6th Session of 16th TPiE

སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་བདུན་པ་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་འཆར་འཛིན་ཚོགས་ཆུང་གི་བསྣམས་པའི་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་བགྲོ་གླེང་དང་གཏན་འབེབས་གནང་འགོ་བཙུགས་ཡོད་པ་དང་། དེ་རིང་གྲོས་ཚོགས་ཀྱི་ལས་ཉིན་དགུ་པའི་སྔ་དྲོའི་ཚོགས་དུས་ཐོག་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་ཁྲིམས་འཆར་ཡོངས་སུ་གྲུབ་སྟེ། བཙན་བྱོན་བོད་མིའི་འོས་བསྡུའི་སྒྲིག་གཞི་གསར་པ་གཏན་འབེབས་དང་འབྲེལ་མ་འོངས་པ་བཙན་བྱོལ་བོད་མིའི་འོས་བསྡུའི་སྐབས་ཆོལ་ཁ་གསུམ་གྱི་སྒྲིག་འཛུགས་དང་ཆོས་རྒྱུད། གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་ནས་སྲིད་སྐྱོང་དང་སྤྱི་འཐུས་ཀྱི་འོས་གཞི་འདོན་མི་ཆོག་པ་སོགས་ཀྱི་སྒྲིག་གཞི་ཁག་ཅིག་གསར་འཇུག་གནང་སོང་། དེ་ཡང་དེ་རིང་ལས་ཉིན་དགུ་པའི་ཐོག་ཁྲིམས་བཟོའི་ལས་དོན་དང་འབྲེལ། བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ཉི་ཤུ་རྩ་བཞི་པ། དངུལ་དངོས་སོགས་ལྐོག་རྔན་སྤྲོད་ལེན་དང་རྒྱུད་སྐུལ་ཐབས་ཤེས་ཞེས་པའི་ནང་གསེས་བདུན་པའི་ཐོག་ཆོལ་ཁ་གསུམ་གྱི་སྒྲིག་འཛུགས་དང་ཆོས་རྒྱུད་ཁག གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་བཅས་ཀྱིས་སྲིད་སྐྱོང་དང་སྤྱི་འཐུས་ཀྱི་འོས་གཞི་འདོན་པ་དང་། རྒྱབ་གཉེར་གསལ་བསྒྲགས་རིགས་བྱེད་མི་ཆོག་ཅེས་བཟོ་བཅོས་ཁྲིམས་འཆར་བསྣམས་ཡོད་པ་དང་། སྐབས་དེར་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་ཁྲིམས་འཆར་དེར་དགག་པ་དང་སྦྲགས་སྤྱི་འཐུས་རྣམས་ནས་བགྲོ་གླེང་གི་ཆ་ཤས་བླངས་སོང་། སྐབས་དེར་སྤྱི་འཐུས་ཁག་ཅིག་ནས་ཕྱི་ལོ་ ༢༠༡༦ ལོའོ་བཙན་བྱོལ་བོད་མིའི་འོས་བསྡུའི་རྒྱུད་རིམ་ཁྲོད་ཆོལ་ཁ་དང་ཚོགས་སྐྱིད་ཁག་ཅིག་ནས་སྲིད་སྐྱོང་དང་སྤྱི་འཐུས་ཀྱི་འོས་མི་འདོན་པ་དང་དེར་དྲིལ་བསྒྲགས་ཀྱི་ལས་གཞི་སོགས་སྤེལ་བར་བརྟེན་སྤྱི་ཚོགས་ནང་ཟིང་ཆ་ཆེན་པོ་བྱུང་ཡོད་པ་སོགས་འགྲེལ་བརྗོད་དང་སྦྲགས། བཟོ་བཅོས་ཁྲིམས་འཆར་དེར་རྒྱབ་བསྐྱོར་ཡོད་པ་གསུངས་ཡོད། འོན་ཀྱང་ཁག་ཅིག་ནས་ཆོལ་ཁ་བྱེ་བྲག་པ་ཞིག་གིས་འོས་མི་བཏོན་པ་ཙམ་དེ་དཀའ་ངལ་མ་ཡིན་པར། ཆོལ་ཁ་དེ་དག་ནང་དངོས་སུ་ཕྱག་ལས་གནང་མཁན་རྣམས་ཀྱི་གནས་ཚུལ་སྤེལ་སྟངས་དང་། ལས་དོན་བྱེད་ཕྱོགས་ཀྱི་རྐྱེན་པས་དཀའ་ངལ་འཕྲད་པ་ཞིག་ཏུ་གསུངས་སོང་།གང་ལྟར་བཟོ་བཅོས་ཁྲིམས་འཆར་དེའི་ཐོག་སྤྱི་འཐུས་རྣམ་པས་ཆུ་ཚོད་གཅིག་དང་ཕྱེད་ཀ་ལྷག་བགྲོ་གླེང་གནང་རྗེས་ཚོགས་གཙོ་མཆོག་གི་མཐའ་མའི་ཐག་གཅོད་སྐབས་ངོ་འོས་སྤྱི་འཐུས་གསུམ་ཆ་གཉིས་ཀྱི་རྒྱབ་བསྐྱོར་ཐོག་བཟོ་བཅོས་ཁྲིམས་འཆར་དེ་གཏན་འབེབས་བྱུང་ཡོད།   དེ་བཞིན་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་དྲུག་ཅུ་རེ་བདུན་པ། སྲིད་སྐྱོང་གི་སྔོན་འགྲོ་དང་དངོས་གཞིའི་འོས་བསྡུ་བྱ་ཕྱོགས་ཞེས་པའི་ནང་གསེས་༤ པར་བཟོ་བཅོས་ཁྲིམས་འཆར་བསྣམས་ཏེ། འོས་བསྡུའི་སྐབས་དབུས་འོས་བསྡུ་ལས་ཁང་ནས་སྲིད་སྐྱོང་གི་དངོས་གཞིའི་འོས་གཞི་གཉིས་ལས་མ་ཉུང་བ་གསལ་བསྒྲགས་བྱེད་དགོས་པ་དང་། གལ་ཏེ་འོས་གཞི་གཅིག་ལས་མེད་པ་དང་དེ་ལ་སྔོན་འགྲོའི་འོས་ཤོག་ཁྱོན་འབོར་གྱི་བརྒྱ་ཆ་ ༥༡ ལས་མི་ཉུང་བའི་རྒྱབ་སྐྱོར་ཐོབ་ཡོད་ཚེ་ཁ་གཏད་མེད་པའི་སྲིད་སྐྱོང་ལ་འདེམས་ཐོན་བྱུང་བར་ངོས་འཛིན་གསལ་བསྒྲགས་བྱ་རྒྱུ། མེད་ཚེ་སྔོན་འགྲོའི་འོས་བསྡུ་བསྐྱར་དུ་བྱེད་དགོས། འོན་ཀྱང་སྔོན་འགྲོའི་འོས་བསྡུའི་སྐབས་འོས་མི་གཅིག་ལ་འོས་ཤོག་ཁྱོན་འབོར་བརྒྱ་ཆ་ ༦༠ ཡན་ཐོབ་ཡོད་ཚེ་དངོས་གཞིའི་ལས་རིམ་འགྲོ་མི་དགོས་པར་སྲིད་སྐྱོང་ལ་འདེམས་ཐོན་བྱུང་བར་ངོས་འཛིན་གསལ་བསྒྲགས་བྱ་རྒྱུ་བཅས་ངོ་ཡོད་སྤྱི་འཐུས་གསུམ་ཆ་གཉིས་ཀྱི་ཐོག་ནས་གཏན་འབེབས་གནང་སོང་། གཞན་ཡང་ད་རེས་གཏན་འབེབས་གནང་པའི་བཙན་བྱོལ་བོད་མིའི་འོསབསྡུའི་སྒྲིག་གཞི་བསྐྱར་བཅོས་ཚིག་བརྗོད་ནང་དུ་སློབ་གྲྭ་ཁག་ཏུ་གཞུང་འབྲེལ་ཕུད་། དེ་མིན་འོས་མི་དང་སྐྱེས་བུ་སུའི་ཐད་ནས་འོས་བསྡུ་དང་འབྲེལ་བའི་དྲིལ་བསྒྲགས་དང་། གཏམ་བཤད། ཡིག་ཆ་འགྲེམས་སྤེལ་བཅས་དངོས་ཤུགས་བརྒྱུད་གསུམ་ནས་བྱ་མི་ཆོག་པ་དང་། འོས་བསྡུའི་སྐབས་སུ་སྐྱེ་བོ་སུ་རུང་ནས་མི་མང་ཚོགས་འདུ་དང་། སྤྱི་ཚོགས་དྲ་ལམ་གྱི་གླེང་སྟེགས་བཅས་སུ་རྩ་དོན་དང་འབྲེལ་ལས་དོན་བྱེད་ཕྱོགས་ཐད་དོན་དངོས་སྐྱོན་འདོན་བྱེད་པ་ལས། བོད་མིའི་ཐུན་མོང་མ་ཡིན་པའི་བཟང་སྤྱོད་ལས་བརྒལ་ཏེ་གང་ཟག་སྒེར་གྱི་མི་གཤིས་ལ་སྐྱོན་བརྗོད་རིགས་ནམ་ཡང་མི་ཆོག་པའི་སྒྲིག་གཞི་ཁག་ཅིག་གསར་འཇུག་གནང་སོང་།

དེ་རིང་བོད་མི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གཙོས་པའི་སྤྱི་འཐུས་རྣམ་པས་ཨ་རིའི་གྲོས་ཚོགས་འོག་མའི་ནང་བོད་ནང་འདྲ་མཉམ་གྱི་འགྲུལ་བཞུད་ཆོག་པའི་ཁྲིམས་འཆར་གཏན་འབེབས་བྱུང་བར་དགའ་བསུ་ཞུས་སོང་། དེ་ཡང་སྐབས་ ༡༦ པའི་སྤྱི་འཐུས་གྲོས་ཚོགས་ཀྱི་ཚོགས་དུས་༦པའི་ལས་ཉིན་བརྒྱད་པ་དང་དགུ་པའི་ཚོགས་དུས་ཁག་ཅིག་གི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་རྩིས་ལོ་ ༢༠༡༧ དང ༢༠༡༨ ཀྱི་ལས་བསྡོམས་ཐོག་བགྲོ་གླེང་གནང་བའི་ཁྲོད་ཕྱི་དྲིལ་བཀའ་བློན་བློབཟང་སེང་གེ་མཆོག་གིས་ཨ་རི་གྲོས་ཚོགས་འོག་མས་རྒྱ་ནག་དང་བོད་དུ་ཡོད་པའི་མཁས་པ་དང་གསར་འགོད་པ་རྣམས་ཨ་རིར་རང་དབང་ཐོག་ཕེབས་ཆོག་གི་ཡོད་པ་ལྟར་ཨ་རིའི་མི་སེར་རྒྱ་ནག་ནང་ཕེབས་བཇུག་དགོས་པའི་གྲོས་ཆོད་བཞག་པ་དེར་གྲོས་ཚོགས་འཐུས་མི་གཙོས་པའི་རྒྱལ་སྤྱི་བོད་དོན་ལས་འགུལ་ཁང་བཅས་ལ་དགའ་བསུ་ཞུས་པའི་ཐོག་མ་འོངས་པར་སྲིད་འཛིན་གྱིས་དེར་མཚན་རྟགས་བསྐྱོན་པའི་ཁྲིམས་ཤིག་ཆགས་རྒྱུའི་རེ་བ་ཡོད་ཅེས་གསུངས་སོང་། སྐབས་དེར་སྤྱི་འཐུས་མང་དག་ཅིག་ནས་ཀྱང་ཨ་རི་གྲོས་ཚོགས་འོག་མའི་ནང་ Reciprocal Access to Tibet Act ཞེས་པའི་གྲོས་ཆོད་གཏན་འབེབས་བྱུང་བར་ཐུགས་རྗེ་ཆེ་ཞུས་པ་དང་མཉམ་ཨ་རིར་གནས་སྡོད་བོད་མི་ཚོས་ཐུགས་འགན་བཞེས་པའི་ཐོག་སོ་སོའི་གྲོས་ཚོགས་འཐུས་མི་དང་འབྲེལ་བ་གནང་ནས་གྲོས་ཚོགས་གོང་མའི་ནང་བསླེབ་ཐུབ་པ་ཙམ་དུ་མ་ཟད་ཁྲིམས་ཤིག་བཟོ་ཐུབ་རྒྱུའི་འབད་བརྩོན་གནང་དགོས་པའི་སྐུལ་མ་གནང་སོང་། རྩ་བའི་ཁ་ཉིན་ཕྱི་ཚེས་ ༢༥ ཉིན་ཨ་མི་རི་ཀའི་གྲོས་ཚོགས་འོག་མའི་ནང་དུ་གཏན་འབེབས་བྱུང་བའི་ཁྲིམས་འཆར་དེའི་ནང་དོན་གཙོ་བོ་ནི་རྒྱ་ནག་གི་དཔོན་རིགས་དང་གསར་འགོད་པ། དེ་བཞིན་མི་སེར་རྣམས་ཨ་རིའི་ས་ཕྱོགས་གང་སར་རང་དབང་ངང་འགྲུལ་བསྐྱོད་ཀྱི་ཐོབ་ཐང་ཡོད་པ་བཞིན་ Reciprocal Access ཞེས་ཨ་རིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་མི་སྣ་དང་གསར་འགོད་པ། བོད་པ་ཨ་རིའི་མི་སེར་ཡིན་པ། དེ་བཞིན་ཨ་རི་བ་བཅས་བོད་དང་རྒྱ་ནག་ནང་རང་དབང་ངང་འགྲུལ་བསྐྱོད་ཆོག་པའི་ཐོབ་ཐང་འདྲ་མཉམ་སྤྲོད་དགོས་སྐོར་དང་། རྒྱ་གཞུང་ནས་ཨ་མི་རི་ཀའི་མི་སེར་བོད་ནང་འགྲུལ་བསྐྱོད་བྱ་རྒྱུར་བཀག་སྡོམ་བྱེད་བཞིན་ཡོད་པ་ལྟར་རྒྱ་ནག་གི་འབྲེལ་ཡོད་རྣམས་ལ་བཀག་སྡོམ་གནང་རྒྱུ་ཡིན་པའི་ཁྲིམས་འཆར་ཞིག་ཡིན་པ་རེད། ཐེངས་འདིའི་ཕྱི་དྲིལ་ལས་ཁུངས་ཀྱི་ལས་བསྡོམས་བགྲོ་གླེང་ཁྲོད་ཕྱི་རྒྱལ་མི་སེར་ཡིན་པའི་བོད་རིགས་ཚོར་རྒྱ་གར་དུ་ཡོད་པའི་གཞིས་ཆགས་ཁག་ཏུ་སྤུན་མཆེད་སོགས་ཐུག་འཕྲད་ལ་འབྱོར་སྐབས་papཞེས་པ་དེ་ཞུ་རྒྱུར་་དཀའ་ངལ་འཕྲད་ཀྱི་ཡོད་སྐོར་དང་། དབུ་མའི་ལམ་གྱི་སྲིད་བྱུས་དང་འབྲེལ་ཏེ། རྒྱ་གར་གཞུང་མང་ལ་གོ་རྟོགས་ཇི་སྤེལ་དང་དེའི་ཕན་འབྲས་ཅི་བྱུང་། ཕྱིའི་རྒྱལ་ཁབ་ཁག་གི་དོན་གཅོད་ལས་བྱེད་བསྐོ་བཞག་གནང་ཕྱོགས་དང་ཕྱི་རྒྱལ་ཡུལ་གྲུ་ཁག་ཏུ་རྒྱ་རིགས་འབྲེལ་མཐུད་པའི་ལས་འགན་དང་གྲུབ་འབྲས་ཅི་སོན། དེ་བཞིན་སྐུ་ཚབ་དོན་གཅོད་ཁང་གི་ལས་ཁུངས་ཇི་ཉོས་སོགས་ཀྱི་གནད་དོན་འདྲ་མིན་ཐོག་བགྲོ་གླེང་ལྷུག་པོ་གནང་སོང་། རྩ་བའི་ཐེངས་འདིའི་སྐབས་ ༡༦ པའི་སྤྱི་འཐུས་གྲོས་ཚོགས་ཀྱི་ཚོགས་དུས་༦པའི་ལས་ཉིན་མཐའ་མ་དེ་སང་ཉིན་འཚོགས་རྒྱུ་ཡིན་པ་དང་། ད་དུང་གྲོས་ཚོགས་སུ་འཕྲོད་བསྟེན་ལས་ཁུངས་ཀྱི་ལས་བསྡོམས་ཐོག་བགྲོ་གླེང་དང་སྦྱང་བཤད་གནང་རྒྱུ་ལྷག་ཡོད་པ་རེད།

སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་ལྔ་པའི་ཐོག་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་དང་འབྲེལ་བའི་འཆར་ཟིན་ཚོགས་ཚུང་གི་སྙན་ཐོར་བཀའ་ཤག་གི་ངོས་ནས་གཞུང་འབྲེལ་བཟོ་བཅོས་ཁྲིམས་འཆར་ཕེབས་པའི་ཐོག་བགྲོ་གླེང་གནང་སྐབས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བཀའ་ཤག་ལ་འོས་བསྡུའི་སྒྲིག་གཞི་བསྐྱར་བཅོས་ཀྱི་ཐད་ལ་བཅའ་ཁྲིམས་བསྐྱར་བཅོས་བསྣམ་ཕེབས་དགོས་པའི་ལམ་སྟོན་གནང་ཡོད་པ་ལྟར། དེ་རིང་ལས་ཉིན་བདུན་པའི་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བཙན་བྱོལ་བོད་མིའི་བཅའ་ཁྲིམས་དོན་ཚན་གོ་བདུན་པའི་ནང་གསེས་༢ པའི་ཀ་པའི་ཐོག་བསྐྱར་བཅོས་ཁྲིམས་འཆར་གྲོས་ཚོགས་སུ་སྙན་སྒྲོན་ཞུས་ཡོད། སྐབས་དེར་འོས་གྲངས་ ༡༦ དང་ ༢༡ བྱས་ནས་ངོ་ཡོད་སྤྱི་འཐུས་ཀྱི་མང་མོས་རྒྱབ་སྐྱོར་ཐོག་གཞུང་འབྲེལ་བཅའ་ཁྲིམས་བསྐྱར་བཅོས་ཁྲིམས་འཆར་དེ་ཚུད་པའི་ཐོག་བཀའ་བློན་རྣམ་པ་དང་གྲོས་ཚོགས་འཐུས་མི་རྣམས་ནས་བསྐྱར་བཅོས་ཁྲིམས་འཆར་དེ་དང་དེའི་ནང་གསལ་བཙན་བྱོལ་བོད་མིའི་འོས་བསྡུའི་རྒྱུད་རིམ་ཁྲོད་སྔོན་འགྲོ་དང་དངོས་གཞི་ཞེས་འོས་བསྡུ་ཐེངས་གཅིག་དང་གཉིས་དགོས་མིན་ཐོག་བགྲོ་གླེང་ལྷུག་པོ་གནང་ཡོད། སྐབས་དེར་སྲིད་སྐྱོང་མཆོག་གིས་འདས་པའི་བཙན་བྱོལ་བོད་མིའི་འོས་བསྡུའི་རྒྱུད་རིམ་སྐབས་སྔོན་འགྲོའི་ནང་འོས་རྩེད་ཕུད་སོན་མཁན་མང་ཆེ་བ་དངོས་གཞིའི་ནང་རང་འཇགས་འོས་ཐོབ་ཀྱི་ཡོད་པ་དང་། སྔོན་འགྲོ་དང་དངོས་གཞི་ཞེས་འོས་བསྡུ་ཐེངས་གཉིས་ཡོད་པ་དེ་དུས་ཚོད་ཀྱི་ཆ་ནས་རིང་པོ་ཡིན་སྟབས། རྒྱ་ནག་གི་ཐེ་བྱུས་ཡོང་གི་ཡོད་པ་སོགས་གསལ་བཤད་གནང་ཡོད།འོན་ཀྱང་སྤྱི་འཐུས་ཁག་ཅིག་ནས་འོས་བསྡུ་ཐེངས་གཅིག་གནང་བ་ཡིན་ན་མ་འོངས་པར་རྩོད་རྙོག་མང་དུ་འགྲོ་རྒྱུའི་ཚོར་བ་ཆེན་པོ་ཡོད་པ་དང་། ལྷག་པར་དུ་བཀའ་ཤག་གི་བསྣམས་པའི་བཅའ་ཁྲིམས་བསྐྱར་བཅོས་ཚིག་བརྗོད་ནང་དུ་མི་མང་གི་མངོན་འདོད་ཚུད་མེད་པ་སོགས་འགྲེལ་བརྗོད་དང་སྦྲགས་ཁྲིམས་འཆར་དེར་རྒྱབ་སྐྱོར་གནང་ཐུབ་ས་མ་རེད་ཅེས་གསུངས་མཁན་མང་པོ་བྱུང་སྟེ། མཐར་བརྗོད་པ་གཉིས་པའི་སྐབས་གཞུང་འབྲེལ་བཅའ་ཁྲིམས་བསྐྱར་བཅོས་ཁྲིམས་འཆར་དེར་རྒྱབ་སྐྱོར་གནང་མཁན་གཅིག་ལས་མེད་པའི་ཐོག་ཟགས་ཡོད་པ་རེད།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་དྲུག་པའི་ཐོག་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་གནང་ཡོད་པ་རེད། དེ་ཡང་བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་གྲོས་ཚོགས་སུ་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་ཞུས་ཟིན་མ་ཐག་བོད་མི་མང་སྤྱི་འཐུས་རྒྱུན་ལས་ཀྱིས་བདེ་སྲུང་ལས་ཁུངས་ཀྱི་སྙན་ཐོ་རྒྱས་པར་བལྟ་ཞིབ་བརྒྱུད། འདས་ལོའི་༸གོང་ས་སྐྱབས་མགོན་ཆེན་པོ་མཆོག་གི་ཆིབས་བསྒྱུར་དང་འབྲེལ་བའི་ཚེས་གྲངས་ཁག་ཅིག་དང་། འདི་ལོ་བོད་ནང་གཉེན་འཕྲད་དུ་ཕེབས་ཏེ་ཕྱིར་མ་ལོག་པའི་ཁ་གྲངས། དེ་བཞིན་ད་བར་ཨོ་སི་ཀྲི་ལི་ཡར་གཞིས་སྤོས་རྒྱན་ཁོངས་སུ་བོད་མི་ག་ཚོད་བཏང་ཡོད་མེད་སོགས་ཀྱི་བཀའ་འདྲི་ཁག་ཅིག་ཕུལ་སོང་བ་དང་། སྐབས་དེར་བདེ་སྲུང་བཀའ་བློན་མཆོག་ནས་བོད་ནང་གཉེན་འཕྲད་དུ་ཕེབས་ཏེ་ཕྱིར་མ་ལོག་མཁན་མེད་པ་དང་། ཨོ་སི་ཀྲི་ལི་ཡར་གཞིས་སྤོས་ཀྱི་ལས་གཞི་སྤྱི་ལོ་༡༩༩༦ ལོར་འགོ་བཙུགས་པ་ནས་བཟུང་ད་བར་བོད་མི་ཆབ་སྲིད་བཙོན་ཟུར་དང་འབྲེལ་ཆགས་འབྲེལ་ཡོད་ཀྱི་མི་སྣ་ ༡༣༣༨ གནས་སྤོས་ཟིན་ཡོད་པ་གསུངས་སོང་། ལྷག་པར་དུ་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་སྐབས་སུ་སྤྱི་འཐུས་ཁག་ཅིག་གིས་བར་སྐབས་ནས་བོད་པའི་སྤྱི་ཚོགས་ཁྲོད་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་ཐོག་ཚོགས་པ་དང་སྒེར་གྱི་ཁ་བྱང་འདྲ་མིན་བརྒྱུད་སྤྱི་ཚོགས་ལ་ཕན་ཐོག་མེད་པའི་གནས་ཚུལ་འདྲ་མིན་སྤེལ་བཞིན་པ་སོགས་འགྲེལ་བརྗོད་དང་སྦྲགས། བདེ་སྲུང་ལས་ཁུངས་ནས་ཚོགས་པ་གསར་བཟོ་བྱེད་མཁན་དང་། དེ་དག་གི་དམིགས་ཡུལ་གང་ཡིན་སོགས་ཀྱི་ཐད་ལ་རྩད་ཞིབ་ནན་པོ་གནང་དགོས་པ་མ་ཟད། བྱུང་ན་བདེ་སྲུང་ལས་ཁུངས་ནང་ལ་དེའི་ཐད་དཔྱད་ཞིབ་གནང་མཁན་གྱི་སྡེ་ཚན་ཞིག་དགོས་གལ་ཡིན་པ་སོགས་གསུངས་ཡོད། སྐབས་དེར་བདེ་སྲུང་བཀའ་བློན་མཆོག་གིས་ད་ལྟའི་ཆར་བདེ་སྲུང་ལས་ཁུངས་ནས་དྲ་ཐོག་གི་གནས་ཚུལ་དེ་དག་ཐོག་དཔྱད་ཞིབ་གནང་མུས་ཡིན་པ་འགྲེལ་བརྗོད་དང་སྦྲགས། རྩ་དོན་དང་སྒྲིག་འཛུགས། སྒེར་བཅས་ལ་གནོད་པའི་དྲ་ཐོག་གི་ཚོགས་སྒེར་ཁག་རིམ་པས་སྤྱི་ཚོགས་ནང་སྟོན་གྱི་ཡིན་ཞེས་གསུངས་སོང་། ད་དུང་སྤྱི་འཐུས་ཁག་ཅིག་ནས་བདེ་སྲུང་ལས་ཁུངས་ཀྱི་ལས་དོན་སྤྱི་ཡོངས་ཐོག་ལ་བསྔགས་བརྗོད་དང་འབྲེལ། ༸གོང་ས་མཆོག་གི་དགོང་ལོའི་བབས་ལ་གཞིགས་ཏེ་མཛད་འཕྲིན་ཉུང་འཕྲི་གནང་རྒྱུའི་ཐད་དགོངས་བཞེས་གནང་དགོས་པའི་འབོད་སྐུལ་ཞུ་མཁན་བྱུང་སོང་བ་དང་། སྐབས་དེར་བཀའ་བློན་མཆོག་ནས་འབོད་སྐུལ་དེ་དག་དགའ་ལྡན་ཕོ་བྲང་ཡིག་ཚང་ལ་སྙན་གསེང་ཞུ་རྒྱུ་ཡིན་ཞེས་གསུངས་པ་དང་ཆབས་ཅིག ཚོགས་པ་སྐྱིད་སྡུག་དང་མི་སྒེར་ཚོའི་ངོས་ནས་ཀྱང་༸གོང་ས་མཆོག་སྐུ་ངལ་གསོ་ཆེད་མཇལ་ཁ་ཞུ་རྒྱུ་ཉུང་ཙམ་གནང་རོགས་ཞེས་འབོད་སྐུལ་སྐུལ་གནང་སོང་། གཞི་རྩའི་དེ་རིང་བདེ་སྲུང་བཀའ་བློན་མཆོག་གིས་གྲོས་ཚོགས་སུ་སྙན་སྒྲོན་གནང་བའི་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་སྙིང་བསྡུས་ནང་ལ། བདེ་སྲུང་ལས་ཁུངས་ཀྱི་ལས་འགན་གཙོ་བོ་༸གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཉེན་སྲུང་ཞབས་ཞུའི་ཐོག་རང་ནུས་གང་ལྕོགས་ཀྱིས་འབད་བརྩོན་ལྷོད་མེད་ཞུས་ཡོད་པ་སོགས་འགྲེལ་བརྗོད་དང་སྦྲགས། འདས་ལོའི་ནང་༸གོང་མཆོག་གིས་རྒྱལ་སྤྱིའི་རྒྱལ་ཁབ་མི་འདྲ་བ་ལྔ་དང་། རྒྱ་གར་གྱི་ས་གནས་མི་འདྲ་བ་ ༡༦ ནང་ཆིབས་བསྒྱུར་བཀའ་དྲིན་བསྐྱངས་ཡོད་པ་འཁོད་འདུག མ་ཟད་འདས་ལོའི་ནང་བོད་ནས་གཏན་སྡོད་དང་གནས་སྐོར་ཕེབས་མཁན་བོད་མི་ ༢༨༦༡ བྱུང་བའི་ནང་ནས་རྒྱ་གར་ནང་དམིགས་བསལ་འཛུལ་ཞུགས་ཆོག་པའི་ལག་འཁྱེར་ཐོབ་པ་ ༤༨ བྱུང་ཡོད་པ་དང་། གནས་མཇལ་རྗེས་བོད་དུ་ཕྱིར་ལོག་ཕེབས་མཁན་ ༢༨༡༣ བྱུང་ཡོད་པ་མ་ཟད། ཕྱི་ཕྱོགས་ནས་བོད་ནང་གཉེན་འཕྲད་དུ་ཕེབས་མཁན་ ༡༨༧ བྱུང་ཡོད་པ་སོགས་ཀྱང་འཁོད་འདུག དེ་བཞིན་ལོ་འཁོར་འདིའི་ནང་ཕྱི་རྒྱལ་ནས་ཕྱིར་ལོག་མཐོང་ཆེན་ནམ་ Return Visa ཞུ་མཁན་གྲངས་ ༥༣༢ དང་། རྒྱ་གར་ནས་ཕྱིར་ཐོན་ལག་འཁྱེར་ Exit Permit ཞུ་མཁན་༨༣༣ བྱུང་ཡོད་པ་སོགས་ཀྱང་བཀོད་འདུག དེ་རིང་ཉིན་རྒྱབ་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་ཀྱི་ལས་རིམ་གྲུབ་མཚམས་སུ་ཕྱི་དྲིལ་ལས་ཁུངས་ཀྱི་ཕྱི་ལོ་ ༢༠༡༧ ནས་ ༢༠༡༨ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་སྦྲགས། སྤྱི་འཐུས་རྣམ་པའི་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་ཀྱི་ལས་རིམ་འགོ་འཛུགས་གནང་སོང་།

བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་པདྨ་དབྱངས་ཅན་མཆོག་གིས་དེ་རིང་གྲོས་ཚོགས་ནང་ཤེས་རིག་གི་ལས་དོན་དང་འབྲེལ་བའི་དོགས་དྲི་ཁག་ལ་ལན་འདེབས་གསལ་བཤད་གནང་སོང་བ་དང།  དེ་ཡང་ཁོང་གིས་འདི་ལོའི་ཕྱི་ཟླ་ ༤ ཚེས་ ༣ ཉིན་བཀའ་བློན་གྱི་ལས་འཁུར་དམ་འབུལ་ཞུས་པའི་རྗེས་ད་ལན་གྲོས་ཚོགས་སུ་ཤེས་རིག་ལས་ཁུངས་ཀྱི་ལོ་འཁོར་ལས་བསྡོམས་འགོད་འབུལ་ཞུས་པ་ཐེངས་དང་པོ་དེ་ཆགས་ཀྱི་ཡོད་པ་རེད། སྐབས་དེར་སྤྱི་འཐུས་གཅིག་གིས་དུས་དང་མཚམས་པའི་འགྱུར་གྲོས་དགོས་གལ་སྐོར་དང་འབྲེལ་ནས་ད་ཆ་བོད་པའི་སློབ་གྲྭ་ཁག་གི་འགོ་འཛིན་འདེམས་སྒྲུག་བྱེད་ཕྱོགས་དེ་རྒྱ་གར་གྱི་ཚད་མཐོའི་སློབ་གྲྭ་ཁག་གི་འགོ་འཛིན་འདེམས་ཕྱོགས་དེ་དག་ལས་དམིགས་དཔེ་བླངས་བའི་ཐོག་ནས་ལག་བསྟར་ཐུབ་པའི་ཁོར་ཡུག་ཞིག་བསྐྲུན་དགོས་པའི་དགོངས་འཆར་ཕེབས་ཡོད་སྟབས། ཤེས་རིག་བཀའ་བློན་མཆོག་གིས་དེའི་ཐོག་དགོངས་བཞེས་གནང་ཐོག་དམིགས་བསལ་ཆ་རྐྱེན་ཞིག་བསྐྲུན་པའི་བརྒྱུད་སློབ་གྲྭ་ཁག་གི་འགོ་འཛིན་འདེམས་སྒྲུག་བྱ་རྒྱུ་ཡིན་པའི་ལན་འདེབས་གནང་སོང་། ལྷག་པར་དུ་དེ་རིང་སྔ་དྲོ་མཐོ་སློབ་སློབ་ཡོན་དང་འབྲེལ་ནས་བོད་མིའི་སྒྲིག་འཛུགས་ཤེས་རིག་ལས་ཁུངས་བརྒྱུད་སློབ་ཡོན་ཐོབ་ནས་ཕྱི་རྒྱལ་དུ་སློབ་སྦྱོང་གནང་བར་ཕེབས་པའི་ཁྲོད་ནས་ད་ཆ་བོད་ཕྲུག་སློབ་མ་ག་ཚོད་ཕྱིར་ལོག་གནང་མིན་ཐོག་དྲི་བ་ཕེབས་པ་མ་ཟད།  ཤེས་རིག་ལས་ཁུངས་ནས་བོད་སློབ་ཁག་ཏུ་རིག་ལམ་བརྒྱུད་ཚན་རིག་སློབ་ཚན་ཁྲིད་ཐབས་ཀྱི་ལག་དེབ་ངོ་སྤྲོད་དང་ཟབ་སྦྱོང་ཕུལ་བཞིན་པ་དེ་དག་གིས་དོན་དངོས་སློབ་ཕྲུག་རྣམ་པར་དགེ་མཚན་བྱུང་གི་ཡོད་མེད་སྐོར་དྲི་བ་ཕུལ་སྐབས།  བཀའ་བློན་མཆོག་ནས་ལས་གཞི་དེ་ཕན་ཐོག་ཆེན་པོ་བྱུང་བཞིན་པ་དང་། མ་འོངས་པར་ཨང་རྩིས་སློབ་ཚན་ཡང་རིག་ལམ་བརྒྱུད་སློབ་ཁྲིད་གནང་ཐབས་བྱ་རྒྱུར་འབད་རྩོན་ཞུ་རྒྱུ་ཡིན་སྐོར་གསུངས་སོང་། གཞན་ཡང་དེ་རིང་གི་གྲོས་ཚོགས་ལས་རིམ་དེའི་ཐོག་ཤེས་རིག་ལས་ཁུངས་ཀྱི་བོད་པའི་སློབ་གྲྭ་ཁག་ཏུ་སྤེལ་བཞིན་པའི་ཆོས་ལུགས་ལ་མ་བརྟེན་པའི་བཟང་སྤྱོད་དམ་ཚུལ་སྤྱོད་ཤེས་ཡོན་སློབ་གསོའི་ལས་འཆར་དང་འབྲེལ།  ཆོས་ལུགས་ཀྱི་སྤྱི་འཐུས་ཁག་ཅིག་གིས་ལས་གཞི་དེ་བོད་མིའི་སྤྱི་ཚོགས་ཁྲོད་དུ་དགོས་གལ་མེད་པར་གཟིགས་ཀྱི་ཡོད་པའི་དགོངས་འཆར་ཕུལ་མཁན་བྱུང་སོང་བ་མ་ཟད། རེ་བཟུང་གིས་དེའི་ཐ་སྙད་དང་འབྲེལ་བའི་ཐོག་དོགས་དྲི་ཁག་གཅིག་ཕེབས་པ་དེ་ལྟར་ཡང་ཤེས་རིག་བཀའ་བློན་མཆོག་གིས་དེའི་ཐོག་ལན་འདེབས་ཞིབ་ཕྲ་གང་ཡང་གནང་མ་སོང་། གཞི་རྩའི་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁྱབ་ཁོངས་རྒྱ་གར་དང་བལ་ཡུལ་གཉིས་ནང་གཏན་ཉིན་སློབ་གྲྭ་ཆེ་འབྲིང་ཆུང་གསུམ་བསྡོམས་ ༦༤ ཡོད་པ་དང་འདས་པའི་ལོ་དེའི་ནང་སློབ་ཕྲུག་ཕོ་མོ་གྲངས་ ༡༧༤༨༦ དང་དགེ་རྒན་ལས་བྱེད་ ༡༩༢༢ བཅས་ཡོད་པ་རེད། བཀའ་བློན་མཆོག་གིས་ཤེས་རིག་ལས་ཁུངས་ཀྱིས་ཕྱི་ལོ་ ༢༠༡༣ ལོར་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་རྩིས་ལེན་གནང་འགོ་འཛུགས་ནས་འདི་ལོའི་ཕྱི་ཟླ་ ༤ པའི་བར་ཁྱོན་སློབ་ཁག་ ༡༤ རྩིས་བླངས་ཟིན་པ་དང་ལྷག་འཕྲོས་སློབ་ཁག ༦ རྣམས་གང་མགྱོགས་རྩིས་ལེན་ཐུབ་ཐབས་སུ་རྒྱ་གར་དབུས་ཤེས་རིག་ལས་ཁུངས་དང་བཀའ་བསྡུར་ཞུས་མུས་ཡིན་སྐོར་གསུངས་ཡོད་པ་རེད། དེ་རིང་ཤེས་རིག་ལས་ཁུངས་ཀྱི་ལས་བསྡོམས་ཐོག་གཞན་ཡང་སློབ་མའི་ཤེས་ཚད་ཡར་རྒྱས་ཇེ་མཐོར་གཏང་སྟངས་དང་དགེ་རྒན་གྱི་མཐུན་རྐྱེན་སྦྱོར་ཕྱོགས་དང་གསོལ་ཕོགས་སོགས་ཐོབ་ཐང་ཇེ་བཟང་དུ་གཏོང་རྒྱུའི་སྐོར། དེ་བཞིན་མདུན་ལམ་སློབ་སྟོན་དང་འབྲེལ་བའི་རྒྱུས་སྟོན་ཟབ་སྦྱོང་ཁག་དང་ཕྱི་རྒྱལ་དུ་གཟའ་མཇུག་སློབ་གྲྭའི་གལ་གནད་སོགས་ཤེས་ཡོན་སྤྱིའི་སྐོར་ལ་བཀའ་མོལ་ལྷུག་པོ་བྱུང་སོང་།    

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་ལྔ་པའི་ཐོག བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་དང་འབྲེལ་བའི་འཆར་ཟིན་ཚོགས་ཚུང་གི་སྙན་ཐོར་བཀའ་ཤག་གི་ངོས་ནས་གཞུང་འབྲེལ་བཟོ་བཅོས་ཁྲིམས་འཆར་ཕེབས་པའི་ཐོག་མུ་མཐུད་བགྲོ་གླེང་གནང་འགོ་བཙུགས་ཡོད་ཀྱང་། གྲོས་ཚོགས་འཐུས་མི་ཁག་ཅིག་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་མ་གནང་གོང་ལ་འོས་བསྡུའི་སྒྲིག་གཞི་དང་འབྲེལ་བའི་བཅའ་ཁྲིམས་ནང་གི་དོན་ཚན་ཁག་ཅིག་ལ་བསྐྱར་བཅོས་དགོས་གལ་གྱི་དགོངས་ཚུལ་དང་ལས་རིམ་རྣམ་གཞག་རིགས་ཕེབས་ཡོད་སྟབས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བཀའ་ཤག་ལ་འོས་བསྡུའི་སྒྲིག་གཞི་བསྐྱར་བཅོས་ཀྱི་ཐད་ལ་བཅའ་ཁྲིམས་བསྐྱར་བཅོས་བསྣམ་ཕེབས་དགོས་པའི་ལམ་སྟོན་གནང་སོང་། དེ་ཡང་སྤྱི་འཐུས་བློ་བཟང་ཆོས་འབྱོར་ལགས་ནས་བཙན་བྱོལ་བོད་མིའི་བཅའ་ཁྲིམས་ཀྱི་ལེའུ་གཉིས་པ་དང་དོན་ཚན་ ༡༡ པ། དེ་བཞིན་དོན་ཚན་ ༥༧ པ་སོགས་སུ་འཁོད་པའི་འོས་མིའི་རང་ལོ་དང་། འོས་མིར་ལངས་རྒྱུའི་གཞི་རྩའི་ཐོབ་ཐང་སོགས་ལས་འཕྲོས་ཏེ་འོས་བསྡུའི་སྒྲིག་གཞི་བསྐྱར་བཅོས་མ་བཏང་གོང་ལ་བཅའ་ཁྲིམས་ལ་བསྒྱུར་བཅོས་གཏང་རྒྱུ་གལ་ཆེན་པོ་ཡིན་སྐོར་གསུངས་པ་དང་འབྲེལ། བགྲོ་གླེང་ཐོག་ཆ་ཤས་ལེན་རྒྱུ་མིན་ཞེས་གསུངས་ཡོད། སྐབས་དེར་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས།  འོན་ཀྱང་སྤྱི་འཐུས་ཁག་ཅིག་ནས་ལས་རིམ་རྣམ་གཞག་དང་སྦྲགས། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་༩༧ གྱི་ནང་གསེས་གཉིས་པའི་ཀ་པ་ལ་བསྒྱུར་བཅོས་མ་གཏང་བར་སྔོན་འགྲོ་དང་དངོས་གཞི་མི་དགོས་པར་བཙན་བྱོལ་བོད་མིའི་འོས་བསྡུ་ཐེངས་གཅིག་ཏུ་བཟོ་རྒྱུ་གཙོས་བསྐྱར་བཅོས་ཀྱི་ལས་རིམ་མུ་མཐུད་ཕྱིན་ན་ཁྲིམས་འགལ་ཆགས་ཀྱི་ཡོད་སྟབས་མཐོང་བཞིན་དུ་ཁྲིམས་འགལ་བྱས་ན་འགྲིག་གི་མ་རེད་ཅེས་གསུངས་མཁན་བྱུང་ཡོད་སྟབས། ཚོགས་གཙོ་མཆོག་གིས་འཛིན་སྐྱོང་བཀའ་ཤག་ནས་དང་ཐོག་བཅར་ཁྲིམས་བསྐྱར་བཅོས་བསྣམ་ཕེབས་དགོས་པའི་ལམ་སྟོན་དང་སྦྲགས། འོས་བསྡུའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་གི་བགྲོ་གླེང་མཚམས་འཇོག་དགོས་བྱུང་ཡོད། རྩ་བའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཐོག་གྲོས་ཆོད་གཏན་འབེབས་གནང་བ་གཞིར་བཟུང་། ཚོགས་དུས་གསུམ་པའི་སྐབས་སུ་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་གི་སྙན་ཐོ་འགོད་འབུལ་ཞུས་ཡོད་པ་དང་། སྐབས་དེར་སྙན་ཐོའི་ནང་སྲིད་སྐྱོང་དང་སྤྱི་འཐུས་ཀྱི་འོས་བསྡུ་སྔོན་འགྲོ་དང་དངོས་གཞི་བཅས་ཐེངས་གཉིས་དགོས་མིན་ཐད་དགོངས་ཚུལ་མི་མཐུན་པ་བྱུང་སྟེ། སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བཀའ་བློན་རྣམ་པས་སྙན་ཐོ་དེར་ངོ་རྒོལ་མཚོན་ཆེད་གྲོས་ཚོགས་ནས་ཕྱིར་ཐོན་གནང་བ་སོགས་བྱུང་ཡོད་པ་དང་། སྐབས་དེར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བཀའ་ཤག་ནས་གྲོས་ཚོགས་ཚོགས་དུས་རྗེས་མའི་སྟེང་ཁྲིམས་འཆར་དེའི་བཟོ་བཅོས་ཁྲིམས་འཆར་བསྣམ་ཕེབས་དགོས་པའི་ལམ་སྟོན་ལྟར་ཁ་སང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་བཞི་པའི་ཚོགས་ཐུན་བཞི་པའི་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་འོས་བསྡུའི་སྒྲིག་གཞི་བསྐྱར་བཅོས་ཀྱི་བཟོ་བཅོས་ཁྲིམས་འཆར་གྲོས་ཚོགས་སུ་འགོད་འབུལ་ཞུས་པ་དང་སྦྲགས། ངོ་ཡོད་སྤྱི་འཐུས་ཀྱི་མང་མོས་རྒྱབ་སྐྱོར་ཐོག་ཁྲིམས་འཆར་དེ་ཚུད་དེ་གྲོས་ཚོགས་འཐུས་མི་རྣམས་ནས་བསྐྱར་བཅོས་ཁྲིམས་འཆར་དེ་དང་དེའི་ནང་གསལ་བཙན་བྱོལ་བོད་མིའི་འོས་བསྡུའི་རྒྱུད་རིམ་ཁྲོད་སྔོན་འགྲོ་དང་དངོས་གཞི་ཞེས་འོས་བསྡུ་ཐེངས་གཅིག་དང་གཉིས་དགོས་མིན་ཐོག་བགྲོ་གླེང་གནང་འགོ་བཙུགས་པ་ཞིག་ཆགས་ཀྱི་ཡོད་པ་རེད།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་བའི་ལས་ཉིན་བཞི་པའི་ཐོག་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་དང་འབྲེལ་བའི་འཆར་ཟིན་ཚོགས་ཚུང་གི་སྙན་ཐོར་བཀའ་ཤག་ངོས་ནས་གཞུང་འབྲེལ་བསྐྱར་བཅོས་ཁྲིམས་འཆར་ཕེབས་ཡོད་པ་རེད། རྩ་བའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཐོག་གྲོས་ཆོད་གཏན་འབེབ་གནང་བ་གཞིར་བཟུང། ཚོགས་དུས་གསུམ་པའི་སྐབས་སུ་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་འཆར་འཛིན་ཚོགས་ཆུང་གི་སྙན་ཐོ་འགོད་འབུལ་ཞུས་ཡོད་པ་དང་། སྐབས་དེར་སྙན་ཐོའི་ནང་སྲིད་སྐྱོང་དང་སྤྱི་འཐུས་ཀྱི་འོས་བསྡུ་སྔོན་འགྲོ་དང་དངོས་གཞི་བཅས་ཐེངས་གཉིས་དགོས་མིན་ཐད་དགོངས་ཚུལ་མ་མཐུན་པ་བྱུང་སྟེ། སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བཀའ་བློན་རྣམ་པས་སྙན་ཐོ་དེར་ངོ་རྒོལ་མཚོན་ཆེད་གྲོས་ཚོགས་ནས་ཕྱིར་ཐོན་གནང་བ་སོགས་བྱུང་ཡོད་སྟབས། སྐབས་དེར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བཀའ་ཤག་ནས་གྲོས་ཚོགས་ཚོགས་དུས་རྗེས་མའི་སྟེང་ཁྲིམས་འཆར་དེའི་བཟོ་བཅོས་ཁྲིམས་འཆར་བསྣམ་ཕེབས་དགོས་པའི་ཐག་གཅོད་གནང་ཡོད་པ་རེད། ཚོགས་གཙོའི་ལམ་སྟོན་ལྟར་དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་བཞི་པའི་ཚོགས་ཐུན་བཞི་པའི་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་འོས་བསྡུའི་སྒྲིག་གཞི་བསྐྱར་བཅོས་ཀྱི་བཟོ་བཅོས་ཁྲིམས་འཆར་གྲོས་ཚོགས་སུ་འགོད་འབུལ་ཞུས་སོང་། བཀའ་ཤག་གི་བཟོ་བཅོས་ཁྲིམས་འཆར་དེའི་ནང་གཙོ་བོ། བཙན་བྱོལ་བོད་མིའི་འོས་བསྡུ་ཐེངས་གཅིག་དགོས་པའི་མངོན་འདོད་ལྟར་དེ་འབྲེལ་གྱི་བཟོ་བཅོས་ཁག་གཅིག་བསྣམས་ཕེབས་ཡོད་པ་ལྟར། བཙན་བྱོལ་བོད་མིའི་འོས་བསྡུའི་སྒྲིག་གཞི་སྐྱར་བཅོས་འཆར་ཟིན་ཚོགས་ཆུང་ཁོངས་སུ་ཡོད་པའི་སྤྱི་འཐུས་རྒྱ་རིགས་མཐར་ལགས་ཀྱིས་བཀའ་ཤག་གི་བསྐྱར་བཅོས་ཁྲིམས་འཆར་དེ་བཙན་བྱོལ་བོད་མིའི་བཅའ་ཁྲིམས་དང་འགལ་བ་ཞིག་དང་། མུན་ནག་ནང་འགེངས་ཤོག་སླངས་བ་ལྟ་བུ་ཞིག་ལ་འགྲེལ་བརྗོད་དང་འབྲེལ། ཁྲིམས་འཆར་དེར་དགག་པ་སྐྱོན་གནང་སོང་། འོང་ཀྱང་སྐབས་དེར་འོས་གྲངས་ ༡༧ དང་༡༨ བྱས་ནས་ངོ་ཡོད་སྤྱི་འཐུས་ཀྱི་མང་མོས་རྒྱབ་སྐྱོར་ཐོག་ཁྲིམས་འཆར་དེ་ཚུད་པའི་ཐོག གྲོས་ཚོགས་འཐུས་མི་རྣམས་ནས་བསྐྱར་བཅོས་ཁྲིམས་འཆར་དེ་དང་དེའི་ནང་གསལ་བཙན་བྱོལ་བོད་མིའི་འོས་བསྡུའི་བརྒྱུད་རིམ་ཁྲོད་སྔོན་འགྲོ་དང་དངོས་གཞི་ཞེས་འོས་བསྡུ་ཐེངས་གཅིག་དང་གཉིས་དགོས་མིན་ཐོག་བགྲོ་གླེང་གནང་འགོ་བཙུགས་སོང་། བགྲོ་གླེང་འགོ་འཛུགས་ཀྱི་མཚམས་སུ་ལས་ཉིན་བཞི་པའི་ཚོགས་དུས་ཟིན་སྟབས་ལས་ཉིན་རྗེས་མའི་ཐོག་མུ་མཐུད་བགྲོ་གླེང་གནང་གི་ཡོད་པ་རེད། གཞི་རྩའི་ད་རེས་འཛིན་སྐྱོང་བཀའ་ཤག་ནས་བསྣམས་པའི་བཟོ་བཅོས་ཁྲིམས་འཆར་དེའི་ནང་ལ་སྲིད་སྐྱོང་དང་། སྤྱི་འཐུས་གཉིས་ཀྱི་འོས་བསྡུ་དེ་བཞིན་སྔོན་འགྲོ་དང་དངོས་གཞི་ཞེས་འོས་བསྡུ་རིམ་པ་གཉིས་མི་དགོས་པར་འོས་བསྡུ་རིམ་པ་གཅིག་གི་འཐུས་པ་བཟོས་འདུག་པ་དང་། དེ་ཡང་དབུས་འོས་བསྡུ་ལས་ཁང་ནས་སྲིད་སྤྱི་གཉིས་ཀྱི་འོས་བསྡུ་ཁྱབ་བསྒྲགས་བྱས་རྗེས། རང་འགུལ་དྭང་བླངས་དང་དམིགས་འཛུགས་བྱས་པའི་འོས་མི་དང་རྒྱབ་སྐྱོར་བྱེད་པོ་བཅས་ནས་ས་གནས་འོས་བསྡུ་ལས་ཁང་ལ་དེབ་སྐྱེལ་བྱེད་དགོས་པ་དང་། འོས་མིར་དེབ་སྐྱེལ་བྱས་རིགས་ལ་ས་གནས་འོས་བསྡུ་ལས་ཁང་ནས་རྟོག་ཞིབ་རྩད་གཅོད་དང་ཐག་གཅོད་བྱ་རྒྱུའི་དུས་ཡུན་ཉིན་གྲངས་ ༣༠ དེའི་རྗེས་འོས་བསྡུ་ལས་ཁང་ནས་ཐག་གཅོད་བྱུང་ཚེ་འོས་མི་དང་རྒྱབ་སྐྱོར་བ་རྣམས་ནས་ཉིན་གྲངས་ ༤༥ རིང་དྲིལ་བསྒྲགས་བྱེད་པ་ལས། དེབ་སྐྱེལ་མ་བྱས་པར་དྲིལ་བསྒྲགས་རིགས་བྱས་པ་ར་འཕྲོད་བྱུང་ཚེ་འོས་གྲངས་ཇི་ཐོབ་ཚང་མ་རྩིས་མེད་གཏོང་རྒྱུ་སོགས་གསར་འཇུག་གནང་འདུག

ཁ་སང་གྲོས་ཚོགས་ཀྱི་ལས་ཉིན་གཉིས་པའི་ཐོག་ནས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་ལོ་འཁོར་ལས་བསྡོམས་སྙིང་བསྡུས་འགོ་འབུལ་དང་སྦྲགས། སྤྱི་འཐུས་རྣམ་པས་ཁ་སང་ཉིན་རྒྱབ་དང་དེ་རིང་ཉིན་འཁྱོངས་རིང་ནང་སྲིད་ཀྱི་ལས་དོན་ཐོག་དྲི་བ་དྲི་ལན་དང་བགྲོ་གླེང་བཅས་གནང་པའི་ཁྲོད། སྤྱི་འཐུས་ཕལ་ཆེ་བས་བོད་ནས་གསར་དུ་འབྱོར་བའི་བོད་མི་རྣམས་ལ་སྡོད་ཁང་མ་རག་པའི་དཀའ་ངལ་འཕྲད་བཞིན་པར་ཐུགས་འཚབ་དང་འབྲེལ། དེར་ནང་སྲིད་ལས་ཁུངས་ནས་ངེས་པར་དུ་དགོངས་བཞེས་གནང་ཐོག་ཁོང་རྣམ་པར་སྡོད་ཁང་གི་མཐུན་འགྱུར་གནང་རོགས་ཞེས་འབོད་སྐུལ་ཞུས་སོང་། སྐབས་དེར་བཀའ་བློན་མཆོག་གིས་ད་ལྟའི་བཀའ་ཤག་གི་ལོ་གཉིས་དང་ཕྱེད་ཀའི་ལས་ཡུན་དེའི་ནང་ད་བར་བོད་ནས་ཕེབས་པའི་གསར་འབྱོར་བ་ཚོར་གང་ཐུབ་ཅི་ཐུབ་ཀྱིས་གཟིགས་རྟོགས་དང་མཐུན་འགྱུར་གང་ལེགས་བསྐྲུན་ཡོད་པའི་སྐོར་དང་འབྲེལ་ནས། ད་ཆ་སྦེལ་ཀོབ་གཞིས་ཆགས་སུ་གསར་རྒྱག་གནང་བཞིན་པའི་གསར་འབྱོར་བའི་སྡོད་ཁང་གྲངས་ ༨༠ ཁྲོད་ནས་ཁྱིམ་ཚང་ ༤༠ ཡི་སྡོད་ཁང་གསར་རྒྱག་གནང་ཟིན་ཡོད་པ་དང་རིང་མིན་ཕྱི་ཟླ་ ༡༡ པའི་ནང་ཚུད་ལས་གཞི་དེ་ཡོངས་སུ་མཇུག་སྒྲིལ་བྱ་རྒྱུའི་དམིགས་ཚད་འཛིན་བཞིན་ཡོད་པའི་ལན་འདེབས་དེ་ལྟར་གནང་སོང་། ཡང་སྤྱི་འཐུས་གཅིག་གིས་ཉེ་ཆར་ཨ་རུ་ནཱ་ཅལ་ནང་ས་གནས་བོད་མི་རྣམས་ཕྱིར་འབུད་གཏོང་དགོས་པའི་ངོ་རྒོལ་རིགས་བྱུང་བ་དང་འབྲེལ། དཀའ་ངལ་དེ་སེལ་ཐབས་སླད་ནང་སྲིད་ལས་ཁུངས་ནས་གང་གནང་ཡོད་མེད་སྐོར་དྲི་བ་ཕུལ་སོང་བ་དང་བཀའ་བློན་མཆོག་གིས་གནད་དོན་དེ་ནི་གཙོ་བོ་ཡུལ་དེའི་ནང་གནས་བཞུགས་བོད་མི་མི་ཉུང་བ་ཞིག་གིས་སྐྱབས་བཅོལ་བོད་མི་དང་ས་གནས་ཡུལ་མིའི་ཐོབ་ཐང་གཉིས་ཀ་ལོངས་སུ་སྤྱོད་བཞིན་ཡོད་སྟབས་ས་གནས་ཡུལ་མི་རྣམས་པས་ངོ་རྒོལ་བྱས་པ་ཞིག་ཆགས་ཀྱི་ཡོད་ཀྱང་མངའ་སྡེ་གཞུང་ནས་ད་བར་བོད་མིར་གཟིགས་ཕྱོགས་ཡག་པོ་ཡོད་པ་གསུངས་སོང་། འོན་ཀྱང་སྤྱི་འཐུས་ཞིག་གིས་དཀའ་ངལ་དེ་ནི་ས་གནས་བོད་མི་ཡིས་རྐང་པ་གཉིས་འཛུགས་བྱས་པ་ལ་བརྟེན་ནས་བྱུང་བ་ཞིག་ཡིན་སྟབས། བོད་མིའི་སྒྲིག་འཛུགས་ནས་སྲིད་བྱུས་ངེས་གཏན་ཞིག་གི་ཐོག་ནས་དཀའ་ངལ་དེ་སེལ་ཐབས་གནང་དགོས་པའི་ཞུས་སྐུལ་གནང་སོང་། དེ་རིང་གི་གྲོས་ཚོགས་སུ་ད་དུང་བོད་མིའི་སྤྱི་མཐུན་མཉམ་འབྲེལ་ཁག་གི་ད་ལྟའི་གནས་བབ་དང་། ལས་དོན་གནང་ཕྱོགས་སོགས་དང་འབྲེལ་མཉམ་འབྲེལ་གྱི་སྡེ་ཁག་དེ་དག་དེ་སྔ་ཐོག་མར་ཆེད་འཛུགས་གནང་བའི་དགོས་དམིགས་གཞིར་བཟུང་ཕྱག་ལས་གནང་ཐུབ་ཡོད་མེད་ཐད་ལ་ངེས་པར་དུ་བསྐྱར་ཞིབ་གནང་གལ་གསུངས་སོང་པ་དང་། སྐབས་དེར་བཀའ་བློན་མཆོག་ནས་མཉམ་འབྲེལ་ཁག་ཁྲིམས་སྒྲིག་གི་སྟངས་འཛིན་རྐྱེན་པས་ནང་སྲིད་ལས་ཁུངས་ནས་ཐད་ཀར་ཐེ་བྱུས་བྱ་རྒྱུ་ཁག་པོ་ཡིན་པ་དེ་ལྟར་ཡང་། དེ་སྔ་ཚོགས་ཆེན་རིམ་པའི་སྐབས་མཉམ་འབྲེལ་གྱི་ལས་དོན་ཐོག་བསྐྱར་ཞིབ་དགོས་པའི་ལམ་སྟོན་ཞུས་ཡོད་པ་གསུངས་སོང་། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ལས་བསྡོམས་གྲུབ་བསྟུན། དེ་རིང་ཉིན་རྒྱབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་དཔལ་འབྱོར་ལས་ཁུངས་ཀྱི་ལོ་གཅིག་གི་ལས་བསྡོམས་སྙིང་བསྡུས་འགོད་འབུལ་ཞུས་གནང་སོང་།

དེ་རིང་ཟླ་ ༩ ཚེས་ ༡༩ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ནང་ལ་ལོ་ངོ་བཞི་བཅུ་ལྷག་ཕྱག་ལས་གནང་མྱོང་ཡོད་པ་ད་ལྟའི་ཆོས་རིག་དྲུང་འཕར་ཀརྨ་དགྲ་འདུལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་མང་མོས་ཐོག་འོས་འདེམས་གནང་སོང་། བཙན་བྱོལ་བོད་མིའི་བཅའ་ཁྲིམས་ལེའུ་ ༦ དོན་ཚན་ ༦༣ ནང་གསེས་དང་པོའི་དགོངས་དོན་ལྟར། ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་སྤྱི་འཐུས་ལྷན་ཁང་གི་ཚོགས་གཙོ་སྦྲེལ་པོ་མཆོག དེ་བཞིན་སྲིད་སྐྱོང་མཆོག་བཅས་ནས་ཁྲིམས་ཞིབ་པ་ཆེ་བ་ཟུར་པ་བྱ་དུར་བསོད་ནམས་བཟང་པོ་ལགས་དང་། བཀའ་ཟུར་ཚེ་རིང་ཕུན་ཚོགས་མཆོག དབུས་འོས་བསྡུ་སྤྱི་ཁྱབ་འགན་འཛིན་ཟུར་པ་འཇམ་དཔལ་ཆོས་བཟང་ལགས་བཅས་ལས་གྲུབ་པའི་འོས་མི་འདེམས་སྒྲུག་ཚོགས་ཆུང་ཞིག་ཆེད་འཛུགས་གནང་དོན་ལྟར། དེ་རིང་གྲོས་ཚོགས་སུ་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་དང་ཆོས་རིག་དྲུང་འཕར་ཀརྨ་དགྲ་འདུལ་ལགས་རྣམ་གཉིས་ཁྲིམས་ཞིབ་པ་གཞན་གཅིག་གི་འོས་མིག་ཏུ་མཚན་འདོན་གནང་ཡོད་པ་རེད། དེ་རིང་གྲོས་ཚོགས་སུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་གི་ཆེད་དུ་ངོ་ཡོད་སྤྱི་འཐུས་ ༤༣ རྣམས་ཀྱིས་འོས་ཤོག་འཕེན་པའི་ཁྲོད་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་སུ་འོས་གྲངས་ ༢༡ དང་ཆོས་རིག་དྲུང་འཕར་ཀརྨ་དགྲ་འདུལ་ལགས་སུ་འོས་གྲངས་ ༢༡ དེ་བཞིན་རྩིས་མེད་སོང་བའི་གྲངས་ ༡ བཅས་བྱུང་སྟབས་ངོ་ཡོད་སྤྱི་འཐུས་ལས་དགོས་ངེས་འོས་གྲངས་མ་ཚང་བར་བརྟེན་ཚོགས་གཙོ་མཆོག་གིས་དེ་འབྲེལ་ལས་རིམ་རེ་ཞིག་འཕར་འགྱངས་དང་བསྐྱར་དུ་འོས་འཕང་རྒྱུའི་གསལ་བསྒྲགས་བསྐྱངས་ཡོད་པ་རེད། གྲོས་ཚོགས་སུ་སླར་ཡང་འོས་འཕངས་པ་ལས་ནང་སྲིད་དྲུང་འཕར་ཤོ་ཟུར་ཚེ་དབང་སྒྲོལ་མ་ལགས་སུ་འོས་གྲངས་ ༡༩ དང་ཆོས་རིག་དྲུང་འཕར་ཀརྨ་དགྲ་འདུལ་ལགས་སུ་འོས་གྲངས་ ༢༡ དེ་བཞིན་བར་བཞུགས་གྲངས་ ༣ བཅས་བྱུང་སྟབས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ངོ་ཡོད་སྤྱི་འཐུས་ལས་དགོས་ངེས་འོས་གྲངས་ཚང་པས་ཆོས་རིག་དྲུང་འཕར་ཀརྨ་དགྲ་འདུལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་འོས་འདེམས་བྱུང་བའི་གསལ་བསྒྲགས་དང་སྦྲགས་འཚམས་འདྲི་གནང་ཡོད། ཚོགས་གཙོ་མཆོག་ནས་གསལ་བསྒྲགས་གནང་གྲུབ་མཚམས་སུ་བདམས་ཐོན་ཁྲིམས་ཞིབ་པ་ཀརྨ་དགྲ་འདུལ་ལགས་ཀྱི་གསར་འགོད་པའི་བཅར་འདྲི་དང་ལེན་དང་སྦྲགས། ཁོང་ཁྲིམས་ཞིབ་པར་འདེམས་ཐོན་བྱུང་བ་འདི་ནི་འདས་པའི་ལོ་ངོ་བཞི་བཅུ་ལྷག་གི་རིང་བོད་པའི་སྤྱི་ཚོགས་ཁྲོད་ཕྱག་ལས་གནང་སྐབས་གཤིབ་འདྲིས་བྱུང་བའི་ལས་བྱེད་རྣམ་པའི་གྲུབ་འབྲས་ཞིག་ཏུ་ངོས་འཛིན་གནང་གི་ཡོད་ཅེས་གསུངས་སོང་། གཞི་རྩའི་བདམས་ཐོན་ཁྲིམས་ཞིབ་པ་ཀརྨ་དགྲ་འདུལ་ལགས་ནི་ ༡༩༥༨ ཟླ་ ༧ ཚེས་ ༡ ཉིན་བོད་ཀོང་པོར་སྐྱེས་ཤིང་བཙན་བྱོལ་དུ་འབྱོར་རྗེས་སློབ་སྦྱོང་ཁག་འཐུས་ཚང་གནང་རྗེས། ཤེས་རིག་དང་བདེ་སྲུང་ལས་ཁུངས་ཀྱི་བཀའ་དགོངས་བཞིན་དང་སློབ་ཏུ་ཆེད་བསྐྱོད་ཀྱིས་ལོ་ཤས་ཞབས་ཞུ་དང་། དེ་ནས་ཕྱི་ལོ་ ༡༩༧༦༌༧༧ བར་ལྡི་ལིར་རང་གཞུང་དཔལ་ལྡན་བཀའ་ཤག་གི་ཐད་ཀར་འཛིན་སྐྱོང་འོག་ཆབ་སྲིད་ལ་མཁོ་གནད་ཆེ་བའི་ལས་རིགས་སློབ་སྦྱོང་གནང་སྟེ་རིམ་པས་སྦེལ་ཀོབ་བདེ་སྐྱིད་སླར་གསོའི་མཉམ་འབྲེལ་ནང་ཚོང་ལས་འགན་འཛིན་དང་དྲུང་ཆེ། ཀོ་ལི་གྷལ་དོན་ལྡན་གླིང་གཞིས་ལས་ཁང་གི་ལས་དྲུང་སོགས་གནང་ཡོད་པ་མ་ཟད་ཕྱི་ལོ་ ༢༠༠༡ ལོར་གནས་འཕར་གྱི་སྦེལ་ཀོབ་བདེ་སླར་དང་། མན་སྤར་ཕན་བདེ་གླིང་གཞིས་ཆགས། དེ་བཞིན་འབྲས་ལྗོངས་སྒང་ཏོག་ས་གནས་བཅས་ཀྱི་གཞིས་འགོ་དང་ཕྱི་ལོ་ ༢༠༡༦ ལོར་ལྷོ་གཞིས་ཁག་གི་ལྷོ་སྤྱི་བཅས་གནང་མྱོང་ཡོད་པ་དང་། ཕྱི་ལོ་ ༢༠༡༧ ལོ་མཇུག་ཏུ་ལྷོ་སྤྱི་ནས་དྷ་ས་ཆོས་རིག་ལས་ཁུངས་སུ་གནས་སྤོས་ཀྱིས་དྲུང་འཕར་ལས་འགན་ཐོག་དཔལ་༸རྒྱལ་བ་ཀརྨ་པ་རིན་པོ་ཆེའི་སྣེ་ཤན་ཞབས་ཞུ་ཞུ་མུས་ཡིན་པ་རེད།