བོད་རིགས་ན་གཞོན་ཁག་ཅིག་ནས་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་གཙོས་གྲོས་ཚོགས་འཐུས་མི་ཁག་ཅིག་དང་མཇལ་མོལ་གྱིས་ཅི་སྟེ་རྒྱ་ནག་གཞུང་ནས་ཨ་རིའི་གཞུང་འབྲེལ་མི་སྣ་དང་གསར་འགོད་པ་སོགས་བོད་ནང་བསྐྱོད་རྒྱུར་བཀག་སྡོམ་བྱེད་བཞིན་ཡོད་ཚེ། ཨ་རིའི་གཞུང་གི་ངོས་ནས་འབྲེལ་ཡོད་རྒྱ་རིགས་ཚོ་ལའང་དེ་མཚུངས་སུ་ཨ་རིའི་ནང་བསྐྱོད་རྒྱུར་བཀག་སྡོམ་བྱེད་དགོས་པའི་རེ་འདུན་བཏོན་
གནང་འདུག
ཨ་རིའི་རྒྱལ་ས་ལྦ་ཤིང་ཊོན་ཌི་སིར་ཟླ་བ་འདིའི་ཚེས་ ༤ ནས་དབུ་འཛུགས་ཀྱིས་ཁ་སང་བར་ཁྱོན་གཟའ་འཁོར་གཅིག་གི་རིང་བོད་རིགས་ན་གཞོན་གྱི་འགོ་ཁྲིད་ཟབ་སྦྱོང་ཞིག་ཚོགས་འདུག་པ་དང་། ཟབ་སྦྱོང་དེའི་ཁྲོད་བཀའ་བློན་ཁྲི་ཟུར་བཀྲིས་མཐོང་བསྟན་འཛིན་རྣམ་རྒྱལ་མཆོག་གིས་གཙོས་པའི་ལྟེ་གནས་ཁང་དེའི་གཙོ་འཛིན་སྐུ་ཞབས་ Matteo Mecacci ལགས་དང་འགན་འཛིན་ལྷན་ཚོགས་ཀྱི་གཙོ་འཛིན་བཅས་ཀྱིས་ཨ་རིའི་ཆབ་སྲིད་ཀྱི་འགྲོ་ལུགས་དང་ཕྱི་འབྲེལ་སྲིད་བྱུས་གཙོས་པའི། མ་འོངས་འགོ་ཁྲིད་གནང་ཕྱོགས་དང་དེ་བཞིན་བོད་དོན་ཞུ་གཏུག་བྱེད་ཕྱོགས་སོགས་ཀྱི་ཐབས་བྱུས་འདྲ་མིན་སྐོར་ཟབ་འཁྲིད་གནང་འདུག ལྷག་དོན་ཁོང་རྣམས་ནས་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་དང་གྲོས་ཚོགས་འཐུས་མི་བཅས་དང་མཇལ་འཕྲད་ཞུས་ཡོད་འདུག
ཟབ་སྦྱོང་གོ་སྒྲིག་གནང་མཁན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་
སུ་བཅར་འདྲི་ཞུས་པར་ཁོང་གིས་ལྟེ་གནས་ཁང་དེས་ལོ་ལྟར་ཨ་རིའི་མཐོ་སློབ་ཁག་གི་བོད་རིགས་གཞོན་སྐྱེས་རྣམས་ལ་ཟབ་སྦྱོང་དེ་འདྲ་ཞིག་གོ་སྒྲིག་གནང་དོན་གང་ཡིན་བཅས་ཀྱི་ཐད་ལ་ངོ་སྤྲོད་གནང་པ་དང་འབྲེལ། སློབ་མ་ཚོའི་ངོས་ནས་ཨ་རིའི་འཛིན་སྐྱོང་དང་གྲོས་ཚོགས་ཀྱི་འགྲོ་ལུགས། དེ་བཞིན་བོད་ཕྱི་ནང་གཉིས་ཀྱི་གནས་སྟངས་སོགས་རྒྱུས་ལོན་གཏིང་ཟབ་ཡོང་ཆེད་དོ་དབྱིངས་ཆེན་པོ་གནང་གི་ཡོད་པ་གསུངས་སོང་།
རྩ་བའི་རྒྱལ་སྤྱིའི་བོད་དོན་ལས་འགུལ་ཁང་ནས་ལོ་ལྟར་གོ་སྒྲིག་ཞུས་བཞིན་པའི་བོད་མི་ན་གཞོན་འགོ་ཁྲིད་ཟབ་སྦྱོང་དེ་ ཐོག་མ་ཕྱི་ལོ་ ༢༠༠༡ ནས་གནང་འགོ་བཙུགས་པ་དང་། ད་ལན་དེ་ཐེངས་དགུ་པ་དེ་ཡིན་འདུག་པ་མ་ཟད། ཐེངས་འདིར་ཟབ་སྦྱོང་ཐོག་ཨ་རི་ནིའུ་ཡོག་གྲོང་ཁྱེར་དང་ Georgia དེ་བཞིན་ Massachussetts གཞན་ཡང་ Arizona བཅས་ཨ་རིའི་མངའ་སྡེ་འདྲ་མིན་བདུན་ནས་ཁྱོན་བོད་རིགས་ན་གཞོན་ ༡༡ མཉམ་ཞུགས་གནང་འདུག
