕང་རྒྱུའི་གསལ་བསྒྲགས་བསྐྱངས་ཡོད་པ་རེད། གྲོས་ཚོགས་སུ་སླར་ཡང་འོས་འཕངས་པ་ལས་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་སུ་འོས་གྲངས་ ༡༩ དང་ཆོས་རིག་དྲུང་འཕར་ཀརྨ་དགྲ་འདུལ་ལགས་སུ་འོས་གྲངས་ ༢༡ དེ་བཞིན་བར་བཞུགས་གྲངས་ ༣ བཅས་བྱུང་སྟབས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ངོ་ཡོད་སྤྱི་འཐུས་ལས་དགོས་ངེས་འོས་གྲངས་ཚང་པས་ཆོས་རིག་དྲུང་འཕར་ཀརྨ་དགྲ་འདུལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་འོས་འདེམས་བྱུང་བའི་གསལ་བསྒྲགས་དང་སྦྲགས་འཚམས་འདྲི་གནང་ཡོད། ཚོགས་གཙོ་མཆོག་ནས་གསལ་བསྒྲགས་གནང་གྲུབ་མཚམས་སུ་བདམས་ཐོན་ཁྲིམས་ཞིབ་པ་ཀརྨ་དགྲ་འདུལ་ལགས་ཀྱི་གསར་འགོད་པའི་བཅར་འདྲི་དང་ལེན་དང་སྦྲགས། ཁོང་ཁྲིམས་ཞིབ་པར་འདེམས་ཐོན་བྱུང་བ་འདི་ནི་འདས་པའི་ལོ་ངོ་བཞི་བཅུ་ལྷག་གི་རིང་བོད་པའི་སྤྱི་ཚོགས་ཁྲོད་ཕྱག་ལས་གནང་སྐབས་གཤིབ་འདྲིས་བྱུང་བའི་ལས་བྱེད་རྣམ་པའི་གྲུབ་འབྲས་ཞིག་ཏུ་ངོས་འཛིན་གནང་གི་ཡོད་ཅེས་གསུངས་སོང་། གཞི་རྩའི་བདམས་ཐོན་ཁྲིམས་ཞིབ་པ་ཀརྨ་དགྲ་འདུལ་ལགས་ནི་ ༡༩༥༨ ཟླ་ ༧ ཚེས་ ༡ ཉིན་བོད་ཀོང་པོར་སྐྱེས་ཤིང་བཙན་བྱོལ་དུ་འབྱོར་རྗེས་སློབ་སྦྱོང་ཁག་འཐུས་ཚང་གནང་རྗེས། ཤེས་རིག་དང་བདེ་སྲུང་ལས་ཁུངས་ཀྱི་བཀའ་དགོངས་བཞིན་དང་སློབ་ཏུ་ཆེད་བསྐྱོད་ཀྱིས་ལོ་ཤས་ཞབས་ཞུ་དང་། དེ་ནས་ཕྱི་ལོ་ ༡༩༧༦༌༧༧ བར་ལྡི་ལིར་རང་གཞུང་དཔལ་ལྡན་བཀའ་ཤག་གི་ཐད་ཀར་འཛིན་སྐྱོང་འོག་ཆབ་སྲིད་ལ་མཁོ་གནད་ཆེ་བའི་ལས་རིགས་སློབ་སྦྱོང་གནང་སྟེ་རིམ་པས་སྦེལ་ཀོབ་བདེ་སྐྱིད་སླར་གསོའི་མཉམ་འབྲེལ་ནང་ཚོང་ལས་འགན་འཛིན་དང་དྲུང་ཆེ། ཀོ་ལི་གྷལ་དོན་ལྡན་གླིང་གཞིས་ལས་ཁང་གི་ལས་དྲུང་སོགས་གནང་ཡོད་པ་མ་ཟད་ཕྱི་ལོ་ ༢༠༠༡ ལོར་གནས་འཕར་གྱི་སྦེལ་ཀོབ་བདེ་སླར་དང་། མན་སྤར་ཕན་བདེ་གླིང་གཞིས་ཆགས། དེ་བཞིན་འབྲས་ལྗོངས་སྒང་ཏོག་ས་གནས་བཅས་ཀྱི་གཞིས་འགོ་དང་ཕྱི་ལོ་ ༢༠༡༦ ལོར་ལྷོ་གཞིས་ཁག་གི་ལྷོ་སྤྱི་བཅས་གནང་མྱོང་ཡོད་པ་དང་། ཕྱི་ལོ་ ༢༠༡༧ ལོ་མཇུག་ཏུ་ལྷོ་སྤྱི་ནས་དྷ་ས་ཆོས་རིག་ལས་ཁུངས་སུ་གནས་སྤོས་ཀྱིས་དྲུང་འཕར་ལས་འགན་ཐོག་དཔལ་༸རྒྱལ་བ་ཀརྨ་པ་རིན་པོ་ཆེའི་སྣེ་ཤན་ཞབས་ཞུ་ཞུ་མུས་ཡིན་པ་རེད།

ཁ་སང་དང་དེ་རིང་ཉིན་རྒྱབ་བར་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ལས་བསྡོམས་སྐོར་བགྲོ་གླེང་གནང་སྐབས། དགེ་བཤེས་མའི་བསླབ་མཐར་དང་པོ་སོན་མཁན་བཙུན་མ་ཉི་ཤུའི་ཁྲོད་ནས་ཇི་ཙམ་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་དུ་བསྐོ་གཞག་གནང་མིན་སྐོར་ལས་འཕྲོས་ཏེ་སྤྱི་འཐུས་ཁག་ཅིག་ནས་བཀའ་བློན་མཆོག་ལ་དགེ་བཤེས་མའི་གནས་བབ་སྤྱི་ཡོངས་སྐོར་འདྲི་རྩད་གནང་སོང་། ཁ་སང་ཉིན་རྒྱབ་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་གཏན་འབེབས་གནང་གྲུབ་རྗེས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཆོས་རིག་ལས་ཁུངས་ཀྱི་ཕྱི་ལོ་ ༢༠༡༧ ཟླ་ ༤ ཚེས་ ༡ ནས་འདི་ལོ་ཕྱི་ཟླ་ ༣ ཚེས་ ༣༡ བར་༸རྒྱལ་བའི་༸སྐུ་ཕྱཱ་དང་བསྟན་སྲིད་ཞབས་རིམ་སོགས་ཆོས་ཕྱོགས་ཀྱི་ལས་དོན་དང་གྲྭ་བཙུན་སྔགས་འཆང་གསུམ་ལ་མཐུན་རྐྱེན་སྦྱོར་སྤྲོད་སྐོར། སློབ་ཁག་གི་དགེ་རྒན་ཚོའི་གསོལ་ཕོགས་དང་བདེ་དོན། དེ་བཞིན་གཞུང་ཆེན་རིགས་གཅིག་རྐང་འཛིན་དང་དགེ་བཤེས་མའི་ལས་རིམ། སྤྱི་ཚོགས་ནང་ཆོས་རིག་ངོ་སྤྲོད་དང་ཟབ་སྦྱོང་གནང་ལུགས་བཅས་ཀྱི་ཐོག་ནས་ལོ་འཁོར་ལས་བསྡོམས་འགོད་འབུལ་གནང་ཡོད་པ་རེད། དེ་རིང་ཆོས་རིག་ལས་ཁུངས་ཀྱི་ལས་བསྡོམས་ཐོག་གྲོས་ཚོགས་འཐུས་མི་རྣམས་ནས་མུ་མཐུད་བགྲོ་གླེང་དང་དྲི་བ་དྲིས་ལན་བཅས་གནང་སྐབས་སྤྱི་འཐུས་ཁག་ཅིག་གིས་དགེ་བཤེས་མའི་ལས་རིམ་དེའི་ནང་ཆ་ཤས་བླངས་མཁན་བཙུན་མའི་ཞལ་གྲངས་དེ་ལོ་རེ་བཞིན་ཇེ་ཉུང་དུ་འགྲོ་བཞིན་པའི་གནས་སྟངས་ཐད་སེམས་འཚབ་ཀྱིས་ཆོས་རིག་ལས་ཁུངས་ནས་གནད་དོན་དེའི་ཐོག་གང་གནང་ཡོད་མེད་དང་ཐེངས་དང་པོའི་དགེ་བཤེས་མ་ཉི་ཤུའི་ཁྲོད་ནས་ཇི་ཙམ་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་དུ་བསྐོ་གཞག་གནང་མིན་སྐོར་ལས་འཕྲོས་ཏེ་སྤྱི་འཐུས་ཁག་ཅིག་ནས་བཀའ་བློན་མཆོག་ལ་དགེ་བཤེས་མའི་གནས་བབ་སྤྱི་ཡོངས་སྐོར་འདྲི་རྩད་གནང་སོང་། དེ་བཞིན་སྤྱི་འཐུས་གཅིག་གིས་བགྲོ་གླེང་དེའི་ཐོག་ཆ་ཤས་བཞེས་པར་དེ་སྔ་ཆོས་རིག་ལས་ཁུངས་ཀྱིས་ཕྱི་ལོ་ ༢༠༡༣ ལོར་གཞུང་ཆེན་རིགས་གཅིག་རྐང་འཛིན་གྱི་སློབ་ཡོན་ལས་རིམ་ཞིག་གསར་གཏོད་ལག་བསྟར་གྱིས་ལོ་རེ་བཞིན་སློབ་གཉེར་བ་ཁག་གི་གྲངས་ཚད་ངེས་ཅན་ཞིག་བསྡུ་རུབ་གནང་རྒྱུ་ཡིན་ཞེས་གསུངས་ཡོད་ཀྱང་། སྐབས་དང་པོ་ལས་གཉིས་པའི་སློབ་གཉེར་བའི་གྲངས་འབོར་དེ་ཉུང་དུ་ཕྱིན་ཡོད་པ་དང་དེ་རྗེས་ལོ་ཁ་ཤས་རིང་དེའི་སྐོར་གནས་ཚུལ་གང་ཡང་གོ་ཐོས་མེད་པར་གྱུར་དགོས་དོན་སྐོར་བཀའ་འདྲི་ཞུས་པར་བཀའ་བློན་མཆོག་གིས་ལས་འཆར་དེ་ནི་གཙོ་བོ་༸གོང་ས་མཆོག་གི་བཀའ་སློབ་ཕེབས་དགོངས་ལྟར་རིན་ཐང་ཆེ་བར་ངོས་འཛིན་ཞུས་པའི་ཐོག་སྐབས་དེའི་ཆོས་རིག་ལས་ཁུངས་ནས་ལས་གཞི་དེ་དབུ་འཛུགས་གནང་བ་དང་ཕྱིས་སུ་འགྲོ་གྲོན་གྱི་ཆ་ནས་དཀའ་ངལ་གང་ཙམ་འཕྲད་རྐྱེན་ལས་གཞི་དེ་གནས་སྐབས་ཚོད་ལྟའི་ཚུལ་དུ་ཐེངས་གཉིས་གོ་སྒྲིག་ཞུས་ཡོད་ཀྱང་ཐོག་མའི་ཞལ་གྲངས་ལས་ཉུང་དུ་ཕྱིན་ཡོད་པ་དེ་ནི་གཙོ་བོ་གཞུང་ཆེན་རིགས་གཅིག་རྐང་འཛིན་གྱི་སློབ་གཉེར་གནང་མཁན་རྣམས་རང་ཉིད་ཁུངས་གང་ནས་ཡིན་པ་དེའི་ལས་གནས་ཁག་ཏུ་བསྐོ་གཞག་བྱུང་རྐྱེན་ལས་རིམ་དེ་ནས་ཕྱིར་ཐོན་གནང་གི་ཡོད་པ་སོགས་གསལ་བཤད་གནང་སོང་། སྤྱི་འཐུས་གཅིག་གིས་ད་ཆ་༸གོང་ས་༸སྐྱབས་མགོན་ཆེན་པོ་མཆོག་གི་དགུང་ལོའི་བབ་ཀྱི་ཆ་ནས་ངེས་པར་དུ་༸གང་ཉིད་མཆོག་གི་མཛད་འཆར་ཁག་ཉུང་འཕྲི་དགོས་པའི་ཚོར་ཤུགས་ཆེན་པོས་གསུངས་སོང་བར་བཀའ་བློན་མཆོག་གིས་བཀའ་ལན་གནང་ཡོད། དེ་རིང་ཆོས་རིག་གི་ལས་བསྡོམས་ཐོག་༸དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་གནད་དོན་སྐོར་ལའང་དྲི་བ་ཞིག་ཕེབས་ཡོད་པ་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་ལན་འདེབས་གསལ་བཤད་གནང་སོང་བའི་ནང་འཛིན་སྐྱོང་བཀའ་ཤག་ནས་ད་བར་རིན་པོ་ཆེ་མཆོག་གི་༸སྐུའི་ཕྱྭའི་གནད་དོན་ཐད་ཐུགས་འཁུར་ཆེ་བཞེས་ཀྱིས་མཐུན་འགྱུར་གང་ཐུབ་ཞུས་བཞིན་ཡོད་པ་དང་ལྷག་དོན་རྒྱ་གར་གཞུང་ནས་རིན་པོ་ཆེ་མཆོག་རྒྱ་གར་ལ་ཕྱིར་ཕེབས་གནང་རྒྱུར་བཀག་སྡོམ་རྩ་བ་ནས་གནང་མེད་པ་མ་ཟད། ཕྱི་ལོ་ ༢༠༡༡ ནས་ད་བར་རིན་པོ་ཆེའི་གནས་སྟངས་ལ་ཡར་རྒྱས་གང་ཙམ་ཕྱིན་ཡོད་སྐོར་སོགས་གསལ་བཤད་གནང་སྟེ་རིན་པོ་ཆེ་མཆོག་རིང་མིན་ཕྱི་ཟླ་ ༡༡ ནང་བཞུགས་སྒར་དུ་བླ་ཆེན་ཁག་གི་ཚོགས་འདུ་ཐོག་ཆིབས་བསྒྱུར་བསྐྱང་རྒྱུའི་ཐུགས་རེ་ཡོད་ཅེས་བཀའ་གནང་བ་བཞིན་དེ་ལྟར་ངོས་འཛིན་གནང་བཞིན་ཡོད་པ་གསུངས་སོང་། གཞི་རྩའི་དེ་རིང་ཆོས་རིག་ལས་ཁུངས་ཀྱི་ལས་བསྡོམས་དང་འབྲེལ་བའི་བགྲོ་གླེང་དེའི་ཁྲོད་སྤྱི་འཐུས་འགའ་ཞིག་གིས་ཆོས་རིག་ལས་ཁུངས་ཀྱི་ནང་ཆོས་ངོ་སྤྲོད་ལས་དོན་དང་འབྲེལ། བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་གང་འདྲ་འགྲོ་མིན་དང་། དེ་བཞིན་དཔེ་ཁྲིད་དང་སྐད་ཡིག་དགེ་རྒན་རྣམས་ཀྱི་གསོལ་ཕོགས་སྤར་ཕྱོགས། དེ་བཞིན་དགེ་བཤེས་ལས་རིམ་དང་མཉམ་དུ་ཆོས་བརྒྱུད་གཞན་གྱི་མཁན་པོ་མ་དང་སློབ་དཔོན་མ་རྣམས་ལ་ཐོབ་ཐང་གཅིག་མཚུངས་གནང་རོགས་ཞེས་གསུང་མཁན་ཡང་བྱུང་སོང་།

ཁ་སང་ཟླ་ ༩ ཚེས་ ༡༨ ཉིན་རྒྱ་གར་གྱི་གསར་ཤོག The Hindu ཐོག་གནས་ཚུལ་སྤེལ་བར་གཞིགས་ཚེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ the Gandhi Global Foundation འམ་གྷན་དྷཱི་གོ་ལའི་ཐེབས་རྩ་ཁང་གི་ངོས་ནས་ Gandhidarsan ཞེས་པའི་རྒྱལ་སྤྱིའི་གཟེངས་རྟགས་ཤིག་འབུལ་ལམ་ཞུ་གཏན་འཁེལ་འདུག དེའང་ཐེབས་རྩ་ཁང་གི་ཚོགས་གཙོ་ S. Vijayan ལགས་ཀྱིས་ཁ་སང་རྒྱགར་ལྷོ་ཕྱོགས་ཀེ་ར་ལ་མངའ་སྡེའི Thiruvananthapuram གྲོང་ཁྱེར་དུ་ཚོགས་པའི་གསར་འགོད་ལྷན་ཚོགས་ཐོག་ཕྱི་ལོ་ ༢༠༡༨ ལོའི་ Gandhidarsan གཟེངས་རྟགས་ཐོབ་མཁན་རྣམ་པའི་མཚན་ཡོངས་གྲགས་ཀྱི་གསལ་བསྒྲགས་གནང་བ་དང་འབྲེལ། གཟེངས་རྟགས་དེ་དང་མཉམ་དུ་བྱ་དགའ་ཧིན་སྒོར་འབུམ་གསུམ་དང་། རྒྱ་གར་གྱི་མེས་པོ་དམ་པ་གྷན་དྷཱིའི་རྡོ་རྐོས་སྐུ་བརྙན་ཞིག་ཀྱང་འབུལ་གྱི་ཡོད་སྐོར་གསུངས་འདུག རྩ་བའི་གྷན་དྷཱི་གོ་ལའི་ཐེབས་རྩ་ཁང་གི་ངོས་ནས་ཟེངས་རྟགས་དེ་ལོ་ལྟར་ཆབ་སྲིད་ཀྱི་ལས་དོན་ལ་མཁས་མྱོང་ཆེ་བའི་མི་སྣ་ལེགས་ཤོས་དང་། གཞན་ཡང་ཆོས་ལུགས་དང་ཚོང་འབྲེལ། སྤྱི་ཚོགས་ཞབས་ཞུ། དེ་བཞིན་འགྲོ་བ་མིའི་བདེ་དོན་སོགས་ཀྱི་སྡེ་ཚན་ཁག་གི་ཐོག་སྤྱི་སྨན་ཞབས་འདེབས་གནང་མཁན་རྣམས་ལ་ཕུལ་གནང་གི་ཡོད་པ་རེད། དེ་དག་ལས་ཆོས་ལུགས་ཀྱི་ལས་དོན་ཐད་ཕུལ་བྱུང་གཟེངས་རྟགས་དེ་རྒྱ་གར་གྱི་ཧིཾདཱུའི་ཆོས་དཔོན་སྙན་གྲགས་ཅན་ Sri Sri Ravi Shankar མཆོག་དང་། གྲོས་ཚོགས་ཀྱི་ལས་དོན་ལ་མཁས་མྱོང་ཆེ་བའི་མི་སྣ་ལེགས་ཤོས་རྒྱ་གར་གྱི་དཔལ་འབྱོར་བློན་ཆེན་སྐུ་ཞབས་ Arun Jaitley  མཆོག་དང་། མངའ་སྡེའི་བློན་ཆེན་ལེགས་ཤོས་རྒྱ་གར་ལྷོ་ཕྱོགས་ཀེ་ར་ལའི་མངའ་སྡེའི་བློན་ཆེན་སྐུ་ཞབས་ Pinarayi Vijayan མཆོག དེ་བཞིན་འགྲོ་བ་མིའི་བདེ་དོན་ཐོག་ཕྱག་ལས་གནང་མཁན་ལེགས་ཤོས་ཀྱི་གཟེངས་རྟགས་དེ་རྒྱ་གར་ལྷོ་ཕྱོགས་ཀེ་ར་ལའི་སྔོ་སྨན་མཁས་པ་ལྕམ་སྐུ་ Healer Lakshmikutty མཆོག་བཅས་ལ་ཕུལ་རྒྱུ་ཐུགས་གཏན་འཁེལ་ཡོད་པ་རེད་འདུག གཞི་རྩའི་ Gandhidarsan གཟེངས་རྟགས་འབུལ་བཞེས་ཀྱི་མཛད་སྒོ་དེ་རྒྱ་གར་གྱི་ས་གནས་འདྲ་མིན་ཁག་གསུམ་ནང་འཚོགས་གཏན་འཁེལ་ཡོད་པ་དང། དེའང་ཀེ་ར་ལ་མངའ་སྡེའི་ Thiruvananthapuram གྲོང་ཁྱེར་ནང་ལོ་རྗེས་མའི་ཕྱི་ཟླ་ ༡ ཚེས་ ༣༠ དང། ཀ་ན་ཊ་ཀ་མངའ་སྡེའི་སྦེང་ལོར་གྲོང་ཁྱེར་ནང་ཕྱི་ཟླ་ ༢ ཚེས་ ༢༧ དེ་བཞིན་རྒྱལ་ས་ལྡི་ལིའི་ནང་ཕྱི་ཟླ་ ༣ ཚེས་ ༤ བཅས་ས་གནས་སོ་སོར་ལ་འཚོགས་རྒྱུ་རེད་འདུག

ཁ་སང་ཟླ་ ༩ ཚེས་ ༡༨ ཉིན་ཨ་རི་ནིའུ་ཡོག་གྲོང་ཁྱེར་དུ་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་ཐེངས་ ༧༣ པ་འགོ་འཛུགས་དང་འབྲེལ། ནིའུ་ཡོག་ནང་རྟེན་གཞི་བྱས་པའི་ཚོགས་པ་ཁག་ ༡༣ ཟུང་འབྲེལ་ཐོག་ཉིན་དགུང་ཚོུད་ ༢ ནས་ ༦ བར་རྣམ་པ་འདྲ་མིན་གྱི་ཐོག་ནས་རྒྱལ་ཚོགས་ཀྱི་མདུན་དུ་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་ཞིག་སྤེལ་ཡོད་པ་དང་། དེའི་ཐོག་བོད་མི་དང་ཡུ་གུར་བ། སོག་པོ། ཐེ་ཝན། ཧོང་ཀོང་། རྒྱ་རིགས་མང་གཙོ་དོན་གཉེར་བ་བཅས་མི་རིགས་འདྲ་མིན་མཉམ་ཞུགས་བྱས་འདུག ནིའུ་ཡོག་ས་གནས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ། ས་གནས་མདོ་ཁམས་ཆུ་བཞི་སྒང་དྲུག ཨར་བོད་མཇའ་འབྲེལ་ཚོགས་པ་སོགས་ཀྱིས་གོ་སྒྲིག་འོག་མི་རིགས་འདྲ་མིན་གྱི་ལས་འགུལ་བ་རྣམས་འདུ་འཛོམས་ཀྱིས་ཕྱག་ལ་རང་ཉིད་རྒྱལ་ཁབ་ཀྱི་རྒྱལ་དར་བསྣམས་པ་དང་། རྒྱ་གཞུང་གིས་བོད་གཙོ་གྱུར་རྒྱལ་ཁབ་ཁག་ལ་བཙན་འཛུལ་བྱས་པ་མ་ཟད་ཞི་ཅིང་ཕིང་གིས་གཅིག་སྡུས་རིང་ལུགས་དང་སྲིད་དབང་སྒེར་འཛིན་ཐོག་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པར་སྐད་འབོད་གནང་ནས་དགོས་འདུན་ཁག་ཅིག་བཏོན་འདུག དགོས་འདུན་དེའི་ནང་བོད་དང་སོག་པོ། ཐེ་ཝན། ཤིན་ཅང་སོགས་ལ་རྒྱལ་ཁབ་ཀྱི་བདག་དབང་ངམ་རང་བཙན་སྤྲོད་དགོས་པ་དང་། རྒྱ་ནག་མི་དམངས་ལ་འགྲོ་བ་མིའི་ཐོབ་ཐང་དང་རང་དབང་སྤྲོད་དགོས་པ། དེ་བཞིན་སྲིད་འཛིན་ཞི་ཅིང་ཕིང་གི་མི་ཚེ་ཧྲིལ་པོ་སྲིད་དབང་སྒེར་གཅོད་བྱ་རྒྱུར་མཐའ་གཅིག་ཏུ་ངོ་རྒོལ་ཡོད་པ་ཆེད་བཀོད་གནང་འདུག

ཉན་པ།: Listen ཕབ་ལེན། Download ནང་པ་སངས་རྒྱས་པའི་ཆོས་ཉམས་ལེན་གནང་སྐབས་དབང་རྣོན་ཆོས་ཀྱི་རྗེས་འབྲངས་ཞིག་བྱ་དགོས། ༸གོང་མཆོག་གིས་ནེ་ཐར་ལན་ཊི་གྲོས་ཚོགས་འཐུས་མི་ཁག་ཅིག་དང་མཇལ་མོལ་མཛད་པ། སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ དབུ་འཛུགས། རྒྱ་གཞུང་གིས་རྔ་བ་སྒོ་མང་དགོན་གྱི་དགེ་འདུན་པ་ལྔ་འཛིན་བཟུང་བྱས་འདུག བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་བཟང་དུ་གཏང་རྒྱུའི་ཐབས་ལམ་ཐོག་གྲོས་བསྡུར། Tuesday 18/09/2018 Dalai Lama gives religious teaching in Rotterdam Dutch Parliamentarians call on the Dalai Lama Sixth session of 16th TPiE commences today 5 monks detained over land protest in Ngaba Solutions for human rights situation in Tibet: Side event at UNHRC