སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་སྲིད་སྐྱོང་འོས་མིར་བཞེངས་རྒྱུའི་གསལ་བསྒྲགས་གནང་སོང།

བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་ལོ་ ༢༠༡༦ ལོའོ་སྲིད་སྐྱོང་འོས་མིར་བཞེངས་རྒྱུའི་གསར་འགོད་གསལ་སྒྲགས་ཤིག་སྤེལ་གནང་སོང།
དེ་རིང་ཟླ་བ་ ༨ ཚེས་ ༣ ཕྱི་དྲོ་ཚོུད་ ༣།༠༠ ཐོག་འདི་ག་རླུང་འཕྲིན་ཁང་གི་སྒྲ་འཇུག་ཁང་དུ་ཚོགས་གཙོ་སྤེན་པ་ཚེ་རིང་མཆོག་སྐུ་སྒེར་གྱི་ཐོག་ནས། བཙན་བྱོལ་ནང་གི་བོད་སྐད་ཀྱི་རླུང་འཕྲིན་གསུམ་སྐོང་ཚོགས་ཐོག་གསར་འགོད་གསལ་བསྒྲགས་ཤིག་སྤེལ་གནང་བ་ཡོད་པ་དང། ཁོང་གིས་སྐབས་དེར་བོད་ཀྱི་རྩ་དོན་ཆེད་དུ་མ་འོངས་ལས་དོན་བྱེད་ཕྱོགས་དང་འབྲེལ། ཆོལ་ཁ་གསུམ་ཆིག་སྒྲིལ་གྱི་ནུས་པ་ཤུགས་ཆེ་རུ་གཏང་རྒྱུ་དང། བཙན་འབྱོལ་བོད་མིའི་སྒྲིག་འཛུགས་སྲ་བརྟན་སླད་མང་གཙོའི་ཀ་བ་གསུམ་གྱི་ཐུན་མོང་གི་ནུས་པ་མཉམ་སྤུངས་ཐུབ་པ་བྱ་རྒྱུ་གཉིས་ལས་དོན་གལ་ཆེ་ཞིག་ཏུ་ངོས་འཛིན་གནང་གི་ཡོད་སྐོར་གསུངས་པ་དང་སྦྲགས། ད་དུང་ཁོང་གིས་མ་འོངས་པར་སུ་ཐོབ་དང་མ་ཐོབ་ལ་མ་ལྟོས་པར། སོ་སོའི་ངོས་ནས་གྲ་སྒྲིག་གི་ཚུལ་དུ་བོད་མིའི་སྒྲིག་འཛུགས་ཀྱི་ལྷན་ཁང་སོ་སོའི་ལས་དོན་བྱེད་ཕྱོགས་དང་བཀའ་བློན་སུ་བཀོད་དགོས་མེད་སོགས་ཀྱི་ཐོག་ལའང་དགོངས་པ་བཞེས་ཟིན་སྐོར་གསུངས་ཡོད་པ་རེད། རྩ་བའི་ད་སྐབས་རང་བཙན་གྱི་ལངས་ཕྱོགས་འཛིན་མཁན་བོད་ཀྱི་རྒྱལ་ཡོངས་མང་གཙོ་ཚོགས་པའི་ངོས་ནས་ ༢༠༡༦ སྲིད་སྐྱོང་འོས་མིར་སྲིད་སྐྱོང་ལས་ཐོག་བློ་བཟང་སེང་གེ་མཆོག་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་ཀྱི་མཚན་བཏོན་གནང་ཡོད་པ་དང། དེ་བཞིན་ཉེ་ཆར་དབུས་གཙང་ཆོལ་ཁའི་འགན་འཛིན་ལྷན་ཚོགས་ཀྱི་ཐོག་ནས་ཚོགས་གཙོ་སྤེན་པ་ཚེ་རིང་མཆོག་མང་མོས་ཀྱིས་སྲིད་སྐྱོང་འོས་མིར་བཏོན་ཡོད་པ་ལྟར། ཚོགས་པ་དེ་གཉིས་ནས་ལངས་ཕྱོགས་དང་ཆོལ་ཁ་དབྱེ་མེད་ཐོག་རྒྱབ་སྐྱོར་གནང་བར་ཁོང་གིས་ཐུགས་རྗེ་ཆེ་ཞུ་བ་དང་སྦྲགས། མང་ཚོགས་ནས་ཀྱང་ཆོལ་ཁ་ཆོས་ལུགས་དབྱེ་བ་མེད་པའི་ཐོག་ནས་སོ་སོའི་བསམ་བློའི་རྣམ་དཔྱོད་ཀྱི་ཐོག་ནས་ཁོང་ལ་འོས་ཤོག་བླུགས་དགོས་པའི་འབོད་སྐུལ་ཀྱང་ཞུས་གནང་བ་མ་ཟད། གསར་འགོད་ལྷན་ཚོགས་རྗེས་ཀྱི་དྲི་བ་དྲི་ལན་སྐབས་སུ་ཁོང་གིས་སྲིད་སྐྱོང་ལ་འདེམས་ཐོན་བྱུང་བའི་དབང་དུ་བཏང་ནའང། ལོ་ལྔའི་དུས་ཡུན་ནང་བོད་རྒྱའི་གནད་དོན་སེལ་ཐུབ་ཀྱི་རེད་ཅེས་ཁས་ལེན་ཞུ་ཐུབ་ཀྱི་མེད་ནའང། ཕྱོགས་ཚང་མ་ནས་ཐབས་ཤེས་མཉམ་སྤུང་ཀྱིས་འབད་བརྩོན་གང་ཐུབ་ཞུས་ནས་སླེབས་ས་གཅིག་ལ་སླེབས་ཐུབ་པ་བྱ་རྒྱུ་ཡིན་པའི་ཞལ་བཞེས་ཀྱང་གནང་བ་དང་འབྲེལ། ཁོང་སྐུ་སྒེར་གྱི་ངོས་ནས་སྲིད་སྐྱོང་གི་དྲིལ་བསྒྲགས་སྐབས་ཁོང་རང་ཉིད་ཀྱི་འདས་པའི་ཉམས་མྱོང་དང་འབྱུང་འགྱུར་གྱི་ལས་དོན་ཇི་བྱས་ལ་གཞི་བཞག་པ་མ་གཏོགས་anti campaign འམ་གཞན་ལ་དམའ་འབེབ་དང་ལྡོག་ཕྱོགས་ཀྱི་སྐྱོན་བརྗོད་བརྒྱུད་རང་ཉིད་དྲིལ་བསྒྲགས་གནང་རྒྱུ་མིན་པའི་འགྲེལ་བརྗོད་སོགས་གནང་སོང།