སྲིད་སྐྱོང་མཆོག་གིས་བསྟན་འཛིན་བདེ་ལེགས་རིན་པོ་ཆེའི་སྲིང་མོ་དང་ཉེ་འབྲེལ་རྣམས་འཕྲལ་དུ་གློད་བཀྲོལ་དགོས་པ་གསུངས་འདུག

རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་གདུང་ཟླ་བ་འདིའི་ཚེས་༡༦གི་སྔ་དྲོ། ཁྲང་ཏུང་བཙོན་ཁང་ཉེ་འཁྲིས་ཀྱི་བཙོན་ཁང་ཁུག་ཀྱོག་གཅིག་ཏུ་བཙན་དབང་འོག་ཞུགས་འབུལ་བྱེད་རྗེས། ཉིན་དེའི་དགོང་མོ་དར་རྩེ་མདོའི་ཉེ་འགྲམ། ལྕགས་ཟམ་ཁ་ས་གནས་ནས་རིན་པོ་ཆེ་མཆོག་གི་གདུང་ཐལ་འཕྲོག་པ་དང། དེ་བཞིན་ཕྱི་ཉིན་ཏེ་ཚེས་༡༧གྱི་སྔ་དྲོ། ལི་ཐང་ཉེན་རྟོག་པས་ཞུགས་འབུལ་ཆེད་ཕེབས་པའི་རིན་པོ་ཆེའི་སྲིང་མོ་སྒྲོལ་དཀར་ལྷ་མོ་དང་ཚ་མོ་ཉི་མ་གཉིས་ཁྲུན་འདུ་ནས་འཛིན་བཟུང་གིས་ད་བར་གར་ཡོད་ཤེས་རྟོགས་མེད་པ་གྱུར་ཡོད་རེད།
རྒྱ་གཞུང་གིས་ཨོ་ཐོག་དགོན་སོགས་སུ་དགོངས་རྫོགས་ཀྱི་བྱེད་སྒོར་དམ་དྲག་བྱེད་མུས་ཡིན་པ་དང། དེ་བཞིན་རིན་པོ་ཆེའི་སྲིང་མོ་དང་ཚ་མོ་རྣམ་གཉིས་གར་སོང་ཆ་མེད་དུ་གྱུར་ནས་ཉིན་ལྔ་སོང་མཚམས་འདིར། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རིན་པོ་ཆེའི་དགོངས་རྫོགས་ཀྱི་གནད་དོན་དང་ནང་མི་འབྲེལ་གྱི་གནས་སྟངས་ལ་ཐུགས་འཚབ་དང་བཅས། རྒྱ་ནག་གཞུང་ནས་བསྟན་འཛིན་བདེ་ལེགས་རིན་པོ་ཆེ་མཆོག་གི་ནང་མི་ཉེ་འབྲེལ་འཛིན་བཟུང་བྱས་པ་རྣམས་འཕྲལ་དུ་གློད་བཀྲོལ་གཏོང་དགོས་པ་གསུང་གནང་སོང་བ་དང། ད་དུང་སྲིད་སྐྱོང་མཆོག་གིས་རྒྱ་གཞུང་ནས་བསྟན་འཛིན་བདེ་ལེགས་རིན་པོ་མཆོག་ལ་ནག་ཉེས་བཙུགས་པ་ཁག་ལ་བོད་མིའི་སྒྲིག་འཛུགས་ཙམ་དུ་མ་ཟད། ད་ཆ་རྒྱལ་སྤྱིིའི་གཞུང་མང་ནས་ཀྱང་དེ་ལ་གཞི་མེད་ཅིག་ཏུ་ངོས་འཛིན་གནང་གི་ཡོད་པ་མ་ཟད། ལྷག་པར་དུ་རིན་པོ་ཆེ་དགོངས་པ་རྫོགས་སྟངས་སྐོར་ལའང་ཐུགས་ཕམ་གྱི་གསལ་བསྒྲགས་སྤེལ་སྐོར་སོགས་གསུངས་གནང་སོང།