བཞུགས་སྒར་རྡ་ས་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་ཀྱི་དམངས་ཁྲོད་དུ་དར་བའི་ནད་བཅོས་དང་སྲོལ་རྒྱུན་རིག་གནས་ཀྱི་རིན་ཐང་གླེང་བ་ཞེ
ས་པའི་བརྗོད་གཞིའི་ཐོག་བོད་རིག་པའི་བགྲོ་གླེང་ཐེངས་ ༡༠ དབུ་འཛུགས་གནང་ཡོད་པ་རེད།
དེ་རིང་ཟླ་ ༨ ཚེས་ ༡༦ ཉིན་གྱི་སྔ་དྲོ་ཚོུད་ ༩།༠༠ སྟེང་རྡ་ས་ཉེ་འདབས་སུ་རྟེན་གཞི་བྱས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་མའི་གཞོན་ནུ་རུ་ཁག་གིས་གོ་སྒྲིག་འོག་སྐུ་མགྲོན་གཙོ་བོ་བཀའ་ཟུར་ཀིརྟི་རིན་པོ་ཆེ་མཆོག་གིས་གཙོས། དམིགས་བསལ་སྐུ་མགྲོན་སྨན་རྩིས་ཁང་གི་འགན་འཛིན་བཀྲ་ཤིེས་ཚེ་རིང་ལགས། ཕྱོགས་མཐའ་ཁག་ནས་ཕེབས་བའི་བགྲོ་གླེང་བ་རྣམ་པ། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་དང་མཐོ་སློབ་དེའི་དགེ་ལས་སློབ་གཉེར་བ་བཅས་ཁྱོན་མི་གྲངས་ ༩༠ ལྷག་ཚང་འཛོམས་ཀྱིས་བོད་རིག་པའི་བགྲོ་གླེང་ཐེངས་ ༡༠ དབུ་འཛུགས་གནང་སོང་།
སྐབས་དེར་སྐུ་མགྲོན་གཙོ་བོ་ཀིརྟི་རིན་པོ་ཆེ་མཆོག་གིས་ད་རེས་ཁོང་དབུ་འབྱེད་ཀྱི་མཛད་སྒོའི་ཐོག་ཕེབས་དོན་གཙོ་བོ་ནི་ད་བར་ས་རཱ་གཞོན་ནུའི་རུ་ཁག་གིས་ཤེས་ཡོན་དང་བོད་མིའི་རིག་གཞུང་དང་འབྲེལ་བའི་ལས་འགུལ་སྤེལ་བར་རྒྱབ་སྐྱོར་ཆེད་ཡིན་ཅེས་གསུངས་པ་མ་ཟད། ས་རཱ་མཐོ་རིམ་སློབ་གཉེར་ཁང་གི་སློབ་མ་ཚོ་ནི་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་སློབ་གཉེར་གཙོ་བོ་གནང་མཁན་ཞིག་ཡིན་སྟབས། དེ་མི་ཉམས་རྒྱུན་འཛིན་
བྱ་བར་བོད་ཀྱི་སྐད་ཡིག་དང་ལྷན་བོད་ཀྱི་རིག་གཞུང་དང་གོམས་གཤིས་བཟུང་སྦྲེལ་གྱི་སློབ་སྦྱོང་བྱ་དགོས་པ་ལས་བོད་ཀྱི་སྐད་ཡིག་དང་ཤེས་ཡོན་སྦྱོང་བ་ཁོ་ན་ཙམ་གྱིས་བོད་ཀྱི་རིག་གཞུང་མི་ཉམས་རྒྱུན་འཛིན་གནང་ཐུབ་ཀྱི་མ་རེད་ཅེས་གསུངས་སོང་།
ད་དུང་ཁོང་གིས་དགེ་ལས་སློབ་མ་ཚོར་ཁོང་གི་སྐུ་ཚེ་ཧྲིལ་པོ་འདིའི་ནང་མྱོང་བ་ཁག་གསུངས་པ་དང་འབྲེལ། སློབ་མ་ཚོའི་ངོས་ནས་རང་ཉིད་ཀྱི་ལྟོ་གོས་གཏམ་གསུམ་ཁོ་ནའི་ཆེད་མ་ཡིན་པར་༸གོང་ས་མཆོག་གི་བཀའ་དགོངས་དབུ་ལ་བཞག་སྟེ་བོད་མི་རིགས་དང་སྤྱི་དོན་གཙོ་བཟུང་གིས་སློབ་གཉེར་དང་ལས་དོན་སོགས་གཉེར་བ་ཡིན་ཚེ་དེས་མི་ཚེ་དོན་དང་ལྡན་པ་ཞིག་ཡོང་ངེས་རེད་ཅེས་གསུངས་སོང།
དམིགས་བསལ་སྐུ་མགྲོན་སྨན་རྩིས་ཁང་གི་འགན་འཛིན་བཀྲ་ཤིེས་ཚེ་རིང་ལགས་ཀྱིས་ད་སྐབས་ཕྱི་ལུགས་སྨན་དང་ཚན་རིག་དར་བ་བཅས་ཀྱི་རྐྱེན་པས་བོད་པའི་དམངས་ཁྲོད་དང་སྲོལ་རྒྱུན་གྱི་ནད་བཅོས་རིགས་མང་པོ་ཞིག་མེད་པ་ཆགས་འགྲོ་གྱི་ཡོད་པ་དང་། ལྷག་པར་དུ་མི་རབས་གཞོན་པའི་ཁྲོད་སྲོལ་རྒྱུན་གྱི་སྨན་བཅོས་ལག་ལེན་རིགས་སློབ་གཉེར་བྱེད་མཁན
་ཉུང་རུ་འགྲོ་བཞིན་ཡོད་སྐོར་སོགས་གསུངས་ཡོད་པ་རེད།
འདི་ག་རླུང་འཕྲིན་ཁང་གི་གསར་འགོད་པས་ས་རཱ་གཞོན་ནུ་རུ་ཁག་གི་ཚོགས་གཙོ་སྒྲོལ་མ་སྐྱིད་ལགས་སུ་བགྲོ་གླེང་གི་ལས་རིམ་གོ་སྒྲིག་ཞུ་ཕྱོགས་དང་འབྲེལ་བའི་བཅར་འདྲི་ཁག་གཅིག་ཞུས་པར་ཁོང་གིས་འདི་ལོ་བོད་རིག་པའི་བགྲོ་གླེང་ཐོག་བོད་ཀྱི་དམངས་ཁྲོད་དུ་དར་བའི་ནད་བཅོས་དང་སྲོལ་རྒྱུན་རིག་གནས་ཀྱི་རིན་ཐང་གླེང་བ་ཞེས་པའི་བརྗོད་གཞི་དེ་ལྟར་བདམས་དོན་ནི་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ལྷ་ས་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༠ འཁོར་བའི་དུས་ཚིགས་དང་བསྟུན་གོ་སྒྲིག་ཞུས་པ་ཡིན་ཅེས་གསུངས་པ་མ་ཟད། ལྷག་དོན་བགྲོ་གླེང་གི་ལས་རིམ་དེའི་དགོས་དམིགས་ལྟར། དཔྱད་གཏམ་པ་རྣམ་པའི་དཔྱད་བརྗོད་ཁག་ཡིག་ཐོག་ནས་འདོན་སྤེལ་གྱིས་མི་རབས་གསར་པ་ཚོར་དེ་སྔའི་བོད་ཀྱི་དམངས་ཁྲོད་སྲོལ་རྒྱུན་རིག་གནས་ཁག་གི་གོ་རྟོགས་རྒྱ་གང་ཆེ་དང་རྒྱུས་སྤྲོད་བྱ་རྒྱུ་ཡིན་ཅེས་གསུངས་ཀྱི་འདུག
གཞི་རྩའི་བགྲོ་གླེང་གི་དུས་ཡུན་ཉིན་གྲངས་གསུམ་རིང་ཆེད་ཕེབས་གནང་པའི་ནང་མཁས་དབང་དང་ཞིབ་འཇུག་པ། དེ་བཞིན་ཆེད་ལས་མི་སྣ་ཚོས་བོད་ཀྱི་དམངས་ཁྲོད་དུ་དར་བའི་ནད་བཅོས་དང་། གསོ་རིག་སྨན་གཞུང་གི་འཕེལ་རིམ། སྲོལ་རྒྱུན་གྱི་ཕྱུགས་རིགས་ནད་བཅོས། བོད་ཀྱི་རོལ་དབྱངས་སྐོར། བོད་ཀྱི་ཟས་རིགས་ཐོན་ཁོངས་སྐོར་སོགས་སྲོལ་རྒྱུན་རིག་གནས་ཀྱི་བརྗོད་གཞི་འདྲ་མིན་ཐོག་གསུང་བཤད་དང་བགྲོ་གླེང་གནང་རྒྱུ་ཡིན་པ་རེད།
རྩ་བའི་བགྲོ་གླེང་དེ་དེ་རིང་ཚེས་ ༡༦ ཉིན་དབུ་འཛུགས་ཀྱིས་ཚེས་ ༡༨ བར་བཅས་ཉིན་གྲངས་གསུམ་རིང་ཚོགས་གནང་གི་འདུག་པ་དང་། བགྲོ་གླེང་དེའི་ཐོག་ལ་ལྡི་ལི་དང་སྦེང་ལོར། དགོན་སྡེ་ཁག་གི་སློབ་གཉེར་བ་བཅས་མང་དག་ཞིག་ཆེད་བཅར་ཞུས་འདུག
